San Marcos 14 - Xochapa Mixteco

Ndúku na ndá kuꞌva tiin na Jesús

¹ Soo uvi kivi kúmani saa tindaa kivi ya ndítava na Israel viko pascua xiꞌin inka viko nuu xíxi na xita vaꞌa ya köo uxan iya xiꞌin. Saa xa̱á nda naꞌnu nuu sutu xiꞌin nda maestro nda sínaꞌa ley Ndioxi ya ta̱a ra Moisés, ndúku nda kuachi siki xaꞌa Jesús saa kuchiñu nda kaꞌni nda ra.

² Saa xa̱á sava nda káꞌan nda, káchi nda saa: ―Ïkan yo saa, tïin yo ra mí viko pascua, koto ka ndikuita ndiꞌi na, ndee ni ndaꞌa i na ta koo ni kuachi ―káchi nda.

Iin ñaꞌa ndi̱koyo ndee yá nduta tami xáꞌan xiní Jesús

³ Saa iin kivi íyo Jesús ñuu Betania veꞌe ra Simón, ra ndo̱ꞌo kueꞌe táꞌi ya nani lepra. Káꞌan na xiꞌin ra “ra táꞌi”. Saa índuꞌu koo Jesús nuu mesa veꞌe ra ikán ta ndi̱xaa iin ñaꞌa, níꞌi yá iin yuyu loꞌo ya ndi̱kuaꞌa xiꞌin yu̱ú náni alabastro ta iin chútu ndaa nduta tami xáꞌan ini ya ndi̱xaa xiꞌin yá, ta ndinuꞌu iku nardo ndi̱kuaꞌa rá, ta yaꞌvi ni rá ikán. Saa ta̱ꞌvi yá sukun ya, ta ki̱ꞌin yá rá ndi̱koyo ndee ndiꞌi yá xiní Jesús.

⁴ Ñaa ndi̱saa sava na ndóo ikán, ta xa̱á na káꞌan na xiꞌin taꞌan na, káchi na saa: ―¿Ndachu kua xáta ndikuu mií yá rá?

⁵ Xuꞌun kuaꞌa ndáa yaꞌvi rá, nda uni ciento vi xuꞌun denario ku yaꞌvi rá. ¿Án väꞌa ka ndíkiaꞌvi rá ta chindee yá na ndaꞌvi? ―káchi nda. Ndikanaꞌa nda xaꞌa yá.

⁶ Ñaa ndi̱kuiin Jesús káꞌan ra xiꞌin nda, kachi ra saa: ―Këꞌe ndo yá, ¿ndachu káꞌan ndo saa xaꞌa yá? Ya i̱kan yá yóꞌó ta ya vaꞌa ni kua i̱kan yá xiꞌin i.

⁷ Na ndaꞌvi ta ndiꞌi saa kivi koo na xiꞌin ndo, ta kuchiñu ndo chindee ndo na ndá kivi kúni mií ndo, sundi yeꞌe, ta süvi ndiꞌi saa kivi koo i xiꞌin ndo.

⁸ Ta yá yóꞌó i̱kan yá ya vaꞌa xiꞌin i nda nuu xíto yá kéta ndaꞌa yá. Vaꞌa ni ya i̱kan yá xiꞌin i, chi ndi̱koyo ndee yá nduta tami xáꞌan xiní i, xa̱a ndúvi yá xiꞌin i ya kuꞌun i nduxin i.

⁹ Ta ndixa káꞌan i xiꞌin ndo, ndiꞌi kúu ñuu ivi nuu káꞌan ndoso na tuꞌun vaꞌa xaꞌa i, ta kaꞌan tu na xaꞌa ya vaꞌa i̱kan yá yóꞌó va xiꞌin i. Ta saa ndikaꞌán ini ndiꞌi kúu na xaꞌa ya i̱kan yá ―káchi Jesús.

Chítaꞌan tuꞌun ra Judas ya ndíxiko vata ra Jesús nuu na sáa ini xíni Jesús

¹⁰ Saa ku̱u ke̱ta ra Judas Iscariote, iin ra ítaꞌan xiꞌin Jesús, ke̱e ra kuaꞌan ra nuu nda sutu naꞌnu kaꞌan ra xiꞌin nda ya ndixiko ra Jesús nuu nda.

