San Marcos 5 - Xochapa Mixteco

Taa ra kúu mií tachi nduvaꞌa, ñuu Gadara

¹ Saa ku̱u ndi̱xaa Jesús xiꞌin nda ítaꞌan xiꞌin ra inka ñaꞌñu yuꞌu nduta ñûꞌu ñuu na Gadara.

² Saa tá nu̱u soꞌva Jesús sata itun barco, ta ku̱yati iin taa, ra kúu mií tachi nduvaꞌa nuu ra, ta ra ikán ke̱ta ra kava nuu ndúxin ndìì, ndi̱xaa ra nuu Jesús.

³ Ta íyo ra kava nuu ndúxin ndìì ta nda iin na köo kúchiñu xiꞌin ra, ni cadena núꞌni ra, ta köo kúchiñu ya xiꞌin ra.

⁴ Kuaꞌa ka vi ichí ka̱tun na xaꞌa ra xiꞌin cadena kàà, ta ndakua iin síkuachi vali ra ya, nda iin na köo kúchiñu xiꞌin ra.

⁵ Ndiꞌi saa ichí ndáꞌi koꞌo ra xíka ra, nduvi niuun íkan ra saa xíka ra iku tin kava nuu ndi̱nduxin naꞌa, sítikueꞌe ka vi ra mií ra xiꞌin yu̱ú.

⁶ Saa tá xi̱ni ra Jesús, xíka ka xi̱ni ñaꞌa ra, ñaa xínu ra ndi̱xaa ra si̱kusiti ra nuu ra.

⁷ Iin ndáꞌi koꞌo mií ra, káchi ra saa: ―Tata, ¿unkua kúni un ikan un xiꞌin i? Chi yóꞌo̱ ku Jesús Seꞌe Ndioxi ra kaꞌnu. Xáku ndaꞌvi i nuu un, xäa nduvaꞌa un xiꞌin i ―káchi ra xiꞌin Jesús.

⁸ Saa ndi̱kaꞌan ra kúu mií tachi nduvaꞌa, chi xa yachi vi ndi̱kaꞌan Jesús xiꞌin mií tachi nduvaꞌa ikán, káchi ra saa: ―¡Tachi nduvaꞌa, keta kuáꞌan ta saña un ra yóꞌó ná nduvaꞌa ra! ―ka̱chi ra xiꞌin ya.

⁹ Saa ndi̱ndakan tuꞌun Jesús ya, káchi ra saa: ―¿Unkua náni un, káchi ra xiꞌin ya? Saa ndi̱kuiin ya, káchi ya saa: ―Legión náni i, saa chi kuaꞌa ni ku nde ―káchi ya.

¹⁰ Saa xáku ndaꞌvi ya nuu Jesús, káꞌan ya xiꞌin ra ya ná täva ñaꞌa ra kuꞌun xika ya inka ñaꞌñu.

¹¹ Ta yati ikán ñúꞌu kuaꞌa kini xíxi ri xaꞌa iin iku.

¹² Saa xáku ndaꞌvi mií tachi nduvaꞌa ikán nuu Jesús, káchi ya saa: ―Taxi loꞌo un ná kuꞌun nde kee nde ini kini kaá ―káchi ya xiꞌin ra.

¹³ Saa ta̱xi Jesús ichí ndaꞌa ya, ñaa si̱ndoo ya ra taa ikán, ta ndi̱xaa ya ndi̱kee ya ini kiti kini ikán. Ta kúu ri ikán uvi mil, ñaa iin xi̱nu ri ta si̱koyo ri mií ri taꞌvi ta ndi̱koyo ri ini nduta ñûꞌu. Ñaa ndi̱kaꞌan ndaa ri tikuii ta ndi̱xiꞌi ndiꞌi ri.

¹⁴ Saa xínu ni mií na ndáa kini ikán ndi̱xaꞌan na ñuu naꞌnu tin iku, ndi̱tuꞌun ndiꞌi na xiꞌin naꞌa xaꞌa ya ku̱u. Saa kuaꞌa ka vi na ndi̱xaa xíto ya ndo̱ꞌo ra taa ikán.

¹⁵ Tá ndi̱xaa na nuu Jesús, ta xi̱ni na ra ku̱u mií tachi nduvaꞌa ikán, xi̱ni na ra ndu̱vaꞌa ra índuꞌu koo ra nuu Jesús. Ta ndi̱ndiꞌvi ka vi na.

