ROMANOS 4 - Xochapa Mixteco

Ka̱ndixa ni ra Abraham Ndioxi

¹ Ná koto yo ndá kuꞌva ndi̱kiꞌin Ndioxi ra Abraham, xii sikua ndiꞌi yo judío.

² Süvi xaꞌa ya vaꞌa i̱kan ra nuu Ndioxi kua ndu̱u ra, ra vaꞌa, ra köo ka kuachi ku mií nuu Ndioxi. Saa chi tá tu xaꞌa ya ikán kua ta kuu mií ra ichí kaꞌan tái ni ra nuu yo, sundi küvi kaꞌan tái ra nuu Ndioxi.

³ Chi tuꞌun Ndioxi káꞌan ya, káchi ya saa: “Xaꞌa ya ka̱ndixa ni ra ya ndi̱kaꞌan Ndioxi xiꞌin ra, xaꞌa ya ikán kua nda̱sa vaꞌa ñaꞌa ra, ndu̱u ra tá káa iin ra köo ka kuachi kúu mií nuu Ndioxi”, káchi ya.

⁴ Ta xa xíni mií yo, tá kúu iin naꞌa na xáa chiñu, ta cháꞌvi ñaꞌa ra xáa chiñu na nuu xaꞌa chiñu íkan na. Ta xuꞌun ya kíꞌin na, ta süvi ya síniꞌi uun ra nuu na ku ya, chi ya cháꞌvi ñaꞌa ra xaꞌa chiñu íkan na nuu ra ku ya.

⁵ Sundi Ndioxi ta ndása vaꞌa ra naꞌa na kándixa ñaꞌa. Süvi xaꞌa ñaꞌa ya vaꞌa íkan na nuu ra kua ndása vaꞌa ra na. Vani na kúu mií kuachi ku na, ta síniꞌi uun ra ya vaꞌa nuu na, saa ndása vaꞌa ra na nuu mií ra xaꞌa ya kándixa na Jesucristo.

⁶ Ta iin kuꞌva saa ndi̱xiyo tu yuꞌu ra rey David va xaꞌa ya yóꞌó xinaꞌa, xaꞌa ya vaꞌa ni kée naꞌa na ndíkuiso vaꞌa Ndioxi nuu ra, ta süvi xaꞌa ya vaꞌa ni íkan na kua ndása vaꞌa ra na, tá íyo ya ndi̱kaꞌan ra rey David, káchi ra saa:

⁷ “Vaꞌa ni kée naꞌa na köo ka kuachi nuu Ndioxi, chi xa xa̱a kaꞌnu ini ra xaꞌa kuachi na.

⁸ Vaꞌa ni kée naꞌa, na köo síkuiso Ndioxi kuachi”. Soꞌva káꞌan tuꞌun Ndioxi ya ta̱a ra rey David xinaꞌa.

⁹ ¿Án ndisaa naꞌa, na judío, na ndíkunuu tuni Ndioxi ku na vaꞌa ni kée? ¿Án köo saa vaꞌa ni kée tu naꞌa na köo tuni kúu mií va? Xa ndi̱kaꞌan nde xiꞌin ndo xaꞌa ya ka̱ndixa ni ra Abraham Ndioxi, ta xaꞌa ya ikán kua ndu̱u ra, ra vaꞌa, ra köo ka kuachi kúu mií nuu Ndioxi.

¹⁰ Ndá kuꞌva ku ya ndu̱u ra Abraham, ra vaꞌa, ra köo ka kuachi kúu mií nuu Ndioxi túvi ndóꞌo̱? ¿Án xaꞌa ya ndi̱kunuu tuni Ndioxi ra kua, túvi ndo? Ta süvi saa íyo ya, chi xa yachi ka vi, ndu̱u ra, ra vaꞌa, ra köo ka kuachi kúu mií nuu Ndioxi.

