San Juan 4 - Xochapa Mixteco

Jesús káꞌan ra xiꞌin iin ñaꞌa yá estado Samaria

¹ Saa ku̱ndaa ini Tata yo ya káꞌan nda fariseo xaꞌa ra ya kuaꞌa ni naꞌa ndíkundikun sata ra ta saa kuaꞌa ni na síkuchi ra nuu ra Juan.

² Vani süvi mií Jesús ku ra ndi̱sikuchi naꞌa, chi nda ítaꞌan xiꞌin va ra kú nda síkuchi na.

³ Saa ke̱ta Jesús estado Judea ta ndiko koo tuku ra kuaꞌan ra chí estado Galilea.

⁴ Ta nduxa xíniñuꞌu ra yaꞌa ra estado Samaria.

⁵ Saa ku̱u ta ndi̱xaa ra estado Samaria, nuu ndíkaa ñuu ya náni Sicar, yati nuu íin ñuꞌú ya si̱niꞌi ra Jacob nuu ra José seꞌe ra.

⁶ Ta ikán íyo iin poso náni ya poso ra Jacob, chi ra ikán ku ra xa̱ta ya. Saa ku̱naa ni Jesús ndi̱xika ra ichí, ta ndi̱xaa ra ndi̱kunduꞌu ra ndíkundee ra yuꞌu poso ikán. Ta xa kua iin kuꞌva kàà uxi uvi nduvi.

⁷ Saa ndi̱xaa iin yá ke̱e ñuu Samaria táva yá tikuii, ñaa ndi̱kaꞌan Jesús xiꞌin yá káchi ra saa: ―Taxi loꞌo tikuii koꞌo i ―káchi ra xiꞌin yá.

⁸ Ta nda ítaꞌan xiꞌin ra, ke̱e nda kuaꞌan nda sata nda ñaꞌa kuxi Jesús xiꞌin nda.

⁹ Saa ndi̱kuiin yá káꞌan yá: ―¿Ndachu ndúku un tikuii nuu i koꞌo un, ta yóꞌo̱ judío ku un, ta yeꞌe yá Samaria ku i? ―káchi yá xiꞌin ra. Saa káꞌan yá xiꞌin ra saa chi na judío xiꞌin na Samaria ta köo ítaꞌan vaꞌa na xiꞌin taꞌan na.

¹⁰ Saa ndi̱kuiin Jesús káꞌan ra: ―Tá tu xíni un unku ya vaꞌa kúni Ndioxi taxi ra ndaꞌa un ta kundaa ini un unku yeꞌe, ndíkuu. Ta saa nduku un tikuii nuu i, ta taxi i rá ndaꞌa un, ta tikuii rá taxi i ndaꞌa un kúu mií rá ndee taxi rá kutaku na ivi ―káchi ra xiꞌin yá.

¹¹ Saa ndi̱kaꞌan yá xiꞌin ra, káchi yá saa: ―Tata, ni köo ñaꞌa níꞌi un tava un rá, ta kúnu ni ndíkaa rá. ¿Án ndixa káꞌan un? ¿Ta míí tava un rá taxi un koꞌo i ya kutaku i?

¹² Ta ¿án chee ka yóꞌo̱ nuu xii sikua nde ra Jacob?, chi xii nde ra Jacob ku ra si̱ndikoo poso yóꞌó ndaꞌa nde. Yóꞌó ku nuu xi̱ꞌi mií ra tikuii xiꞌin seꞌe ra tin kiti sana ra ―káchi yá xiꞌin ra.

¹³ Saa ndi̱kuiin Jesús káꞌan ra xiꞌin yá, káchi ra saa: ―Ndiꞌi kúu na xíꞌi tikuii poso yóꞌó, ta kama ni i̱chi tuku na.

¹⁴ Sundi na koꞌo tikuii nduta táxi i ndaꞌa na ta nda iin kivi ïchi ka na. Saa chi tikuii rá táxi i koꞌo na ta nduu rá tá káa iin ita chee ini na, ta nda iin kivi ïchi rá ini na. Ta na koꞌo tikuii rá taxi i ta küvi na, chi kúu mií rá ndee ya taxi rá kutaku na, ta nda iin kivi ya vaxi ndïꞌi xaꞌa na ―káchi Jesús xiꞌin yá.

¹⁵ Saa ndi̱kaꞌan yá xiꞌin ra. káchi yá saa: ―Tata, taxi tikuii ñaa ná koꞌo i, ya ná ïchi ka ini i ta ni kïxi ka i yóꞌó kiꞌin i rá ―káchi yá xiꞌin ra.

¹⁶ Saa ndi̱kuiin Jesús káꞌan ra: ―Kuáꞌan kaꞌan xiꞌin ií un ná kixi ra xiꞌin un ―káchi ra xiꞌin yá.

