Santiago 2 - Xochapa Mixteco

Iin káchi ná kuꞌvi ini yo kuni yo ndiꞌi na taꞌan yo, ná ndïkaxin yo na

¹ Ñani yo, ndïkaxin ndo nda iin na taꞌan yo na ndíkun Tata yo Jesucristo ra kúu mií ndee chee ya vaꞌa ni, iin kachi kuꞌvi ini ndo kuni taꞌan ndiꞌi ndo.

² Chi tá ná xaa iin ra kuika kiꞌvi ra veꞌe nuu ndíkitaꞌan ndo xáa kaꞌnu ndo Ndioxi, ta ndee ni ndíxi vaꞌa ra ikán, ndíkaa xeꞌe ya oro ndaꞌa ra, sáꞌan ni káa ra. Ta suvi saa kuakiꞌvi tu iin ra ndaꞌvi ndee ni láꞌla toto ndíxi, ná kachi yo.

³ Ta ndee ni va vaꞌa ná káꞌan ndo xiꞌin ra kuika ikán, kachi ndo saa: “Naꞌa koo un nuu tai vaꞌa yóꞌó”, ná kachi ndo xiꞌin ra. Ta ra ndávi ikán ná kaꞌan ndo xiꞌin: “Vaꞌa ñaa kundichi ndaa un, án vaꞌa kunduꞌu tu un nuu ñuꞌú ñaa va”, ná kachi ndo xiꞌin ra.

⁴ Tá íkan ndo saa xiꞌin na taꞌan ndo, ta väꞌa kéꞌe ndo, chi ndíkaxin ndo na kuika xiꞌin na ndaꞌvi, ta ndúu ndo juez na köo xáa ndaa kuachi xiꞌin naꞌa.

⁵ Ñani mani xiꞌin kuꞌva yo, ndóꞌo̱ ku ndo kúꞌvi ni ini i xíni i, ta kuni soꞌo ndo ya kaꞌan i xiꞌin ndo: Ndioxi ku ra ndi̱kaxin na ndaꞌvi ndóo ñuu ivi ya ná nduu na naꞌa, na ndinuꞌu ni ini ndáa ini xíni ra xiꞌin ndiꞌi nima na, ta saa ndikiꞌin na ya ndi̱kaꞌan ra taxi ndaꞌa na kúꞌvi ini xíni ra, saa koo na kaꞌnda chiñu na xiꞌin ra.

⁶ Sundi ndóꞌo̱, ta köo ndíkuiso vaꞌa ndo na, na xáa nduvaꞌa ndo xiꞌin va ku na. Ta ¿án süvi na kuika ku na táxi kuachi xaꞌa ndo, saa ñúu ndai na ndóꞌo̱ kuaꞌan ndo nuu na chiñu?

⁷ Ta suvi ni na ikán ku na káꞌan ndivaꞌa xaꞌa kivi Tata yo Jesucristo ra chee ni, ra ka̱na ndóꞌo̱ ya kundikun ndo ra.

⁸ Tá tu ya ndixa ni kua kándixa ndo ley Ndioxi ya ndee ni ndáa yaꞌvi, ta vaꞌa ni va íkan ndo, chi soꞌva káꞌan ley ikán: “Ná kuꞌvi ni ini ndo kuni ndo naꞌa tá kuꞌva kúꞌvi ini ndo xíni ndo mií ndo”, káchi ya.

⁹ Sundi ndóꞌo̱ ta ndíkaxin ndo naꞌa ndíkuiso vaꞌa ndo na kuika nuu na ndáꞌvi, ta xaꞌa ya íkan ndo saa ta ndíkuiso ndo kuachi nuu Ndioxi chi yáꞌa ndo nuu ley ikán.

¹⁰ Saa chi tá ndá naꞌa vaꞌa ni xáa súvi ndiꞌi ley Ndioxi, ta yáꞌa na nuu iin mituꞌun loꞌo ya káꞌan ya, tá íkan na saa ta kuakiꞌvi na kuachi xiꞌin ndiꞌi ni kúu ya káꞌan ya.

¹¹ Saa chi mií Ndioxi ku ra xa̱ꞌnda chiñu ikán, káchi ra saa: “Küsun un xiꞌin iin ñaꞌa tá tu süvi yá síꞌi un ku yá”, káchi ra. Saa káꞌan ka Ndioxi káchi ra saa: “Käꞌni un naꞌa”, káchi ra. Xaꞌa ya ñaa kua ni köo kíxi iin taa xiꞌin inka ñaꞌa, sundi tá xáꞌni ra ndìì, ta yáꞌa ra nuu ley Ndioxi.

¹² Xaꞌa ya ñaa kua vívií ndituꞌun ndo, ta vívií koo ndo ñani yo. Chi ndóꞌo̱ ta tá íin naꞌa, na xaa nani Ndioxi kuachi xiꞌin xaꞌa ley ra ya sa̱ña ndíka ndóꞌo̱, saa íin ndo.

¹³ Saa chi ndiꞌi na köo kúndaꞌvi ini xíni inka na, ta kuꞌva saa kündaꞌvi ini Ndioxi kuni ra naꞌa tá ná xaa nani ra kuachi xiꞌin na ñuu ivi. Sundi naꞌa, na ku̱ndaꞌvi ini xi̱ni inka naꞌa, ta kuꞌva saa kundaꞌvi ini Ndioxi kuni ra na.

