ROMANOS 12 - Xochapa Mixteco

Soꞌva xíniñuꞌu na kándixa Jesucristo koo na

¹ Ñani yo xiꞌin kuꞌva yo, xíkan ni i ya mani nuu ndo ya ná nditaxi táku ndo mií ndo ndaꞌa Ndioxi. Soko ndiꞌi ndo mií ndo nuu ra. Tá íin naꞌa na ií, na síkusini ni ini ra, saa koo ndo. Nditaxi ndiꞌi ndo mií ndo ndaꞌa ra xaꞌa ya kúndaꞌvi ni ini ra xíni ra ndóꞌo̱. Tá íkan ndo saa ta xáa kaꞌnu ni ndo ra, ta ya ñaa ku mií ya ndixa ni ka ndáa yaꞌvi nuu ra.

² Ta köo ndo tá kuꞌva íyo na ñuu ivi yóꞌó, vaꞌa ka nditaxi ndiꞌi ndo mií ndo ndaꞌa ra ná ndinama ra ya xínituni ndo. Ná nduxaa kuꞌva ndíkani ini ndo. Saa kuchiñu ndo kundaa ini ndo, ta xaa súvi ndo ya kúni mií ra, ta saa kua ikan ndo ya vaꞌa, ya ndaa, ya xáa sini ndo ini ra.

³ Xaꞌa ya vaꞌa ni Ndioxi ta si̱niꞌi uun ra nuu i káꞌan i xiꞌin ndo, yakan xíkan ni i ya mani nuu ndo ndïkani ini ndo ya vaꞌa ni ka mií ndo nuu inka naꞌa. Vaꞌa ka kiꞌin ni ndo kuenta ndá kuꞌva ndíkani ini ndo xaꞌa mií ndo. Ta ndáꞌvi, ndáꞌvi ndikani ini ndo, ikan ndo tá kuꞌva íyo ya vaꞌa ta̱xi Ndioxi ndaꞌa iin iin ndo ya kándixa ndo ra.

⁴ Ta xa xíni mií ndo, ndá kuꞌva íyo ikin kuñu yo, kuaꞌa ni ñaꞌñu kúu mií ya, sundi xa síin, xa síin chiñu íkan iin iin ya.

⁵ Ta saa íyo ndiꞌi yo kándixa Jesucristo, ni kuaꞌa ni nuu ku yo, ni xa síin, xa síin chiñu íkan iin iin yo, sundi tá íyo ikin kuñu ra saa ndúu yo xiꞌin ra. Iin nuu ndúu ndiꞌi yo xiꞌin ra, xaꞌa ya ikán kua iin ndúu yo xiꞌin na taꞌan yo xaꞌa ra.

⁶ Ta xaꞌa ya kúꞌvi ni ini Ndioxi xíni ra yoo, ta xa síin xa síin si̱niꞌi taꞌvi ra iin iin yo, ta̱xi ra ya vaꞌa xínituni yo, ya ke̱e nuu ndivi ndaꞌa yo. Tá tu ndi̱niꞌi sava yo ya kaꞌan ndoso yo ndá ka tuꞌun ya vaxi nuu Ndioxi xiꞌin naꞌa, ta vaꞌa saa ná koo ya kaꞌan yo xiꞌin na, tá kuꞌva ndáa ni ini yo Ndioxi.

⁷ Tá íyo sava tu yo ndi̱niꞌi taꞌvi ya chindee taꞌan yo xiꞌin inka naꞌa, ta vaꞌa saa ná ikan yo xiꞌin na. Tá tu íyo sava tu yo ndi̱niꞌi taꞌvi ya sinaꞌa yo naꞌa, ta vaꞌa saa ná sinaꞌa yo na, ná ikan yo ya xiꞌin ndinuꞌu ini yo.

⁸ Ta sava tuku yo ndi̱niꞌi taꞌvi xaꞌa yo ndee xiꞌin naꞌa, ta kuꞌva saa ná ikan yo xiꞌin na. Tá sava tuku yo ndi̱niꞌi taꞌvi ya siniꞌi yo ñaꞌa nuu inka na, ta kuꞌva saa ná ikan yo xiꞌin na, ná ikan yo ya xiꞌin ndinuꞌu nima yo. Tá sava tu yo ndi̱niꞌi taꞌvi ya kunuu yo nuu naꞌa, ta kuꞌva saa ná ikan yo xiꞌin na, ndinuꞌu ini yo ná ikan yo saa. Tá sava tuku yo ndi̱niꞌi taꞌvi ya kundaꞌvi ni ini yo kuni yo naꞌa, ta kuꞌva saa ná kundaꞌvi ni ini yo ikan yo saa xiꞌin na ta ná kusini ni yo.

