ROMANOS 1 - Xochapa Mixteco

Káꞌan ndioxi ra Pablo xiꞌin na ndíkun Jesús ndóo ñuu Roma

¹ Ndioxi ná koo xiꞌin ndo, na taꞌan yo, na ndóo ñuu Roma. Yeꞌe ku ra Pablo, ra xáa chiñu nuu Jesucristo, ra ka̱na Ndioxi ku i, ta ta̱xi ra chiñu ndaꞌa i ya kúu i apóstol, saa ti̱ꞌvi ra yeꞌe ya kaꞌan ndoso i tuꞌun vaꞌa xaꞌa Jesucristo xiꞌin naꞌa. Táa i tutu yóꞌó xaa ya ndaꞌa ndo.

² Saa chi xa ki̱ndoo Ndioxi xiꞌin nda profeta nda ndi̱kaꞌan ndoso tuꞌun yuꞌu ra xinaꞌa, ya xaa súvi ra xaꞌa tuꞌun vaꞌa ya ndi̱kaꞌan ra xiꞌin nda ikán xaꞌa Jesucristo. Saa ta̱a nda ikán tuꞌun nuu tutu ya náni Tuꞌun Ií Ndioxi.

³ Ta xaꞌa Tata yo Jesucristo ra kúu Seꞌe Ndioxi, ra chee nuu yo kua ndíkani tuꞌun vaꞌa ikán. Ta kúu Jesucristo Seꞌe sikua ra rey David, xaꞌa ya ka̱ku ra tá kuꞌva káku ndiꞌi yo ñuu ivi yóꞌó.

⁴ Ta si̱taku Ndioxi ra tixin ndee Tachi I̱í ra, ndi̱taku ra tañu na ndíi, saa ndi̱kiꞌin ndiꞌi ra ichí ya kaꞌnda chiñu ra xaꞌa ya kúu ra Seꞌe Ndioxi.

⁵ Ta xaꞌa mií ra kua ta̱xi Ndioxi ya toꞌo chee ni ndaꞌa i kúu i apóstol, yakan ti̱ꞌvi ra yeꞌe ya chindee taꞌan i xiꞌin ndiꞌi ni kúu naꞌa, na ndóo ndiꞌi ni kúu ñuu ivi, na köo kúu judío ya kandixa na ra, saa xaa toꞌo na ra.

⁶ Saa ndóꞌo̱ ndóo ñuu Roma, chi ka̱na Ndioxi ndóꞌo̱ ya kandixa ndo Jesucristo, saa íyo ndo xiꞌin ra.

⁷ Táa i tutu yóꞌó xaa ya ndaꞌa ndóꞌo̱, ñani yo, xiꞌin ndóꞌo̱ kuꞌva yo ndóo ñuu Roma, chi ndóꞌo̱ ku naꞌa, na kúꞌvi ni ini Ndioxi xíni ra. Saa ka̱na ra ndóꞌo̱ ya kuu ndo naꞌa, na i̱í nuu ra, koo vaꞌa ni ini ndo, ná taxi ni ra ya vaꞌa ndaꞌa ndo ya ndi̱niꞌi uun ndo nuu Iva yo Ndioxi xiꞌin Tata yo Jesucristo.

Kúni ra Pablo kuꞌun ra koto ra na kándixa Jesucristo ndóo ñuu Roma

⁸ Xiꞌna kúni i kaꞌan i xiꞌin ndo tuꞌun yóꞌó: tixin ichí Jesucristo káꞌan i xiꞌin Ndioxi, táxi ni i tixaꞌvi ndaꞌa ra xaꞌa ndo. Saa chi ndee ni kándixa ndo Jesucristo yakan ndiꞌi ni kúu ñuu xíni soꞌo na tuꞌun vaꞌa xaꞌa ndo.

⁹ Ta mií Iva yo Ndioxi ndíkuiin xaꞌa i ya köo xíkuiin i káꞌan ni i xiꞌin ra xaꞌa ndo. Ndinuꞌu ni ini i xáa chiñu i nuu ra káꞌan ndoso i tuꞌun vaꞌa xaꞌa Jesucristo, ra kúu Seꞌe ra.

¹⁰ Saa xáku ndáꞌvi ni i nuu ra, káꞌan i xiꞌin ra, ndúku i ya mani nuu ra taxi ra ichí ndaꞌa i ya kuꞌun i koto i ndóꞌo̱. Ná taxi mií ra ichí ndaꞌa i saa xaa i nuu ndo.

¹¹ Saa chi yeꞌe ta kúni i xaa i koto i ndóꞌo̱ ya ndituꞌun i xiꞌin ndo xaꞌa ya ndikiꞌin ndo ndee vaꞌa ya vaxi nuu Ndioxi, ya taxi ka ya ndee ndaꞌa ndo kandixa ni ka ndo Jesucristo.

