San Marcos 4 - Xochapa Mixteco

Tuꞌun ndíchi xaꞌa ra chíꞌi ndikin trigo

¹ Saa xa̱á tuku Jesús sínaꞌa ra yuꞌu nduta ñûꞌu ikán. Ta kuaꞌa ni naꞌa ndixaa nuu ra, yakan nda̱a ra sata iin barco tun ndíkaa ini nduta ñûꞌu. Sata nu ikán ndi̱kunduꞌu koo ra sínaꞌa ra na ndíta yuꞌu rá.

² Saa xa̱á ra sínaꞌa ra na kuaꞌa ni tuꞌun ndíchi, káchi ra saa:

³ ―Kuni soꞌo ndo ná kaꞌan i xiꞌin ndo: Iin ra chíꞌi ta ke̱e ra kuaꞌan ra chiꞌi ra.

⁴ Ta xa̱á ra xáta yáva ra ndikin trigo, ta sava ya ndi̱koyo yuꞌu ichí, ñaa ndi̱xaa sàà ya̱xi ri ya.

⁵ Sava ya ndi̱koyo tañu yu̱ú, nuu ndóo loꞌo ni ñuꞌú, ta kama ni ndi̱nduta ya chi köo kunu ndíkoyo ya,

⁶ sundi tá ke̱ta ñu̱ꞌù ta si̱ichi ñaꞌa ya, xaꞌa ya köo tioꞌo ya yakan ndi̱ndichi ya.

⁷ Sava ndikin ikán ndi̱koyo tañu itun iñu, ñaa xa̱ꞌnu ni itun iñu ta si̱nduxin ndiꞌi ñaꞌa nu, ta ni köo mií ka trigo ndítaxi ya.

⁸ Sundi sava ndikin ikán ndi̱koyo nuu ñuꞌú vaꞌa. Ta saa xa̱ꞌnu vaꞌa ya ta vaꞌa ni ka̱na trigo ya. Sava ya ku̱u mií oko uxi ndikin trigo, ta sava ya ka̱na uni xiko ndikin trigo, sava ya ka̱na nda iin ciento ndikin trigo ―káchi ra xiꞌin na.

⁹ Saa ndi̱kaꞌan ka ra, káchi ra saa: ―Ndiꞌi ndóꞌo̱ xíni soꞌo ya káꞌan i, ta kuni soꞌo ni ndo ya ta saa ndikiꞌin xiní ndo xiꞌin ya ―káchi ra xiꞌin na.

Ndá xaꞌa kua xi̱niñuꞌu Jesús tuꞌun ndíchi

¹⁰ Sindiꞌi tá ndi̱ndoo mií Jesús xiꞌin na ndíta yati xiꞌin ra xiꞌin uxi uvi nda ítaꞌan tuun xiꞌin ra, ta saa ndi̱ndakan tuꞌun ndiꞌi na ra, ndi̱kaꞌan na xiꞌin ra, unkua kúni kachi tuꞌun ndíchi ya ndi̱kaꞌan ra xiꞌin na.

¹¹ Saa ndi̱kuiin Jesús ndi̱kaꞌan ra xiꞌin na, káchi ra saa: ―Ndioxi táxi ra kundaa ini ndo xaꞌa ya íyo sěꞌe nuu xáꞌnda chiñu ra. Sundi na íyo chí keꞌe ta köo kúndaa ini na xiꞌin ya chi ndisaa tuꞌun ndíchi va kua xíni soꞌo na káꞌan i.

¹² Saa síxinu na ya ndi̱kaꞌan iin ra ndi̱kaꞌan tuꞌun yuꞌu Ndioxi xinaꞌa, káchi ra saa: ‘‘Vani xíto ni na, ta küchiñu na kuni na ya ndaa, vani xíni soꞌo ni na, ta köo kúchiñu na kundaa ini na ya ndaa. Yakan köo ndíko koo ini na xaꞌa kuachi na, ta ni Ndioxi xäa kaꞌnu ini ra xaꞌa kuachi na’’, káchi ra ndi̱kaꞌan tuꞌun yuꞌu Ndioxi ikán ―káchi Jesús xiꞌin na.

Ndíkani Jesús unkua kúni kaꞌan tuꞌun ndíchi xaꞌa ra chíꞌi

¹³ Saa ndi̱kaꞌan Jesús xiꞌin na, káchi ra saa: ―¿Án köo kúndaa ini ndo unkua kúni kachi tuꞌun ndíchi yóꞌó? Ta ¿unkua ikan ndo kundaa ka ini ndo taꞌan ya ndíchi ndíkani i nuu ndo? ―káchi ra xiꞌin na.

¹⁴ Saa ndi̱kaꞌan ra xiꞌin na, káchi ra saa: ―Ra chíꞌi ndikin ikán ku ra káꞌan ndoso tuꞌun Ndioxi.

