ROMANOS 6 - Xochapa Mixteco

Naꞌa na kándixa Jesucristo ta xa ndi̱saña na ndaꞌa kuachi na

¹ Ta, ¿unkua ikan yo vitin? ¿Án vaꞌa ikan ni ka yo ya väꞌa, ta saa ikan ni Ndioxi ya vaꞌa xiꞌin yo, xaa kaꞌnu ini ra xaꞌa ndiꞌi kuachi íkan yo?

² ¡Ni küvi ka ikan yo saa! Chi yo kándixa Jesucristo ku yo, tá íin yo xa ndi̱xiꞌi saa íin yo nuu kuachi ya xa̱ꞌnda chiñu nuu yo yachi, yakan ni chïkaa soꞌo ka yo ya väꞌa.

³ ¿Án köo kúndaa ini ndo unkua káꞌan ya xa chi̱chi yo? Chi tá chi̱chi yo ta tá íin yo ndi̱xiꞌi saa ndu̱u yo, ndi̱xiꞌi yo xiꞌin Jesucristo, iin ndu̱u yo xiꞌin ra.

⁴ Saa chi Jesucristo ta ndi̱xiꞌi ra saa ndi̱nduxin ra. Ta saa mií yo tá chíchi yo ta tá íin yo xíꞌi ta ndúxin yo xiꞌin ra, saa íin yo. Tá kuꞌva si̱taku Iva yo Ndioxi Jesucristo xiꞌin ndee chee ni kúu mií ra, saa íyo ya i̱kan ra xiꞌin yo. Saa chi xaꞌa ya iin káchi ndi̱taku yo xiꞌin Jesucristo ta ndu̱u yo naꞌa na xa̱á, yakan xa síin koo yo, vívií ná koo yo nuu Ndioxi.

⁵ Xíni yo xaꞌa ya iin kuꞌva chi̱chi yo xiꞌin Jesucristo ta kúni kachi ya iin káchi ndi̱xiꞌi yo xiꞌin ra. Xaꞌa ya ikán kua kúndaa ini yo ya iin káchi nditaku yo kivi vaxi, tá kuꞌva ndi̱taku Jesucristo.

⁶ Saa chi tá ndi̱xiꞌi Jesucristo ndaꞌa cruzin, ta nda tá íin mií yo ndi̱xiꞌi saa ndi̱xiyo yo xiꞌin ra ndaꞌa nu. Ndaꞌa nu ikán ku nuu ndi̱ꞌi xaꞌa ya yata, ya ku̱u mií yo, ya ndee ni si̱keꞌe ini yo ikan yo ya väꞌa nuu Ndioxi.

⁷ Chi xaꞌa ya ndi̱xiꞌi yo xiꞌin Jesucristo, ta íin yo tá íyo naꞌa, na xa ndi̱xiꞌi xaꞌa ndee ku̱u mií kuachi na. Ta ndee kuachi yo köo ka ichí ya kaꞌnda chiñu ya nuu yo.

⁸ Xaꞌa ya ndi̱xiꞌi yo xiꞌin Jesucristo, ta saa kándixa tu yo ya koo yo xiꞌin ra ndiꞌi saa kivi ya vaxi va.

⁹ Ta xíni vaꞌa yo ya ndi̱xiꞌi Jesucristo ta ndi̱taku ra, yakan nda iin kivi küvi ka ra. Saa chi ndee ya xáꞌni ndìì ta nda loꞌo ka küchiñu ya kuu mií ya ndee nuu ra.

¹⁰ Iindaa ichí ndi̱xiꞌi ra xaꞌa kuachi yo, ta si̱ndiꞌi xaꞌa ra ndee ku̱u mií ya, nda iin ichí küvi ka ra ikan ya. Táku ra vitin ya chinuu vaꞌa ra ya toꞌo Ndioxi.

¹¹ Saa tu ndóꞌo̱ va, xaꞌa ya iin ndu̱u ndo xiꞌin Jesucristo, ta ndïndoso ini ndo ya kúu ndo naꞌa, na xa ndi̱xiꞌi nuu ndee kuachi ndo. Ta iin káchi tá kuꞌva táku Jesucristo, saa táku ndo xiꞌin ra ya ikan ndo ya vaꞌa chinuu vaꞌa ndo ya toꞌo Ndioxi.

¹² Täxi ndo kaꞌnda chiñu kuachi ndo nuu ikin kuñu ndo, ta ni xäa súvi ndo ya väꞌa ya kútoo ni ya ikan ya, chi ya ndíꞌi xaꞌa va ku ikin kuñu ndo.

¹³ Nda iin ñaꞌñu ikin kuñu ndo täxi ndo ikan ya ndá ka ñaꞌa ya väꞌa. Ndinuꞌu ni ka ini ndo nditaxi ndo mií ndo ndaꞌa Ndioxi xaꞌa ya ikan ndo ya vaꞌa, ya ndaa nuu ra. Chi vitin kúu ndo naꞌa, na táku nuu ra, ta yachi tá iin na ndíi saa ndi̱xiyo ndo nuu ra. Yakan nditaxi ndiꞌi ndo mií ndo ndaꞌa ra, tá káa iin ndaꞌa chiñu ya xáa chiñu ndaku nuu Ndioxi, saa ná koo ndo xiꞌin ra.

