Judas 1 - Xochapa Mixteco

Káꞌan ndioxi ra Judas xiꞌin na kándixa Tata yo Jesucristo.

¹ Yeꞌe, Judas, ñani ra Jacobo, ra xáa chiñu nuu Tata yo Jesucristo ku i táa tutu yóꞌó xaa ya ndaꞌa ndóꞌo̱ ka̱na ra, saa nda̱sa i̱í Iva yo Ndioxi ndóꞌo̱, ta ndáa ni Tata yo Jesucristo ndóꞌo̱.

² Ta ná niꞌi kuaꞌa ni ndo ya vaꞌa nuu Iva yo Ndioxi, ra kúndaꞌvi ni ini xíni ndóꞌo̱, saa ná koo vaꞌa ni ini ndo.

Kundaa ni ndo mií ndo nuu nda vata káꞌan ndoso tuꞌun yuꞌu Ndioxi xiꞌin nda vata sínaꞌa naꞌa

³ Ñani mani, xa yachi vi kúni ni i taa i tutu yóꞌó xaa ya ndaꞌa ndo nuu káꞌan i xiꞌin ndo xaꞌa ya síkaku Iva yo Ndioxi yoo. Ta nda vitin vi táa i ya xaa ya nuu ndo ya ndúku ni i ya mani nuu ndo káꞌan i xiꞌin ndo, täxi ndo sindaꞌvi nda sínaꞌa ya vata ndóꞌo̱, ta xaꞌa ni ka ndo nde ya kandixa ni ndo tá kuꞌva ku̱ndaa ini na ñuu Ndioxi.

⁴ Saa chi íyo sava nda xa ndi̱kee sěꞌe tañu ndo, ta xaꞌa nda ñaa kua káꞌan tuꞌun Ndioxi ya ta̱a na xinaꞌa, nda ñaa ta kuꞌun nda nuu ndiꞌi xaꞌa nda, chi süvi nda vaꞌa ku nda, yakan káꞌan nda xiꞌin ndo: “Vaꞌa ni ikan ndo tá kuꞌva kúni mií va ndo chi köo kuachi xaꞌa ya nuu Ndioxi”, káchi nda xiꞌin ndo. Chi ndíkuaa nda Tata yo Jesucristo, ra xáꞌnda chiñu nuu yo.

⁵ Ta yeꞌe ra kúni i sindikaꞌán i ini ndo xaꞌa ya xa xíni vaꞌa ndo xaꞌa: Chi Iva yo Ndioxi ta si̱kaku ra na Israel ñuu Egipto, ta sindiꞌi saa si̱ndiꞌi xaꞌa yaa ra naꞌa, na köo ndi̱xiin kandixa ñaꞌa.

⁶ Ta ndikaꞌán tu ini ndo ya kundo̱ꞌo na tatun Ndioxi, na köo ndi̱xaa súvi chiñu ya xa̱ꞌnda chiñu Ndioxi nuu na, si̱ndoo ndaꞌa na chiñu vaꞌa ni ta̱xi ra ndaꞌa na xaa súvi na. Ta xaꞌa ya ikán kua ta̱an ra na veꞌe kàà nuu naá ni, núꞌni na, ta ikán kuñuꞌu na ndiꞌi saa kúu tiempo ya vaxi, ta kundátun na nda ná tindaa kivi nuu yáꞌa ni ndee kuu ya xaa nani Ndioxi kuachi xiꞌin ndiꞌi na ñuu ivi.

⁷ Ta saa ndi̱kaꞌán tu ini ndo xaꞌa ya ndo̱ꞌo na ñuu Sodoma xiꞌin na ñuu Gomorra xiꞌin ka ñuu ya xi̱ndoꞌni yati xiꞌin ya. Iin si̱ndiꞌi vaꞌa Ndioxi xaꞌa na chi kini ni i̱kan na, ndi̱xika sií nda taa xiꞌin ná ñaꞌa ta saa i̱kan tu ná ñaꞌa va. Saa ndi̱kiꞌvi nda taa xiꞌin taꞌan mií nda, ta saa i̱kan tu ná ñaꞌa va. Ta yáꞌa ni ndee kundoꞌo na koko na xiꞌin ñu̱ꞌu̱ ndiꞌi saa kivi ya vaxi. Ya yóꞌó sínaꞌa yoo ya ná ïkan yo saa.

