Proverbios 12 - New Testament Psalms and Proverbs in Mixtec Magdalena Peñasco

¹ Ñayii jan‑ta'vi ja ka ndaka'an so'o ñayii ma naxe ko sa'a ko kuu i ma chi ñayii ndichi kúu i, kovaa ñayii saxiko ja ka ndaka'an so'o ñayii ma nuu i ma chi in ñayii so'o kúu i te ñatuu ndása'a i kuenda i ma.

² Ñayii jani vii jani va'a ini ma chi játna ini Su'si ma ja sukan kúu i ma, kovaa ñayii jani ini ndimaa ja u'vi sa'a i ma chi maa Su'si ma sa'a ja ndachunaa i ja sa'a i ma.

³ Vaa ñayii sa'a ja u'vi ma chi masu kuu konukuiñi va'a i, kovaa ñayii sa'a ja va'a ja ndaa ma chi ni'i yo'o va'a i te konukuiñi va'a i nuu Su'si ma te masu na in xtuu ña'a.

⁴ Te ña'a ñu'u kaji ñu'u va'a ini ma chi ja sa'a ja kúu ña ma te ní'i yii ña ma jayiñu'u, kovaa ña'a ñatuu ñu'u kaji ñu'u va'a ini ma chi sukan kúu kue'e kívi onde yiki ñayii ma sukan kúu ña nuu yii ña ma.

⁵ Ñayii jika ndaa nuu Su'si ma chi ndimaa ja ndaa ja ndija kúu ja jani ini i te ká'an i ma, kovaa ñayii sa'a ja u'vi ma chi ndimaa tnu'u xnda'vi tna'a kúu ja ká'an i ma.

⁶ Onde ndaka tnu'u ká'an i ma, ûni kuenda tnu'u ja ja'ni i ñayii ma kúu, kovaa ñayii ka iyo ndaa nuu Su'si ma chi ndimaa tnu'u vii tnu'u va'a ka ka'an i, te ja sukan ka kuu i ma chi chindee ña'a i ja jin kaku i nuu ja u'vi ma.

⁷ Vaa Su'si ma chi sa'a ya ja ñayii ka sa'a ja u'vi ma chi jin naa i ve'e ke'e i ma, kovaa ñayii ka sa'a ja va'a ja ndaa ma chi ni‑kani ni‑jika jin koteku i ji'in sa'ya tata i ma.

⁸ Ñayii ndichi ma chi naxe sa'a naxe kúu maa i ma, te sukan ka ka'an vii ka ka'an va'a ñayii ma ja kuu i ma, kovaa ñayii ñatuu va'a ini ma chi masu na in ká'an vii ká'an va'a ja kuu i chi su'va ka saxiko ña'a ñayii ma.

⁹ Ja va'a‑ka kúu in ñayii visi ka ka'an ndeva'a i ja kuu i ma kovaa ka iyo ñayii ka chindee ña'a nawa jiniñu'u i ma, sana tee jani ini ja maa de kúu‑ka ma te ni ja kaa de ma masu nawa neva'a de.

¹⁰ Ñayii sa'a ja va'a ja ndaa ma chi jito va'a i ndaka kiti neva'a i ma, kovaa ñayii sa'a ja u'vi ma chi masu va'a ini i chi sa'a ndeva'a i kiti neva'a i ma.

¹¹ Ñayii satniñu itu i ma chi ndimaa koo ja kaa ja ko'o i, kovaa ñayii kua'an vee‑ni kúu i ma chi ñatuu jáku'ni ini i nawa sa'a i ma.

¹² Ñayii kúneé kú‑uun ma chi ndíyo ini i ja ko kuu i sukan ka kuu ñayii ka sa'a ja u'vi ma, kovaa masu jini i nawa ndetu ña'a ja ndo'o i, kovaa ñayii sa'a ja va'a ja ndaa ma chi ni‑kani ni‑jika ndimaa ja va'a ko kuu ja ndani'i ndatna'a i.

¹³ Ñayii sa'a ja u'vi ma chi maa ja xnda'vi i ñayii ma nukun‑tuu maa i te ndando'o ndaneni i, kovaa ñayii ká'an ndimaa ja va'a ja ndaa ma chi vivii yanduu yandoso i nuu ndaka tnundo'o kenda ma.

