Los Hechos 3 - Xochapa Mixteco

Síndaꞌa ra Pedro xiꞌin ra Juan iin taa ra küvi kaka

¹ Iin kivi ke̱e ra Pedro xiꞌin ra Juan, kuaꞌan nda veꞌe ñuꞌu kaꞌnu, ta kúu ya iin kuꞌva kàà uni xikuaa, hora ikán kua káꞌan na judío xiꞌin Ndioxi.

² Ñaa ndi̱xaa nda yeꞌe ñuꞌu ta xi̱ni nda índuꞌu iin ra ndákan, küvi kaka ra. Saa káa ra tá ka̱ku ra. Ta ndiꞌi kivi xáꞌan na taꞌan ra ndáka ñaꞌa na mií yeꞌe ñuꞌu nuu íin yeꞌe ya náni Yeꞌe Luvi. Ikán chínduꞌu na ra ndákan ra xuꞌun nuu na xáa veꞌe ñuꞌu.

³ Saa índuꞌu ra ndákan ra ta xi̱ni ra ndi̱xaa ra Pedro xiꞌin ra Juan kuakiꞌvi nda veꞌe ñuꞌu, saa xáku ndaꞌvi ra nuu nda ndúku ra xuꞌun nuu nda.

⁴ Ñaa ndi̱koto nda nuu ra, ta saa ndi̱kaꞌan ra Pedro xiꞌin ra, káchi ra saa: ―Koto nuu nde ―káchi ra.

⁵ Saa ndi̱koto vaꞌa ndixa ra nuu nda ndátun ra taxi nda xuꞌun ndaꞌa ra.

⁶ Ta saa ndi̱kaꞌan ra Pedro xiꞌin ra, káchi ra saa: ―Köo xuꞌun ndíso nde taxi nde ndaꞌa un, sundi ya kúu mií nde ta taxi nde ya ndaꞌa un. Kuandikoo kundichi kaka un tixin kivi Jesucristo, ra ñuu Nazaret, káꞌan i xiꞌin un ―káchi ra Pedro xiꞌin ra.

⁷ Ñaa tá ndi̱kaꞌan soꞌva ra Pedro xiꞌin ra, ta saa ti̱in ra ndaꞌa kuaꞌa ra ndi̱kundichi ra. Tá ndi̱kundichi soꞌva ra ta ndikun ndu̱ndee xaꞌa ra xiꞌin sukun xaꞌa ra.

⁸ Saa ndi̱kundichi ra xa̱á ra xíka ra. Ta saa ndi̱kiꞌvi ra xiꞌin nda veꞌe ñuꞌu, xíka mií ra ndi̱kiꞌvi ra xiꞌin nda. Kúsini ka vi ra ndakua kándeta ra, káꞌan ra ya vaꞌa xaꞌa Ndioxi.

⁹ Ndiꞌi na ñúꞌu yeꞌe ñuꞌu ikán xi̱ni ya ndu̱vaꞌa ra ta xi̱ni na káꞌan ni ra ya vaꞌa xaꞌa Ndioxi.

¹⁰ Saa ndi̱kanda ni ini na, íꞌvi ni na saa chi ndi̱kuni na ra ya xínduꞌu ra ndákan ra yeꞌe ñuꞌu ya náni Yeꞌe Luvi.

Káꞌan ndoso ra Pedro xaꞌa Jesús xiꞌin naꞌa

¹¹ Tá ndu̱vaꞌa ra ikán ta ni köo ndi̱xiin ra saña ñaꞌa ra, iin ndíkun tuun ra xíka ra xiꞌin nda. Ta saa xa̱á ndíkanda ni ini ndiꞌi naꞌa xíni ñaꞌa na. Ñaa iin ndi̱katin na nuu ndóo nda ini corredor ya íin yeꞌe ñuꞌu, ta corredor ikán náni ya Corredor ra Salomón.

¹² Tá xi̱ni ra Pedro ndiꞌi na ikán, ta ndi̱kaꞌan ra xiꞌin na káchi ra saa: ―Ndóꞌo̱ na taꞌan yo, na Israel, ¿ndachu ndíkanda ni ini ndo xíto ndo ya ndo̱ꞌo ra yóꞌó? saa xíto ni ndo nuu nde ¿Án vaꞌa ni taa kúu nde yakan vaꞌa si̱ndaꞌa nde ra, káꞌán ndo? ¿Xiꞌin ndee mií nde si̱ndaꞌa nde ra, káꞌán ndo? Ta süvi saa íyo ya.

¹³ Chi Ndioxi ra kaꞌnu, ra ka̱ñuꞌu ni xii sikua yo ra Abraham xiꞌin ra Isaac tin ra Jacob, ra ikán ku ra nda̱sa chee ni Jesús ra kúu Seꞌe ra, ta suvi ra ikán ku ra ti̱in ndo taxi ndo ndaꞌa na chiñu ta köo ndi̱xiin ndo saña ra tá ku̱ni ra Pilato saña ñaꞌa ra.

¹⁴ Sundi ndóꞌo̱ ta köo ndi̱xiin ndo saña ra vaꞌa, ra i̱í ni, chi ra xa̱ꞌni ndìì va ku ra ndi̱kaꞌan ndo xaꞌa saña.

