Tito 1 - Xochapa Mixteco

Káꞌan ndioxi ra Pablo xiꞌin ra Tito

¹ Yeꞌe ku ra Pablo, ta suvi mií i ku ra xáa chiñu nuu Iva yo Ndioxi, ta xíka tu i chiñu nuu Tata yo Jesucristo va. Ta yeꞌe ku ra táa tutu yóꞌó xaa ya nuu un ñani yo Tito, chi mií Iva yo Ndioxi ku ra ndi̱kaxin yeꞌe, saa xa̱ꞌnda chiñu ra nuu i ya kaka i chindee taꞌan i xiꞌin na ñuu ra, na ndi̱kaxin ra, ya ndinuꞌu ni ini na ná kundaa ini na kuni na ra. Ta saa vaꞌa ná kundaa ini na ya ndaa xaꞌa Tata yo Jesucristo, tá kuꞌva kúni mií Iva yo Ndioxi.

² Chi yoo ta xa kúndaa teꞌe vaꞌa ini yo, ya ki̱ndoo ra xiꞌin yo taxi ra koo yo xiꞌin ra ndiꞌi saa ichí, ta köo ndi̱sindaꞌvi ra yoo chi nda tá täꞌan ka vi xikoo xaꞌa ñuu ivi kua ndi̱kaꞌan ra ikan ra saa xiꞌin yo.

³ Ta vitin ku nuu ndi̱xinu kivi ya ndi̱naꞌa Iva yo Ndioxi ra síkaku yoo, ndi̱naꞌa ra tuꞌun vaꞌa xaꞌa Tata yo Jesucristo nuu ndiꞌi naꞌa. Xaꞌa ya ikán kua ti̱ꞌvi ra yeꞌe ya kaka i kaꞌan ndoso i tuꞌun ra xiꞌin naꞌa.

⁴ Ta tíꞌvi i tutu yóꞌó xaa ya ndaꞌa un ñani yo Tito. Chi yóꞌo̱, ta tá íyo seꞌe mií i saa íyo un, xaꞌa ya iin káchi ndáa ini yo xíni yo Tata yo Jesucristo, ra síkaku yoo. Ta ná ikan Iva yo Ndioxi xiꞌin Tata yo Jesucristo ya vaꞌa xiꞌin un, ná kundaꞌvi ni ini ra kuni ra yóꞌo̱, ná taxi ra koo vaꞌa ini un.

Káꞌan ra Pablo xiꞌin ra Tito ndá chiñu kua xíniñuꞌu ra xaa súvi ra ñuu Creta

⁵ Tá si̱ndoo i yóꞌo̱ ñuu Creta ya ndíkaa maꞌñu nduta ñûꞌu, ta si̱ndoo i yóꞌo̱ ya sixinu un chiñu ya kúmani ka xinu, ta ndi̱kaꞌan i xiꞌin un ya ndikaxin un taa nda xikuaꞌa tá ñuu, tá ñuu, ya kundiso chiñu nda xiꞌin na veꞌe ñuꞌu.

⁶ Ta nda ñani yo, nda ndikaxin un kundaa chiñu xiꞌin na veꞌe ñuꞌu, ta xíniñuꞌu ndǎku ni koo ini nda, ná kunuu vaꞌa tuꞌun xaꞌa nda, ta iindaa ná kuu yá síꞌi nda, ta ná kuu seꞌe nda na kándixa Tata yo Jesucristo, saa ná kuu na, na ínuu vaꞌa ni tuꞌun xaꞌa, ná köo na naꞌa, na soꞌo ni.

⁷ Saa chi nda kúu xi̱ní xiꞌin na veꞌe ñuꞌu, ta xíniñuꞌu nda ndǎku ni koo ini nda xaꞌa ya ndíso chiñu nda xiꞌin chiñu Ndioxi. Ná chïnuu vaꞌa ni nda tuꞌun nda, ná säa kama ni nda, ná käka nda koꞌo nda, saa ná täva nda kuachi xiꞌin naꞌa, ta ná ïkan nda ndá ka ñaꞌa väꞌa ya kuu mií nda xuꞌun.

