San Lucas 17 - Xochapa Mixteco

Ndaꞌvi ni na táa sii naꞌa íkan na ya väꞌa

¹ Iin kivi ndi̱kaꞌan Jesús xiꞌin nda ítaꞌan xiꞌin ra, káchi ra saa: ―Ndiꞌi saa ñaꞌñu koo naꞌa, na taa sii inka na ya ikan na ya väꞌa. Ta ndaꞌvi ni na íkan saa, chi vaxi kivi ta tixuꞌvi ni na ikan Ndioxi.

² Vaꞌa ka án yachi ndi̱tikaa na iin yu̱ú itun molinu sukun na ta kiꞌin ñaꞌa na sikana na ini nduta ñûꞌu ya ndiꞌi xaꞌa na, ya ná täa sii na na vali ndíkun sata i ya kiꞌvi na kuachi.

³ Yakan kua kuenta ni koo ndóꞌo̱. Tá íyo iin ra ñani ndo íkan ya väꞌa xiꞌin ndo, ta kaꞌan ndo xiꞌin ra ná ïkan ka ra saa xiꞌin ndo. Tá tu ndíko koo ini ra xaꞌa ya íkan ra xiꞌin ndo, ta vaꞌa xaa kaꞌnu ni ndo xaꞌa ra.

⁴ Vani uxa ichí íkan ra ya väꞌa xiꞌin ndo iin kivi, sundi tá tu vaxi ra uxa saa ichí nuu ndo káꞌan ra xiꞌin ndo: “Ndíko koo ini i xaa kaꞌnu ini un xaꞌa i”, káchi ra xiꞌin ndo, ta xaa kaꞌnu ini ndo xaꞌa ra ―káchi Jesús xiꞌin nda ítaꞌan xiꞌin ra.

Yáꞌa ni ndee ya ndáa ni ini yo Ndioxi

⁵ Saa kúu ta ndi̱kaꞌan nda ítaꞌan xiꞌin Jesús xiꞌin ra, káchi nda saa: ―Tata, chindee un ndeꞌe ná kundaa ni ini nde kuni nde Ndioxi ―káchi nda xiꞌin ra.

⁶ Saa ndi̱kuiin Tata yo Jesús káchi ra saa: ―Tá ndáa ni ini ndo xíni ndo Ndioxi, vani loꞌo paꞌa tíin tá káa ndikin siꞌva mostaza saa ndáa ini ndo ra. Ta saa vaꞌa kaꞌan ndo xiꞌin itun sicómoro, vani kúnu ni ndíkaa tioꞌo nu ta keta nu kuꞌun nu ndikaa nu ini nduta ñûꞌu chi kuni soꞌo nu tuꞌun káꞌan ndo ―káchi Jesús xiꞌin nda.

Na íkan ndisaa chiñu táꞌnda nuu na

⁷ Ta saa ndi̱kaꞌan tuku Jesús káchi ra saa: ―Tá tu íyo iin ra sa̱ta xitoꞌo ra xáa chiñu nuu ra ta ndi̱xaꞌan ra iku ta̱ꞌvi ra án xiꞌin kiti sana ndo ndi̱xaꞌan ra ta ndi̱ko koo ra xa̱a ra xikuaa, ta ¿án kaꞌan ndo xiꞌin ra, ndikunduꞌu ra kuxi ra?

⁸ ¿Án süvi xaꞌa ya xáa chiñu ra nuu ndo yakan xáꞌnda ka ndo chiñu nuu ra, káꞌan ndo xiꞌin ra, káchi ndo saa: “Xaa ndúvi un mií un ya sikuaꞌa un ñaꞌa kuxini i, nda ná ndiꞌi kuxi i saa kuxi mií un”, káchi ndo xiꞌin ra.

⁹ Ta köo xíniñuꞌu ndo taxi ndo ndixaꞌvi ndaꞌa ra, chi xa chiñu nuu ra kua ikan ra ya ndi̱kaꞌan ndo xiꞌin ra.