⁸ Ta kuꞌva saa kua i̱kan tu nda vata, nda sínaꞌa tuꞌun Ndioxi chi ndiꞌi ya ndíxani nda kua íkan nda, saa xáa yakua nda ikin kuñu nda, ta köo táxi nda kaꞌnda chiñu Ndioxi nuu nda, saa káꞌan kini nda xaꞌa ndee naꞌnu ya íyo nuu sukun.

⁹ Ni mií tatun Ndioxi ya núnu̱ú ya ndee ni ndee kúu mií ya Miguel ya xáꞌnda chiñu nuu kuaꞌa ni tatun Ndioxi, ta köo ndi̱xaꞌa ndee ini ya tavi chiꞌña ya kiti nǎꞌa tá kivi ka̱nitaꞌan ya xiꞌin ri xaꞌa ikin kuñu ra Moisés. Ta ya ndi̱kaꞌan ya xiꞌin ri kua ka̱chi ya saa: “Mií Iva i Ndioxi ná xaa nduvaꞌa ni xiꞌin un”, ka̱chi ya xiꞌin ri.

¹⁰ Ta saa íkan nda vata ñaa, nda sínaꞌa tuꞌun Ndioxi, chi ni köo íꞌvi nda káꞌan ndikuu nda xaꞌa ñaꞌa ya köo kúndaa ini nda xiꞌin. Tá íkan kiti köo ya xínituni va saa íkan nda chi síndiꞌi xaꞌa nda mií va nda.

¹¹ ¡Ndaꞌvi ni nda! Chi kuaꞌan nda ichí taꞌan ya ndi̱xika ra Caín ra xa̱ꞌni ñani xinaꞌa. Ta saa íkan tu nda tá i̱kan ra Balán chi xíni ni nda ndá kuꞌva tava nda xuꞌun ndaꞌa naꞌa. Ta saa íkan tu nda tá kuꞌva i̱kan ra Coré xinaꞌa köo ndi̱xiin ra xaa súvi ra chiñu ya ndi̱taꞌnda nuu ra xaa súvi ra, ta saa kundoꞌo nda ñaa, síndiꞌi nda xaꞌa mií va nda.

¹² Ta nda vata káꞌan yo xaꞌa yóꞌó ta nda síndiꞌi xaꞌa va ku nda vikó ya táva ndo nuu ndíkaꞌán ini ndo xaꞌa Tata yo Jesucristo, chi tá xáa nda nuu ndóo ndo ta ndee ni xíxi nda tin xíꞌi nda ndakua xáa ini nda, ndisaa xaꞌa mií va nda ndee ni ndíꞌi ini nda, ta ni köo xáa toꞌo nda Ndioxi. Tá íin nda paxto ndáa kiti sana nda, ta ndisaa xaꞌa mií va nda ndíꞌi ni ini nda kuxi nda, saa íin nda ñaa. Saa íin tu nda tá íyo vi̱kó ya köo savi ndíso, ya síndiꞌi xaꞌa tachi. Saa íin tu nda tá íin itun kuiꞌi xa xíniñuꞌu kuun kuiꞌi ndaꞌa, ta ni köo kuiꞌi kúun ndaꞌa nu. Tá íin itun ta̱va vaꞌa naꞌa tioꞌo saa íin nda. Xa ndi̱ꞌi vaꞌa xaꞌa nda.

¹³ Tá kuꞌva xíto yo ndee ni ndíkanda nuu nduta ñûꞌu ta iin kána koo ndiꞌi chiñu nuu ra ya kána koo ñaꞌa yakua ñúꞌu ini rá maá, ta kuꞌva saa íkan nda ikán ndínaꞌa nda ya yakua íyo nima nda. Tá ndo̱ꞌo kiti kimi, kiti nda̱ñuꞌu, ta ke̱e ri kuaꞌan ri ndi̱koyo ri nuu naá ni va, saa íin nda ikán. Ta saa kundoꞌo nda ndiꞌi saa kúu kivi.