⁹ Tá kúꞌvi ni ini ndo xíni taꞌan ndo, ta ndixa ndinuꞌu ini ndo kuꞌvi ini ndo kuni taꞌan ndo. Kundasi nuu ndo kuni ndo ya väꞌa, ta chikaa ni ndo ndee ya kundikun ndo ya vaꞌa.

¹⁰ Kuꞌvi ni ini ndo kuni taꞌan ndo, tá kuꞌva kúꞌvi ini ndo xíni ndo ñani ndo án kuꞌva ndo na ka̱ku xiꞌin ndo. Chinuu vaꞌa ndo tuꞌun na taꞌan ndo, saa xaa toꞌo taꞌan ndo.

¹¹ Ñani yo xiꞌin kuꞌva yo, küxuxan ndo xaa chiñu ndo, ndinuꞌu ni ini ndo ikan ndo chiñu ya xíniñuꞌu ndo ikan ndo nuu Tata yo Jesús.

¹² Ta kusini ni ndo chi ndátun ndo taxi Ndioxi ya vaꞌa ndaꞌa ndo, tá vaxi tindoꞌo nuu ndo tíxuꞌvi ndo, ta kuaꞌa ndee ni ini ndo xiꞌin ya, ta xïkuiin ndo, kaꞌan ni ndo xiꞌin Ndioxi.

¹³ Saa koo ndúvi ndo ya chindee ndo na ndaꞌvi veꞌe ñuꞌu, na ñuu Ndioxi. Ta ndikuiso vaꞌa ndo naꞌa, na xáa veꞌe ndo, án ñuu yati vaxi na, án ñuu xika vaxi na, ta ndikuiso ndo na. Saa taxi ndo kuxi na, ta taxi ndo nuu kusun na.

¹⁴ Ta kaꞌan ndo xiꞌin Ndioxi xaꞌa naꞌa, na xáa nduvaꞌa xiꞌin ndo. Nduku ndo ya vaꞌa nuu Ndioxi xaꞌa na, ta ndüku ndo chiꞌña sata na.

¹⁵ Kusini ni ndo xiꞌin naꞌa, na kúsini, ta kuaku ndo xiꞌin naꞌa, na xáku.

¹⁶ Ta vívií koo ndo xiꞌin taꞌan ndo, käni taꞌan ndo. Kütai ni ini ndo nuu naꞌa, vívií koo ndo xiꞌin na, ta saa ikan ndo xiꞌin ndiꞌi na, ni na ndáꞌvi ku na, ta koto vií ndo na. Ta ndäsa xíni ni ka ndo mií ndo nuu inka naꞌa.

¹⁷ Tá väꞌa íkan naꞌa xiꞌin ndo, ta ïkan ndo tá íkan na. Kundiꞌi ni ka ini ndo ikan ndo ya vaꞌa nuu ndiꞌi naꞌa.

¹⁸ Xaꞌa ni ndo ndee, nduku ndo kuꞌva ya koo vaꞌa ndo xiꞌin ndiꞌi naꞌa.

¹⁹ Ñani yo, xiꞌin kuꞌva yo, ndüku ndo kuꞌva ya sindiko koo ndo ya väꞌa nuu taꞌan ndo, chi mií Ndioxi ku ra chaꞌvi nuu naꞌa xaꞌa ya väꞌa íkan na xiꞌin ndo. Tá kuꞌva káꞌan tuꞌun mií ra, ya káchi saa: “Yeꞌe ku i kúu mií ichí ya xaa nduvaꞌa i xiꞌin naꞌa, chaꞌvi i na tá kuꞌva íkan na”, káchi Iva yo Ndioxi.

²⁰ Ta saa káꞌan tuku Ndioxi, káchi ra: “Tá tu kúni kuxi naꞌa, na sáa ini xíni ndóꞌo̱, ta vaꞌa taxi ndo kuxi na. Tá tu íchi na tikuii, ta vaꞌa taxi ndo tikuii koꞌo na”. Chi tá íkan ndo saa xiꞌin na, ta tá íin ñu̱ꞌu̱ yěꞌé saa íin ya síkoyo ndo xiní na, án táxi ndo kúkaꞌan nuu na.

²¹ Täxi ndo kuchiñu ya väꞌa nuu ndo, ya vaꞌa ku ya xíniñuꞌu ndo ikan ndo. Tá íkan ndo saa, ta síndiꞌi xaꞌa ndo ya väꞌa.