ROMANOS 3 - Xochapa Mixteco

¹ Sava mií yo kú judío, ta ná ndikani ini yo ¿án ndáa yaꞌvi ni ya kúu yo judío án köo ndáa yaꞌvi ni ya? Ta ¿án ndáa yaꞌvi ni ya ndíkunuu tuni Ndioxi yoo, án köo ndáa yaꞌvi ni ya?

² Ya ndaa ku ya ndáa yaꞌvi ni ya kúu yo judío. Saa chi xiꞌna ndaꞌa yoo kua ta̱xi Ndioxi ichí ya kuu mií yo tuꞌun ra ya ndi̱kaꞌan ra.

³ Vani sava na ikán ta köo ndi̱xiin na kuni soꞌo na ya ndi̱kaꞌan ra xiꞌin na, ta ni köo ndi̱xaa súvi na ya kúni Ndioxi, ta ¿án xaꞌa ya ikán kua ndiko koo ini Ndioxi xäa súvi ra ya ndi̱kaꞌan ra xiꞌin na?

⁴ ¡Köo íkan Ndioxi saa! Süvi tá íin na ñuu ivi yóꞌó saa káa ra. Vani na ñuu ivi yóꞌó köo síxinu na ya káꞌan na, sundi Ndioxi ta nina síxinu ra tuꞌun ya káꞌan ra. Saa chi tuꞌun Ndioxi ya ta̱a na xinaꞌa, ta soꞌva káꞌan ya xaꞌa ra: Ndiꞌi naꞌa kundaa ini ya ndaa ni ini un, chi ndiꞌi tuꞌun ya káꞌan un, ta ndaa ni káꞌan un. Ni naꞌa ta nïꞌi na kuachi un, ta köo na taxi kuachi xaꞌa un. káchi tuꞌun Ndioxi xaꞌa ra, ya ta̱a na xinaꞌa.

⁵ Ya ndaa kua, xaꞌa ya väꞌa íkan yo ta sínaꞌa ya mií yo, ya iin mií Ndioxi ku ra ndaa ni nuu yo. Yakan kua ¿án vaꞌa kaꞌan yo xaꞌa Ndioxi, ra väꞌa ku ra chi táxi ra tíxuꞌvi yo xaꞌa kuachi yo? Soꞌva ndíkani xiní sava na ñuu ivi yóꞌó.

⁶ Ta süvi saa íyo ya, saa chi Ndioxi ku ra ndaa ni ini, ta ndiꞌi saa kivi íkan ra ya vaꞌa. Tá tu süvi ra ndaa ku ra, ta küchiñu ra xaa nani ra kuachi na, ndíkuu.

⁷ Saa káꞌan tuku sava na: “¿Ndachu káꞌan Ndioxi xaꞌa yo ya íyo kuachi yo tá tu xiꞌin tuꞌun vata káꞌan yo kua ndúndee ni ka ya ndaa kúu mií ra?” káchi na ikán.

⁸ Saa tu tá ndá naꞌa káꞌan: Vaꞌa, ná ikan ka yo ya väꞌa, saa niꞌi ni yo ya vaꞌa, káchi na. Káꞌan ni naꞌa xaꞌa nde ya si̱naꞌa nde na kaꞌan vata na, ta süvi ya ndaa kua káꞌan na xaꞌa nde, ya siki ku ya. Chi nda iin ichí köo ndi̱sinaꞌa nde na saa. Ta naꞌa na káꞌan saa, ta sindoꞌo ni Ndioxi na.

Yo íyo kuachi nuu Ndioxi ku ndiꞌi yo

⁹ Ta, ¿unku ya ndíkani ini yo? ¿Án vaꞌa ni ka mií yo kúu judío nuu naꞌa, na köo kúu judío? Ya ndaa ni káꞌan i xiꞌin ndo, süvi saa íyo ya, chi iin káchi íyo kuachi ndiꞌi yo nuu Ndioxi, tá íyo ya xa ndi̱kaꞌan nde xiꞌin ndo.

¹⁰ Tá kuꞌva káꞌan tuꞌun Ndioxi ya ta̱a na xinaꞌa, káchi ya saa: “Köo nda iin mituꞌun naꞌa, na ndaa ni ini nuu Ndioxi, nda iin mituꞌun na köo.