¹² Ta saa ndóꞌo̱ xiꞌin yeꞌe, chindee taꞌan yo xiꞌin na taꞌan yo, saa chi ndinuꞌu ni ini yo kándixa yo Jesucristo.

¹³ Ñani yo xiꞌin kuꞌva yo, kúni i ná kundaa ini ndo, xa kuaꞌa ni ichí kúni i xaa i nuu ndo koto i ndóꞌo̱, ta köo ndíkuchiñu xaa i, íyo ya ndi̱kasi nuu i. Chi kúni i xaa i koto i chiñu vaꞌa íkan ndo, taꞌan chiñu vaꞌa íkan na taꞌan yo, na köo kúu judío, na ndóo inka ñuu nuu ndi̱xaꞌan i xi̱to i na.

¹⁴ Xaꞌa ya vaꞌa ni íkan Jesucristo xiꞌin i, yakan ndee ni xíniñuꞌu i kaꞌan ndoso i tuꞌun vaꞌa xaꞌa ra xiꞌin ndiꞌi naꞌa, na káꞌan tuꞌun griego tin na köo káꞌan tuꞌun griego, na ndíchi ni xiꞌin na köo xíni kaꞌvi, ndiꞌi na yóꞌó ku na xíniñuꞌu ni i kaꞌan i xiꞌin.

¹⁵ Xaꞌa ya ikán kua kúni ni i xaa i ndikani i tuꞌun vaꞌa xaꞌa Jesucristo nuu ndóꞌo̱ ndóo ñuu Roma.

Káꞌan ra Pablo tuꞌun vaꞌa xaꞌa Jesucristo ya ndee ni ndee kúu mií ya

¹⁶ Kúni i ná kundaa ini ndo, chi yeꞌe ta köo kúkaꞌan nuu i ya kándixa i tuꞌun vaꞌa xaꞌa Jesucristo, chi tuꞌun yóꞌó kúu mií ya ndee Ndioxi ya sikaku ya ndiꞌi naꞌa, na kándixa ya káꞌan ya. Xiꞌna ni ka na judío ku na xi̱ni soꞌo tuꞌun vaꞌa xaꞌa Jesucristo, saa xi̱ni soꞌo tu naꞌa, na köo kúu judío va ya.

¹⁷ Ta tuꞌun vaꞌa xaꞌa Jesucristo kua sínaꞌa yoo ndá kuꞌva kua ndíkuiso vaꞌa Ndioxi naꞌa nuu ra. Saa ndása ra na ivi na vaꞌa, na köo ka kuachi kúu mií nuu ra. Tá kuꞌva káꞌan mií tuꞌun Ndioxi ya ta̱a na xinaꞌa, káchi ya saa: “Naꞌa na ndíkuiso vaꞌa Ndioxi, na ndúu tá íin naꞌa, na köo ka kuachi ku mií nuu ra, na kándixa ni ñaꞌa, na ikán ku na kuchiñu kutaku xiꞌin Ndioxi”, káchi tuꞌun ra.

Ndiꞌi yo íyo kuachi nuu Ndioxi

¹⁸ Ndioxi ta sínaꞌa ra yóo ya ndixa kua sáa ni ini ra xíni ra ndiꞌi ñaꞌa ya väꞌa íkan yo, xiꞌin ya väꞌa íkan naꞌa xaꞌa ya köo xíin na kandixa na ra, tin ya väꞌa íkan na xiꞌin taꞌan na. Vani xa xíni na ya ndaa ta köo xíin na ikan na ya, xaꞌa ya íkan na saa, ta köo táxi na kundaa ini nda iin naꞌa ya ndaa.

¹⁹ Xa kúndaa vaꞌa ini na xaꞌa ya íkan Ndioxi, chi xíto na ndiꞌi ya vaꞌa íkan ra ñuu ivi yóꞌó. Ta xiꞌin ndiꞌi ya vaꞌa yóꞌó kua sínaꞌa teꞌe ra mií ra nuu na.

²⁰ Nda iin naꞌa küchiñu kuni xiꞌin nuu Ndioxi, sundi nda kivi núnu̱ú si̱kuaꞌa ra ñuu ivi ta xiꞌin ndiꞌi ñaꞌa ya si̱kuaꞌa ra kua kúchiñu kúndaa ini na ya íyo Ndioxi. Ta saa kúndaa ini na ya iindaa mií ra ku Ndioxi ra ndinuꞌu ni, ta ndee ni ndee kúu mií ra ta nda iin kivi ndïꞌi xaꞌa ndee ra. Yakan nda iin naꞌa, ta köo ka ya taa nuu na, saa chi xa ku̱ndaa vaꞌa ini na xaꞌa ñaꞌa ya si̱kuaꞌa Ndioxi.

²¹ Vani xa xíni naꞌa ya íyo Ndioxi, ta ni köo ndi̱xiin na xaa toꞌo na ra, ni köo ndi̱taxi na tixaꞌvi ndaꞌa ra. Ta saa ndu̱ndee ka ya ndíkani ini mií na xaꞌa ndisaa chiñu kiꞌvi. Ñaa ndu̱tuun vaꞌa ka nima na.

