Los Hechos 2 - Xochapa Mixteco

Xa̱a Tachi I̱í Ndioxi

¹ Saa ku̱u ndi̱yaꞌa uxa semana ya ndi̱taku Jesús ta ti̱ndaa kivi ya koo viko Pentecostés. Saa ndi̱kitaꞌan ndiꞌi na kándixa Jesús ndóo na iin veꞌe.

² Ta iin ku̱u soꞌva xa̱á ndee ni níꞌi. Chí nuu ndivi ke̱e ya níꞌi. Tá íkan tachi ndee ni, saa kúu, iin xa̱á níꞌi ndiꞌi ni kúu ini veꞌe nuu ndóo na.

³ Saa xi̱ni na iin ñaꞌa tá káa ñu̱ꞌu̱ saa káa ya xi̱ni na. Ñaa ta̱ꞌvi taꞌan ya ndikundoso ya sata iin iin na.

⁴ Ta Tachi I̱í Ndioxi kua xa̱a sata iin iin na, ñaa xa̱á iin iin na káꞌan na inka nuu tuꞌun ya káꞌan na inka ñuu. Tá íyo ya ta̱xi Tachi I̱í Ndioxi ndaꞌa na kaꞌan na, saa íyo ya xa̱á na káꞌan na.

⁵ Ta kuaꞌa ni nda judío nda káñuꞌu ni Ndioxi ndi̱xaa ndóo ñuu Jerusalén kivi ikán, ta kuaꞌa ni nda ikán ka̱ku inka ñuu ta ndi̱xaa nda ndóo nda ikán.

⁶ Saa tá xi̱ni soꞌo ndiꞌi nda ikán ya ndee ni ndi̱niꞌi ini veꞌe nuu ndóo na kándixa Jesús, ta saa ndi̱kitaꞌan nda, kuaꞌa ni ku nda kuaꞌan koto. Ta saa iin ndi̱saka soꞌva ini nda saa chi xi̱ni soꞌo iin iin nda tuꞌun ya ka̱ku xiꞌin nda.

⁷ Iin ndi̱kanda ini nda, saa xa̱á nda káꞌan nda xiꞌin taꞌan nda, kachi nda saa: ―¿Unkua yóꞌó? ¿Ndachu vaꞌa ni káꞌan na yóꞌó tuꞌun yo, ta na ke̱e chí estado Galilea ku ndiꞌi na?

⁸ ¿Unkua íkan na vaꞌa ni káꞌan na tuꞌun yo ya ka̱ku xiꞌin yo?, ta xa síín nuu tuꞌun káꞌan ndiꞌi yo.

⁹ Kuaꞌa ka vi kuu yo, ndá yokan ñaꞌñu ke̱e yo, yo ke̱e Partia tin Media xiꞌin Elam tin Mesopotamia. Sava tu yo ke̱e Judea yóꞌó va, ta sava tu yo ke̱e Capadocia xiꞌin Ponto tin Asia.

¹⁰ Ta sava tu yo ke̱e Frigia xiꞌin Panfilia, ta sava tu yo ke̱e Egipto va. Sava tu yo ke̱e estado Libia ya ndíkaa yati xiꞌin ñuu Cirene. Ta sava tu yo ka̱ku Roma ta xa̱a yo ndóo yo yóꞌó. Raza na judío ku sava yo, ta sava yo xi̱ndikun inka ichí, ta ndi̱kundikun yo ichí na judío.

¹¹ Sava tu yo ke̱e nda Creta ya ndíkaa nda maꞌñu nduta ñûꞌu, ta sava tu yo ke̱e nda Arabia. Ndixa ni vi kuaꞌa ñuu ke̱e yo ta nani xíni soꞌo yo káꞌan na yóꞌó tuꞌun yo. Xíni soꞌo yo káꞌan na yatuꞌun íkan Ndioxi ―káchi nda ikán.

¹² Saa iin ndi̱kanda ini nda, ni köo xíni nda unkua ikan nda xaꞌa ya xi̱ni nda. Ñaa xa̱á ndákan tuꞌun taꞌan nda káchi nda saa: ―¿Unkua kúni kaꞌan ndiꞌi ya yóꞌó? ―káchi nda xiꞌin taꞌan nda.

¹³ Sundi sava nda ta xáku ndaa ni ñaꞌa nda, káchi nda saa: ―Na xíꞌi va ku na ñaa, ta ndi̱xini ni na, yakan íkan na saa ―káchi nda.