¹¹ Saa tá ku̱ndaa ini nda ya ndi̱kaꞌan ra xiꞌin nda, ta ku̱sini ni nda xiꞌin ra, ta saa ki̱ndoo nda chaꞌvi ñaꞌa nda. Saa ku nuu xa̱á ra Judas ndúku ra ndá kuꞌva kua koo nditaxi ra Jesús ndaꞌa nda.

Xíxi xíní Jesús xiꞌin nda ítaꞌan xiꞌin ra

¹² Ta kivi núnu̱ú tá íyo viko ya xíxi na Israel xita vaꞌa ya köo uxan ìya xiꞌin, saa iin iin veꞌe xáꞌni na iin kiti levo loꞌo nuu Ndioxi xíxi na viko pascua. Xaꞌa ya ikán kua ndi̱ndakan tuꞌun uxi uvi saa nda ítaꞌan xiꞌin ra, káchi nda saa: ―¿Tata, mií kua kúni un kuꞌun nde xaa ndúvi nde ñaꞌa ya kuxini yo viko pascua? ―káchi nda xiꞌin ra.

¹³ Saa ti̱ꞌvi ra uvi nda ítaꞌan xiꞌin ra kuaꞌan nda, ta ndi̱kaꞌan ra xiꞌin nda, káchi ra saa: ―Kuáꞌan ndo Jerusalén. Ta ikán nditaꞌan ndo iin taa, ndíso ra iin yoo tikuii kuaꞌan ra, ta kundikun ndo kuꞌun ndo sata ra.

¹⁴ Ta veꞌe nuu xaa ra kiꞌvi ra ikán, kaꞌan ndo xiꞌin mií ra xíin veꞌe ya ikán, kachi ndo saa: “Ra Tata Maestro ti̱ꞌvi ndeꞌe vaxi nde kaꞌan nde xiꞌin un: ¿Ndá cuarto kua táxi loꞌo un xaa vií nde ñaꞌa kuxini ra viko pascua vitin xiꞌin ndeꞌe ítaꞌan xiꞌin ra, káchi ra?”, kachi ndo xiꞌin ra.

¹⁵ Ta saa naꞌa ra iin cuarto chee ya íyo piso ni̱nù nuu ndo, ta xa íyo ndiꞌi ñaꞌa kuniñuꞌu ndo ini ya, ikán xaa vií ndo ñaꞌa kuxini yo ―káchi Jesús xiꞌin nda.

¹⁶ Saa ka̱na koo uvi saa nda kuaꞌan nda ñuu Jerusalén. Tá íyo ndiꞌi ya ndi̱kaꞌan ra xiꞌin nda, saa íyo ya ndi̱taꞌan nda. Ta ikán xa̱a vií nda kuxini nda viko pascua.

¹⁷ Tá xa ku̱ñuu ta saa ndi̱xaa Jesús xiꞌin uxi uvi saa nda ítaꞌan xiꞌin ra.

¹⁸ Saa tá ndóo nda xíxi nda nuu mesa, ta saa ndi̱kaꞌan ra xiꞌin nda, káchi ra saa: ―Ya ndaa káꞌan i xiꞌin ndo, iin ndóꞌo̱ ndóo xíxi xiꞌin i nuu mesa yóꞌó ku ndo ndixiko vata yeꞌe nuu na sáa ini xiꞌin yeꞌe ―káchi ra.

¹⁹ Tá ndi̱kaꞌan ra saa xiꞌin nda ta ku̱chiꞌña ni ini nda, saa xa̱á iin iin nda ndákan tuꞌun nda ra, káchi nda saa: ―Tata, ¿án yeꞌe ku i? ―káchi nda xiꞌin ra.

²⁰ Saa ndi̱kuiin Jesús káꞌan ra: ―Iin ndóꞌo̱ uxi uvi síndaxin xita vaꞌa xiꞌin i ini koꞌo yóꞌó ku ndo.

²¹ Ya ndaa kua yeꞌe, Taa ra xa̱a ñuu ivi yóꞌó, ta xíniñuꞌu ndoꞌo ni i, saa kuvi i, tá kuꞌva íyo ya xa ta̱a na xaꞌa i xinaꞌa, saa kundoꞌo i kuvi i. Sundi ndaꞌvi ni ra ndixiko vata yeꞌe nuu na sáa ini xíni yeꞌe. Vaꞌa ka kua tá tu köo ndi̱kaku ra, ndikuu ―káchi Jesús.