¹⁶ Ta ndiꞌi na xi̱ni ya ndo̱ꞌo ra ku̱u mií tachi nduvaꞌa xiꞌin ya ndo̱ꞌo kiti kini, ndítuꞌun na xiꞌin inka naꞌa xaꞌa ya xi̱ni na.

¹⁷ Saa xa̱á na káꞌan na xiꞌin Jesús, xíkan na ya mani nuu ra ya ná ke̱ta ra ñuu na kuꞌun ra inka ñaꞌñu.

¹⁸ Saa ndi̱ko koo Jesús ndi̱xaa ra ini tun barco, ñaa xa̱á mií ra ndo̱ꞌo tachi nduvaꞌa ikán, xíkan ra ya mani nuu ra, ya taxi ra kuꞌun ra xiꞌin ra.

¹⁹ Ta köo ndi̱xiin Jesús taxi ra kuꞌun ra xiꞌin ra, saa ndi̱kaꞌan ra xiꞌin ra, káchi ra saa: ―Vaꞌa ndiko koo kuanuꞌu veꞌe un, ndituꞌun un xiꞌin na veꞌe un tin na taꞌan un ná kundaa ini na ndá kuꞌva ku̱ndaꞌvi ini Ndioxi xi̱ni ra yóꞌo̱ ―káchi Jesús xiꞌin ra.

²⁰ Saa ke̱e ra kuanuꞌu ra veꞌe ra, ndítuꞌun ndiꞌi ra xiꞌin na veꞌe ra tin xiꞌin ndiꞌi na ñuu ya ñúꞌu Decápolis, ndítuꞌun ra xiꞌin na unkua i̱kan Jesús xiꞌin ra, ta ndiꞌi na ndíkanda ni ini na xaꞌa ya káꞌan ra.

Si̱taku Jesús yá loꞌo seꞌe ra Jairo ta si̱ndaꞌa ra yá ñaꞌa ti̱in ndaa yuꞌu tikoto ra

²¹ Saa tá ndiko koo Jesús xiꞌin barco, ndi̱xaa ra nda yuꞌu nduta tikuii nuu ke̱e ra tá kuaꞌan ra. Ta iin chútu ndaa naꞌa ndóo na ndátun na ra, saa ndi̱ndoo ra yuꞌu nduta ñûꞌu ikán xiꞌin na.

²² Ikan íin ra ta ndi̱xaa iin ra náni Jairo, ra xáꞌnda chiñu nuu na veꞌe ñuꞌu sinagoga mí ñuu ikán. Tá xi̱ni ra Jesús ta ndi̱xaa ra si̱kusiti ra nuu ra.

²³ Saa xa̱á ra xáku ndaꞌvi ra nuu ra, káchi ra saa: ―Tata, vaxi i nuu un kuꞌun loꞌo un xiꞌin i veꞌe i, saa chi ndee ni ndee ndóꞌo seꞌe i xa xíꞌi va yá, yakan xíkan ni i ya mani nuu un, kuꞌun loꞌo un xiꞌin i, chinuu ndaꞌa un sata seꞌe i ta nduvaꞌa yá ―káchi ra.

²⁴ Saa ke̱e Jesús kuaꞌan ra xiꞌin ra, ta kuaꞌa ka vi naꞌa kuaꞌan xiꞌin ra, iin ndakua chíndaꞌa taꞌan mií na kuaꞌan na.

²⁵ Ta tañu na kuaꞌan xiꞌin ra ikán, kuaꞌan iin yá ñaꞌa kúꞌvi. Ndee ka vi ndóꞌo yá, xa ndi̱xinu uxi uvi kuiya kúꞌvi yá xíta nií yá.

²⁶ Ta kuaꞌa ka vi ichí ndi̱xaꞌan yá nuu na ndotor, ta ni köo ndi̱kuchiñu na sindaꞌa ñaꞌa na, ñaa iin ndi̱ꞌi vaꞌa xuꞌun yá, ta ndu̱ndee vaꞌa ka kueꞌe xiꞌin yá.

²⁷ Saa tá xi̱ni soꞌo yá tuꞌun xaꞌa Jesús, ta ndi̱xaa yá tañu na, saa ku̱yati yá sata ra ti̱in ndaa yá tikoto ra.

²⁸ Saa chi ndíkani ini yá, káchi yá saa: “Án nda tikoto ra ná tiin ndaa yo, ta nduvaꞌa yo”, káchi yá.

²⁹ Tá ti̱in ndaa soꞌva yá tikoto ra, ta saa ndikun ku̱ndaa ini yá ndu̱vaꞌa yá.