¹⁴ Ra Enoc, ra uxa ra kúu seꞌe ñani sikua ra Adán, ra ikán ku ra ndi̱kaꞌan xaꞌa nda taa nda sinaꞌa ya vata ñaa, ka̱chi ra saa: “¡Koto ndo vii! Xa xi̱ni i vaxi kuaꞌa ni mil na tatun Ndioxi xiꞌin ra,

¹⁵ ta vaxi ra ya xaa nani ra kuachi xiꞌin ndiꞌi ni kúu na, saa sitixuꞌvi ni ra na xaꞌa ndiꞌi ni kúu ya väꞌa íkan na xiꞌin ndiꞌi ni kúu tuꞌun väꞌa ya ndi̱kaꞌan na xaꞌa Ndioxi”.

¹⁶ Ta nda sínaꞌa ya vata xaꞌa tuꞌun Ndioxi ku nda káꞌan kuáchi ni, ndiꞌi saa kivi ndúku nda kuachi naꞌa ya kaꞌan nda xaꞌa na, ta ndisaa ya kúni mií nda kua íkan nda, kútai ni ini nda xíni nda mií nda ya kúni nda sixinu nda ini na, ta saa kuchiñu tava nda ya kúni nda ndaꞌa na.

Tuun ni ná kundikun yo Tata yo Jesucristo

¹⁷ Sundi ndóꞌo̱ ñani yo, ta ndikaꞌán ni ini ndo xaꞌa tuꞌun ya ndi̱kaꞌan nda xa̱a chiñu nuu Tata yo Jesucristo tá yachi.

¹⁸ Chi nda ikán ta ndi̱kaꞌan nda: “Tá xa ti̱ndaa kivi ya ndiꞌi xaꞌa ñuu ivi yóꞌó, ta koo kuaꞌa ni naꞌa, na kusiki ndaa Ndioxi, ta koo na tá kuꞌva kúni mií na, ikan ni na ya väꞌa kúni mií na”.

¹⁹ Ta nda káꞌan i xaꞌa xiꞌin ndo ku nda, táva kuachi xiꞌin ndo ta taꞌvi taꞌan ndo, ta ndisaa ya kútoo mií ikin kuñu nda kua íkan nda, ta köo Tachi Ndioxi íyo xiꞌin nda.

Xaa kaꞌnu ni ndo Ndioxi

²⁰ Sundi ndóꞌo̱ ñani yo, ta iin tuun saa ná chindee taꞌan ni ndo xiꞌin taꞌan ndo ya ndinuni kundikun ndo tuꞌun i̱í ya kándixa ndo, ta kaꞌan ni ndo xiꞌin Ndioxi tá kuꞌva kúni mií Tachi I̱í Ndioxi.

²¹ Ta sïndoo ndo ya ndíkun ndo ichí Ndioxi, ra kúꞌvi ni ini xíni ndóꞌo̱, ta saa niꞌi ndo koo ndo xiꞌin ra ndiꞌi saa ichí xaꞌa ya kúndaꞌvi ni ini ra xíni ra ndóꞌo̱.

²² Ta sixinu ndo ini na köo kúndaa vaꞌa ini ya ná kandixa ni na Tata yo.

²³ Ta chindee taꞌan ndo xiꞌin na ná kaku na, ndixita ndo na täxi ndo kuꞌun na nuu koko na, saa kundaꞌvi ni ini ndo kuni ndo inka na, ta xíniñuꞌu kuenta ni koo ndo xiꞌin mií ndo, saa ná kundási nuu ndo chiñu väꞌa ya kini ni íkan na.

Káꞌan vaꞌa ni ra Judas xaꞌa Ndioxi

²⁴ Ná xaa kaꞌnu ni yo Ndioxi chi ndee ni ndee kúu mií ra ya chindee ra yoo ya ná sïndikoo yo ichí ra ya ndaa kándixa yo. Ta vaxi kivi kundita yo nuu ra nuu íyo ndiꞌi ya kaꞌnu luvi ni. Saa ndasa vaꞌa ra yoo nduu yo naꞌa, na köo ka kuachi kúu mií nuu ra, ta yáꞌa ni kusini yo kivi ikán.

²⁵ Ná xaa kaꞌnu ni yo Ndioxi chi iin mituꞌun mií ra ku Ndioxi ra ndíchi ni, ra síkaku yoo, saa ná kunuu sukun ni ya toꞌo ra nuu luvi ni íyo ra, nuu ndee ni xáꞌnda chiñu ra xiꞌin ndiꞌi ndai kúu mií ra vitin tin ndiꞌi saa kúu kivi ya vaxi. Saa ná koo.