¹¹ Ta sindiꞌi vi ndi̱kunuu tuni Ndioxi ra chi xa yachi ka vi ka̱ndixa ni ra Ndioxi. Ta xaꞌa ya ka̱ndixa ni ra yakan ndu̱u ra, ra vaꞌa nuu Ndioxi. Ta saa ndu̱u ra Abraham tá káa iva ndiꞌi ni kúu naꞌa, na ndinuꞌu ni kándixa Ndioxi, vani köo tuni Ndioxi kúu mií sava na. Ta xaꞌa ya kándixa na tá kuꞌva ka̱ndixa ra Abraham Ndioxi, xaꞌa ya ikán kua ndu̱u na, na vaꞌa, na köo ka kuachi kúu mií nuu ra.

¹² Ta saa tu mií yo judío, yo íyo tuni Ndioxi, seꞌe ñani sikua ra Abraham ku tu mií va yo, tá tu kándixa yo Ndioxi tá kuꞌva ka̱ndixa ñaꞌa ra. Ta kuꞌva saa ná kandixa yo Ndioxi tá kuꞌva ka̱ndixa mií ra yachi tá täꞌan ka kuu mií ra tuni Ndioxi.

Ndioxi ta ndixa xáa súvi ra tuꞌun ra xiꞌin naꞌa na kándixa ñaꞌa

¹³ Ndi̱kaꞌan Ndioxi xiꞌin ra Abraham ya taxi ra ñuu ivi yóꞌó ndaꞌa ra xiꞌin na seꞌe sikua ra. Ta süvi xaꞌa ya xáa súvi ra ley Ndioxi kua taxi ra ya ndaꞌa ra xiꞌin na seꞌe sikua ra. Sundi xaꞌa ya kándixa ni ra Ndioxi kua ndu̱u ra ra vaꞌa, ra káa tá káa naꞌa, na köo ka kuachi kúu mií nuu Ndioxi.

¹⁴ Ta kúndaa ini yo xaꞌa ya kándixa naꞌa Ndioxi, ta xaꞌa ya ikán kua taxi ra ya vaꞌa ndaꞌa na, ta süvi xaꞌa ya xáa súvi na ley ra kua níꞌi na ya vaꞌa nuu ra. Saa chi tá tu xaꞌa ya xáa súvi yo ley Ndioxi kua níꞌi yo ya vaꞌa nuu ra, ndikuu, ta köo ndá yaꞌvi tuꞌun ya ki̱ndoo ra xiꞌin na, ya mani uun ku ya, ta ni köo ndáa yaꞌvi ya kándixa na Ndioxi, ndikuu.

¹⁵ Chi ley Ndioxi ta tindoꞌo va ku ya táxi ya tá yáꞌa ndoso na ya. Chi tá köo káꞌan ya saa, ta köo kuachi ndíso na, ndikuu.

¹⁶ Xaꞌa ya kándixa yo Ndioxi kua taxi ra ya vaꞌa ndaꞌa yo. Ta saa ndiꞌi na seꞌe ñani sikua ra Abraham niꞌi na ya vaꞌa, ya ki̱ndoo Ndioxi taxi ra ndaꞌa na. Vaꞌa ni Ndioxi ta xaꞌa ya ikán kua si̱niꞌi ra ñaꞌa ya ndi̱kaꞌan ra siniꞌi ra na ivi, na kándixa ñaꞌa, tá kuꞌva ka̱ndixa ra Abraham Ndioxi, án na xíni ley ya ta̱a ra Moisés ku na, án süvi na xíni ley ku na. Sundi ndiꞌi naꞌa na ndinuꞌu ni kándixa Ndioxi, na ikán ku na ndu̱u tá íyo seꞌe ra Abraham. Saa chi ra Abraham ku iva ndiꞌi naꞌa, na kándixa ni Ndioxi.