³⁰ Saa ku̱ndaa ini Jesús ke̱e ndee kúu mií ra. Ñaa ndi̱ko koo ra ndi̱koto ra nuu ndiꞌi na ikán, ndákan tuꞌun ñaꞌa ra, káchi ra saa: ―¿Unku ndóꞌo̱ ti̱in ndaa tikoto i? ―káchi ra xiꞌin na.

³¹ Ñaa ndi̱kuiin nda ítaꞌan xiꞌin ra, káchi nda saa: ―Tata, xíto mií un, iin chútu ndaa naꞌa ta ndá yokan chíndaꞌa ndaa na yóꞌo̱, ta káꞌan ka un: ‘‘¿Unku na ti̱in ndaa yeꞌe?’’, káchi un ―káchi nda xiꞌin ra.

³² Saa xa̱á ra xíto ra ndiꞌi ni kúu ñaꞌñu, unku na ti̱ndaa ñaꞌa.

³³ Ñaa ku̱yati yá ñaꞌa ikán nuu ra, ndakua kísi ñaꞌa ya íꞌvi yá xaꞌa ya ndu̱vaꞌa yá, ta ndi̱xaa yá nuu ra si̱kusiti yá, saa ndi̱kaꞌan ndiꞌi yá xiꞌin ra ya ndu̱vaꞌa yá.

³⁴ Ñaa ndi̱kaꞌan ra xiꞌin yá, káchi ra saa: ―Xa ndu̱vaꞌa un seꞌe, saa chi ndáa ni ini un xíni un yeꞌe, vaꞌa kuanuꞌu vitin, köo ka ya kundiꞌi ini un xaꞌa chi xa ndu̱vaꞌa un ―káchi ra xiꞌin yá.

³⁵ Saa káꞌan ka ra xiꞌin yá, ta ndi̱xaa na ke̱e veꞌe ra Jairo, káꞌan na xiꞌin ra, káchi na saa: ―Tata, xa ndi̱xiꞌi va seꞌe un, köo xíniñuꞌu ka un sindiꞌi un ini Tata Maestro ñaa ―káchi na xiꞌin ra.

³⁶ Ñaa xi̱ni soꞌo Jesús ya ndi̱kaꞌan na xiꞌin ra Jairo, saa ndi̱kuiin ra káꞌan ra xiꞌin ra: ―Küu iꞌvi un, iindaa yeꞌe kandixa ni un ―káchi Jesús xiꞌin ra.

³⁷ Saa ke̱e nda kuaꞌan nda veꞌe ra, ta köo ndi̱taxi ra kuꞌun ndá ka naꞌa xiꞌin ra, ndisaa ra Pedro xiꞌin ra Jacobo tin ra Juan ñani ra, nda ikán ku nda kuaꞌan xiꞌin ra.

³⁸ Ñaa ndi̱xaa nda veꞌe ra Jairo, ta xi̱ni nda iin ndá síso xáku naꞌa, ta iin ndáꞌi koꞌo na ndóo na.

³⁹ Saa ndi̱kiꞌvi ra ini veꞌe, ta ndi̱kaꞌan ra xiꞌin na, káchi ra saa: ―Küaku ndo xaꞌa yá, köo ndi̱xiꞌi vi yá, yá kíxi va ku yá ―káchi ra xiꞌin na.

⁴⁰ Tá ndi̱kaꞌan ra saa, ta xa̱á na xáku̱ ndaa ñaꞌa na. Ñaa ta̱va ndiꞌi ra na ke̱e na keꞌe, ndisaa iva siꞌí yá xiꞌin nda kuaꞌan xiꞌin ra, ku na ndi̱kee xiꞌin ra nuu índuꞌu yá.

⁴¹ Saa ti̱in ra ndaꞌa yá loꞌo ikán, ta ndi̱kaꞌan ra xiꞌin yá, káchi ra saa: ―Talita, cumi ―káchi ra xiꞌin yá. Tuꞌun ikán kúni kachi ya: “Yá loꞌo, káꞌan i xiꞌin un ndikoo un”.

⁴² Saa ndikun ndi̱taku yá ndi̱koo yá, ñaa xa̱á yá xíka yá, chi xa kúu mií yá uxi uvi kuiya yá. Tá xi̱ni na ndóo veꞌe yá, ndi̱taku yá, ñaa ndi̱ndiꞌvi ka vi na.

⁴³ Saa ndi̱kaꞌan ni ra xiꞌin na, ya ná käꞌan na xiꞌin nda iin naꞌa ya xi̱ni na. Ñaa ndi̱kaꞌan ra xiꞌin iva siꞌí yá, ya ná taxi na kuxi yá.