¹⁴ Vaa maa maa o ndani'i ndatna'a nawa ká'an o ma xi nawa sa'a nawa kúu o ma ndeva'a‑ni nú ja va'a xi ja u'vi kúu.

¹⁵ Ñayii so'o xeen kaa ma chi ndaka ja sa'a i ma chi jani ini i ja ja va'a kúu, kovaa ñayii ndichi ma chi ndimaa kándija i ja ka ka'an so'o ñayii ma nuu i ma.

¹⁶ Ñayii so'o ma chi yachi‑ni káxtnu'u i ja ndákiti ini i, kovaa ñayii ndichi ma chi masu sánuu i nawa ka ka'an ndeva'a ñayii ma nuu i ma.

¹⁷ Ñayii ká'an ndaa ma chi ndáka'an ndaa i naxe iyo ma, kovaa ñayii tnu'u ma chi masu ndáka'an ndaa i naxe iyo ma su'va ndúku i naxe xnda'vi i ñayii ma.

¹⁸ Ka iyo ñayii ma chi tnu'u ka ka'an i ma‑ni, te ka sa'a i ja tna‑u'vi ini o vi'i‑ka sana ni xtnakue'e ña'a i, kovaa ñayii inundichi ma chi vivii ka ka'an i te ka ndataa i tnu'u kanu ini kuenda tnu'u ja in jatatna ni ji'i o te ni nduva'a o.

¹⁹ Ñayii ká'an ndaa ká'an ndija ma chi ni‑kani ni‑jika koo i, kovaa ñayii ká'an tnu'u ma chi nunuu‑ni koo i te naa i.

²⁰ Ñayii sa'a ja u'vi ma chi nanimaa tnu'u xnda'vi tna'a ma ñu'u ini anua i ma, kovaa ñayii ndí ini naxe koo mani i ji'in in‑ka ñayii ma chi nanimaa tnu'u sii ini iyo ini anua i ma.

²¹ Ñayii sa'a ja va'a ja ndaa ma chi ni‑in ja u'vi ndo'o i, kovaa ñayii sa'a ja u'vi ma chi nukoxtna'a nukoxtnii ja u'vi sa'a i ma ndani'i i.

²² Su'si Iya Tátnuni ma chi saxiko ya ñayii tnu'u ma, kovaa játna ini ya sukan ka sa'a ka kuu ñayii ka sa'a ja va'a ja ndaa ma.

²³ Ñayii ndichi ma chi masu nde savixi i maa i ndaka ja jini i ma, kovaa ñayii ndee ini ma chi ja ká'an i ma‑ni, te yachi‑ni ndatuu maa i ja ñatuu na tnu'u ndichi neva'a i.

²⁴ Ñayii ñu'u ini te satniñu i ma chi ko ni'i ko tna'a i te koo ñayii jin satniñu nuu i ma, kovaa ñayii kuxi ma chi masu ni'i nde i te in‑ka ñayii xi‑nuu ko satniñu i‑ni.

²⁵ Tnu'u ndí ini xeen ma chi sa'a i ja kúxii ini ñayii ma te ñatuu‑ka na tnu'u ndee tnu'u ndatnu i iyo, kovaa nuna kenda in ñayii ká'an vii ká'an va'a ma chi sani te sa'a i ja ndúsii ini ñayii ma.

²⁶ Ñayii sa'a ja va'a ja ndaa ma chi kuu skaka i in‑ka ñayii ma ichi va'a ma, kovaa ñayii sa'a ja u'vi ma chi kuan koo i ichi jin skenaa i maa i ma.

²⁷ Ñayii kuxi ma chi onde kiti ni ja'ni i ma masu no'o i ji'in ti ve'e i ma ja jin kaa i kuñu ti ma, kovaa ñayii ñu'u ini ma chi jini i ja ja va'a xeen kúu ndaka ja ni'i tna'a i ma.

²⁸ Ja ko sa'a o ja va'a ja ndaa ma chi kua'an o ichi nuu koteku o ni‑kani ni‑jika, te masu kûu o te skenaa o maa o.