ROMANOS 2 - Xochapa Mixteco

Ndioxi xaa nani ra kuachi naꞌa xiꞌin nina ya ndaa

¹ Ta ndóꞌo̱, ta ni köo ya taa nuu ndo, xaꞌa ya káꞌan ndo xaꞌa inka naꞌa, na íkan saa. Chi tá káꞌan ndo xaꞌa na ta chíkaa ndo kuachi sata mií ndo, saa chi saa íkan tu mií va ndo.

² Xa xíni yo mií Ndioxi ku juez, ta mií ra ku ra sindoꞌo ndiꞌi naꞌa, na íkan saa.

³ Ta ndóꞌo̱, káꞌan ndo xaꞌa inka naꞌa xaꞌa ya väꞌa íkan na. Ta ¿án ndíkani ini ndo kaku ndo nuu Ndioxi, ta xäa nduvaꞌa ra xiꞌin ndo káꞌán ndo? Saa chi saa tu ndóꞌo̱ va, tá íkan na ikán, saa íkan tu mií va ndo.

⁴ Xa kúndaa ini ndo, ya vaꞌa ni Ndioxi xiꞌin ndo, ta íyo ni ra ya kaꞌnu ini xiꞌin ndo xaꞌa ya väꞌa íkan ndo. Xaꞌa ya vaꞌa ni ini Ndioxi, ta ¿án ndiꞌi saa ichí kundee ini ra kuni ra ya väꞌa íkan ndo, káꞌán ndo? ¿án köo kúndaa ini ndo ya kúni Ndioxi sindikoo ndo ya väꞌa íkan ndo, ta ndikundikun ndo ichí ra? Xaꞌa ya ndátun ra ndiko koo ndo ichí ra, yakan íkan ni ra ya vaꞌa xiꞌin ndo.

⁵ Sava ndo ta soꞌo ni ndo, köo xíin ndo ndiko koo ini ndo xaꞌa ya väꞌa íkan ndo. Xaꞌa ya íkan ndo saa, ta kuandaa ka kuachi ndo ndúkuaꞌa ya nuu Ndioxi. Ta vaxi kivi saa xaa nduvaꞌa ni Ndioxi xiꞌin ndiꞌi ni kúu naꞌa, saa kundaa ini na ya ndixa ni sáa ini ra xíni ra na. Chi saa kua sinaꞌa Ndioxi na ya ndee ni ndaa xáa súvi ra kuachi na xiꞌin na.

⁶ Kivi ikán kua chaꞌvi Ndioxi iin iin naꞌa, tá íyo chiñu i̱kan na, saa koo ya chaꞌvi ra na.

⁷ Ndiꞌi naꞌa, na i̱kan ya vaꞌa, ta saa ikan Ndioxi xiꞌin na. Na ikán ku naꞌa, na köo ndi̱xikuiin ikan ya vaꞌa. Saa chi ku̱ni na xaa kaꞌnu na ra, saa taxi na ya toꞌo chee ni ndaꞌa ra. Ta na ikán ku na niꞌi ichí koo na xiꞌin ra ndiꞌi saa kivi.

⁸ Sundi sava naꞌa, na ikú ni ini, na köo xíin ikan ya vaꞌa, ndisaa ya väꞌa kúni na ikán na, na ikán ta kundoꞌo ni na ikan Ndioxi chi sáa ni ini ra xíni ra na, yakan yáꞌa ni xaa nduvaꞌa ra xiꞌin na.

⁹ Ndiꞌi naꞌa, na íkan ya väꞌa, ta ndee ni kundoꞌo na ikan Ndioxi. Xiꞌna na judío kundoꞌo saa, ta saa kundoꞌo tu naꞌa, na köo kúu judío va.

¹⁰ Sundi xaa kaꞌnu Ndioxi ndiꞌi naꞌa, na íkan ya vaꞌa, saa taxi ra ya toꞌo ndaꞌa na, ta taxi ra ya koo vaꞌa ni ini na. Xiꞌna na judío ikan ra ya vaꞌa xiꞌin, ta sindiꞌi saa ikan ra ya vaꞌa xiꞌin naꞌa, na köo kúu judío.

¹¹ Saa chi Ndioxi, ta köo ndíkaxin ra naꞌa, iin káchi íkan ra xiꞌin ndiꞌi na.

¹² Saa chi tá íkan ya väꞌa, na köo xíni ley Ndioxi, ta kuꞌva saa küniñuꞌu ra ley ra xiꞌin na ikán, saa chi mií ra ku juez yakan xa xíni mií ra ndá kuꞌva sindoꞌo ra na. Ta saa tu naꞌa, na xíni ley ra, tá íkan na ya väꞌa, ta kuꞌva saa kuniñuꞌu ra ley ra xiꞌin na, ya sindoꞌo ra na.

¹³ Naꞌa na xáa súvi ley Ndioxi ku naꞌa na köo kuachi ku mií nuu ra. Ta na ndisaa xíni soꞌo ya ta köo xáa súvi na ya, na ikán ku na íyo kuachi nuu ra.

¹⁴ Naꞌa na köo kúu judío, vani köo xíni na ley Ndioxi, ta saa ni xáa súvi na ley ra tá íkan na ya vaꞌa nuu Ndioxi. Na íkan saa ta sínaꞌa na mií na ya xíni na unkua vaꞌa ta unkua väꞌa.

¹⁵ Vani köo xíni na ley Ndioxi, sundi Ndioxi ta chi̱tuni ra koo ya nima na. Saa chi tá xíka ini na ikan na ndá ka chiñu, ta ya ndíchi íyo nima mií na kua táxi kundaa ini na ya vaꞌa xiꞌin ya väꞌa. Saa ndíkuiin ya tuꞌun ndaa xaꞌa na, chi káꞌan ya xaꞌa na íkan na ya vaꞌa, án káꞌan ya xaꞌa na íyo kuachi na nuu Ndioxi.

