San Juan 9 - Xochapa Mixteco

Síndaꞌa Jesús iin taa, ra ka̱ku kuáa̱

¹ Tá yáꞌa Jesús kuaꞌan ra ta xi̱ni ra iin ra kuáa̱, saa káa ra tá ka̱ku ra.

² Saa ndi̱ndakan tuꞌun ñaꞌa nda ítaꞌan xiꞌin ra, káchi nda saa: ―Tata Maestro, ¿unku na kúu mií kuachi yakan ka̱ku kuáa̱ ra yóꞌó? ¿Án xaꞌa kuachi iva siꞌí ra kua, án xaꞌa kuachi mií ra kua? ―káchi nda.

³ Saa ndi̱kuiin Jesús, káꞌan ra: ―Süvi xaꞌa kuachi mií ra kua, ta ni süvi xaꞌa kuachi iva siꞌí ra kua. Xaꞌa ya ná kuni naꞌa yatuꞌun ikan Ndioxi xiꞌin va ra kua ndo̱ꞌo ra saa.

⁴ Ta xíniñuꞌu i xaa súvi i chiñu ra ti̱ꞌvi yeꞌe vaxi i, chi vitin ta tá káa nduvi saa káa ya, ta vaxi kivi ta tá káa ñuu saa nduu ya, ta nda iin naꞌa küchiño xaa chiñu.

⁵ Kivi íyo i ñuu ivi yóꞌó, ta tá káa ñu̱ꞌu̱ yéꞌe̱ saa káa i nuu na ñuu ivi ―káchi Jesús xiꞌin nda.

⁶ Tá sindiꞌi ndi̱kaꞌan Jesús tuꞌun ikán, saa ko̱ꞌni ra sii ra nuu ñuꞌú, ndu̱laꞌla ya, ta saa ndi̱yakun ra ya nuu ra kuáa̱ ikán.

⁷ Saa ndi̱kaꞌan Jesús xiꞌin ra káchi ra saa: ―Kuáꞌan ndikata un nuu un ini ñaꞌa nuu ñúꞌu tikuii Siloé ―káchi ra. (Ta tuꞌun Siloé kúni kachi ya: Taa ra ti̱ꞌvi ra kuaꞌan.) Saa ke̱e ra ikán ndi̱xaꞌan ra ndi̱kata ra nuu ra, tá ndi̱ko koo ra ta xa ndi̱kuna nuu ra, vaꞌa xíto ra.

⁸ Ta ndiꞌi na ndóo yati xiꞌin ra xiꞌin inka na xíni kuáa̱ ra, káchi na saa: ―¿Án süvi ra yóꞌó ku ra xi̱nduꞌu ndi̱ndakan xuꞌun? ―káchi na xiꞌin taꞌan na.

⁹ Sava na káꞌan: ―Ikán ku ra ―káchi na. Sava tuku na káꞌan: ―Tá káa ra ikán saa káa ra, ta süvi ra ―káchi na. Saa ndi̱kuiin ra káꞌan ra, káchi ra saa: ―¡Ra ikán ku yeꞌe va! ―káchi ra xiꞌin na.

¹⁰ Saa ndi̱ndakan tuꞌun na ra káchi na saa: ―¿Ndachu vaꞌa ndi̱xuna nuu un xíto un vitin? ―káchi na xiꞌin ra.

¹¹ Saa ndi̱kuiin ra, káꞌan ra: ―Taa ra náni Jesús ku ra si̱kuaꞌa ndaꞌi ta ndi̱yakun ra ya nuu i, saa ndi̱kaꞌan ra xiꞌin i, káchi ra saa: “Kuáꞌan nuu ñúꞌu tikuii Siloé ndi̱kata un nuu un”, káchi ra xiꞌin i. Saa ke̱e i ndi̱xaꞌan i, tá ndi̱kata soꞌva i nuu i ta ndikun ndi̱xuna ya ―káchi ra xiꞌin na.

¹² Saa ndi̱kaꞌan na xiꞌin ra káchi na saa: ―¿Ta míí íyo ra vitin? ―káchi na xiꞌin ra. Saa ndi̱kuiin ra káꞌan ra: ―Köo xíni i ―káchi ra.

Ndákan tuꞌun nda fariseo ra ndi̱xiyo kuáa̱

¹³ Saa ndáka na ra ndi̱xiyo kuáa̱ ikán ndi̱xaa ra xiꞌin na nuu nda fariseo.

¹⁴ Ta kivi tá si̱kuchi Jesús ndaꞌi nuu ra ikán ya ndi̱xuna nuu ra kua kivi i̱í ndíkundee na.