Ya núnu̱ú ndi̱kaꞌan ra Pedro xiꞌin naꞌa

¹⁴ Saa ndi̱kundichi ra Pedro xiꞌin uxi iin saa nda taꞌan ra, ñaa xa̱á ra ndee ka vi káꞌan ra xiꞌin nda ikán, káchi ra saa: ―Na taꞌan yo, ndóꞌo̱ judío xiꞌin ndiꞌi ka mii ndo ndóo ñuu Jerusalén yóꞌó, kuni soꞌo vaꞌa ndo ya kaꞌan i xiꞌin ndo.

¹⁵ Chi sava ndo káꞌán ndeꞌe xíꞌi ku nde, káꞌán ndo. Ta süvi ya ndaa kua, ¿mií kama ni koꞌo nde?, ta sikan kàà ììn xitaan kua.

¹⁶ Süvi ndeꞌe xíꞌi ku nde. Tá íyo ya ta̱a ra ndi̱kaꞌan ndoso tuꞌun yuꞌu Ndioxi xinaꞌa, ra náni Joel, saa va íyo ya i̱kan Ndioxi xiꞌin nde, chi ya ta̱a ra ikán káchi ya saa:

¹⁷ Tá xa ku̱yati ndiꞌi xaꞌa ñuu ivi, ta tiꞌvi i Tachi i ya koo ya xiꞌin ndiꞌi saa kúu na ñuu ivi. Ta seꞌe taa ndo xiꞌin seꞌe síꞌi ndo, kaꞌan ndoso na tuꞌun yuꞌu i, Saa situvi ya nuu na kuâán ikan i. Ta na xikuaꞌa taxi i xani nuu na ndixani na.

¹⁸ Ta kivi ikán taxi i Tachi i koo ya xiꞌin na xáa chiñu nuu i: taa ku ra, ñaꞌa ku ná, ndiꞌi na taxi i ya ndaꞌa ya kaꞌan ndoso na tuꞌun yuꞌu i.

¹⁹ Ta sinaꞌa i ñaꞌa nuu ndivi ya kuni na, ñaa ndikanda ni ini na, koo seña ñuu ivi yóꞌó ikan i. Kuni na ni̱í ta kuni na koko ni ñu̱ꞌu̱. Saa koo ni tu iꞌma va, nda tá káa viko, saa koo ya.

²⁰ Kunaa nuu ñu̱ꞌù, ta ndukuaꞌa yoo, tá káa ni̱í saa nduu ri. Xiꞌna ya yóꞌó kuu, ta saa tindaa kivi chee ni ya ndiko koo Tata yo, ta ndee ni kuu ikan ra kivi ikán.

²¹ Ndiꞌi ni kúu naꞌa tá ná kaꞌan na xiꞌin Tata yo, kana na kivi ra, ta sikaku ra na. Soꞌva káchi tuꞌun Ndioxi ya ta̱a ra Joel xinaꞌa.

²² ’Nda taꞌan yo nda ñuu Israel, kuni soꞌo ndo ya kaꞌan i xiꞌin ndo xaꞌa Jesús, ra ñuu Nazaret. Iin taa ra vaꞌa ni ku ra. Suvi mií Ndioxi ku ra ndi̱kaxin ra i̱kan ra kuaꞌa ni ya vaꞌa, chi̱ndee ni ra yoo, i̱kan ni ra yatuꞌun Ndioxi nuu yo. Ta tixin ndiꞌi ya yóꞌó si̱naꞌa Ndioxi yoo ndá taa ku Jesús.

²³ Sundi tá ti̱in ndo Jesús ta xa xíni va Ndioxi unkua kundoꞌo ra, chi tá íyo ya chi̱tuni Ndioxi, saa íyo ndiꞌi ya ndo̱ꞌo ra. Ta ndóꞌo̱ xa̱ꞌni ndo ra chi ta̱xi ndo ra ndaꞌa naꞌa na väꞌa, ta̱xi ndo xa̱ꞌni ñaꞌa na Roma. Saa ndi̱xiyo yuꞌu ndo xiꞌin na, chi̱nuu na ra nuu itun cruzin ta ikán ndi̱xiꞌi ra.

²⁴ Sundi tá ndi̱xiꞌi ra ta köo ndi̱taxi Ndioxi ndoo ra ndikaa ra ndaꞌa ya ndíi, chi köo ichí ya ndíi kaꞌnda chiñu ya nuu ra.