²² Saa ndíkani ini na ya ndu̱ndíchi ni na, ta süvi ya ndaa kua, na ndu̱kiꞌvi vaꞌa ka va ku na.

²³ Saa ndo̱ꞌo na chi köo ndi̱xiin na xaa toꞌo na Ndioxi ra ndaa, ra chee ni, ra ndee ni ndee kúu mií. Ta ndee ni ka kúsini na xáa toꞌo na naꞌna naꞌa, na köo táku ka ñuu ivi yóꞌó, án naꞌna kiti ndachi, án naꞌna kiti xíka xiꞌin kumi xaꞌa, án naꞌna kiti ñúu tixin nuu ñuꞌú.

²⁴ Xaꞌa ya íkan na saa kua si̱ndoo ndaꞌa Ndioxi na íkan na ya kúni mií na. Saa sa̱ña ndaꞌa ra na, ta xa̱á na íkan na ñaꞌa xiꞌin taꞌan mií na, ya kini ni káa, ya ka̱ꞌan ni nuu. Xaꞌa ya íkan na saa ta köo xáa toꞌo na ikin kuñu na.

²⁵ Köo ndi̱xiin na kandixa na Ndioxi, ra ndaa, ta vaꞌa va ka̱ndixa ni na ndioxi, ra vata. Xa̱a toꞌo na tin xa̱a kaꞌnu na ndiꞌi ñaꞌa ya si̱kuaꞌa Ndioxi, ta köo ndi̱xiin na xaa kaꞌnu na Ndioxi ra si̱kuaꞌa ñuu ivi yóꞌó xiꞌin ndivi. ¡Sundi iin mituꞌun mií Ndioxi yóꞌó ku ra xíniñuꞌu ni yo xaa kaꞌnu yo ndiꞌi saa kivi! Saa ná koo.

²⁶ Xaꞌa ya köo ndi̱xiin na xaa toꞌo na Ndioxi ra ndaa, yakan xa̱á na íkan na ya ka̱ꞌan ni nuu. Tá kúu ná síꞌi ta köo xíin ka ná kuni ná taa, yakan xa̱á kuakiꞌvi xiꞌin taꞌan mií ná.

²⁷ Saa tu nda taa, köo xíin ka nda kuni nda ná síꞌi, chi taa taꞌan mií va nda xa̱á nda kútoo ni nda yakan xa̱á nda kuakiꞌvi nda xiꞌin taꞌan mií nda. Xaꞌa ya kini ni íkan nda, ka̱ꞌan ni káa nuu ya íkan nda xiꞌin taꞌan nda, xaꞌa ya ikán kua ta̱xi Ndioxi tindoꞌo nuu nda. Ndóꞌo ni ikin kuñu nda.

²⁸ Xaꞌa ya ndi̱ndoso ini na xaꞌa Ndioxi, ta ni köo ndi̱xiin na kundaa ini na xaꞌa ra, yakan sa̱ña ndaꞌa ra na, xa̱á na íkan na ya väꞌa, ya ndíkani xiní mií na.

²⁹ Ta íyo ni ndiꞌi nuu ya väꞌa ini na. Nda taa kuakiꞌvi nda xiꞌin ná ñaꞌa, ta süvi ná síꞌi nda ku ná, saa ná ñaꞌa kuakiꞌvi ná xiꞌin taa, ta süvi ií ná ku nda. Kini ni íkan na xiꞌin mií na. Ni köo xáa ini na xiꞌin ya kuika kúu mií na, nina ya väꞌa kútoo na ikan na, uní ni ini na, na xáꞌni ndìì ku na. Kútoo ni na kani taꞌan na xiꞌin taꞌan na, síndaꞌvi na naꞌa, ikú ni na.

³⁰ Kútoo na ndituꞌun vata na xaꞌa naꞌa. Chíkaa na kuachi siki inka naꞌa, kúndasi nuu na xíni na Ndioxi, ni köo xáa toꞌo na naꞌa, kútai ni ini na, chínuu vaꞌa ni na tuꞌun mií na, nina ya väꞌa ndíkani ini na ikan na, ni köo xíni soꞌo na ya káꞌan iva siꞌí na xiꞌin na.

³¹ Kíꞌvi ni na, ndíxiko taꞌan mií na. Köo kúꞌvi ini na xíni taꞌan na, ni köo táꞌnu ini na, ndee ni ku̱aꞌan na, ni köo kúndaꞌvi ini na xíni na nda iin naꞌa.

³² Na íkan saa, ta xa xíni vaꞌa na ya íyo ley Ndioxi ya káꞌan xaꞌa na ya xíniñuꞌu na kuvi na. Ta saa ni xïin na sindoo na ya väꞌa íkan na, saa kúsini na xíni na naꞌa, na íkan taꞌan ya väꞌa íkan mií na.