San Mateo 28 - Xochapa Mixteco

Kivi ndi̱taku Jesús

¹ Tá ndi̱yaꞌa kivi i̱í ya ndíkundee na, saa kuaꞌan túvi inka kivi núnu̱ú xaꞌa semana, kivi domingo, saa ndi̱xaa yá María Magdalena xiꞌin inka yá María, ndi̱xaa ná xíto ná nuu chi̱kaa nda ikin kuñu Jesús.

² Iin ku̱u soꞌva ta xa̱á ndee ni táan, chi nu̱u iin tatun Ndioxi ke̱e nuu ndivi si̱kutaꞌa ya yu̱ú kaꞌnu ni ndási yuꞌu kava ikán, saa ndi̱kunduꞌu koo ya sata mií yu̱ú ikán.

³ Ta ndee ni yéꞌe̱ nuu mií tatun Ndioxi ikán, tá ndíyeꞌe taxan saa yéꞌe̱ nuu ya, ta ndakua yaa kachi toto ya.

⁴ Saa tá xi̱ni mií nda lapa ndáa yeꞌe kava ikán ya, ta ndee ka vi ndi̱ndiꞌvi nda xa̱á kísi ni̱nù ya nda. Ñaa ndi̱koyo nda nuu ñuꞌú, tá íin nda ndíi saa ndu̱u nda.

⁵ Saa ndi̱kaꞌan tatun Ndioxi xiꞌin ná ñaꞌa ikán, káchi ya saa: ―Ku ïꞌvi ndo, saa chi xíni i ya ndúku ndo Jesús ra xa̱ꞌni na nuu cruzin.

⁶ Tá íyo ya xa ndikaꞌan ra xiꞌin ndo saa ndi̱xiyo ya, chi xa ndi̱taku va ra. Köo ka ra ndíkaa yóꞌó, kuayaꞌa ndo koto ndo nuu xi̱ndikaa ra.

⁷ Ta kuáꞌan ndo, kama ni kuꞌun ndo kaꞌan ndo xiꞌin nda xi̱taꞌan xiꞌin ra, kachi ndo saa: “Xa ndi̱taku ra tañu na ndíi, ta xiꞌna ka ra kunuu nuu ndo kuꞌun ra chí estado Galilea, ikán kuni ndo ra”. Ya yóꞌó ku ya vaxi i kaꞌan i xiꞌin ndo ―káchi tatun Ndioxi xiꞌin ná.

⁸ Ndi̱ndiꞌvi ni ná, sundi kúsini ka vi ná. Ñaa ka̱na koo ná ndee ka vi xínu ná kuaꞌan ná ndituꞌun ná xiꞌin nda xi̱taꞌan xiꞌin ra.

⁹ Saa iin ku̱u soꞌva ta ndi̱kitaꞌan ná xiꞌin Jesús, saa chi̱ndee ra ná. Ñaa ku̱yati ná nuu ra si̱kusiti ná nuu ra saa nu̱mi ná xaꞌa ra xáa kaꞌnu ná ra.

¹⁰ Ñaa ndi̱kaꞌan ra xiꞌin ná, káchi ra saa: ―Ku ïꞌvi ndo, kuáꞌan ndo kaꞌan ndo xiꞌin nda xi̱taꞌan xiꞌin i ná kuꞌun nda estado Galilea, ta ikán kuni nda yeꞌe ―káchi ra xiꞌin ná.

Ya ndi̱tuꞌun nda lapa nda xi̱ndaa yeꞌe kava

¹¹ Tá ka̱na koo ná síꞌi ikán kuaꞌan ná, saa ka̱na koo tu sava nda lapa xi̱ndaa yeꞌe kava ikán va. Kuaꞌan nda ñuu Jerusalén ndituꞌun nda xiꞌin nda naꞌnu nuu sutu xaꞌa ya ku̱u xi̱ni nda.

¹² Ta nda naꞌnu nuu sutu xiꞌin nda xikuaꞌa ndi̱kitaꞌan nda ya chitaꞌan tuꞌun nda xaꞌa ya ikán. Ñaa ta̱xi nda kuaꞌa ni xuꞌun ndaꞌa nda lapa ikán.

¹³ Saa ndi̱kaꞌan nda xiꞌin nda, káchi nda saa: ―Soꞌva kaꞌan ndo: “Ñǔu tá ndóo nde kíxi nde saa ndi̱xaa nda xi̱taꞌan xiꞌin ra si̱kuiꞌna nda ikin kuñu ra kuaꞌan xiꞌin nda”, kachi ndo xiꞌin naꞌa.

¹⁴ Tá ná kundaa ini ra gobernador xaꞌa ya yóꞌó, ta kündiꞌi ini ndo mií nde ndikuiso chiñu sixinu nde ini ra, ta köo ya kundoꞌo ndo ―káchi nda naꞌnu nuu sutu xiꞌin nda lapa ikán.

¹⁵ Saa ki̱ꞌin nda ikán xuꞌun, ta ka̱na koo nda kuaꞌan nda, tá íyo ya xi̱ni soꞌo nda, saa íyo ya i̱kan nda. Yakan nda kivi vitin ta saa íyo ya káꞌan mií na judío.

Ta̱xi Jesús chiñu chee ni ndaꞌa nda xi̱taꞌan xiꞌin ra

¹⁶ Saa ka̱na koo uxi iin saa nda xi̱taꞌan xiꞌin ra kuaꞌan nda estado Galilea, ta kuaꞌan nda xiki nuu xa ndi̱kaꞌan ra xiꞌin nda.

¹⁷ Tá xi̱ni nda Jesús, saa xa̱a kaꞌnu ñaꞌa nda, vani sava nda ta xíka uvi va ini nda xiꞌin ra.

¹⁸ Saa ku̱yati Jesús nuu nda, ta ndi̱kaꞌan ra xiꞌin nda, káchi ra saa: ―Ndaꞌa yeꞌe ta̱xi Ndioxi ichí xaꞌa ndiꞌi ni kúu ñaꞌa ya íyo nuu ndivi tin ya íyo ñuu ivi yóꞌó.

¹⁹ Yakan vitin ta kuáꞌan ndo ndiꞌi saa xaꞌa ñuu ivi ta sinaꞌa ndo naꞌa ndá kuꞌva kundikun na ichí i, saa sikuchi ndo na tixin kivi Iva i, xiꞌin tixin kivi Seꞌe ra, xiꞌin tixin Tachi I̱í Ndioxi.

²⁰ Saa sinaꞌa ndo na ya ná xaa súvi ndiꞌi na ya ndi̱kaꞌan i xiꞌin ndo. Ta ná kundaa ini ndo, chi yeꞌe, ta ndiꞌi saa kivi koo i xiꞌin ndo, iin saa nda ná ndiꞌi xaꞌa ñuu ivi ―káchi Jesús xiꞌin nda xi̱taꞌan xiꞌin ra. Saa ná koo.