²² Saa tá xíxi nda ta ti̱in Jesús xita vaꞌa, ta̱xi ra tixaꞌvi ndaꞌa Ndioxi xaꞌa ya, ñaa ta̱ꞌvi ra ya ta̱xi ra ndaꞌa nda, káchi ra saa: ―Kuxi ndo xita vaꞌa yóꞌó, chi ya yóꞌó ku ikin kuñu i ―káchi ra xiꞌin nda.

²³ Sindiꞌi saa ti̱in ra copa vino, ta ta̱xi ra tixaꞌvi ndaꞌa Ndioxi, ñaa si̱yaꞌa ra ya ndaꞌa iin iin nda xi̱ꞌi ndiꞌi nda.

²⁴ Saa ndi̱kaꞌan ra xiꞌin nda, káchi ra saa: ―Nduta yóꞌó ku nií i, xaꞌa ya vaꞌa kuaꞌa ni naꞌa kua kuita rá. Ya yóꞌó kúni kachi ya, Ndioxi, ta ki̱ndoo ra iin trato ya xa̱á nuu ki̱ndoo vaꞌa na ñuu ivi xiꞌin ra.

²⁵ Ya ndaa káꞌan i xiꞌin ndo, köꞌo yachi ka i nduta vino kiti uva, nda ná tindaa kivi ndikitaꞌan yo nuu xáꞌnda chiñu Ndioxi, nda saa kua koꞌo i nduta vinu xa̱á ―káchi ra xiꞌin nda.

Káꞌan Jesús xaꞌa ra Pedro ya ndikuaa ñaꞌa ra

²⁶ Saa ku̱u tá si̱ndiꞌi nda xi̱xi nda, ta saa xi̱ta nda iin yaa Ndioxi, saa ka̱na koo nda kuaꞌan nda iku Olivo.

²⁷ Ñaa ndi̱kaꞌan Jesús xiꞌin nda: ―Ñǔu vitin ta ndiꞌi ndóꞌo̱ sindikoo mií ndo yeꞌe, chi saa íyo ya ta̱a iin ra ndi̱kaꞌan ndoso tuꞌun yuꞌu Ndioxi xinaꞌa, káchi ya saa: “Sitikueꞌe i ra ndáa levo, ta kunu ndiꞌi levo sana ra kuꞌun ri”, káchi ya.

²⁸ Sundi tá ná nditaku i ta xiꞌna ka i kunuu kuꞌun nuu ndo chí ñuu Galilea ―káchi ra xiꞌin nda.

²⁹ Saa ndi̱kuiin ra Pedro, káꞌan ra, káchi ra saa: ―Vani ndiꞌi nda ná kunu kuꞌun, ta sindoo ndaꞌa mií nda yóꞌo̱, sundi yeꞌe ta sïndoo i yóꞌo̱ ―káchi ra xiꞌin Jesús.

³⁰ Saa ndi̱kuiin Jesús káꞌan ra: ―Ya ndaa káꞌan i xiꞌin un Pedro, ñǔu vitin ta täꞌan ka vi kana cheꞌle uvi ichí, ta xa ndi̱kuáa va un yeꞌe uni ichí ―káchi ra xiꞌin ra.

³¹ Ta ndee ni ndinuꞌu ini ra káꞌan tuku ra xiꞌin Jesús, káchi ra saa: ―Tata, vani nda kuvi i xaꞌa un, sundi ndïkuaa i yóꞌo̱ ―káchi ra. Tá ndi̱kaꞌan ra ikán, saa ndi̱kaꞌan ndiꞌi nda.

Kuaꞌan Jesús Getsemaní kaꞌan ra xiꞌin Ndioxi

³² Saa ndi̱xaa nda iin ñaꞌñu náni Getsemaní, ta ndi̱kaꞌan Jesús xiꞌin nda ítaꞌan xiꞌin ra, káchi ra saa: ―Koo loꞌo ndo yóꞌó ná kuꞌun i káꞌan i xiꞌin Ndioxi ―káchi ra xiꞌin nda.

³³ Saa ke̱e ra kuaꞌan ra xiꞌin ra Pedro tin ra Jacobo xiꞌin ra Juan, ta xa̱á kúsuchi ni ini ra saa ndíꞌi ni ini ra.

³⁴ Saa ndi̱kaꞌan ra xiꞌin nda, káchi ra saa: ―Yaꞌa ni kúsuchi ini i, nda íyo ini i kuvi i. Ta ndoo ndo yóꞌó, ta küsun ndo kundito ndo ―káchi ra xiꞌin nda.