¹⁵ Saa ndi̱ndakan tuꞌun ñaꞌa tuku nda fariseo, ndá xaꞌa kua vaꞌa ndi̱xuna nuu ra. Ta ndi̱kaꞌan ra xiꞌin nda, káchi ra saa: ―Ndaꞌi si̱kuchi ra nuu i, saa ndi̱xaꞌan i ndi̱kata i nuu i, ta ndi̱kun ndi̱xuna ya vaꞌa xíto i vitin ―káchi ra xiꞌin nda.

¹⁶ Saa ndi̱kuiin sava nda fariseo káꞌan nda, káchi nda saa: ―Taa, ra i̱kan saa xiꞌin un, ta süvi nuu Ndioxi ndi̱kee ra, chi köo ndi̱xaa súvi ra kivi i̱í ya ndíkundee yo ―káchi nda xiꞌin ra. Ta sava na káꞌan: ―¿Ndachu vaꞌa íkan ra yatuꞌun, tá tu ra íyo kuachi ku ra? ―káchi na. Iin ndi̱saka soꞌva ini nda.

¹⁷ Saa ndi̱kaꞌan tuku nda xiꞌin ra ndi̱xiyo kuáa̱, káchi nda saa: ―¿Ta unkua káꞌan yóꞌo̱ xaꞌa taa, ra xu̱na nuu un? ―káchi nda xiꞌin ra. Saa ndi̱kuiin ra káꞌan ra: ―Iin ra káꞌan ndoso tuꞌun yuꞌu Ndioxi va ku ra ―káchi ra.

¹⁸ Ta nda naꞌnu nuu na judío, ta köo ndi̱kandixa nda ya ka̱ku kuáa̱ ra ikán, ta ndi̱xuna nuu ra vaꞌa xíto ra. Ndakua ka̱na nda iva siꞌí ra.

¹⁹ Ndi̱kaꞌan nda xiꞌin na, káchi nda saa: ―¿Án seꞌe ndo ku ra yóꞌó? ¿Ta án ndixa kua ka̱ku kuáa̱ ra? ¿Ta ndachu vaꞌa ndi̱xuna nuu ra? ―káchi nda xiꞌin iva síꞌí ra.

²⁰ Saa ndi̱kuiin iva siꞌí ra, káchi na saa: ―Xíni nde seꞌe nde ku ra, ta ka̱ku kuáa̱ ra,

²¹ sundi köo xíni nde unku na si̱ndaꞌa ra ndi̱xuna nuu ra ndu̱vaꞌa ra. Vaꞌa ndakan tuꞌun ndo mií va ra, chi ra xa chee va ku ra, ta ná kaꞌan mií ra xiꞌin ndo ―káchi iva siꞌí ra.

²² Ndi̱kaꞌan iva siꞌí ra saa xaꞌa ya íꞌvi na nuu nda naꞌnu nuu na judío, chi xa chi̱taꞌan tuꞌun nda tá ndá naꞌa káꞌan xaꞌa Jesús ya kúu ra Cristo, ta tava ndaꞌa ñaꞌa nda ini veꞌe ñuꞌu sinagoga, káchi nda.

²³ Xaꞌa ya ikán kua ndi̱kaꞌan iva siꞌí ra: “Vaꞌa ndakan tuꞌun ndo mií va ra, chi ra xa chee va ku ra”, káchi na.

²⁴ Saa ka̱na tuku nda naꞌnu nuu na judío ra, ta ndi̱kaꞌan nda xiꞌin ra káchi nda saa: ―Vaꞌa xaa kaꞌnu un Ndioxi xaꞌa ya ndu̱vaꞌa un ndi̱xuna nuu un, chi ndeꞌe ta xíni nde, ra íkan ya väꞌa ku ra si̱ndaꞌa yóꞌo̱ ―káchi nda xiꞌin ra.

²⁵ Saa ndi̱kuiin ra káꞌan ra xiꞌin nda, káchi ra saa: ―Köo xíni i xaꞌa ra, án ra väꞌa ku ra, ya xíni i kua si̱ndaꞌa ra yeꞌe, chi ra kuáa̱ ndi̱xiyo i, ta vitin vaꞌa xíto i ―káchi ra xiꞌin nda.

²⁶ Saa ndi̱kaꞌan tuku nda xiꞌin ra, káchi nda saa: ―¿Unkua i̱kan ra xiꞌin un? ¿Unkua i̱kan ra xu̱na ra nuu un? ―káchi nda xiꞌin ra.

