Proverbios 10 - New Testament Psalms and Proverbs in Mixtec Magdalena Peñasco

Tnu'u ndichi ni ka'an Salomón ma ja kuu ñayii sa'a ja va'a ma ji'in ñayii sa'a ja u'vi ma

¹ Tnu'u ndichi ni ka'an Salomón ma. Suchi sa'a sukan ká'an tnu'u ndichi Su'si ma chi sa'a i ja kúsii ini yuva i ma, kovaa suchi so'o xeen kaa ma chi sa'a i ja kúxii ini si'i i ma.

² Nú nanimaa ja u'vi ma sa'a ñayii ma chi masu nawa chíndee ña'a i, kovaa nú nanimaa ja va'a ja ndaa ma na ko sa'a ñayii ma chi kaku i te ma skenaa i maa i.

³ Vaa Su'si ma chi masu kua'a ya tnu'u ja ko kokon ko yichi ñayii sa'a ja va'a ja ndaa ma, kovaa ñayii ka sa'a nanimaa ja u'vi ma chi kua'a Su'si ma tnu'u, te jin ndando'o jin ndaneni maa i ja u'vi ka sa'a i ma.

⁴ Ñayii kuxi te ñatuu ndí ini i ja satniñu i ma chi ko kunda'vi ko kukee i, kovaa ñayii ñu'u ini ma te satniñu i ma chi ko ni'i ko tna'a i.

⁵ Ñayii ñu'u kaji ini ma chi satniñu i itu i ma, te na'a i na tiempu ndáxtutu i itu i ma, kovaa suchi ká'an uun ká'an su'va‑ni ini ma te ñatuu ndáxtutu i itu i ma chi ja kan‑nuu wa'a i yuva i ma.

⁶ Iyo ja vii ja va'a kuta'vi ñayii sa'a ja va'a ja ndaa ma, kovaa ñayii sa'a ja u'vi ma chi ndando'o ndatna'a xeen maa i ja u'vi sa'a i ma.

⁷ Ñayii ni yo sa'a ja va'a ma chi ka ndakune'e ña'a ñayii ma, te ka ka'an vii ka ka'an va'a i ja sukan ni yo sa'a i ja va'a ma, kovaa ñayii ni yo sa'a ja u'vi ma chi masu na in ndakune'e‑ka ña'a te ni naa maa cuentu i ma‑ni.

⁸ Ñayii iyo tnu'u ndichi ini anua i ma chi jan‑ta'vi i te kándija i tnu'u ni tatnuni Su'si ma, kovaa ñayii ndee ini ma te ndimaa ndákone'e xiko i ma chi skenaa i maa i.

⁹ Ñayii jika ndaa jika ndija ma chi masu nawa yu'u i ndenu kua'an ndenu vee i vaa ja va'a sa'a i ma, kovaa ñayii sa'a ja u'vi ma chi ndí ini xeen i nasa yukan te ndatuu ja u'vi sa'a i ma.

¹⁰ Ñayii kini xeen nde'ya i ja kúni u'vi i nuu in‑ka ñayii ma chi sa'a i ja kúxii ini o, te ñayii ndee xeen yu'u i ma chi ja sukan kúu i ma chi xndo'o xneni ña'a Su'si ma.

¹¹ Kovaa ñayii sa'a ja va'a ja ndaa ma chi sa'a i ja kúu sii ini xeen o te ndáni'i o tnu'u kanu ini, kovaa ñayii sa'a ja u'vi ma chi ndando'o ndatna'a xeen maa i ja u'vi sa'a i ma.

¹² Ñayii chú'un ini nawa ni sa'a ña'a in‑ka ñayii ma te suu‑ni suu‑ni ndákune'e i ma chi ñatuu kúu koo mani i, kovaa ñayii kútoo tna'a ndija ma chi kánda i nekanu ini i nawa ni sa'a ña'a maa in‑ka ñayii ma.

¹³ Ñayii jini tnu'u ndichi ma chi nanimaa tnu'u ndichi ma ká'an i, kovaa ñayii ñatuu ndása'a kuenda naxe ko sa'a ko kuu i ja va'a ma, chi ja kuta'vi i ko kuu yutnu xii ma te ndo'o neni maa i.

¹⁴ Ñayii ndichi ma chi ndása'a i kuenda te káji kaji‑ni i tnu'u kuatniñu ma ká'an i, kovaa ñayii ndee ini ma chi masu káji maa i tnu'u ká'an i.

¹⁵ Ñayii ndichi ma chi ja ni jani va'a ini i ma te ní'i tna'a i te iyo tu'va i te kúu yanduu i nuu tnundo'o kénda ma, kovaa ñayii kúnda'vi kúkee ma chi ja ñatuu ni jani va'a ini i kúu, te kundee maa tnundo'o ma nuu i.