⁸ Ya ndee ni xíniñuꞌu nda ikan nda kua yóꞌó, ná koo ndúvi nda ndikuiso vií nda naꞌa veꞌe nda, na xíniñuꞌu chindee taꞌan nda xiꞌin, saa ná kutoo nda ikan nda ya vaꞌa, káxin ni ná koo ini nda, vaꞌa ná koo ini nda, i̱í ná koo nda, ná ndixita nda mií nda nuu ya väꞌa.

⁹ Xíniñuꞌu nda kuu nda taa, nda ndee ni kándixa tuꞌun ya ndaa ni si̱naꞌa nde. Saa kua vaꞌa xaꞌa nda ndee xiꞌin nda ñani yo tin kuꞌva yo, ta saa sixinu nda ini na köo xíin kandixa vaꞌa.

¹⁰ Saa chi íyo kuaꞌa ni nda köo xíin kandixa, ta ndá yokan tuꞌun ya íin ya köo káꞌan nda, saa síndaꞌvi nda naꞌa kuakiꞌvi na ichí väꞌa xaꞌa tuꞌun ya káꞌan nda xiꞌin na. Ta nda íkan saa ku sava nda ñúꞌu tañu ndo ñaa, chi káꞌan nda ya xíniñuꞌu ndiꞌi naꞌa ndikunuu tuni Ndioxi na, saa kua ndikuiso vaꞌa ra na, káchi nda.

¹¹ Ta nda íkan saa ta síndiꞌi xaꞌa nda naꞌa, ínii veꞌe síndiꞌi xaꞌa nda xiꞌin tuꞌun ya sínaꞌa nda na, ta saa ndátun nda chaꞌvi naꞌa nda xaꞌa ya väꞌa sínaꞌa nda na. Ta ndiꞌi nda íkan saa, ta vaꞌa ndikasi un yuꞌu nda, täxi un sinaꞌa ka nda naꞌa xaꞌa ya íkan nda saa.

¹² Tá íyo ya ndi̱kaꞌan iin ra ndíchi ni, ra ñuu mií na Creta, káꞌan ra xaꞌa na, káchi ra soꞌva: “Na ndóo ñuu Creta yóꞌó ku naꞌa, na ndee ni vata, tá íin kiti iku saa íin na, kini ni xíxi na, ta ndee ni kini xúxan na”.

¹³ Ta ya ndaa ni ndixa kua ndi̱kaꞌan ra xaꞌa na, yakan yóꞌo̱, ta ndee koo ini un xiꞌin na ndaꞌi un xiꞌin na ya ná ïkan na ya väꞌa, sinaꞌa un na, ya ná kutuun tuꞌun Ndioxi nima na ta ná kundaa ni ini na ra.

¹⁴ Ta ná küni soꞌo na kuento yata ya ndítuꞌun mií na judío, ni ná täa tu soꞌo na ya síkuaꞌa ini mií na káꞌan na, na ñaa ku naꞌa, na síndoo ichí Ndioxi ya ndaa.

¹⁵ Chi naꞌa, na kúu mií nima vaꞌa, ta ya vaꞌa ku ndiꞌi ya nuu na, ta naꞌa, na kúu mií nima väꞌa, na köo ndáa ini xíni Ndioxi ta ya väꞌa ku ndiꞌi va ya nuu na, nda ya ndíkani ini na xiꞌin ya xínituni na ta köo íyo vaꞌa ya.

¹⁶ Káꞌan na xíni na Ndioxi sundi ndiꞌi ñaꞌa väꞌa íkan na ta ndínaꞌa na mií na ya köo xíni na ra, ta ndíkuaa va na ra, saa kúndasi nuu na xíni na naꞌa, ta köo xíin na xaa súvi na ya kúni Ndioxi, ta nda iin ñaꞌa vaꞌa küchiñu na ikan na.