³⁵ Saa ku̱xika loꞌo Jesús, ta ikán si̱kusiti ra nda nuu ñuꞌú, ta ndi̱kaꞌan ra xiꞌin Ndioxi, tá tu kúni ra ta ná täxi ra yaꞌa ra nuu tindoꞌo ya vaxi nuu ra.

³⁶ Saa káꞌan ra káchi ra saa: ―Tata iva i, nda iin ñaꞌa köo ndíchi nuu mií un. Tá tu kúni un ta täxi un yaꞌa i nuu tindoꞌo yóꞌó, sundi ïkan un ya kúni i, vaꞌa ikan un ya kúni mií un ―káchi ra.

³⁷ Saa ndi̱ko koo ra, ta ndi̱taꞌan ra nda ítaꞌan xiꞌin ra ndóo nda kíxi nda. Saa ndi̱kaꞌan ra xiꞌin ra Pedro, káchi ra saa: ―¿Án kíxi va un, Simón? ¿Án nda iin hora loꞌo köo ndi̱kuchiñu un kundito un?

³⁸ Kundito ndo, ta kaꞌan ni ndo xiꞌin Ndioxi ya ná ndïkava ndo nuu kuachi. Ya ndaa kua kúni ni ndo xaa súvi ya kúni Ndioxi, sundi köo kúchiñu ndo xaa súvi ndo ya xiꞌin ndee mií ndo ―káchi Jesús xiꞌin nda.

³⁹ Saa ke̱e tuku ra kuaꞌan ra káꞌan ra xiꞌin Ndioxi, tá íyo ya xa ndi̱kaꞌan ra saa íyo ya káꞌan tuku ra.

⁴⁰ Tá ndi̱ko koo ra ta ndi̱taꞌan tuku ra nda ndóo nda kíxi nda, saa chi ndakua niꞌnu vee maꞌna nuu nda, ta köo xíni nda unkua kaꞌan nda xiꞌin ra.

⁴¹ Saa ke̱e tuku ra ndi̱xaꞌan ra ndi̱kaꞌan ra xiꞌin Ndioxi ichí uni, ta ndi̱ko koo ra, saa ndi̱kaꞌan ra xiꞌin nda, káchi ra saa: ―¡Kundoo ka ndo kusun ndo! Chi xa ti̱ndaa hora, ta yeꞌe, ra xa̱a ñuu ivi yóꞌó ta nditaxi na yeꞌe ndaꞌa na ivi kuachi.

⁴² Kuandikoo ndo koꞌyo, xa yóꞌó kúyati taa ra ndi̱taxi yeꞌe ndaꞌa naꞌa na sáa ini xíni yeꞌe ―káchi Jesús xiꞌin nda.

Tíin na Jesús kuaꞌan ra xiꞌin na

⁴³ Saa káꞌan ka ra xiꞌin nda ítaꞌan xiꞌin ra, ñaa ndi̱xaa ra Judas taꞌan nda uxi uvi xi̱taꞌan xiꞌin ra, ta kuaꞌa ni naꞌa ndáka ra ndi̱xaa xiꞌin ra, ta níꞌi na ikán i̱chi̱ tin itun carroti ndi̱xaa na xiꞌin ra. Ta nda sutu naꞌnu nuu sutu, xiꞌin nda maestro nda sínaꞌa ley Ndioxi tin na xikuaꞌa nuu na Israel, nda ikán ku nda ti̱ꞌvi naꞌa kuaꞌan na xiꞌin ra Judas.

⁴⁴ Ta ra Judas xa ndi̱kaꞌan ra xiꞌin nda, ndá seña kua ikan ra nuu nda, káchi ra saa: ―Ra xaa i kaꞌan ndioxi i xiꞌin, chutu i nuu ra, ra ikán ku Jesús, ta ra ikán ku ra tiin ndo, katun ndo ra ná kuꞌun ra xiꞌin ndo ―káchi ra xiꞌin nda.

⁴⁵ Saa ndi̱xaa ra ta ku̱yati ra nuu Jesús ndi̱kaꞌan ra xiꞌin ra, káchi ra saa: ―¡Tata Maestro! ¡Tata Maestro! ―káchi ra. Saa chu̱tu ra nuu Jesús, ya ndi̱kaꞌan ndioxi ra xiꞌin ra.

⁴⁶ Ta saa ti̱in nda ikán Jesús ya kuꞌun ra xiꞌin nda veꞌe kàà.

