Proverbios 11 - New Testament Psalms and Proverbs in Mixtec Magdalena Peñasco

¹ Ñayii masu chíkua'a ndaa nawa xíko i ma chi ñatuu kúni sii Su'si ma nuu i, kovaa ñayii chíkua'a ndaa ndaa ma chi játna ini ya ja sa'a i ma.

² Nuna kenda ja kani ini ñayii ma ja maa i kúu‑ka ma chi ja ndetu ña'a kúu ja ndatna'a i ja kayu'u ja kan‑nuu, kovaa ñayii iyo ji'in tnu'u ndichi ma chi masu nde jani ini i ja maa i kúu‑ka sana in‑ka ñayii ma.

³ Chukan kúu ja ñayii ni‑yu'u ni‑ini i sa'a i ja va'a ja ndaa ma chi maa ja va'a sa'a i ma skaka ña'a ichi va'a ma, kovaa ñayii sa'a ja u'vi ma te jiso kuechi i nuu Su'si ma chi maa ja u'vi sa'a i ma xnaa ña'a.

⁴ Vaa kivi ndakan Su'si ma kuenda ma chi masu nawa chindee ña'a ja ni'i tna'a i ma ja kaku i, kovaa ñayii sa'a ja va'a ja ndaa ma chi maa ja sa'a ja kúu i ma sa'a ja kaku i te ma skenaa i maa i.

⁵ Maa ja va'a ja ndaa sa'a ñayii núkuiñi va'a nuu Su'si ma sa'a ja nune nune‑ni ichi kua'an i ma, kovaa ñayii sa'a ja u'vi ma, maa ja u'vi sa'a i ma sa'a ja kotuu i.

⁶ Ñayii núkuiñi va'a nuu Su'si ma chi maa ja va'a ja ndaa sa'a i ma chindee ña'a te kaku i nuu tnundo'o ma, kovaa ñayii ka sa'a ja u'vi ma te ka jiso kuechi i nuu Su'si ma chi maa ja u'vi ka sa'a i ma nukun‑tuu ña'a te ma jin kaku i nuu tnundo'o ma.

⁷ Chukan kúu ja kivi kûu ñayii sa'a ja u'vi ma, te yukan‑ni, te ni ndi'i ja ni yo kukanu ini i ma, te sukan‑ni, te ni naa maa i ji'in ndaka ja ni yo ñu'u ini i ma.

⁸ Ñayii sa'a ja va'a ja ndaa ma chi kaku i nuu tnundo'o tnuneni kenda ma, kovaa ñayii sa'a ja u'vi ma chi ndando'o ndaneni maa i ja u'vi sa'a i ma.

⁹ Ñayii sa'a tnu'u ja vivii ká'an i ma kovaa ñii yu'u i ma‑ni iyo tnu'u ká'an i ma, chi ndimaa ja sa'a u'vi i in‑ka ñayii ma kúu. Kovaa ñayii sa'a ja va'a ja ndaa ma chi tnu'u ndichi ma chíndee ña'a te ndimaa kée vii kée va'a i.

¹⁰ Ja sukan ka kendoo va'a ndaka ja ka sa'a ka kuu ñayii ka sa'a ja va'a ja ndaa ma chi ka kuu sii ini ndaka ñayii ñuu ma. te nú ni ji'i ñayii ka sa'a ja u'vi ma chi ûni ka sa'a ñayii ma in viko ja ka iyo sii ini xeen i.

¹¹ Ja vii ja va'a ka sa'a ñayii ka iyo ndaa nuu Su'si ma kúu ja ve kuva'a‑ka ñuu nuu ka iyo i ma, kovaa ja u'vi ka ka'an ñayii ka sa'a ja u'vi ma chi su'va jana i tna'a ja va'a ka kuni ñayii ma ja jin sa'a i ma.

¹² Ñayii ñatuu ndása'a kuenda sukan kúni Su'si ma chi ká'an i tnu'u in‑ka ñayii ma, vaa ñatuu jamani i in‑ka ñayii ma kúu, kovaa ñayii kándija te sa'a i sukan kúni Su'si ma chi jasi yu'u i te ñatuu ká'an i tnu'u in‑ka ñayii ma.

¹³ Ñayii ndimaa ndúku i cuentu ma chi kua'an i te ndáxtuu i nawa ni ka ndatnu'u yu'u ñayii ma, kovaa ñayii núkuiñi va'a nuu Su'si ma chi masu ndáka'an kuiti i nawa ni jiniso'o i ja iyo ja maa i‑ni jin kona'a ma.

¹⁴ Nú ñatuu na tnu'u ndichi Su'si ma iyo nuu tee tátnuni in ñuu ma chi nuna kenda in‑ka ñuu ja jin kanaa i ma chi jin skenaa de, kovaa ñuu nuu ka iyo kua'a ñayii ndichi ma te ka ketna'a ini i ma chi masu na in kundee nuu i.

¹⁵ Ndo'o xeen maa ñayii wa'a tnu'u te kúu i nuu ñayii masu ndachunaa nawa tavi i ma, kovaa ñayii masu kachi ja ko kuu i nuu in‑ka ñayii ma chi koo sii ini‑ka i.

¹⁶ Te ña'a va'a ini ma, te chíndee ña ñayii ka jiniñu'u ma chi ka ka'an vii ka ka'an va'a i ja kuu ña, kovaa tee visi iyo tnu'u ndee tnu'u ndatnu de te satniñu de ma chi yika‑ni ja ni'i de kúu xu'un ma‑ni.