¹⁶ Ndiꞌi ya yóꞌó kuu tá ná tindaa kivi taxi Ndioxi ichí ndaꞌa Jesucristo ya xaa nani ra kuachi ndiꞌi naꞌa. Nda kuachi ya íkan sěꞌe na xaa nani ra ya xiꞌin na. Ya ikan Ndioxi saa, iin ku ya xiꞌin tuꞌun ya káꞌan ndoso i xiꞌin ndiꞌi naꞌa.

Ley ya ta̱a ra Moisés xiꞌin na judío

¹⁷ Sava ndóꞌo̱ xaꞌa ya kúu ndo na judío, ta saa íyo ley ra Moisés ndaꞌa ndo, ta ndee ni kándixa ndo ya, túvi ndo. Ta xaꞌa ya ñaa kua ndee ni kútai ini ndo, chi vaꞌa ni ndíkun ndo Ndioxi, túvi ndo.

¹⁸ Ta xíni ni ndo xaa súvi ndo ya kúni Ndioxi, ta saa ndee ni vaꞌa kúndaa teꞌe ini ndo ikan ndo ñaꞌa ya ndixa ndaa ni xiꞌin ya väꞌa, chi xa si̱kuaꞌa ni ndo ley ra, túvi ndo.

¹⁹ Yakan vaꞌa ni kúndaa ini ndo ya xíniñuꞌu ndo kunuu ndo ichí nuu na kuáa̱, chi tá káa ñu̱ꞌu̱ ya yéꞌe̱ nuu naá, saa íin ndo, túvi ndo.

²⁰ Ta ndíkani ini ndo xíni̱ ni ndo sinaꞌa ndo naꞌa, na köo xíni̱ tuꞌun Ndioxi, iin kuꞌva saa xíni̱ ni ndo sinaꞌa ndo naꞌa na sikan xa̱á kúndaa ini xaꞌa ya ndaa. Saa chi xíni̱ ni ndo ley Ndioxi ya kúu ya ndixa ndaa ni, káꞌán ndo.

²¹ Sava ndóꞌo̱, na kúu judío, ndo sínaꞌa naꞌa xaꞌa ichí Ndioxi, ¿ndachu köo xáa súvi ndo ya sínaꞌa ndo? Chi káꞌan ndo väꞌa sikuiꞌna naꞌa, tá tu saa ¿ta ndachu síkuiꞌna mií ndo?

²² Ta káꞌan ndo küvi koo tani naꞌa, káchi ndo, ¿ta ndachu íyo tani mií ndo? Saa káꞌan ndo kúndasi nuu ndo xíni ndo ndioxi ndíi, ta ¿ndachu kuakiꞌvi ndo síkuiꞌna ndo ini veꞌe ñuꞌu ndioxi ndíi?

²³ Káꞌan tái ni ndo, chi xíni ndo ley Ndioxi, káchi ndo. ¿Ta ndachu chíkaa ni̱nu̱ ndo tuꞌun Ndioxi, chi köo xáa súvi ndo ley ya káꞌan ra?

²⁴ Ndaa ni ndixa káꞌan tuꞌun Ndioxi ya ta̱a na xaꞌa ndo xinaꞌa, chi káꞌan ya: “Xaꞌa ya väꞌa íkan ndóꞌo̱ judío kua, kánaꞌa inka naꞌa, na köo kúu judío xaꞌa Ndioxi”, káchi tuꞌun Ndioxi.

²⁵ Tá tu xáa súvi ni ndo ley Ndioxi ta saa kua vaꞌa ndáa yaꞌvi ni ya ndíkunuu tuni Ndioxi ndóꞌo̱. Tá tu köo xáa súvi ndo ya, ta ni köo ndáa yaꞌvi ya ndíkunuu tuni Ndioxi ndóꞌo̱. Tá íin naꞌa, na köo tuni Ndioxi kúu mií, saa íin ndo.

²⁶ Sundi tá íyo naꞌa, vani süvi na judío ku na, ta xaꞌa ya xáa súvi ni na ya kúni Ndioxi, ta na ikán ku na íin tá íin naꞌa, na kúu mií tuni Ndioxi.

²⁷ Ta ndiꞌi naꞌa, na xáa súvi ley Ndioxi, vani köo tuni Ndioxi kúu mií na, na ikán ku na chíkaa kuachi sata ndo xaꞌa ya xáa súvi na ley ra. Ta ndóꞌo̱, vani kúu mií ndo ley ra ta ndíkunuu tuni ra ndóꞌo̱, sundi köo xíin ndo xaa súvi ndo ya kúni Ndioxi.

²⁸ Chi süvi ndisaa xaꞌa ya kúu mií na tuni Ndioxi ikin kuñu na kua ndúu na judío. Sundi tuni Ndioxi, ya ndixa, ta köo íyo ya ndisaa ikin kuñu na.

²⁹ Naꞌa na ndixa kúu judío ku naꞌa, na ndixa kándixa Ndioxi. Ta kúu mií na tuni Ndioxi ya ndixa ndaa kua kúu na, naꞌa na ndâku nima nuu ra. Chi mií Tachi I̱í Ndioxi kua ndi̱nama nima na yakan ndi̱kuiso vaꞌa ra na nuu mií ra. Ta süvi na ñuu ivi yóꞌó ku na ndíxaa saa, süvi mií na ku na ndíkuiso vaꞌa ñaꞌa, chi mií Ndioxi ku ra i̱kan saa xiꞌin na. Ndi̱kuiso vaꞌa ra na nuu ra.