¹⁷ Ta soꞌva ndi̱kaꞌan Ndioxi xiꞌin ra Abraham nuu ya ta̱a na xinaꞌa, káchi ra saa: “Yeꞌe ku Ndioxi, ta taxi i ichí ndaꞌa un nduu un iva ndiꞌi ni kúu naꞌa, na ndóo ñuu ivi yóꞌó”, káchi Ndioxi xiꞌin ra. Saa ka̱ndixa ra Abraham tuꞌun ya ndi̱kaꞌan Ndioxi xiꞌin ra. Chi Ndioxi ta kúu mií ra ichí ya sitaku ra na ndíi, saa kúu mií ra ichí ya sikuaꞌa ra ñaꞌa ya täꞌan kuaꞌa.

¹⁸ Tá ndi̱kaꞌan Ndioxi xiꞌin ra Abraham ya kaku kuaꞌa ni seꞌe ra, ta ndee ni uꞌvi ya nuu ra kandixa ra ya koo seꞌe ra, ta saa ni ka̱ndixa ra tuꞌun ya ndi̱kaꞌan Ndioxi xiꞌin ra. Xaꞌa ya ikán kua ndu̱u ra iva kuaꞌa ni na ñuu ivi yóꞌó. Chi ndi̱kaꞌan Ndioxi xiꞌin ra ya ndixa ni kuaꞌa koo seꞌe ñani sikua ra. Tá kuꞌva ndi̱kaꞌan Ndioxi xiꞌin ra saa ndi̱xiyo ya.

¹⁹ Ta siloꞌo xinu iin ciento kuiya ra Abraham, ta xíni ra köo ka ndee kúu mií ra ya koo seꞌe ra, saa tu yá síꞌi ra yá Sara va, xíni ra ya küchiñu ka kaku seꞌe yá xaꞌa ya kúu yá, yá núma. Vani xa ku̱ndaa ini ra ya köo ka ndee ra, xaꞌa ya xa ku̱chee ni ra. Vani saa káa ra ta ka̱ndixa ni ra Ndioxi xaꞌa tuꞌun ya ndi̱kaꞌan ra xiꞌin ra, ya xaa súvi ra tuꞌun ya ndi̱kaꞌan ra xiꞌin ra.

²⁰ Ta köo ndi̱xika uvi ini ra xaꞌa tuꞌun ya ndi̱kaꞌan Ndioxi xiꞌin ra. Ndee ka chi̱kaa ini ra ka̱ndixa ra Ndioxi. Ta saa xa̱a kaꞌnu ni ra Ndioxi.

²¹ Ta ndinuꞌu ni ini ra Abraham ka̱ndixa ra Ndioxi, ya kúu mií ra ndee sixinu ra ya ndi̱kaꞌan ra xiꞌin ra.

²² Xaꞌa ya ka̱ndixa ni ra Ndioxi yakan ndi̱kiꞌin Ndioxi ra ndu̱u ra taa, ra vaꞌa, ra káa tá káa iin naꞌa, na köo ka kuachi kúu mií nuu Ndioxi.

²³ Ta tuꞌun Ndioxi ya ta̱a na xinaꞌa káꞌan ya xaꞌa ra Abraham ya kúu ra, ra vaꞌa nuu Ndioxi, chi ka̱ndixa ñaꞌa ra, ta süvi ndisaa xaꞌa ra Abraham káꞌan ya saa.

²⁴ Chi káꞌan tu ya xaꞌa yoo va, yo kándixa Ndioxi, ra si̱taku Tata yo Jesús, ra chee nuu yo. Xaꞌa ya kándixa yo ra, ta nduu yo tá íin naꞌa, na köo ka kuachi kúu mií nuu Ndioxi.

²⁵ Saa chi mií ra ku ra ta̱xi Jesucristo ya ndi̱xiꞌi ra xaꞌa kuachi yo, ta xaꞌa ya ndi̱taku ra yakan ku̱chiñu ra si̱kitaꞌan ra yoo xiꞌin Ndioxi, saa ku̱chiñu yo ndu̱u yo tá íin naꞌa na vaꞌa, na köo ka kuachi kúu mií nuu ra.