¹⁷ Saa ndi̱kuiin yá káꞌan yá: ―Köo vi ií i, Tata ―káchi yá. Saa ndi̱kaꞌan ra xiꞌin yá, káchi ra saa: ―Ya ndaa ndixa kua káꞌan un köo ií un,

¹⁸ saa chi xa ndi̱xiyo uꞌun ií un, ta ra íyo xiꞌin un vitin ta süvi ií un ku ra. Ya ndaa ni ku ndixa va ya ndi̱kaꞌan un ―káchi ra xiꞌin yá.

¹⁹ Ñaa tá xi̱ni soꞌo yá ya ndi̱kaꞌan ra xiꞌin yá, saa ndi̱kaꞌan yá xiꞌin ra, káchi yá saa: ―Tata, va iin ra káꞌan ndoso tuꞌun yuꞌu Ndioxi va ku un túvi i.

²⁰ Ta xii sikua nde na Samaria ta nuu xiki yóꞌó va xa̱a toꞌo na Ndioxi, ta ndóꞌo̱ judío káꞌan ndo xíniñuꞌu yo xaa toꞌo yo Ndioxi veꞌe ñuꞌu Jerusalén ―káchi yá xiꞌin ra.

²¹ Saa ndi̱kaꞌan ra xiꞌin yá, káchi ra saa: ―Nana, kandixa un ya káꞌan i xiꞌin un. Chi vaxi kivi ta köo xíniñuꞌu ndo kixi ndo xaa toꞌo ndo Iva yo Ndioxi nuu xiki yóꞌó, ni ñuu Jerusalén ta küꞌun ka na judío xaa toꞌo na Ndioxi.

²² Ndóꞌo̱ na Samaria ta ni köo xíni ndo unku na káñuꞌu ndo. Sundi ndeꞌe ta xíni nde Ndioxi ra káñuꞌu nde. Saa chi taa, ra sikaku na ñuu ivi, ta tixin ndeꞌe judío kua keta ra kixi ra.

²³ Ta kama ni tindaa kivi, ta xa vitin ku kivi nuu xíniñuꞌu ndiꞌi na ndixa ni xáa kaꞌnu Ndioxi, ya xaa kaꞌnu ñaꞌa na tixin Tachi I̱í ra xiꞌin ya ndaa. Saa chi saa kúni Iva yo Ndioxi, ndúku ra taꞌan na ñaa ya ná xaa kaꞌnu ñaꞌa na.

²⁴ Saa chi Iva yo tá káa Tachi ndinuꞌu saa káa ra, ta na xáa toꞌo ra ta xíniñuꞌu na xaa toꞌo na ra xiꞌin tachi ra tin ya ndaa ―káchi Jesús xiꞌin yá.

²⁵ Saa ndi̱kaꞌan yá xiꞌin ra, káchi yá saa: ―Xíni i iin kivi ta kixi Taa ra Mesías. Ta káꞌan tu na xiꞌin ra Cristo va. Tá ná kixi ra ikán ta saa ndikani vaꞌa ka ra nuu nde ―káchi yá.

²⁶ Saa ndi̱kaꞌan Jesús xiꞌin yá, káchi ra saa: ―Ra káꞌan un xaꞌa ñaa ku yeꞌe va ―káchi ra xiꞌin yá.

²⁷ Saa káꞌan na xiꞌin taꞌan na ta xa̱a va nda ítaꞌan xiꞌin ra. Ta ndi̱kanda ni ini nda xíto nda nuu ra xaꞌa ya káꞌan ra xiꞌin iin ñaꞌa, ta nda iin nda köo ndi̱ndakan tuꞌun ñaꞌa unkua kúni ra án ndá xaꞌa kua káꞌan ra xiꞌin yá.

²⁸ Ta saa si̱ndoo yá yoo yá, ta ndi̱kiꞌin yá kuaꞌan yá ndituꞌun yá xiꞌin na ñuu yá, káchi yá saa:

²⁹ ―Naꞌa ndo koto ndo iin ra taa ta ndi̱kaꞌan ndiꞌi ra xiꞌin i xaꞌa ya íkan i. Ta ¿án süvi ra kúu Cristo ku ra? ―káchi yá xiꞌin na.

³⁰ Ñaa ka̱na koo ndiꞌi na ñuu kuaꞌan na koto na nuu íin Jesús.

³¹ Ta nda ítaꞌan xiꞌin ra, ndinuni loꞌo káꞌan nda xiꞌin ra, káchi nda saa: ―Rabí, kuxi loꞌo un ―káchi nda xiꞌin ra.

³² Saa ndi̱kaꞌan ra xiꞌin nda, káchi ra saa: ―Xa íyo va ñaꞌa xi̱xi i, ta köo xíni ndo unkua ―káchi ra xiꞌin nda.

³³ Ñaa xa̱á nda ndákan tuꞌun taꞌan nda, káchi nda saa: ―¿Án ndá na xa ki̱xi va xiꞌin ñaꞌa xi̱xi ra? ―káchi nda.