²⁷ Saa ndi̱kuiin ra káꞌan ra: ―Xa ndi̱kaꞌan i xiꞌin ndo, ta köo xíin ndo kuni soꞌo ndo ya káꞌan i. ¿Ndachu kúni tuku ndo kaꞌan i xiꞌin ndo? ¿Án kúni tu ndóꞌo̱ va kundikun ndo sata ra? ―káchi ra xiꞌin nda.

²⁸ Saa ndi̱kanaꞌa nda xiꞌin ra, káchi nda saa: ―Mií un ku un ndíkun ñaꞌa, sundi ndeꞌe ta ra Moisés va ku ra ndíkun nde.

²⁹ Ndeꞌe ta xíni nde ya ndi̱kaꞌan Ndioxi xiꞌin ra Moisés, sundi ra ñaa, ta köo xíni nde xaꞌa ra míí chí ke̱e ra ―káchi nda xiꞌin ra.

³⁰ Saa ndi̱kuiin ra káꞌan ra: ―Ndíkanda ini i xíto i nuu ndo, chi káꞌan ndo köo xíni ndo míí chí ke̱e ra, sundi yeꞌe ta si̱ndaꞌa ra yeꞌe, xu̱na ra nuu i.

³¹ Kúndaa ini yo, Ndioxi ta köo xíni soꞌo ra ya káꞌan na íyo kuachi, sundi na káñuꞌu ni ñaꞌa ta xáa súvi na ya káꞌan ra, na ikán ku na xíni soꞌo ra káꞌan, tá káꞌan na xiꞌin ra.

³² Nda kivi tá xaꞌa, ta täꞌan kuni soꞌo yo, kaꞌan naꞌa ya xu̱na na nuu iin na ka̱ku kuáa̱.

³³ Tá tu süvi nuu Ndioxi ndi̱kee ra, ta nda iin ñaꞌa küchiñu ra ikan ra, ndíkuu ―káchi ra xiꞌin nda.

³⁴ Saa ndi̱kuiin nda ndi̱kaꞌan nda xiꞌin ra, káchi nda saa: ―Tixin kuachi ka̱ku un, ta ni köo ichí kúu mií un ya sinaꞌa un ndeꞌe ―káchi nda xiꞌin ra. Saa ta̱va ndaꞌa nda ra veꞌe ñuꞌu sinagoga ke̱ta ra kuaꞌan ra.

Na vaꞌa xíto ta tá íin na kuáa̱ va saa íin na

³⁵ Ta xi̱ni soꞌo Jesús ya ta̱va ñaꞌa nda ini veꞌe ñuꞌu, saa tá ndi̱taꞌan ñaꞌa ra ta ndi̱kaꞌan ra xiꞌin ra, káchi ra saa: ―¿Án kándixa un ra kúu Seꞌe Ndioxi? ―káchi ra xiꞌin ra.

³⁶ Saa ndi̱kuiin ra, káꞌan ra: ―¿Unku ra, Tata? ta kandixa i ra ―káchi ra.

³⁷ Saa ndi̱kaꞌan Jesús xiꞌin ra, káchi ra saa: ―Xa xi̱ni un ra, ta ra ikán ku yeꞌe, ra káꞌan xiꞌin un ―káchi Jesús xiꞌin ra.

³⁸ Saa ndi̱kaꞌan ra, káchi ra saa: ―Kándixa i yóꞌo̱, Tata ―káchi ra. Ta saa xa̱a kaꞌnu ñaꞌa ra.

³⁹ Saa ndi̱kaꞌan Jesús, káchi ra saa: ―Xa̱a i ñuu ivi yóꞌó ya ta ya situvi i ini naꞌa ndá kuꞌva íyo ini na kua xa̱a i. Tá kúu na íkan ya väꞌa, ta tá iyo na kuáa̱ saa íin na, ta na ikán ku na xúna i nuu. Ta ivi na vaꞌa ni túvi na, ta na ikán ku na ndúkuaa, saa chi xaꞌa ya vaꞌa ni na túvi na, ta köo táxi na kuna i nuu na ―káchi Jesús.

⁴⁰ Ta nda fariseo nda íyo xiꞌin Jesús, tá xi̱ni soꞌo nda ya ndi̱kaꞌan ra saa, ta ndi̱kaꞌan nda xiꞌin ra, káchi nda saa: ―¿Án nda ndeꞌe ku nde kuáa̱ túvi un? ―káchi nda xiꞌin ra.

⁴¹ Saa ndi̱kuiin ra, káꞌan ra: ―Tá tu ndóꞌo̱ kuáa̱ ku ndo ta köo kuachi ndo, ndikuu. Ta xaꞌa ya vaꞌa xíto ndo káchi ndo, xaꞌa ya ñaa kua íyo kuachi ndo ―káchi ra xiꞌin nda.