Proverbios 1 - New Testament Psalms and Proverbs in Mixtec Magdalena Peñasco

Nava'a ni ka tee de tnu'u ndichi Su'si ma

¹ Cha'a ka kuu tnu'u ndichi ni ka'an tee kúu Salomón, sa'ya tata David, tee ni yo kuu rey ñuu Israel ma.

² Vaa ni jani ini de ja ka'an de tnu'u ndichi ma, sukan‑va'a chindee ña'a i ja jaku'ni ini o te ndasa'a o kuenda na tnu'u kuatniñu o ma,

³ te kutu'va o, te ni'i ini o naxe ko sa'a ko kuu o, te ko sa'a o ja va'a ja ndaa ma, te ko kaka va'a ko kaka ndaa o nuu Su'si ma; te másu ko ski'in o maa o ichi Su'si ma.

⁴ Te tnu'u ndichi ya'a chi sa'a i ja suchi jaa ñatuu jin ni'i ini‑ka i naxe jin ko sa'a jin ko kuu i ma ja jin jakun‑tnuni ini i, te jin ndasa'a i kuenda naxe jin ko sa'a jin ko kuu tna i ja va'a ma ne'un ñuu ñayivi a.

⁵ Te suni ñayii ndichi ma chi ñukuun‑ka niniso'o i tnu'u ndichi ya'a, te ja sukan sa'a i ma chi kundichi xeen‑ka i te kutu'va‑ka i naxe ko kuu i nuu Su'si ma,

⁶ vaa sukan, te jaku'ni‑ka ini i tnu'u ndichi ka ka'an ñayii ndichi ma tnu'u ka ka'an vijin i ma sukan‑va'a ndasa'a maa o kuenda ma.

⁷ Vaa ja ko kuu o in ñayii ndichi ma chi xinañu'u kuiti ja koyu'u o Su'si ma, nasa ko sa'a o in ja masu jatna ini ya ma, te sukan, te ko kuu o in ñayii ndichi ndija, kovaa ñayii iyo neé janitnuni i ma chi ñatuu káchi i jaku'ni ini i sukan kúni Su'si ma, te saxiko i tnu'u ndichi ká'an ya ma.

⁸ Sa'ya maa ri, koniniso'o va'a ja káxtnu'u yuva ro ma, te máko saxiko ro ndaka ja ká'an káchi si'i ro ma; su'va kandija ro ja ko sa'a ro sukan ka ka'an de ma.

⁹ Vaa ja vii ja va'a ko kuu nuu ro nde kua'an nde vee ro, sukan vii kaa in ja yoxtnee xini rey ma, xi sukan vivii na'a siki ñu'u sukun ña'a kuu reina ma.

¹⁰ Sa'ya maa ri, nú ñayii ka sa'a ja u'vi ma, ka kuni i ja jin xnda'vi ña'a i ja sa'a ro sukan ka kuni i ma, ¡máko kua'a ro tnu'u ja ko sa'a ro sukan ka sa'a i ma!

¹¹ Nú ñayii yukan, te ka ka'an i: “Ne'e, te jín koo o te jín ka'ni o ñayii nda'vi ñatuu jini naxe kaku i ma; visi ñatuu nawa ka sa'a ña'a i ma.

¹² Te ûni jín kokon teku o i sukan sa'a ñu'ú ma ora chu'u o in ndiyi ma ja sukan ni kêe maa i kua'an i nuu nee ma”, kovaa máko kandija ro ja ka ka'an i ma.

¹³ Te nú ka ka'an tna i: “Jín koo o jín sakui'na o nawa ka neva'a ñayii ma te jín tnaa va'a o ve'e o a, sukan‑va'a jin kuxiku o,

¹⁴ te nú nawa ni ka ni'i o ma, te jin ko kuu kuenda ndaka o”, kovaa máko kandija ro ja ko sa'a ro sukan ka ka'an i ma.

¹⁵ Sa'ya maa ri: ¡má kondikin ro ichi ka jika i ma!, su'va kaka jiyo ichi kuan koo i ma,

¹⁶ vaa ichi kuan koo i ma masu ichi va'a kúu, vaa ka jinu i kuan koo i ichi nuu kuu jin ka'ni i ñayii ma te jin sa'a i ja u'vi ma. Chukan kúu ja, ¡máko kandija ro ja ka ka'an i ma!

¹⁷ Ndasa'a kuenda, te kuni ro ja lasaa ma chi masu kivi ti nuu ni satu'va o ja tnii o ti ma nú ni jini ti ja iyo yika ti ma.