³⁴ Ta saa ndi̱kuiin Jesús káꞌan ra xiꞌin nda, káchi ra saa: ―Tá káa ñaꞌa ya xíxi i saa káa ya xáa súvi ndiꞌi i ya kúni Ndioxi ta ndakua sixinu ndiꞌi i chiñu ya ta̱xi ra ndaꞌa i.

³⁵ Tá kuꞌva káꞌan mií ndo tá chíꞌi ndo: “Nda tixin ya kumi yoo saa sikee yo”, káchi ndo. Ta yeꞌe káꞌan i xiꞌin ndo: Vaꞌa ndaniꞌi ndo nuu ndo ta koto ndo iku, saa chi tá kuꞌva íyo trigo ya xa ndi̱xinu ndikuiso yo, saa íyo tuꞌva naꞌa ya kaꞌan yo xiꞌin na kiꞌvi na ichí Ndioxi.

³⁶ Ta Ndioxi ku ra cháꞌvi na ndíkaya ivi, saa chi ndiꞌi na yóꞌó ta kutaku na xiꞌin ra ndiꞌi saa kúu kivi, tá kúu ra chíꞌi xiꞌin ra síkee ta iin káchi kúsini nda xiꞌin taꞌan nda.

³⁷ Tá íyo ya káchi na káꞌan, ta ya ndaa ni kua káꞌan na, káchi na saa: “Síín kú ra chíꞌi ta síín kú ra síkee”, káchi na.

³⁸ Tíꞌvi i ndóꞌo̱ kuꞌun ndo sikee ndo nuu köo ndi̱chiꞌi ndo, inka na chi̱ꞌi ta ndóꞌo̱ ku ndo vaꞌa ni kée xiꞌin ñaꞌa ya chi̱ꞌi na ikán ―káchi Jesús xiꞌin nda ítaꞌan xiꞌin ra.

³⁹ Ta kuaꞌa ni mií na ñuu Samaria ikán ka̱ndixa Jesús xaꞌa tuꞌun ya ndi̱kaꞌan mií yá ñuu na xiꞌin na, chi ndi̱tuꞌun ndiꞌi yá xiꞌin na káchi yá saa: “Iin ndi̱kaꞌan ndiꞌi ra xiꞌin i xaꞌa ya íkan i”, káchi yá xiꞌin na.

⁴⁰ Ñaa ndi̱xaa mií na ñuu Samaria nuu Jesús ta ndi̱xikan na ya mani nuu ra ya ndoo ra xiꞌin na, saa ndi̱ndoo ra xiꞌin na uvi kivi.

⁴¹ Ta kuaꞌa ni ka na ka̱ndixa ñaꞌa, chi xi̱ni soꞌo na ya ndi̱kaꞌan mií ra xiꞌin na.

⁴² Saa ndi̱kaꞌan na xiꞌin yá ikán, káchi na saa: ―Ndinuꞌu ni ini nde kándixa ñaꞌa nde, saa chi süvi iindaa yóꞌo̱ ndi̱kaꞌan xiꞌin nde, xi̱ni soꞌo mií nde ya káꞌan ra, ta kúndaa ini nde ya ndixa kua, ra yóꞌó ku ra ku Cristo ra vaxi sikaku na ñuu ivi yóꞌó ―káchi na xiꞌin yá.

Síndaꞌa Jesús seꞌe iin ra chiñu kaꞌnu ni

⁴³ Sindiꞌi ndi̱yaꞌa uvi kivi ta ke̱e Jesús estado Samaria, kuaꞌan ra estado Galilea.

⁴⁴ Saa chi tá káchi mií ra káꞌan ra, nda iin na káꞌan ndoso tuꞌun yuꞌu Ndioxi ta köo mani na ñuu mií na.

⁴⁵ Saa tá ndi̱xaa ra estado Galilea ta vaꞌa ni va ndi̱kiꞌin na ñuu ikán ra, saa chi xi̱ni na ndiꞌi ñaꞌa vaꞌa ni i̱kan ra ñuu Jerusalén tá ndi̱xaꞌan na viko pascua.

⁴⁶ Ta saa ndi̱ko koo Jesús kuaꞌan ra ñuu Caná ya ndíkaa estado Galilea, nuu si̱kuaꞌa ra nduta tikuii ndu̱u rá vino. Ta íyo iin ra kúu mií chiñu ndee ni ñuu Capernaum ta ndee ni ndóꞌo seꞌe ra.

⁴⁷ Saa tá ku̱ndaa ini ra tuꞌun xaꞌa Jesús ya ke̱e ra estado Judea ta ndi̱xaa ra estado Galilea, ta ke̱e ra ikán ndi̱xaꞌan ra nuu ra ndi̱kaꞌan ra xiꞌin ra ya kuꞌun ra xiꞌin ra veꞌe ra sindaꞌa ra seