Santiago 3 - Xochapa Mixteco

Kuenta ná koo yo xiꞌin yuꞌu yo

¹ Ñani mani, ná köo kuaꞌa ni na sínaꞌa tuꞌun Ndioxi tañu ndo, saa chi xa kúndaa ini mií ndo yáꞌa ni ka va ndee sitaxin Ndioxi yoo sínaꞌa tuꞌun ra, nuu na ivi taꞌan yo na ndíkun ra.

² Chi ndiꞌi yo ta yo yáꞌa yuꞌú ku ndiꞌi va yo, ta naꞌa, na köo yáꞌa tuꞌun káꞌan, na ñaa ku na xa ndi̱xinu íyo vaꞌa ni nima na xiꞌin ra, yakan kuchiñu na kaꞌnda chiñu na nuu ndiꞌi ikin kuñu na.

³ Tá íkan yo xiꞌin kiti kuai sana yo, chíkaa yo kàà yuꞌu ri ya kuchiñu yo kaꞌnu yo ri, xaa maso yo ri, saa vaꞌa xaa súvi ri chiñu ya kúni yo.

⁴ Ta saa tu itun barco xíka nuu tikuií, ni ndee ni naꞌnu nu ta ndee ni káni ndaa tachi sata nu, ta mií ra káva nu ta iin itun loꞌo va ku nu síkanda ra, saa kuaꞌan nu nda nuu kúni mií ra.

⁵ Ta iníi saa káa tu yáa va yo, loꞌo paꞌa káa ya íyo ya ikin kuñu yo, ta ndee ni vaꞌa káꞌan ya. Ta íyo tu ya tá kuꞌva káa iin ñu̱ꞌu̱ loꞌo chi kuchiñu ya kaꞌmi ndiꞌi ya iin iku kaꞌnu ni, ya chee ni.

⁶ Tá káa ñu̱ꞌu̱ yeꞌe ya xíxi, saa káa yaá yo ya íyo yuꞌu yo, chi táxi ya kaꞌan yo tuꞌun kini ni. Ta ndiꞌi tuꞌun kini káꞌan yo ta xáa yakua ya yoo, ndúu kini yo, chi ndaya nuu íyo kiti nǎꞌa kua kána koo ya vaxi ya, ta kúchiñu ya sítivi ya yo ivi yóꞌó.

⁷ Saa chi xíni vaꞌa va yo ndá kuꞌva ndása maso na kiti ikú xiꞌin kiti ndáchi tin kiti ñúꞌu ndai tixin nuu ñuꞌú, saa tu kiti ñúꞌu ini nduta ñûꞌu va.

⁸ Sundi nda iin yo köo kúchiñu kaꞌnu yo tuꞌun yo ya kána koo yuꞌu yo káꞌan yo ya kuvita ya. Chi tá káa iin tatan xatu ni saa íin tuꞌun ya kána koo yuꞌu yo káꞌan yo, ta ndee ni sítixuꞌvi yo naꞌa xiꞌin ya.

⁹ Saa chi xiꞌin tuꞌun yo kua xáa kaꞌnu yo Iva yo Ndioxi ta suvi ni xiꞌin tuꞌun yo kua kátavi yo chiꞌña sata na taꞌan yo, na si̱kuaꞌa Iva yo Ndioxi, na íin tá kuꞌva káa mií ra.

¹⁰ Ta suvi xiꞌin yuꞌu yo kua xáa kaꞌnu yo Iva yo Ndioxi ta saa kána koo tu tuꞌun yuꞌu yo távi chiꞌña yo na taꞌan va yo. Ta küvi ikan yo saa, ñani yo.

¹¹ Ndikani ini ndo chi iin poso nuu kána tikuíi vaꞌa ta köo kána tikuii uꞌva ini ya.

¹² Ta saa íyo tu itun higo küvi kana kiti olivo ndaꞌa nu, ni teꞌe kiti uva küvi kana higo ndaꞌa ya. Yakan kua ni tikuií vaꞌa án rá uꞌva, ta küvi kana uvi saa rá ini iin poso.

Ya ndíchi vaxi nuu Ndioxi ni̱nù

¹³ Ñani yo, tá íyo sava ndo ndíchi ni, saa íyo ni ya vaꞌa ndo, xínituni ni ndo xaꞌa ichí Iva yo Ndioxi, ta vaꞌa sinaꞌa ndo ya xiꞌin chiñu vaꞌa, ya toꞌo, saa kua sinaꞌa ndo mií ndo ya kúu ndo naꞌa, na ndee ni táku ini, na ndaꞌvi ni ini.

¹⁴ Ni ndíchi ni va tu ndo, sundi tá kǔní ni ini ndo xíni taꞌan ndo, án káni taꞌan ndo xiꞌin taꞌan ndo, ta chïnuu vaꞌa ndo tuꞌun ndo ni sïndaꞌvi taꞌan ndo, chi köo íkan ndo ya ndaa xiꞌin taꞌan ndo.

¹⁵ Ya ndíchi kúu mií ndo ta süvi nuu Ndioxi vaxi ya, ya kána koo xi̱ní na ñuu ivi yóꞌó va ku ya, chi kiti nǎꞌa ku ri táxi ndíkani ini ndo ya ndee ni ndíchi ndo, túvi ndo.

¹⁶ Saa chi tá íyo naꞌa, na kǔní ini xíni taꞌan ta án kéꞌe taꞌan na xiꞌin taꞌan na, ñaa kua íyo ndiꞌi nuu ñaꞌa väꞌa.

¹⁷ Sundi naꞌa, na kúu mií ya ndíchi vaxi nuu Ndioxi ta köo ikán na ñaꞌa ya väꞌa, nina ya vaꞌa íkan na, ni köo kuachi ini na, saa kúu na, naꞌa na vaꞌa ni ini xiꞌin na ivi, kúndaꞌvi ini na xíni ñaꞌa na, ndiꞌi saa ichí kúni na xaa súvi na ya vaꞌa. Saa íkan na ya vaꞌa xiꞌin ndiꞌi naꞌa, ta köo íyo uvi yuꞌu na, na íkan saa ku na ndixa ndíkun ichí Ndioxi.

¹⁸ Ndiꞌi naꞌa, na ndúku kuꞌva ya chindee taꞌan na xiꞌin inka naꞌa ya koo vií na, na íkan saa ta tá íin na chíꞌi ñaꞌa vaꞌa saa íin na nuu Ndioxi.