¹¹ Nda iin naꞌa köo xíin kundaa ini xaꞌa ya ndaa. Ta ni xïin tu na nduku na Ndioxi va.

¹² Ndiꞌi na si̱ndikoo ichí vaꞌa, ta ndi̱kiꞌin na ku̱aꞌan na ichí väꞌa. Si̱tivi ndiꞌi na mií na, ta nda iin na köo íkan ya vaꞌa. Nda iin mituꞌun na köo íkan ya vaꞌa nuu Ndioxi.

¹³ Tá íin yavi nuu ndúxin ndìì, ya núna yuꞌu, saa íyo yuꞌu na ikán. Ndisaa ya vata kána koo yuꞌu na, síndaꞌvi na naꞌa. Tá íin ya xatu kúu mií kiti ko̱ó kueꞌe, saa íin tuꞌun kána koo yuꞌu na.

¹⁴ Nina tuꞌun väꞌa ya távi chiꞌña na naꞌa kua kána koo yuꞌu na, saa káꞌan kini ni na ya sáa ini na.

¹⁵ Ta xa íyo kama ni na ya kaꞌni na ndìì.

¹⁶ Ndiꞌi ichí nuu yáꞌa na ku̱aꞌan na, síndiꞌi xaꞌa na ndiꞌi ya vaꞌa. Íkan na ya väꞌa xiꞌin naꞌa nuu ku̱aꞌan na, saa xáa suchi ni na ini naꞌa.

¹⁷ Na väꞌa yóꞌó ta nda loꞌo köo xíni na ya kundoo vaꞌa na xiꞌin taꞌan na.

¹⁸ Nda loꞌo köo íꞌvi na xíni na Ndioxi”, saa káꞌan tuꞌun Ndioxi ya ta̱a na xinaꞌa.

¹⁹ Xa xíni mií yo ndiꞌi ya káꞌan ley Ndioxi ya ta̱a na xinaꞌa, ta káꞌan ya xaꞌa mií yo ya ndi̱ndoo ya ndaꞌa yo, yakan köo ka ya taa nuu yo. Ta̱xi Ndioxi ley ikán ndaꞌa xii sikua yo na judío, ya ná kundaa ini ndiꞌi naꞌa ya ndíso yo kuachi nuu Ndioxi.

²⁰ Ta nda iin naꞌa küchiñu nduu na naꞌa, na vaꞌa nuu Ndioxi xaꞌa ya kúni na xaa súvi na ley ra. Saa chi ya xáa nduxa na kúni na sixinu na ley ra, ta ya kúndaa ini na xaꞌa íyo kuachi na nuu va ra ku ya.

Síkaku Ndioxi ndiꞌi naꞌa xaꞌa ya kándixa na Jesucristo

²¹ Sundi vitin ta ná kundaa ini yo chi köo naꞌa ndíkuchiñu sixinu ley Ndioxi. Sundi xa si̱naꞌa va Ndioxi yo ndá kuꞌva ku ya ndúu yo naꞌa, na vaꞌa, na köo ka kuachi ku mií nuu ra. Tá káꞌan mií ley ya si̱ndoo ra Moisés, saa ndi̱kaꞌan tu nda profeta, nda ndi̱kaꞌan ndoso tuꞌun yuꞌu Ndioxi xinaꞌa va.

²² Ta ya yóꞌó kua sínaꞌa Ndioxi nuu yo vitin: xaꞌa ya kándixa yo Jesucristo kua, ndúu yo naꞌa, na vaꞌa na köo ka kuachi kúu mií nuu ra, án yo judío ku yo, án süvi yo judío ku yo.

²³ Kuꞌva saa kua xi̱niñuꞌu Ndioxi i̱kan ra xiꞌin yo chi ndiꞌi ni kúu yo ndíso kuachi xaꞌa ya väꞌa íkan yo nuu ra. Ta xaꞌa ya ikán kua ku̱xika yo nuu ra, küvi kuyati yo koo yo xiꞌin ra nuu íyo ndiꞌi ya luvi ni yéꞌe̱.