¹⁷ Ñayii va'a ini te nda'vi ini i ma chi ja va'a maa i kúu nuu Su'si ma, kovaa ñayii ndee kaa ini i ma chi sa'a u'vi i maa i.

¹⁸ Ñayii sa'a ja u'vi ma chi visi ní'i tna'a maa i ma, kovaa yika‑ni ja xnee nuu‑ni ña'a ja ní'i i ma. Te ñayii sa'a ja va'a ja ndaa ma chi ma yanduu ja ni'i i ja skuta'vi ña'a Su'si ma.

¹⁹ Vaa ja sa'a o ja va'a ja ndaa ma chi sa'a i ja koteku o ni‑kani ni‑jika, kovaa ja kondikin o ja sa'a o ja u'vi ma chi ichi nuu skenaa o maa o ma kúu.

²⁰ Vaa Su'si ma chi saxiko ya ñayii ndimaa ja u'vi ka ñu'u ini i ja jin sa'a i ma, kovaa iyo sii ini xeen ya nuu ñayii ka jika ndaa nuu ya ma.

²¹ Vaa ñayii ka sa'a ja u'vi ma chi masu yanduu ja jin ndando'o jin ndaneni maa i ja ka sa'a ka kuu i ma, kovaa ñayii ka sa'a ja va'a ja ndaa ma chi vivii jin kaku i nuu tnundo'o ma ji'in sa'ya tata i ma.

²² Te masu nde jiniñu'u ja vivii kaa ña'a ma, nú kunee ku‑uun ña te ñatuu ndása'a ña kuenda naxe ko kuu ña ma, chi kuenda tnu'u ja in oro ni ka chinee i kutu chikini ma te sa'a ndeva'a ti ma, sukan‑ni sa'a ña maa ña.

²³ Ja iyo ja jin ni'i ñayii ka sa'a ja va'a ja ndaa ma kúu ja jin koo va'a i, te ja ndetu ña'a ja jin ni'i ñayii ka sa'a ja u'vi ma kúu ja ndakiti ini Su'si ma nuu i.

²⁴ Ka iyo ñayii ja sii ini ka wa'a i nawa ka neva'a i ma ñayii ka jiniñu'u ma, te sa'a Su'si ma ja kua'a‑ka ka ndani'i i, kovaa ka iyo ñayii ja inuxii xeen ini i ja ni masu ka ndi ini i ja jin chindee i ñayii ka jiniñu'u ma sukan iyo ja jin sa'a i ma, te su'va ka ndunda'vi‑ka maa i ja sukan ka sa'a i ma.

²⁵ Vaa ñayii sii ini chíndee i in‑ka ñayii ma chi ndimaa ko ni'i ko tna'a i, te ñayii ndimaa chíndee i in‑ka ñayii ma chi koo tna ñayii ndachindee ña'a te ñatuu nawa ka'ni ña'a i ja jin ko kuu i.

²⁶ Ñayii ndiyo ini ma chi xtutu i ndaka ja kaa o ma, sukan‑va'a kenda kivi kumani ma te xiko ya'vi‑ka i, te ñayii ñuu ma chi jin ka'an u'vi i ja kuu i, kovaa ñayii nda'vi ini ma chi masu ndí ini i ja kuu maa i te xíko i ja kaa o ma, te ja sukan sa'a i ma chi jin ka'an vii jin ka'an va'a ñayii ma ja kuu i ma.

²⁷ Ñayii ndí ini ja sa'a i ja va'a ma chi jin ka'an vii jin ka'an va'a ñayii ma ja kuu i ma te koo va'a i, kovaa ñayii jatanuu ja sa'a i ja u'vi ma chi ja ndani'i i kúu ja u'vi ma.

²⁸ Te ñayii kúkanu ini nuu ja ní'i tna'a i ma chi ndo'o i sukan kúu nda'a yutnu ma ja nú ni yichi ma chi ii‑ii‑ni jinkava i ma, kovaa ñayii sa'a ja va'a ja ndaa ma chi sukan kúu yutnu vivii ve ndukuii tnu ma ja ve nana nda'a tnu ma, sukan kúu i.

²⁹ Ñayii ñatuu ndí ini ja jin koo mani i ji'in ñayii ve'e i ma chi ja ndetu ña'a kúu ja ndoo maa ndoo in‑nka i‑ni, te ñayii ñatuu kándija ja ka ndaka'an so'o ñayii ma nuu i naxe ko sa'a ko kuu i sukan‑va'a koo va'a i ma, chi ja ndetu ña'a kúu ja ñayii kunukuechi‑nka‑ni ko kuu i nuu ñayii ndichi ma, vaa ñatuu ni jani va'a ini maa i ma.

³⁰ Ñayii sa'a ja va'a ja ndaa ma chi sa'a i ja jin koteku ñayii ma, vaa ñayii ndichi kúu i, te ja sa'a i ma sa'a ja jin kandija ñayii ma Su'si ma te jin ndani'i ta'vi i.

³¹ Ja ndaa ndija kúu ja ñayii ndimaa sa'a ja va'a ja ndaa ma chi ko ni'i ko tna'a i nani téku i iyo i ñuu ñayivi a, kovaa ñayii ndimaa ja u'vi sa'a i ma chi kua'a xeen ja u'vi ndani'i ndatna'a maa i.