Tito 3 - Xochapa Mixteco

Ndá kuꞌva xíniñuꞌu na kándixa Jesucristo koo na

¹ Ta sinaꞌa un nda ñani yo, xiꞌin ná kuꞌva yo na veꞌe ñuꞌu, ya ná xaa toꞌo ni na ndiꞌi na chiñu, na xáꞌnda chiñu nuu yo, án na chiñu naꞌnu ku na, án na chiñu vali ku na, ta ná xaa toꞌo ni ñaꞌa na. Ndiꞌi saa ichí ná koo ndúvi na ya ikan na ya vaꞌa.

² Ta ná käꞌan väꞌa na xaꞌa nda iin naꞌa, ná täva na kuachi xiꞌin taꞌan na, vívií ná koo na xiꞌin taꞌan na, ni̱nu̱ ná koo ini na xiꞌin ndiꞌi na taꞌan na.

³ Chi saa ndi̱xiyo yo yachi tá täꞌan ndikundikun yo ichí Tata yo Jesucristo: kíꞌvi ni ndi̱xiyo ini yo, ikú ni ndi̱xiyo yo, tá íin yo nda̱ñuꞌu saa ndi̱xiyo yo nuu Ndioxi, ta xi̱nuꞌni yo ndaꞌa ndiꞌi kuachi ya ku̱too ni ikin kuñu yo ikan ya, kuaꞌa ni nuu ya väꞌa i̱kan yo, saa kûni ni ini yo xi̱ni yo naꞌa. Ta ndiꞌi naꞌa ndi̱saa ini xi̱ni yoo, ta saa tu yoo va, ndi̱saa ni ini yo xi̱ni yo na.

⁴ Sundi ti̱ndaa kivi ta ndi̱naꞌa Ndioxi, ra síkaku mií yo, ya ndee ni kúꞌvi ini ra xíni ra yoo, yakan i̱kan ni ra ya vaꞌa xiꞌin ndiꞌi ni kúu yo ñuu ivi yóꞌó.

⁵ Si̱kaku ra yoo, ta süvi xaꞌa ndá ka chiñu ya vaꞌa i̱kan yo kua i̱kan ra saa xiꞌin yo. Xaꞌa ya kúndaꞌvi ni ini ra xíni ra yoo kua i̱kan ra saa xiꞌin yo. Ta ndi̱kata ra yoo, saa nda̱sa xa̱á ra yoo ndu̱u yo na xa̱á nuu Tachi I̱í ra.

⁶ Xaꞌa ya xa̱a súvi Tata yo Jesucristo, ra síkaku yo kua si̱niꞌi ni Iva yo Ndioxi Tachi I̱í ra nuu yo, ta ndee ni ndee íyo ya xiꞌin yo.

⁷ Saa nda̱sa vaꞌa ra yoo, ndu̱u yo tá íin naꞌa, na köo ka kuachi kúu mií nuu ra, xaꞌa ya vaꞌa ni ra xiꞌin yo kua i̱kan ra saa xiꞌin yo. Ta saa kúsini ni yo chi kúndaa teꞌe ini yo ya niꞌi yo nuu taxi Ndioxi ndaꞌa yo koo yo xiꞌin ra ndiꞌi saa kivi ya vaxi.

⁸ Ñani yo, tuꞌun ya káꞌan i xiꞌin un yóꞌó, ta ya ndaa ni kua, yakan ndinuꞌu ni ini un sinaꞌa un ya, ya ná kundaa ini na taꞌan yo na kándixa Ndioxi ikan na ya vaꞌa, chi ya yóꞌó kua ndee ni vaꞌa, chíndee ni ya ndiꞌi na ñuu ivi.

⁹ Ta küni soꞌo un ya ndítuꞌun kuachi na ñani yo xaꞌa ñaꞌa ya köo ndáa yaꞌvi ndítuꞌun na xaꞌa xií síkua na. Vaꞌa kuxika un nuu ya ñaa, xiꞌin ya kánitaꞌan na xaꞌa, ta káꞌan kuachi na xaꞌa ley ya ta̱a ra Moisés, chi ya ñaa ta köo chíndee ya nda iin naꞌa.

¹⁰ Tá ndá mií na ñani yo, na veꞌe ñuꞌu, kúni taꞌvi taꞌan na ñani yo, ta vaꞌa kaꞌan un xiꞌin na iin án uvi ichí ná ïkan ka na saa. Tá tu köo xíin na xikuiin na ya íkan na saa, ta vaꞌa tava un na ná kana koo na veꞌe ñuꞌu.

¹¹ Ta xa ndi̱kaꞌan i xiꞌin un, xíni mií un ndiꞌi na íkan saa, ta köo íyo vaꞌa ka ini na, na xa ndi̱ka̱va ini va ku na, saa íyo kuachi na, táxi ya kuachi xaꞌa na nuu Ndioxi.

Tuꞌun ya si̱ndiꞌi káꞌan ra Pablo xiꞌin ra Tito

¹² Tá ná tiꞌvi i ra Artemas án ra Tíquico xaa iin nda nuu un, ta xaꞌa ni un ndee kama ni xaa loꞌo un koto un yeꞌe nda ñuu Nicópolis. Ikán ndikitaꞌan yo, chi ndi̱kani ini i ndoo i koo i ikán ndiꞌi yoó vixin.

¹³ Ta vaꞌa chindee taꞌan ni un xiꞌin ra ñani yo, ra Zenas, ra xíni ni ley, xiꞌin ra Apolos, ya ná kümani nda iin ñaꞌa nuu nda ichí nuu kuꞌun nda.

¹⁴ Saa nda ñani yo xiꞌin ná kuꞌva yo, ná sikuaꞌá na ikan ni na ya vaꞌa, ta ná chindee taꞌan ná xiꞌin naꞌa, na kúmani ñaꞌa nuu. Ta saa kua nduu na naꞌa, na ndáa yaꞌvi ni, na xáa chiñu ni.

¹⁵ Ta ndiꞌi nda ñani yo, nda ndóo xiꞌin i yóꞌó tíꞌvi ni nda tuꞌun mani xaa ndaꞌa un. Saa kaꞌan ndioxi ni un xiꞌin ndiꞌi nda ñani yo tin kuꞌva yo, na ndáa ni ini xíni Tata yo. Ta mií Iva yo Ndioxi ná chikaa ni ya vaꞌa ndiꞌi ndo. Saa ná koo.