¹⁴ Ta vitin köo ka ndee kuachi ndo kaꞌnda chiñu ya nuu ndo. Chi köo íyo ka ndo tixin ley ya ta̱a ra Moisés xinaꞌa. Chi tixin ya kúꞌvi ni ini Ndioxi xíni ra ndóꞌo̱ va kua íyo ndo vitin, ta ya ikán ku ya xáꞌnda chiñu nuu ndo.

Xíniñuꞌu yo xaa súvi yo ya ndaa kúni Ndioxi

¹⁵ Ta vitin, ¿Án vaꞌa ikan ka ndo ya väꞌa? Chi köo íyo ka ndo tixin ley, sundi vitin ta ya xáꞌnda chiñu nuu ndo ku ya vaꞌa, ya kúꞌvi ni ini Ndioxi xíni ra ndóꞌo̱. Ta xaꞌa ya ñaa, ta ¿án vaꞌa ikan ni ka ndo ya väꞌa? ¡Nda loꞌo köo xíniñuꞌu ka ndo ikan ndo saa!

¹⁶ ¿Án köo xíni ndo iin taa ra sa̱ta naꞌa xáa chiñu ra nuu na, ta xíniñuꞌu ra xaa súvi ra ya kúni mií na? Saa íyo ndóꞌo̱ nuu kuachi ndo, tá tu xáa súvi ndo ya kúni kuachi ndo, ta kuvi ndo nuu Ndioxi, án tá xáa súvi ndo ya kúni Ndioxi ta kuchiñu ndo kutaku ndo xiꞌin ra.

¹⁷ Ndixaꞌvi ni Ndioxi vani ndee ni ndee xi̱ndoꞌni ndo ndaꞌa kuachi, ta ndinuꞌu ni ini ndo ka̱ndixa ndo tuꞌun ya ndi̱kani na nuu ndo tá si̱naꞌa na ndóꞌo̱.

¹⁸ Ñaa ndi̱saña ndo ndaꞌa kuachi ku̱aꞌan ndika ndo, ta vitin ndi̱kiꞌvi ndo ichí Ndioxi tá íin ndo sa̱ta ra xáa chiñu nuu ra, saa íin ndo, íkan ndo ya vaꞌa, ya ndaa.

¹⁹ Xiꞌin tuꞌun ya vaꞌa kundaa ini ndo xiꞌin ku ya káꞌan i xiꞌin ndo xaꞌa naꞌa na sa̱ta iin ra xáa chiñu na nuu ra. Chi xaꞌa ya kúu ndo na ñuu ivi yóꞌó ta ndíchi ni saa kundaa ini ndo xiꞌin ya. Sundi yachi tá täꞌan kandixa ndo Jesucristo, ta ta̱xi xiꞌin mií ndo ndaꞌa ya väꞌa i̱kan ni ndo ya kini, yakan vitin ta xíniñuꞌu ndo nditaxi ni ndo mií ndo ndaꞌa Ndioxi ya kuchiñu xaa súvi ndo ya vaꞌa, ya ndaa kúni mií ra.

²⁰ Yachi tá íin naꞌa na sa̱ta iin taa xa̱a chiñu nuu ra, saa ndi̱xiyo ndo ndaꞌa kuachi ndo xa̱a chiñu ndo nuu ya. Ta köo ndi̱kuchiñu ndo ikan ndo ya vaꞌa, ya ndaa, ya kúni Ndioxi.

²¹ Ta ni köo ñaꞌa vaꞌa ndi̱niꞌi ndo xaꞌa ya i̱kan ndo saa. Ndá ya kúkaꞌan nuu ndo xiꞌin va ku ya ndi̱niꞌi ndo, chi ichí nuu ndi̱xika ndo, ta ndisaa ichí nuu ndíꞌi xaꞌa ndo xíꞌi va ndo ndi̱xiyo ya ikán.

²² Ta vitin ta xa ndi̱saña ndo ndaꞌa kuachi nuu xi̱ñuꞌu ndo. Xa ta̱xi ndo mií ndo xáa chiñu ndo nuu Ndioxi, saa ndu̱u ndo naꞌa na i̱í nuu ra, ta xaꞌa ya ñaa kua ndi̱niꞌi ndo nuu ra ya koo ndo xiꞌin ra ndiꞌi saa kivi ya vaxi.

²³ Saa chi naꞌa, na íkan kuachi ta yaꞌvi na ya cháꞌvi kuachi na nuu na kua ndiꞌi xaꞌa na, kuvi na nuu Ndioxi. Sundi yoo ta si̱niꞌi Ndioxi ya vaꞌa nuu yo ya kutaku yo xiꞌin ra ndiꞌi saa kivi, ta nda iin ichí ndïꞌi xaꞌa yo, xaꞌa ya xa iin ndu̱u yo xiꞌin Tata yo Cristo Jesús.