¹⁶ Ñayii ndichi ma te sa'a i ja va'a ja ndaa ma chi koteku i ni‑kani ni‑jika, kovaa ñayii sa'a ja u'vi ma chi jiso kuechi i nuu Su'si o ma.

¹⁷ Ñayii sa'a sukan ká'an káchi tnu'u ndichi ma chi kua'an i ichi nuu koteku i ma, kovaa ñayii ñatuu niniso'o ja ká'an káchi tnu'u ndichi ma chi kua'an i ichi nuu skenaa i maa i.

¹⁸ Ñayii sa'a tnu'u ja kútoo ña'a i ma kovaa kíti ini i nuu o ma chi ñii yu'u i ma‑ni yoxtnee tnu'u ká'an i ma. Te ñayii skanduu yu'u ma chi ñayii so'o ñayii ndee ini kúu i.

¹⁹ Ñayii ñatuu ndása'a kuenda te ndeva'a‑ni tnu'u ká'an i ma chi iyo yika i ja ka'an i in tnu'u ja masu kuatniñu te kuiso kuechi i, kovaa ñayii ndichi ma chi ndása'a i kuenda na tnu'u ká'an i ma.

²⁰ Ñayii sa'a ja va'a ja ndaa ma chi sukan kúu plata ni nduu nanimaa ma, sukan ka kuu tnu'u ká'an i ma, kovaa ja ñu'u ini anua ñayii sa'a ja u'vi ma chi masu nde jiniñu'u.

²¹ Ja ka ka'an ñayii ka sa'a ja va'a ja ndaa ma chi skaka ichi i kua'a ñayii ichi va'a ma, kovaa ñayii so'o ñayii ndee ini ma chi ka skenaa i maa i ja ñatuu ka jaku'ni ini i ja jin sa'a i ja va'a ma.

²² Ja vii ja va'a skuta'vi ña'a Su'si Iya Tátnuni ma chi sa'a i ja ko ni'i ko tna'a o, te sa'a Su'si ma ja masu na tnu'u xii ini kenda nuu o.

²³ Ñayii so'o ñayii ndee ini ma chi ja sa'a i ja u'vi ma chi kútachi xeen i ja sukan sa'a i ma, kovaa ñayii ndichi ma chi ndátatu‑ka i ja sukan jáku'ni ini i te sa'a kúu i sukan ká'an tnu'u ndichi ma.

²⁴ Tna'a ja yu'u ñayii sa'a ja u'vi ma ja ndo'o i ma, su'va chukan kenda yachi‑ka nuu i ma, kovaa ñayii sa'a ja va'a ja ndaa ma chi ja ñu'u ini i ja ni'i i ma chi kua'a Su'si ma.

²⁵ Ñayii sa'a ja u'vi ma chi sukan‑ni yá'a tikachiyaa xeen ma sukan‑ni kúu i, vaa nunuu‑ni iyo i te náa i, kovaa ñayii sa'a ja va'a ja ndaa ma chi ni‑kani ni‑jika koteku i.

²⁶ Ñayii kuxi ma chi sukan sa'a ja iya ma nuu nu'u ñayii ma xi sukan sa'a ñu'ma ma nduchinuu ñayii ma, sukan kúu i, vaa xtna'a i ñayii xi‑nuu satniñu i ma.

²⁷ Ñayii yu'u Su'si ma te ñatuu sa'a‑ka i ja u'vi ma chi kani kani koteku i, kovaa ñayii sa'a ja u'vi ma chi ndate'nde sava sukan iyo ja koteku i ma.

²⁸ Ñayii ka sa'a ja va'a ja ndaa ma chi jin ni'i sii ini i ja ka ndetu i ma, kovaa ñayii ka sa'a ja u'vi ma chi visi iyo ja ka ndetu i ja jin ni'i i ma, kovaa masu jin ni'i i, vaa sani te jin naa.

²⁹ Ñayii ka jika ichi Su'si ma chi ko koto va'a ya i, kovaa ñayii ka jini ja va'a ma te ñatuu ka sa'a i ma chi jin skenaa i maa i.

³⁰ Ñayii sa'a ja va'a ja ndaa ma chi konukuiñi va'a i nuu Su'si ma te masu nawa kundee ja kotuu i, kovaa ñayii ka sa'a ja u'vi ma chi masu kuu jin konukuiñi va'a i nuu Su'si ma ñuu ñayivi a.

³¹ Ndimaa tnu'u ndichi ká'an káchi ñayii sa'a ja va'a ja ndaa ma, kovaa ja ká'an ñayii so'o ñayii ndee ini ma masu nde kuatniñu o.

³² Vaa ja ká'an ñayii sa'a ja u'vi ma chi nanimaa tnu'u kini tnu'u ndeva'a kúu, te masu játna ini o, kovaa ja ká'an ñayii sa'a ja va'a ja ndaa ma chi játna ini o.