Santiago 5 - Xochapa Mixteco

Vaxi kivi ta ndoꞌo ni na kuika, na íyo xuꞌun

¹ ¡Ndóꞌo̱, na kuika, ndóꞌo̱ íyo xuꞌun! Kuni soꞌo ni ndo ya ndituꞌun i xiꞌin ndo, kusuchi ni ini ndo, ta kuaku ni ndo chi ndee ni kundoꞌo ndo kivi vaxi.

² Ndiꞌi ya kuika kúu mií ndo ta iin taꞌi ndiꞌi ya, kaxi ndiꞌi kiti tikixin toto ndo.

³ Saa tu xuꞌun ya oro xiꞌin ya plata íyo nuu ndo, xa kuaꞌan kúxin ndiꞌi ya, ta ya ñaa kua ndikuiin taxi ya kuachi xaꞌa ndo tá kivi ná xaa nani Ndioxi kuachi xiꞌin ndiꞌi naꞌa. Xaꞌa ya ku̱too ni ndo koo kuaꞌa ni xuꞌun ndo kua kundoꞌo ndo tá ndóꞌo ñaꞌa ya xíxi xiꞌin ñu̱ꞌu̱. Saa chi ndóꞌo̱ ta ndisaa ya kuika kua ndi̱ndiꞌi ni ini ndo xaꞌa ta chi̱vaꞌa ndo ya xaꞌa tiempo sindiꞌi vitin.

⁴ Ta koto vaꞌa ndo, chi káꞌan kuachi va xuꞌun na xa̱a chiñu tátu nuu ndo ya si̱kuiꞌna ndo, ndi̱kasi ndaa ndo ya, si̱ndaꞌvi ndo na, köo ndi̱chaꞌvi ndo na. Ta ya köo ndíchaꞌvi ndo na ikán kua káꞌan kuachi ni na xaꞌa ndo nda nuu ndivi ndi̱xinu koo ya káꞌan na xaꞌa ndo xiꞌin Iva yo Ndioxi, ra ndee ni ndee kúu mií.

⁵ Ta ndee ni vaꞌa ndóo ndo nuu na ñuu ivi yóꞌó. Íyo ndiꞌi saví ya kúni ndo nuu ndo. Nda ndu̱nduꞌu ni va ndo, tá kuꞌva ndúnduꞌu kiti ri kuaꞌan kuvi, saa íin ndo.

⁶ Saa ta̱xi ndo kuachi xaꞌa naꞌa, na köo kuachi ta xa̱ꞌni ndo na, ta na i̱kan ndo saa xiꞌin ta ni köo ndi̱kaꞌan kuachi na xaꞌa na nuu ndo.

Ndaku ni ná koo ini yo nuu tindoꞌo vaxi nuu yo

⁷ Sundi ndóꞌo̱ ñani yo xiꞌin kuꞌva yo, ta ndaku ni koo ini ndo, kündiꞌi ini ndo, kundatun ndo nda ná ndiko koo Tata yo Jesucristo kixi ra. Tá ndóꞌo iin ra chíꞌi nuu ñuꞌú ra, köo ndíꞌi ini ra, kuekuee ndátun ra nda ná ndiyaa, küun ka savi, saa vi xáa ra síkee ra ñaꞌa chi̱ꞌi ra nuu ñuꞌú ra.

⁸ Tá íkan ra ikán saa xíniñuꞌu ndo kuekuee kundatun ndo, ndakú ni koo ini ndo nda ná ndiko koo Tata yo Jesucristo.

⁹ Ñani yo xiꞌin kuꞌva yo, käꞌan kuachi ni ndo xaꞌa taꞌan ndo, chi ìyo ni taxi Ndioxi tindoꞌo kixi ya nuu ndo. Koto ndo chi mií Tata yo Jesucristo kúu juez, ta xa íyo tuꞌva ra ndíchi ra yéꞌe ya ndiko koo ra kixi ra.

¹⁰ Ñani yo xiꞌin kuꞌva yo, sikuaꞌa ndo tá kuꞌva i̱kan nda ndi̱kaꞌan ndoso tuꞌun yuꞌu Iva yo Ndioxi xinaꞌa, ndee ni ti̱xuꞌvi nda ta ndi̱xaꞌa ndee ndiꞌi ini nda xiꞌin ya ndo̱ꞌo nda saa xaꞌa Iva yo Ndioxi.