²⁵ Soꞌva ndo̱ꞌo ra ndi̱taku ra chi xa xinaꞌa vi ndi̱kaꞌan ra rey David xaꞌa Jesús, ya ndi̱kaꞌan ra xiꞌin Iva ra Ndioxi, káchi ra saa: Ndiꞌi saa kivi xíni i Iva i Ndioxi, íyo tuꞌva ra xiꞌin i ñaꞌñu kuáꞌá i ya chindee ra yeꞌe ya ná ku ïꞌvi i nuu ndá ka ñaꞌa.

²⁶ Yakan kua kúsini ni i ta xáa kaꞌnu i Iva i xiꞌin yuꞌu i. vani tindaa iin kivi kuvi i, sundi köo íꞌvi i kuvi i,

²⁷ chi ndáa ni ini i yóꞌo̱, Tata Ndioxi, ta xíni i täxi un ndoo ikin kuñu i ndikaa ya tixin ñuꞌú nuu ñúꞌu na ndíi. Ta ni täxi un taꞌi kuñu i, chi ra i̱í ku i.

²⁸ Si̱naꞌa un ichí vaꞌa nuu i, nuu kutaku i ndiꞌi saa ichí. Ta kusini ni i chi ndiꞌi saa kivi koo i xiꞌin un, soꞌva káchi ya ta̱a ra rey David xinaꞌa ―káchi ra Pedro xiꞌin nda.

²⁹ Saa ndi̱kaꞌan ka ra xiꞌin nda ndíkani ra nuu nda unkua káꞌan tuꞌun ikán, káchi ra saa: ―Ndóꞌo̱ nda taꞌan yo, xíni mií va ndo xaꞌa xii sikua yo ra rey David. Ndi̱xiꞌi xii yo ta ndi̱taꞌi kuñu ra ta nda kivi vitin íyo ñaña ra nuu ndi̱nduxin ra, ñuu yo yóꞌó.

³⁰ Sundi ra ndi̱kaꞌan ndoso tuꞌun yuꞌu Ndioxi ndi̱xiyo ra, ta ku̱ndaa ini ra xaꞌa tuꞌun ya ndi̱kaꞌan Ndioxi xiꞌin ra, nuu chi̱naꞌa ñaꞌa Ndioxi ya kaku iin taa tixin seꞌe sikua ra ñuu ivi yóꞌó, ta ra ikán ku ra ku Cristo, ra ndikunduꞌu nuu tai toꞌo nuu xi̱nduꞌu mií ra rey ikán.

³¹ Ta xii sikua yo, ra David xa yachi vi xi̱ni ra saa ku̱ndaa ini ra xaꞌa Cristo ya nditaku ra, ta ndöo ya vaꞌa ra ndikaa ya nuu ñúꞌu na ndíi ni kuñu ra täꞌi, káchi Ndioxi xiꞌin xii yo.

³² Ta vitin ndeꞌe ku testigo xaꞌa Jesús ya si̱taku Ndioxi ra tixin ñuꞌú.

³³ Ta ndi̱kiꞌin Ndioxi ra kuaꞌan xiꞌin ra koo ra ñaꞌñu kuáꞌá ra nuu ndivi. Saa ta̱xi Ndioxi Tachi ra ndaꞌa Jesús tá íyo ya ndi̱kaꞌan ra xiꞌin Jesús yachi, saa íyo ya i̱kan ra. Ta ndiꞌi ya xíto ndo xiꞌin ya xíni ndo vitin, Tachi I̱í Ndioxi ya ti̱ꞌvi ra ndaꞌa nde kua i̱kan saa xiꞌin nde.

³⁴ Chi xii sikua yo, ra rey David, ta köo ndi̱ndaa ra nuu ndivi, yakan süvi xaꞌa mií ra káꞌan ra tá ndi̱kaꞌan ra, káchi ra saa: Ndioxi ndi̱kaꞌan ra xiꞌin Tata i, ra Chee nuu i, káchi ra saa: “Naꞌa, yóꞌó koo un xiꞌin i ñaꞌñu kuáꞌá i, yóꞌó koo un xiꞌin i chi kúni i xaa toꞌo i yóꞌo̱.

³⁵ Yóꞌó koo un xiꞌin i ndakua ná sindiꞌi xaꞌa ndiꞌi i na íyo kuachi xiꞌin un, na xïin kuni yóꞌo̱”, soꞌva káchi Ndioxi xiꞌin Tata i Cristo, káchi ya ta̱a ra rey David ―káchi ra Pedro xiꞌin nda. Saa ndi̱kaꞌan ka ra xiꞌin nda, káchi ra saa: ―Na taꞌan yo, ya yóꞌó kua sínaꞌa mií yo ya köo ndi̱ndaa xii yo ra rey David nuu ndivi.