⁴⁷ Saa ta̱va iin ra ítaꞌan xiꞌin Jesús i̱chi̱ ra, ta xa̱ꞌnda ra iin soꞌo ra kúu moso nuu sutu, ra ínuu nuu ndiꞌi sutu.

⁴⁸ Saa ndi̱kaꞌan Jesús xiꞌin na, káchi ra saa: ―¿Ndachu ndíso ndo i̱chi̱ tin itun ya xa̱a ndo tiin ndo yeꞌe? ¿Án ra kuiꞌna ku i kua?

⁴⁹ Ndiꞌi saa kivi ndi̱xika i si̱naꞌa i yeꞌe veꞌe ñuꞌu kaꞌnu, ta nda iin ichí köo ndi̱tiin ndo yeꞌe. Ta vitin íkan ndo saa xiꞌin i ya ná xinu ya káꞌan tuꞌun Ndioxi xaꞌa i ―káchi Jesús xiꞌin nda.

⁵⁰ Saa xi̱nu ndiꞌi nda ítaꞌan xiꞌin Jesús kuaꞌan nda, ta si̱ndoo mií nda ra.

Xi̱nu iin ra kuâán loꞌo kuaꞌan ra

⁵¹ Saa ndíkun iin ra kuâán loꞌo kuaꞌan ra xiꞌin Jesús, ta ndíxi ra iin sábana kuaꞌan ra, ñaa ku̱ni tu na tiin na ra ikán va.

⁵² Saa ndee vaꞌa ndi̱xita ra mií ra ta si̱ndoo ra sábana ndíxi ra, ta xi̱nu ra kuaꞌan chala ra.

Ndáka na Jesús ndi̱xaa ra nuu na chiñu naꞌnu

⁵³ Saa ndi̱xaa nda xiꞌin Jesús nuu sutu ra ínuu nuu ndiꞌi sutu, ta ikán ndi̱kitaꞌan ndiꞌi ka sutu nda naꞌnu xiꞌin na xikuaꞌa tin nda sínaꞌa ley Ndioxi.

⁵⁴ Saa ndíkun xíka ra Pedro kuaꞌan ra sata Jesús, ta ndi̱xaa ra yeꞌe veꞌe sutu ikán, saa ndi̱kunduꞌu ra ndísaa ra nuu ñu̱ꞌu̱ xiꞌin nda policía.

⁵⁵ Ta ndiꞌi mií nda sutu naꞌnu xiꞌin nda chiñu naꞌnu ndúku nda naꞌa kaꞌan siki xaꞌa ra ya kuchiñu chikaa nda kuachi ra ya ná kuvi ra, ta nda iin kuachi ra köo ndi̱niꞌi nda.

⁵⁶ Ta kuaꞌa ni na káꞌan kuachi siki xaꞌa ra, sundi xa síin ya káꞌan iin iin na.

⁵⁷ Saa ndi̱kundita sava na, táxi na kuachi siki xaꞌa ra, káchi na saa:

⁵⁸ ―Ndeꞌe ta xi̱ni soꞌo nde ndi̱kaꞌan ra, káchi ra saa: “Yeꞌe ta sindiꞌi xaꞌa i veꞌe ñuꞌu kaꞌnu yóꞌó ya si̱kuaꞌa na ivi, ta tixin kivi uni sixinu i inka ya, ta süvi taꞌan ya síkuaꞌa na ivi yóꞌó koo ya”, káchi ra ―káchi nda xaꞌa Jesús.

⁵⁹ Ta ni saa ta köo ndi̱xinu tuꞌun nda, xaꞌa ya xa síin ya káꞌan iin iin nda.

⁶⁰ Saa ndi̱kundichi sutu ra ínuu nuu ndiꞌi sutu, ndi̱kundichi ra maꞌñu, ñaa ndi̱ndakan tuꞌun ra Jesús káchi ra saa: ―¿Án ndïkuiin un yuꞌu na? ¿Án käꞌan un xaꞌa ya káꞌan na yóꞌó xaꞌa un? ―káchi ra xiꞌin Jesús.

⁶¹ Ta nda iin ya köo ndi̱kuiin Jesús, taxiin íyo ra. Saa ndi̱ndakan tuꞌun tuku mií sutu ikán ra, káchi ra saa: ―¿Án yóꞌo̱ ku Cristo, Seꞌe Ndioxi ra chee? ―káchi ra.