Tá tu kándixa ni yo Ndioxi ta xíniñuꞌu yo xaa súvi yo ya xáꞌnda chiñu ra

¹⁴ Ñani mani, ¿ni köo ndáa yaꞌvi vi ya káꞌan sava ndo ya ndáa ni ini ndo xíni ndo Ndioxi, tá tu köo xáa súvi ndo nda iin loꞌo chiñu ya xáꞌnda chiñu ra nuu ndo? ¿Án kuchiñu kaku ndo ndisaa xaꞌa ya ndáa ini ndo xíni ndo ra, túvi ndo, ta köo xáa súvi ndo ya xáꞌnda chiñu ra?

¹⁵ Tá íyo iin ñani yo án iin kuꞌva yo na köo toto kundixi, ni ya kuxi na köo, ná kachi yo.

¹⁶ Tá káꞌan iin ndo káchi ndo: “Vaꞌa, ñani yo ndikitaꞌan ka yo, Ndioxi ná kuꞌun xiꞌin un, kuenta ni koo un, ndikasi vaꞌa un mií un xiꞌin toto vi̱xi̱n chi vixin ni, ta ná kuxi vaꞌa un ndakua xaa ini un”, ná kachi ndo xiꞌin na, ta köo chíndee ndo na xiꞌin ñaꞌa ya xíniñuꞌu na, yakan ni köo ndáa yaꞌvi vi ya káꞌan ndo xiꞌin na.

¹⁷ Ta saa íyo ya káꞌan ndo ndáa ni ini ndo xíni ndo Ndioxi, tá tu ndisaa ndáa ini ndo ra, ta köo xáa súvi ndo chiñu vaꞌa nuu ra, ta ya káꞌan ndo ta ya mani uun va ku ya.

¹⁸ Küvi kaꞌan yo xiꞌin taꞌan yo, kachi yo: “Yóꞌo̱ ta ndee ni ndáa ini un xíni un Tata yo, ta yeꞌe ta ndee ni vaꞌa xáa súvi i chiñu vaꞌa nuu ra”, kachi yo. Ta vaꞌa sinaꞌa un ndisaa ya ndáa ni ini un xíni un ra, ta sïnaꞌa un chiñu ya xáa súvi un nuu ra. Sundi yeꞌe ta sinaꞌa i ya ndáa ni ini i xíni i ra xiꞌin chiñu ya vaꞌa ni xáa súvi i nuu ra.

¹⁹ Ta vaꞌa ni va íkan ndo xaꞌa ya kándixa ndo iindaa kú Ndioxi, túvi ndo. Ta ¿án köo xíni ndo nda mií kiti nǎꞌa ta kuꞌva saa íkan ri kándixa ri ya íyo iindaa Ndioxi, ta nda kísi ni̱nù ñaꞌa ya, xaꞌa ya íꞌvi ri.

²⁰ Ta vaꞌa ná kundaa ini ndo chi väꞌa vi kéꞌe ndo, tá íkan ndo saa ndisaa ndáa ini ndo xíni ndo Tata yo, ta köo xáa súvi ndo chiñu xáꞌnda chiñu ra nuu ndo, ya ñaa ta köo ndáa yaꞌvi vi ya, ya uun kuiti va ku ya.

²¹ Ta xa xíni mií va ndo, Ndioxi ta nda̱sa vaꞌa ra xií sikua yo ra Abraham xinaꞌa, ndu̱u ra tá káa iin ra köo ka nda iin kuachi kúu mií nuu Ndioxi, xaꞌa ya ndi̱soko ra seꞌe ra, ra Isaac ta̱xi ñaꞌa ra ndaꞌa Ndioxi.

²² Ta xiꞌin ya i̱kan xií síkua yo ra Abraham kua kúndaa ini yo süvi iindaa ya ndáa ini yo Ndioxi kua ndáa yaꞌvi. Chi ndáa yaꞌvi ni tu ya vaꞌa xáa súvi yo chiñu nuu Ndioxi va.

²³ Ta ya i̱kan ra Abraham saa kua si̱xinu ra tuꞌun Ndioxi ya káchi saa: “Ka̱ndixa ni ra Abraham Ndioxi yakan kua ndu̱u ra, ra vaꞌa nuu Ndioxi”. Saa ndu̱u ra iin taa ra xi̱taꞌan vaꞌa ni xiꞌin Ndioxi.

²⁴ Yakan kúndaa ini yo süvi ndisaa xaꞌa ya ndáa ni ini yo Ndioxi kua ndúu vaꞌa yo nuu ra, ndása vaꞌa tu ra yoo xaꞌa ya vaꞌa kéꞌe va yo.

²⁵ Ta saa ku̱u tu xiꞌin yá Rahab, yá ndi̱xika sií ni xiꞌin taa, nda̱sa vaꞌa Ndioxi yá xaꞌa ya vaꞌa i̱kan yá, ya ndi̱kuiso yá nda taa nda ndi̱xika chiñu nuu Ndioxi. Saa chi̱ndee taꞌan yá xiꞌin nda ndi̱kaku nda ka̱na koo nda kuaꞌan nda inka ichí.

²⁶ Saa yoo, tá káꞌan yo ndáa ni ini yo xíni yo Ndioxi ta köo xáa súvi yo chiñu ya xáꞌnda chiñu ra nuu yo, ta ndúu yo tá íyo ikin kuñu naꞌa, na xa ndu̱ndii va.