³⁶ Ta xaꞌa ya ñaa kua xíniñuꞌu kundaa ini ndiꞌi ndóꞌo̱ na taꞌan yo Israel chi suvi mií Jesús ra chi̱nuu ndo nuu cruzin ku ra kúu Cristo ra sikaku yoo ―káchi ra Pedro xiꞌin nda.

³⁷ Tá xi̱ni soꞌo nda ya ndi̱kaꞌan ra xiꞌin nda, saa ndi̱taꞌvi ni nima nda xa̱á kúsuchi ni ini nda. Ñaa ndi̱kaꞌan nda xiꞌin ra Pedro tin nda taꞌan ra, káchi nda saa: ―Ndóꞌo̱ nda taꞌan yo, ¿unkua ikan nde vitin? ―káchi nda.

³⁸ Saa ndi̱kuiin ra Pedro káꞌan ra xiꞌin nda káchi ra saa: ―Ndiko koo ini ndo xaꞌa ndiꞌi kuachi ndo. Ta saa kuchi ndo tixin kivi Jesucristo ya ná xaa kaꞌnu ini Ndioxi xaꞌa kuachi ndo. Saa kua ndikiꞌin ndo Tachi Ií ra koo ya xiꞌin ndo.

³⁹ Chi saa íyo ya ndi̱kaꞌan Ndioxi. Ndi̱kaꞌan ra taxi ra Tachi ra koo ya xiꞌin ndo tin seꞌe ndo. Taxi tu ra ya koo ya xiꞌin ndiꞌi na íyo xíka ni va. Ndiꞌi kúu na kána Ndioxi kundikun ichí ra, taxi ra Tachi ra koo ya xiꞌin na ―káchi ra Pedro xiꞌin nda.

⁴⁰ Xiꞌin tuꞌun yóꞌó tin kuaꞌa ni ka nuu tuꞌun ndi̱kaꞌan ra xiꞌin nda, ndíkani ra nuu nda, káchi ra saa: ―Nditaxi ndo mií ndo ndaꞌa Ndioxi ya ná sikaku ra ndóꞌo̱, süvi ka vi ya kundoꞌo ndo tá kundoꞌo na väꞌa, na íyo vitin ―káchi ra xiꞌin nda.

⁴¹ Ta kuaꞌa ka vi ku na chi̱chi mi kivi ikán. Iin kuꞌva uni mil ku na chi̱chi xaꞌa ya ka̱ndixa na tuꞌun ya ndi̱kaꞌan ra Pedro xiꞌin na. Nda kivi saa ndi̱kitaꞌan na chi̱chi ikán xiꞌin na kándixa Jesús.

⁴² Ta ndiꞌi saa kivi xíni soꞌo na ya sínaꞌa nda apóstol. Tá kuꞌva íyo ya káꞌan nda xiꞌin na, saa íyo ya íkan na xiꞌin taꞌan na. Vitin taan ndíkitaꞌan ndiꞌi na xíxi na xiꞌin taꞌan na. Saa káꞌan tu na xiꞌin Ndioxi va.

Ndá kuꞌva ndi̱xiyo na núnu̱ú xi̱ndikun Jesús

⁴³ Ta ndíkanda ni ini ndiꞌi na xíto na yatuꞌun íkan nda apóstol.

⁴⁴ Saa ndiꞌi na kándixa Jesús iin yuꞌu íyo ndiꞌi na xiꞌin taꞌan na, iin íyo ndikaꞌnu ndiꞌi ñaꞌa na xiꞌin taꞌan na.

⁴⁵ Tá xíni na köo ñaꞌa sava na taꞌan na, ta xíko na ñaꞌa na, án ñuꞌú na, ñaa kána xuꞌun chíndee ñaꞌa nda. Tá kuꞌva xíniñuꞌu na, saa íyo ya táxi na ndaꞌa taꞌan na.

⁴⁶ Vitin taan ndíkitaꞌan ndiꞌi na veꞌe ñuꞌu kaꞌnu, saa ndíkitaꞌan tu na veꞌe va na. Ndinuu ka vi ini na xíxi na xiꞌin taꞌan na, kúsini ka vi na xiꞌin taꞌan na.

⁴⁷ Xáa toꞌo ka vi na Ndioxi. Ta ínuu vaꞌa ka vi tuꞌun na nuu inka naꞌa. Ta vitin taan íyo ka na ndíko koo ini xaꞌa kuachi na, ñaa xáa na ndíkundikun na Jesús ta síkaku Ndioxi na.