²⁴ Sundi mií Ndioxi ku ra i̱kan ya vaꞌa xiꞌin yo, nda̱sa vaꞌa ra yoo, ndu̱u yo tá íin naꞌa, na köo ka kuachi ku mií nuu ra. Xaꞌa ya vaꞌa ni Ndioxi, yakan si̱niꞌi uun ra ya vaꞌa, ya chee ni yóꞌó nuu yo. Ta nda iin ñaꞌa köo ndíkan yo xaꞌa ya nda̱sa vaꞌa Ndioxi yoo. Iindaa Jesucristo ku ra cha̱ꞌvi xaꞌa yo chi ndi̱xiꞌi ra ndaꞌa cruzin.

²⁵ Si̱niꞌi Ndioxi Jesucristo ya ndi̱soko ra mií ra xaꞌa kuachi ndiꞌi ni kúu yo. Ndiꞌi naꞌa na kándixa ya ndi̱xita nií ra ndaꞌa cruzin xaꞌa kuachi na, ta xáa kaꞌnu ini ra xaꞌa kuachi na. Ta ya vaꞌa i̱kan Ndioxi xiꞌin na kua sínaꞌa na ya kúu ra iin taa ra ndaa ni ini. Ta köo ndi̱sitixuꞌvi kama ra na xaꞌa ya väꞌa i̱kan na xinaꞌa, ya kaꞌnu ni ini Ndioxi yakan ku̱ndee ini ra xiꞌin ya väꞌa i̱kan yo.

²⁶ I̱kan Ndioxi saa, xaꞌa ya kaꞌnu ni ini ra yakan kúni ra sinaꞌa ra mií ra nuu naꞌa ya ndixa kua íkan ra ya ndaa ni xiꞌin na. Saa chi ndiꞌi naꞌa, na kándixa Jesucristo, ta ndása Ndioxi na ndúu na, naꞌa na ndaa ni nuu ra. Ndúu na tá íin naꞌa na köo ka kuachi kúu mií nuu ra.

²⁷ Ta ¿án íyo vi ya vaꞌa ikan yo ya kuchiñu yo xaa kaꞌnu xiꞌin mií yo nuu Ndioxi? ¡Köo ya ikan yo! Chi süvi xaꞌa ya xáa súvi yo ley Ndioxi kua ndúu yo naꞌa, na köo kuachi kúu mií nuu ra. Xaꞌa ya kándixa yo Jesucristo kua, ndúu vaꞌa yo köo kuachi yo nuu Ndioxi.

²⁸ Xaꞌa ya yóꞌó kua káꞌan yo, iindaa mituꞌun ya ikan yo kandixa yo Jesucristo, ya yóꞌó kua táxi ndúu yo naꞌa na vaꞌa, na köo ka kuachi kúu mií nuu Ndioxi. Süvi xaꞌa ya xáa súvi yo ley ra kua ndúu yo naꞌa, na köo ka kuachi kúu mií nuu ra.

²⁹ ¿Án Ndioxi, ra chee nuu ndisaa na judío ku ra káꞌán ndo? ¿Án köo xíni ndo, Ndioxi ta kúu tu ra Ndioxi na köo kúu judío va? Ya ndaa kua saa íyo ya, Ndioxi ku ra chee ni nuu ndiꞌi na ñuu ivi yóꞌó.

³⁰ Iin mituꞌun ku Ndioxi mií ra ndaa ni, ta iin káchi íkan ra xiꞌin naꞌa, na ndúu vaꞌa nuu ra, na köo kuachi kúu mií nuu ra, án na judío ku na, án süvi na judío ku na. Xaꞌa ya kándixa na Jesucristo kua ndúu na, naꞌa na vaꞌa nuu ra.

³¹ Tá kándixa yo Jesucristo ta ¿án xaꞌa ya ikán kua síndiꞌi xaꞌa yo ya káꞌan ley Ndioxi ya ta̱a ra Moisés? Uꞌun, süvi saa íyo ya, köo káꞌan i saa xiꞌin ndo. Chi tá kándixa yo Jesucristo, ta ya ikán kua ndixa xáa súvi ka yo ley Ndioxi ya ta̱a na xinaꞌa.