Tito 2 - Xochapa Mixteco

Káꞌan ra Pablo xiꞌin ra Tito ya xíniñuꞌu ra sinaꞌa ra ya ndaa

¹ Sundi yóꞌo̱, ñani yo Tito, ta xíniñuꞌu un sinaꞌa un ndisaa ya ndaa xaꞌa ichí Tata yo Jesucristo ya kándixa yo.

² Saa sinaꞌa un nda ñani yo, nda xikuaꞌa, ya ná koo kaxin ni ini nda, ná koo ni ya toꞌo nda, ndá ya íkan nda ta xiꞌna ná ndikani vaꞌa ini nda saa ikan nda ya. Saa sinaꞌa un nda ndee ni ná kundaa ini nda kuni nda Tata yo Jesucristo ya taxi ra ndee ndaꞌa nda, saa ná kuꞌvi ni ini nda kuni taꞌan nda, ta káꞌnu ni ná koo ini nda xiꞌin taꞌan nda.

³ Ta kuꞌva saa sinaꞌa tu un ná kuꞌva yo ná nána chee xikuaꞌa, vií ná koo ná, ná koo ná xiꞌin ya toꞌo nuu Ndioxi. Kaꞌan xiꞌin ná, ná käꞌan vata ná xaꞌa naꞌa, ni ná küu ná ñaꞌa ndee ni kútoo koꞌo ndixi, xíniñuꞌu ná sinaꞌa ná ya vaꞌa.

⁴ Saa ná sinaꞌa ná, ná xa váli kúni, ya ná kuꞌvi ini ná kuni ná i̱í ná xiꞌin seꞌe ná,

⁵ ta ná ndikani vaꞌa ini ná unkua vaꞌa ikan ná, ta ná kuu mií ná nima vaꞌa, saa ná kundàà vií ná veꞌe ná, ta vaꞌa ná koo ini ná, saa ná koo ndúvi ná ikan ná ya vaꞌa xiꞌin i̱í ná, ya ná nïꞌi nda iin naꞌa, na köo kándixa tuꞌun Ndioxi ya kaꞌan väꞌa na xaꞌa tuꞌun ra.

⁶ Ta saa kaꞌan tu un xiꞌin nda ñani yo, nda kuâán vali ya xiꞌna ná ndikani vaꞌa ini nda unkua vaꞌa xíniñuꞌu nda ikan nda.

⁷ Tá kuꞌva kúni un ikan nda ñani yo, kuꞌva saa xíniñuꞌu un vívií koo un nuu na ya ná kuni na ikán na tá íkan un. Tá sínaꞌa un na ñani yo ta ndinuꞌu ni ini un sinaꞌa un na, toꞌo ndituꞌun un tuꞌun ya ndaa xiꞌin na.

⁸ Vívií kaꞌan un xiꞌin na sinaꞌa un na ya ná nïꞌi na tuꞌun väꞌa taxi na kuachi xaꞌa un. Tá ikan un saa, ta nda naꞌa, na köo xíin kundikun ichí Tata yo Jesucristo, ta kukaꞌan nuu na kuni na yóꞌo̱, nïꞌi na ndá ka ñaꞌa kaꞌan väꞌa na xaꞌa yo.

⁹ Saa sinaꞌa un na ñani yo, na sa̱ta xitoꞌo na xáa chiñu xiꞌin na xiꞌin ya uꞌvi, vívií ná xaa súvi na chiñu ya xáꞌnda xitoꞌo na nuu na. Toꞌo ná ikan na chiñu na, ta ná ndïkuiin kueꞌe na yuꞌu xitoꞌo na.

¹⁰ Ta sinaꞌa un na ná sïkuiꞌna na ñaꞌa xitoꞌo na, ya vaꞌa ni kua ndǎku ná xaa chiñu na nuu xitoꞌo na, saa kundaa ini ndiꞌi naꞌa xaꞌa tuꞌun Iva yo Ndioxi, ra síkaku yoo, ya ndee ni vaꞌa luvi tuꞌun ra ya síkuaꞌa na.

¹¹ Saa chi Ndioxi ta si̱naꞌa ra yoo ya ndee ni kúꞌvi ini ra xíni ra yoo, yakan ta̱xi ra ichí ndaꞌa yo ya ná kuchiñu kaku ndiꞌi ni kúu yo ñuu ivi yóꞌó.

¹² Xaꞌa ya kúꞌvi ni ini Ndioxi xíni ra yoo kua sínaꞌa ra nuu yo ya xíniñuꞌu yo sindoo yo ndiꞌi taꞌan ya väꞌa íyo ñuu ivi yóꞌó, ta ná ndïkani ini yo ikan yo ndá ka ya väꞌa, saa ná koo káxin ni ini yo, ta ndaa ni ná koo ini yo, i̱í ná koo yo nuu ra.

¹³ Saa ná koo yo nani ndátun yo tindaa kivi ya ndee ni chee nuu ndiko koo Tata yo Jesucristo kixi ra ñuu ivi yóꞌó sikaku ra yoo. Chi mií ra ku Ndioxi ra chee ni, ta kusini ni yo xiꞌin ra tá ná ndiko koo ra xiꞌin ndee ya luvi ni yéꞌe̱ kúu mií ra.

¹⁴ Chi ndi̱taxi ra mií ra ndi̱xiꞌi ra xaꞌa yo, ya yóꞌó ku yaꞌvi cha̱ꞌvi ra xaꞌa yo nuu si̱kaku ra yoo ndaꞌa ndee ya väꞌa i̱kan yo, ta nda̱sa vaꞌa ra yoo ndu̱u yo na ñuu mií ra, ya kuchiñu yo ikan yo ya vaꞌa nuu ra.

¹⁵ Ta ya yóꞌó kua xíniñuꞌu un sinaꞌa un na ñani yo. Ta xa íyo ichí ta̱xi Tata yo Jesucristo ndaꞌa un ya xaꞌa un ndee xiꞌin na, saa ndaꞌi un xiꞌin na tá väꞌa íkan na. Ta nda iin na ná kündasi nuu kuni yóꞌo̱.