¹⁵ Sava naꞌa tá íin ñuꞌú nuu ndi̱koyo ndikin trigo yuꞌu ichí saa íin na, saa chi xíni soꞌo ni na tuꞌun yóꞌó, tá vaxi kiti nǎꞌa táva ri tuꞌun nima na, ta ndíndoso ini na xaꞌa tuꞌun ya xi̱ni soꞌo na.

¹⁶ Sava tuku na tá íin ñuꞌú nuu íyo ni yu̱ú saa íin na. Tá xíni soꞌo na tuꞌun Ndioxi ta ndíkiꞌin vaꞌa na ya, saa kúsini ni na xiꞌin ya,

¹⁷ sundi xaꞌa ya täꞌan tiin vaꞌa ya nima na loꞌo ni kúndaa ini na xiꞌin ya, saa vaxi tindoꞌo nuu na, tíxuꞌvi ni na xaꞌa tuꞌun Ndioxi. Ñaa xa̱á na ndíko koo ini na ta köo xíin ka na kandixa na ya.

¹⁸ Sava tuku na tá íin ñuꞌú nuu íyo itun iñu saa íin na: vaꞌa ni xíni soꞌo na tuꞌun Ndioxi,

¹⁹ sundi ndíꞌi ni ini na xaꞌa chiñu íyo ñuu ivi yóꞌó saa xáa na xáa chiñu ni na ya kúni na kuu mií na kuaꞌa ni ya kuika ñuu ivi yóꞌó, ñaa síndiꞌi xaꞌa ya tuꞌun Ndioxi íyo nima na.

²⁰ Ta íyo tuku sava na íin tá íin ñuꞌú vaꞌa ni ya kána kuaꞌa ni ñaꞌa nuu, chi ñuꞌú vaꞌa ikán kána kuaꞌa ni ñaꞌa nuu ya, sava ya táxi oko uxi ndikin trigo, tin ya táxi uni xiko, xiꞌin ya táxi nda iin ciento trigo. Tá íin ya ikán saa íin na ndinuꞌu ndíkiꞌin tuꞌun Ndioxi, ta ya ikán ku ya chíndee na kúu na ivi na vaꞌa. Soꞌva kúni kachi tuꞌun ndíchi ikán ―káchi Jesús xiꞌin na.

Ndiꞌi ya íyo sěꞌe ta ndituvi ndiꞌi ya

²¹ Saa ndi̱kaꞌan Jesús inka tuꞌun ndíchi xiꞌin na, káchi ra saa: ―Ni na ndítuun ñu̱ꞌu̱, ta köo ndíkasi na nuu ya xiꞌin ñaꞌa ni köo chíkaa sěꞌe na ya tixin xito. Sundi chínuu sukun na ya, ya síndiyeꞌe ya ndiꞌi ini veꞌe.

²² Saa yoo, kúndaa ini yo, ndiꞌi ñaꞌa ya íyo sěꞌe vitin, ta ndituvi ndiꞌi ya, nda iin ya kïndoo sěꞌe, chi iin ndituvi ndiꞌi ya vaxi kivi.

²³ Ndiꞌi ndóꞌo̱ xíni soꞌo ya káꞌan i, ta kuni soꞌo ni ndo ya káꞌan i xiꞌin ndo ―káchi Jesús xiꞌin na.

²⁴ Saa ndi̱kaꞌan ka ra xiꞌin na, káchi ra saa: ―Kuenta ni koo ndo xiꞌin ya xíni soꞌo ndo, chi tá kuꞌva íkan ndo, saa ikan Ndioxi xiꞌin ndo, ta ndee ka ikan ra xiꞌin ndo taxi kuaꞌa ka ra ya kundaa ini ndo.

²⁵ Saa chi ndiꞌi na xa kúndaa vaꞌa ini, ta niꞌi ka na ya vaꞌa nuu Ndioxi. Ta ndiꞌi na loꞌo ni kúndaa ini ta nda ya loꞌo kúndaa ini na ndundaa ya ndaꞌa na ―káchi Jesús.

Tuꞌun ndíchi xaꞌa ndikin siꞌva köo xíni na ivi ndá kuꞌva xáꞌnu

²⁶ Saa ndi̱kaꞌan tuku Jesús, káchi ra saa: ―Tá ndóꞌo ndikin ya xíta yava chíꞌi iin taa nuu ñuꞌú ra, saa íyo ichí nuu xáꞌnda chiñu Ndioxi.

²⁷ Chi iin ra chíꞌi ndikin, ta kíxi ra ñûu saa ndíkoo ra nduvi, ta ndúta ndikin chíꞌi ra saa xáꞌnu ya ta ni köo xíni ra ndá kuꞌva xáꞌnu ya.

²⁸ Saa chi suvi mií ñuꞌú ikán kua síkuaꞌnu ñaꞌa. Xiꞌna ndúta ya, saa kána iku ya, tá ndi̱ꞌi kána yoko ya, sindiꞌi saa xáa kána kuaꞌa ndikin trigo nuu yoko ikán.