¹⁵ Ta xa̱ꞌni ndo taa ra vaꞌa ni, chi iin mituꞌun ra ikán ku ra táxi ichí ya kutaku yo. Sundi Ndioxi ta si̱taku ñaꞌa ra. Ndeꞌe ku testigo xaꞌa ra, xi̱ni nde ndi̱taku ra.

¹⁶ Xaꞌa ya kándixa nde Jesús ya ndee ni ndee kúu mií kivi ra, yakan vaꞌa ndu̱vaꞌa ra yóꞌó. Xiꞌin ndee Jesús ndu̱vaꞌa ra ta xíto xiꞌin nuu ndo ra ndíchi ra nuu ndo vitin ―káchi ra Pedro xiꞌin na.

¹⁷ Saa xa̱á káꞌan ka ra xiꞌin na, káchi ra saa: ―Na taꞌan yo, ya ndaa kua xa̱ꞌni ndo Jesús, xaꞌa ya naá nuu va ndo kua i̱kan ndo saa, ta saa i̱kan tu na chiñu kúu mií chiñu nuu va ndo.

¹⁸ Sundi Ndioxi ta xa̱a nduvi ndiꞌi ra ya íyo nuu tuꞌun ra, ya ta̱a ndiꞌi nda ndi̱kaꞌan ndoso tuꞌun yuꞌu ra xinaꞌa, chi ya ikán káchi ya saa: “Xíniñuꞌu ndoꞌo ni Cristo, ra tiꞌvi Ndioxi kixi sikaku yoo ñuu ivi yóꞌó”, káchi ya ta̱a nda ―káchi ra Pedro xiꞌin na.

¹⁹ Saa ndi̱kaꞌan ka ra xiꞌin na káchi ra saa: ―Na taꞌan yo, ndiko koo ndo nuu Ndioxi, ta ndiko koo ini ndo xaꞌa kuachi ndo, ta saa xaa kaꞌnu ini ra xaꞌa kuachi ndo. Ikan ndo saa, ta chindee Ndioxi ndóꞌo̱ ndikiꞌin ndo ini ndo koo vaꞌa ini ndo.

²⁰ Saa tindaa iin kivi ta tiꞌvi tuku Ndioxi Jesús ya ndiko koo ra ñuu ivi yóꞌó chindee ra yoo, tá íyo ya ndi̱kaꞌan Ndioxi xaꞌa ra yachi saa koo ya.

²¹ Sundi vitin ta xíniñuꞌu Jesús koo ra nuu ndivi nda kivi ná xaa vií Ndioxi ñuu ivi yóꞌó. Nduxaa ya kindoo vaꞌa ndiꞌi ñaꞌa. Nduu ya tá ndi̱xiyo ya núnu̱ú tá täꞌan kiꞌvi kuachi ñuu ivi yóꞌó. Tá íyo ya ndi̱kaꞌan Ndioxi tixin ndiꞌi nda i̱í, nda ndi̱kaꞌan ndoso tuꞌun yuꞌu ra xinaꞌa, saa koo ya ikan ra.

²² Iin ra ta̱a tuꞌun Ndioxi xinaꞌa ku ra náni Moisés, ta ra ikán ta̱a ra tuꞌun xaꞌa Jesús nuu ndi̱kaꞌan ra xiꞌin xii sikua yo káchi ra saa: “Vaxi kivi ta ndikaxin Ndioxi iin taa tañu mií ndo kixi ra kaꞌan ndoso ra tuꞌun yuꞌu Ndioxi xiꞌin ndo. Tá káa yeꞌe, saa koo ra ikán kaꞌan ra xiꞌin ndo, ta kuni soꞌo vaꞌa ndo ya kaꞌan ra xiꞌin ndo,

²³ chi sava naꞌa tá ná kändixa na ya kaꞌan ra ikán xiꞌin na, ta ndiꞌi xaꞌa na ikan Ndioxi kana koo na ñuu na, ndoꞌo na tá kuꞌva ndóꞌo itun tá táva na tioꞌo nu nuu ndíchi nu”, soꞌva káchi ya ta̱a ra Moisés xinaꞌa.

²⁴ Tá kúu ra Samuel ra ndi̱kaꞌan ndoso tuꞌun yuꞌu Ndioxi xinaꞌa xiꞌin tá kuu ndiꞌi ka nda ndi̱kaꞌan tuꞌun yuꞌu Ndioxi, nda ikán ku nda ndi̱kaꞌan xaꞌa ya kúu vitin.

²⁵ Ta ndóꞌo̱ ku seꞌe ñani nda ndi̱kaꞌan ndoso tuꞌun yuꞌu Ndioxi xinaꞌa, yakan vitin ndíkiꞌin ndo ya vaꞌa ki̱ndoo ra xiꞌin xii sikua ndo tá ndi̱kaꞌan ra xiꞌin ra Abraham, káchi ra saa: “Xaꞌa iin seꞌe yóꞌo̱ kua taxi i ya vaꞌa ndaꞌa ndiꞌi na ñuu ivi yóꞌó” ka̱chi Ndioxi xiꞌin ra.

²⁶ Tá si̱taku Ndioxi Seꞌe ra ta xiꞌna nuu yo judío kua ti̱ꞌvi ñaꞌa ra ki̱xi ra ya ta̱xi ra ya vaꞌa ndaꞌa yo kutaku yo, ta saa ná ndiko koo ini iin iin ndo xaꞌa ya väꞌa íkan ndo, ta ná ndikundikun ndo Ndioxi ―káchi ra Pedro xiꞌin na.