⁶² Saa ndi̱kuiin Jesús káꞌan ra: ―Ikán kuu i. Ta kuni ndo yeꞌe, Taa ra xa̱a ñuu ivi yóꞌó, kuni ndo kunduꞌu i ñaꞌñu kuaꞌá Ndioxi ra kaꞌnu, saa kuni ndo yeꞌe ndiko koo i kixi i tañu viko nuu ndivi ni̱nù ―káchi ra xiꞌin nda.

⁶³ Saa xa̱ꞌnda sutu ra ínuu nuu ndiꞌi sutu toto ra, xaꞌa ya sínaꞌa ra mií ra nuu naꞌa ya ndixa ni ndi̱saa ra, saa ndi̱kaꞌan ra, káchi ra: ―Köo xíniñuꞌu ka yo naꞌa taxi na kuachi xaꞌa ra.

⁶⁴ Xi̱ni soꞌo mií ndo ya ndi̱kaꞌan ra, mií ra ku Ndioxi káchi ra, ta iin kuachi kaꞌnu ku ya yóꞌó nuu Ndioxi. ¿Ta unkua ndíkani ini ndóꞌo̱ ikan yo xiꞌin ra? ―káchi sutu ra ínuu nuu ndiꞌi sutu. Saa iin yuꞌu ku̱u ndiꞌi nda, ndi̱kaꞌan nda ya xíniñuꞌu kuvi Jesús.

⁶⁵ Saa xa̱á nda kóꞌni ndaa nda sii nuu ra, ta sava nda ndíkasi nuu ra, saa káni ni nda ikin nuu ra, saa káꞌan nda xiꞌin ra: ―Tá tu ndixa ra xíni ndiꞌi ñaꞌa ku un, ta kaꞌan unku nde ka̱ni yóꞌo̱ ―káchi nda xiꞌin ra. Saa ndi̱kiꞌin nda policía ra ta ndinuni loꞌo xákin nda xaꞌnda nuu ra.

Ndíkuaa ra Pedro Jesús

⁶⁶ Tá kúu saa ta xa índuꞌu ra Pedro keꞌe veꞌe sutu ra ínuu nuu ndiꞌi sutu, ta saa ke̱ta iin yá xáa chiñu nuu sutu ikán.

⁶⁷ Tá xi̱ni yá ra Pedro ndísaa ra nuu ñu̱ꞌu̱, saa ndi̱koto yá nuu ra ta ndi̱kaꞌan yá xiꞌin ra, káchi yá saa: ―Ra xi̱taꞌan xiꞌin Jesús ra ñuu Nazaret ku tu yóꞌo̱ va ―káchi yá xiꞌin ra.

⁶⁸ Saa ndi̱kuiin ra, káꞌan ra: ―Köo xíni i ra, ta ni köo xíni i unkua káꞌan un xaꞌa xiꞌin i ―káchi ra. Saa ke̱ta ra kuaꞌan ra yeꞌe keꞌe ikán. Ta ka̱na va iin cheꞌle.

⁶⁹ Saa ndi̱koto vaꞌa tuku yá xáa chiñu nuu sutu ikán nuu ra, ta ndi̱kaꞌan yá xiꞌin nda ndóo ikán, káchi yá saa: ―Taꞌan nda ítaꞌan xiꞌin Jesús ku tu ra yóꞌó va ―káchi yá.

⁷⁰ Saa ndi̱kuaa tuku ñaꞌa ra. Naꞌa loꞌo ta ndi̱kaꞌan tuku mií nda ndóo ikán xiꞌin ra Pedro, káchi nda saa: ―Taꞌan nda ikán ndixa ku un, chi ra ñuu Galilea ku un, chi tá káꞌan nda ikán, saa káꞌan un ―káchi nda xiꞌin ra.

⁷¹ Saa xa̱á ra távi chiꞌña ta chínaꞌa ra nuu Ndioxi káchi ra saa: ―Köo xíni i taa ra káꞌan ndo xaꞌa xiꞌin i ―káchi ra.

⁷² Saa ra ka̱na va cheꞌle ichí uvi. Saa ndi̱kaꞌán ini ra Pedro ya ndi̱kaꞌan Jesús xiꞌin ra, ka̱chi ra saa: “Täꞌan ka vi kana cheꞌle ichí uvi, ta xa uni ichí ndikuaa un yeꞌe, kaꞌan un ya köo xíni un yeꞌe”, ka̱chi Jesús xiꞌin ra. Tá ndi̱kaꞌán ini ra tuꞌun ndi̱kaꞌan Jesús xiꞌin ra, saa xa̱á ra xáku ni ra.