²⁹ Tá ndiꞌi xa̱ꞌnu ya, ta saa ndi̱xinu ñaꞌa ndaꞌa yoko ikán, ñaa kuaꞌan na ndíkuiso na ya xáꞌnda na ya xiꞌin i̱chi, ta saa chívaꞌa na ya, saa chi ndi̱xinu tiempo ya ndikaya na ya ―káchi Jesús.

Tuꞌun ndíchi xaꞌa ndikin itun mostaza

³⁰ Saa ndi̱kaꞌan ka Jesús xiꞌin na, káchi ra saa: ―¿Ndá kuꞌva kua vaꞌa ndikani i nuu ndo xaꞌa nuu xáꞌnda chiñu Ndioxi? Ta ¿ndá tuꞌun ndíchi kua vaꞌa kaꞌan i xiꞌin ndo?

³¹ Tá káa iin ndikin náni mostaza chíꞌi iin ra taa nuu ñuꞌú ra, saa káa ya. Chi vali ni ndikin ikán tá chíꞌi ra ya nuu ñuꞌú ra,

³² sundi tá ndi̱nduta ya ta iin itun naꞌnu ndúu nu. Xáꞌnu naꞌnu ka nu nuu ndiꞌi itun íyo ini corra na. Naꞌnu ka vi ndaꞌa nu, nda kiti sàà vaxi íyo ndati ndaꞌa nu ―káchi Jesús.

Nina xiꞌin tuꞌun ndíchi si̱naꞌa Jesús naꞌa

³³ Soꞌva i̱kan Jesús xi̱niñuꞌu ra kuaꞌa ni nuu tuꞌun ndíchi ya si̱naꞌa ra na xaꞌa ichí nuu xáꞌnda chiñu Ndioxi. Tixin tuꞌun ndíchi si̱naꞌa ra kuaꞌa ni ya nuu na, tá kuꞌva kúchiñu na kundaa ini na saa íyo ya si̱naꞌa ra na.

³⁴ Ta köo ndi̱sinaꞌa ra na xiꞌin inka nuu tuꞌun, nina xiꞌin tuꞌun ndíchi si̱naꞌa ra na. Ta ndiꞌi saa ichí ndi̱kani síín ra nuu nda ítaꞌan xiꞌin ra xaꞌa ya káꞌan tuꞌun ndíchi sínaꞌa ra.

Síyaa Jesús tachi íꞌná xiꞌin nduta tikuii

³⁵ Tá xa kuaꞌan kúnaa xikuáa mi kivi ikán, ta saa ndi̱kaꞌan Jesús xiꞌin nda ítaꞌan xiꞌin ra, káchi ra saa: ―Ná koꞌyo inka ñaꞌñu yuꞌu nduta ñûꞌu ―káchi ra xiꞌin nda.

³⁶ Ta saa nda̱i nda naꞌa ta ndi̱kiꞌin nda kuaꞌan nda xiꞌin Jesús ini barco nuu xa ndíkaa ra. Ta kuaꞌan ka tu sava naꞌa xiꞌin sava ka barco xiꞌin ra.

³⁷ Saa ñúꞌu nda ini nu. Ñaa xa̱á tachi íꞌna ndinuni loꞌo káni ya sata nu, ta nda tikuii iin ndíkuita nuu rá. Ñaa xa̱á rá kuakee ndiꞌi rá ini nu, ta kuaꞌan kúvee nu.

³⁸ Ta Jesús ndi̱naa ini ra, índuꞌu ra kíxi ra nda kaꞌa nu, ndíkaa toto xiní ra índuꞌu ra. Saa ndi̱xaa nda si̱ndikoo ñaꞌa nda, káꞌan nda xiꞌin ra, káchi nda saa: ―¡Tata, maestro! ¿Án köo ndíꞌi ini un ìyo ni ndikava tun barco xiꞌin yo ini tikuii? ―káchi nda xiꞌin ra.

³⁹ Saa ndi̱koo ra ndi̱kaꞌan ra xiꞌin tachi íꞌna, ta ndi̱kaꞌan tu ra xiꞌin nduta ñûꞌu va, káchi ra saa: ―¡Yaa koo un nduta ñûꞌu, siyaa un! ―káchi ra xiꞌin rá. Saa ndikun siyaa tachi íꞌna, ta si̱yaa tu nduta ñûꞌu va, iin yayaa ku̱u.

⁴⁰ Sindiꞌi saa ndi̱kaꞌan ra xiꞌin nda ítaꞌan xiꞌin ra, káchi ra saa: ―¿Ndachu íꞌvi ni ndo? ¿Án köo ndáa ini ndo Ndioxi ya kundaa ra yoo? ―káchi ra xiꞌin nda.

⁴¹ Ta íꞌvi ka vi nda ndóo nda, saa ndi̱ndakan tuꞌun taꞌan nda, káchi nda saa: ―¿Ndá taa ku ra yóꞌó yakan vaꞌa xíni soꞌo tachi nǎꞌa tin xíni soꞌo nduta ñûꞌu tuꞌun káꞌan ra? ―káchi nda xiꞌin taꞌan nda.