¹⁰ Ta saa ndóꞌo̱, tá íyo ra moso yóꞌó, saa íyo ndo nuu Ndioxi. Tá íkan ndiꞌi ndo ya ndi̱kaꞌan ra, ta káꞌan ndo: “Ni süvi ya ndee loꞌo íkan nde nuu ra saa chi ndisaa ya ndi̱kaꞌan ra xiꞌin va nde kua íkan nde”, káchi ndo ―káchi Jesús xiꞌin nda.

Síndaꞌa Jesús uxi na táꞌi xiꞌin kueꞌe lepra

¹¹ Tá kuaꞌan Jesús ñuu Jerusalén ta ndi̱yaꞌa ra ichí nuu ndíkitaꞌan ñuꞌú na Samaria xiꞌin ñuꞌú na Galilea.

¹² Saa ndi̱xaa ra nuu iin ñuu loꞌo ta ndi̱kitaꞌan ra xiꞌin uxi nda taa ndée ni ndóꞌo kueꞌe taꞌi ya náni lepra. Ta ndíta xíka nda kána nda Jesús.

¹³ Iin ndáꞌi koꞌo nda nuu ra káꞌan nda xiꞌin ra, káchi nda saa: ―¡Tata Maestro, kundaꞌvi ini un kuni un ndeꞌe, ndaꞌvi nde! ―káchi nda.

¹⁴ Saa xi̱ni ñaꞌa Jesús, ta ndi̱kaꞌan ra xiꞌin nda, káchi ra saa: ―Kuáꞌan ndo nuu sutu ná koto ra ndóꞌo̱ án xa ndu̱vaꞌa ndo ―káchi ra xiꞌin nda. Saa ke̱e nda kuaꞌan nda, tá xíka nda kuaꞌan nda ta ñaa ndu̱vaꞌa nda.

¹⁵ Tá xi̱ni iin ra ikán ndu̱vaꞌa ra, saa ndi̱ko koo ra nuu Jesús káꞌan ra, ndee ni káꞌan ra ya vaꞌa xaꞌa Ndioxi.

¹⁶ Ñaa si̱kusiti ra nuu Jesús. Nda nuu ñuꞌú ndi̱kuita ndee ra táxi ra tixaꞌvi ndaꞌa ra. Ta ni süvi ra Israel ku ra, ra ñuu Samaria ku ra.

¹⁷ Saa ndi̱kaꞌan Jesús, káchi ra saa: ―¿Án süvi uxi ku ndo ndu̱vaꞌa? Ta ¿máꞌa inka ka i̱in nda ikán?

¹⁸ Köo ka nda ndi̱ndiko koo taxi tixaꞌvi ndaꞌa Ndioxi, ndá siin iindaa ra inka ñuu yóꞌó ku ra ndi̱ko koo káꞌan ya vaꞌa xaꞌa Ndioxi ―káchi Jesús xiꞌin na.

¹⁹ Saa ndi̱kaꞌan Jesús xiꞌin ra, káchi ra saa: ―Kundichi kuáꞌan, xa ndu̱vaꞌa un chi ndáa ni ini un yeꞌe ―káchi Jesús xiꞌin ra.

Ndákan tuꞌun nda fariseo Jesús maa kua kaꞌnda chiñu Ndioxi ñuu ivi

²⁰ Iin kivi ndi̱xaa nda fariseo nuu Jesús ndákan tuꞌun ñaꞌa nda, káchi nda saa: ―¿Maa tindaa kivi xáa Ndioxi kaꞌnda chiñu ra ñuu ivi yóꞌó? ―káchi nda. Saa ndi̱kuiin Jesús káꞌan ra: ―Tá ná xáa kaꞌnda chiñu Ndioxi ta küchiñu yo kuni túvi yo ya.

²¹ Köo na kaꞌan: “Yóꞌó íin ya”, án “Káa íin ya”, kachi na, chi xa tañu ndo yóꞌó xa̱a ya íyo ya xiꞌin ndo ―káchi Jesús xiꞌin nda fariseo.

²² Ta saa ndi̱kaꞌan ra xiꞌin nda ítaꞌan xiꞌin ra, káchi ra saa: ―Vaxi kivi ta ku̱ni̱ ni ndo ndiko koo yeꞌe, Taa ra xa̱a ñuu ivi yóꞌó, sundi küni ka ndo yeꞌe.