¹¹ Ta nuu ndeꞌe ta ndee ni va vaꞌa kée nda ikán chi ndi̱xaꞌa ndee ni ini nda ya ndo̱ꞌo ni nda. Xa xi̱ni soꞌo mií ndo ndá kuꞌva ndo̱ꞌo ra Job, ndi̱xaꞌa ndee ni ini ra xiꞌin ya ndo̱ꞌo ni ra, yakan vaꞌa ni ndi̱niꞌi ra nuu Ndioxi tá sindiꞌi. Ndiꞌi ya yóꞌó sínaꞌa ya mií yo ya íyo tuꞌva Iva yo ya xaa kaꞌnu ini ra xaꞌa yo, chi kúndaꞌvi ni ini ra xíni ra yoo.

¹² Ni saa va ñani mani xiꞌin ndóꞌo̱ kuꞌva yo, ta ndóꞌo̱ ta chïnaꞌa ndo nuu ndivi, ni nuu ñuꞌú, nda iin nuu ñaꞌa chïnaꞌa ndo ya kúni ndo kundaa ini naꞌa xaꞌa ya káꞌan ndo ya ndaa. Tá káꞌan ndo xaa súvi ndo ya káꞌan ndo, ta xaa súvi ndo ya. Tá káꞌan ndo xäa súvi ndo ya káꞌan ndo, ta xäa súvi ndo ya. Saa koo tuꞌun kaꞌan ndo ya ná täxi Ndioxi kuachi ndo.

Ndee ni ndáa yaꞌvi ya kaꞌan ni yo xiꞌin Ndioxi

¹³ Ñani yo xiꞌin kuꞌva yo, tá ndá ndóꞌo̱ ñúꞌu nuu tindoꞌo, ta vaꞌa ná kaꞌan ni ndo xiꞌin Ndioxi. Ta saa tu tá ndá ndóꞌo̱ kúsini ni ta vaꞌa kata ndo yaa nuu Ndioxi.

¹⁴ Saa tu tá ndá ndóꞌo̱ kúꞌvi, ta kaꞌan ndo xiꞌin na xikuaꞌa veꞌe ñuꞌu ná kaꞌan na xaꞌa ndo xiꞌin Ndioxi ya sinduvaꞌa ra ndóꞌo̱, ta xiꞌin kivi Tata yo Jesucristo ná chikaa na ceite xiní ndo.

¹⁵ Tá ndáa ni ini mií na xikuaꞌa ikán Ndioxi ta sinduvaꞌa ra mií na kúꞌvi, nduvaꞌa na. Saa tá ndá ya väꞌa i̱kan na ta xaa kaꞌnu ini Ndioxi xaꞌa kuachi na.

¹⁶ Xaꞌa ya ñaa kua xíniñuꞌu ndo naꞌma ndo kuachi ndo nuu taꞌan ndo, saa kaꞌan ndo xiꞌin Ndioxi xaꞌa taꞌan ndo. Ikan ndo saa ya ná sindaꞌa Ndioxi ndóꞌo̱. Chi ndiꞌi naꞌa, na íyo vaꞌa nuu ra, ta xíni soꞌo va ra ya ndúku na nuu ra.

¹⁷ Tá kúu ra Elías tá kuꞌva íyo mií yo saa ndi̱xiyo ra, ta ndi̱kaꞌan ra xiꞌin Ndioxi ya ná küun savi, ta köo ndi̱kuun rá uni kuiya sava.

¹⁸ Si̱ndiꞌi saa ndi̱kaꞌan tuku ra xiꞌin Ndioxi, saa ku̱un tuku savi ta ka̱na ñaꞌa nuu ñuꞌú.

¹⁹ Ñani mani xiꞌin kuꞌva yo, tá ndá iin ndo nda̱ñuꞌu, köo xíka ka ndo ichí Iva yo ya ndaa, ta saa vaxi inka na síndiko koo na ndóꞌo̱ ya ndiko koo tuku ndo ichí ra.

²⁰ Ta yeꞌe kúni i ya kundaa ini ndo xaꞌa na káꞌan xiꞌin ndo ya sindoo ndo ichí väꞌa kuaꞌan ndo, ta tá íin na síkaku ndóꞌo̱ ya ná küꞌun ndo ichí nuu kuvi ndo ndiꞌi xaꞌa ndo, saa íin na, chi síkaku na ya vaꞌa ndo, saa ndíꞌi xaꞌa kuaꞌa ni kuachí ndo nuu Ndioxi.