¹⁸ Kovaa ñayii ka sa'a ja u'vi ma chi masu ka ndasa'a maa i kuenda ja ka iyo yika ja jin kûu i ja sukan ka sa'a i ma, vaa kuenda tnu'u ja maa i jâ ni ka satu'va nuu jin kê koo i te jin skenaa i maa i ma.

¹⁹ Sukan‑ni kenda ja jin ko kuu ñayii inundiyo ini ja su'va‑ni te jin ni'i i ja jin koneva'a i ndaka nawa ka kuni i ma; te ja sukan ka sa'a ka kuu i ma, te jin ka'ni ña'a in‑ka ñayii ma te jin skenaa i maa i.

²⁰ Te tnu'u ndichi ká'an Su'si o a chi ûni káyu'u i ichi ma ji'in nuya'vi ma.

²¹ Ji'in nuu ka ndatna'a kua'a‑ka ñayii ma kuenda tnu'u ja káyu'u káyu'u tnu'u ndichi ká'an Su'si ma:

²² “Ro'o suchi jaa, ja ñatuu jin kuni‑ka ro naxe jin ko kuu ro a, ¿na saa‑ka kivi jin ko kuu ro sukan‑ni, ja ndimaa ka jakundee ro ñayii ka sa'a ja va'a ma, te ka saxiko ro ja va'a iyo ja jin kutu'va ro ma?

²³ Va'a‑ka jin ndasa'a kuenda tna'a ja ndáka'an‑so'o ri nuu ro a, sukan‑va'a ru'u ya chi kaxtnu'u ri ndaka ja va'a jani ini ri ja jin kuu ro ma.

²⁴ Kovaa ro'o, masu ni ka jatanuu ro ja ki koo ro nuu ni kana ña'a ri ma, te vitna ja ûni ni skuili ri nda'a ri a ja na ki koo ro te jin koniniso'o ro ja ká'an ri ma,

²⁵ kovaa ro'o chi ni ka saxiko ro tnu'u va'a ká'an káchi ri nuu ro ma. Visi ká'an ri ja masu va'a‑ni ka sa'a ro ma, kovaa masu nde ni ka ndasa'a ro kuenda te jin kuan‑ta'vi ro.” Sa'a ká'an tnu'u ndichi Su'si ma.

²⁶ “Chukan kúu ja ru'u ya chi jakundendee‑ni ña'a ri kivi jin ndani'i jin ndatna'a maa ro ja u'vi ka sa'a ro a. Te kivi kenda ja ñatuu ka ni'i ini‑ka ro naxe jin sa'a ro ma ja ka yu'u ro ma chi ru'u ya chi ndajakundendee‑ni ña'a ri.

²⁷ Te kivi kenda koo tnundo'o tnuneni xeen ma, sukan kénda tikachiyaa xeen ma ja ñú'u i ndaka nawa ní'i i ma,

²⁸ onde kivi yukan sana jin ndakune'e jin ndakune'e ña'a ro, kovaa masu ndakone'e ri; te jin ndanduku jin ndanduku ña'a ro, kovaa masu jin ndani'i ña'a ro.

²⁹ Vaa maa ro ni ka saxiko tnu'u ndichi ká'an ri ma te ñatuu ni ka ndi ini ro ja jin koyu'u ro Su'si Iya Tátnuni nuu ro a, ja iya ndákan kuenda kúu ya.” Sa'a ká'an tnu'u ndichi Su'si ma.

³⁰ “Te ja sukan ñatuu ni ka kandija ro tnu'u va'a ká'an káchi ri nuu ro ma te ni ka saxiko ro ndaka ja ndáka'an‑so'o ri nuu ro ma,

³¹ te jin ndani'i jin ndatna'a maa ro ndaka ja u'vi ni ka yo sa'a, ni ka yo kuu ro ma. Ûni ni a in ma jin yanduu, onde jin ndando'o jin ndaneni ro ndaka.

³² Chukan kúu ja ñayii ndee xeen ini i ma, te ñatuu kúni i kuan‑ta'vi i tnu'u ndichi ká'an Su'si ma te sa'a i sukan kúu ini maa i ma chi kundee maa ja u'vi ni yo sa'a i ma xnaa ña'a i te kûu i.

³³ Kovaa ñayii kándija te sa'a i sukan ká'an tnu'u ndichi Su'si a chi koteku sii ini i, te ñatuu kuiti nawa koyu'u i.” Sa'a ká'an tnu'u ndichi Su'si ma.