²³ Ta kivi ikán kaꞌan ni naꞌa xiꞌin ndo: “Koto ndo, yóꞌó íin ra ke̱e nuu Ndioxi”, án “Káa íin ra”, kachi na xiꞌin ndo, ta küni soꞌo ndo ya káꞌan na xiꞌin ndo, ni kändixa ñaꞌa ndo.

²⁴ Saa chi tá ná ndiko koo i ta tá kúu nuu xínduta ndiꞌi xaꞌa ñuu ivi iin ndíyeꞌe ndiꞌi ni kúu ñaꞌñu, saa kuu ná ndiko koo yeꞌe, Taa ra xa̱a ñuu ivi yóꞌó.

²⁵ Sundi xiꞌna xíniñuꞌu ndoꞌo ni i, saa kundasi nuu ni na ñuu ivi yóꞌó kuni na yeꞌe.

²⁶ Tá xa ku̱yati kivi ndiko koo yeꞌe ku Taa ra xa̱a ñuu ivi yóꞌó, ta tá ku̱u tiempo ya ndi̱xika ra Noé saa kuu.

²⁷ Chi saa ku̱u kivi ndi̱xika ra Noé, nda iin na köo ndi̱xika ini kuvi na. Sítindaꞌa na seꞌe na, xíxi na tin xíꞌi va na. Saa i̱kan na nda kivi ndi̱kaꞌan Ndioxi xiꞌin ra Noé kiꞌvi ra ini itun barco. Tá ndi̱kiꞌvi ra ini nu, ta saa si̱kuun Ndioxi savi, ta iin ndi̱xiꞌi yaa naꞌa i̱kan rá.

²⁸ Saa ku̱u tu tiempo ndi̱xiyo ra Lot va: xi̱xi na tin xi̱ꞌi na, sa̱ta na tin ndi̱xiko na, chi̱ꞌi na tin si̱kee na, saa si̱kuaꞌa na veꞌe.

²⁹ Sundi tá kivi ke̱e ra Lot ñuu Sodoma xiꞌin na veꞌe ra ta si̱koyo Ndioxi ñu̱ꞌu̱ tin sufre nuu ndivi. Iin si̱ndiꞌi xaꞌa ndiꞌi ra na ndóo ñuu ikán.

³⁰ Tá ku̱u tiempo ikán, köo ndi̱xika ini na ndiꞌi xaꞌa na, ta ndi̱ꞌi xaꞌa na. Saa kuu ñuu ivi yóꞌó kivi ná ndiko koo yeꞌe, Taa ra xa̱a ñuu ivi yóꞌó.

³¹ ’Ndee ni ndee kuu kivi ikán. Tá íyo iin taa índuꞌu ra xíni veꞌe ra ta vaꞌa ka ná nüu ra kiꞌvi ra ndikuiso ra ñaꞌa ini veꞌe ra. Ni ra xáa chiñu iku, ta ná ndïko koo ka ra ndikuiso ra ñaꞌa ra.

³² Ndikaꞌán ini ndo ya ndo̱ꞌo yá síꞌi ra Lot, ndi̱ꞌi xaꞌa yá.

³³ Chi ndiꞌi na kúni sikaku mií, ta na ndáñuꞌu va ku na, tá ndá na síndiꞌi xaꞌa mií ya ndíkun na yeꞌe, na ñaa ku na kuchiñu kaku.

³⁴ ’Saa tá ná ndiko koo i iin ñǔu tá ná kundoo uvi na kusun nuu iin xito, iin na kuꞌun ta iin na ndoo.

³⁵ Tá ná koo uvi ná ñaꞌa ñúꞌu ná ndíko ná xiꞌin molinu, iin yá kuꞌun, ta iin yá ndoo.

³⁶ Tá ná kuñuꞌu uvi nda taa iku, iin ra kuꞌun ta iin ra ndoo ―káchi Jesús.

³⁷ Saa ndi̱ndakan tuꞌun ñaꞌa nda ítaꞌan xiꞌin ra, káchi nda saa: ―¿Mií kua kuu saa, Tata? ―káchi nda xiꞌin ra. Saa ndi̱kuiin ra káꞌan ra: ― Xíni mií ndo nuu índuꞌu ndìì ta ikán kua kátin ni mbelo xíka ri ―káchi Jesús.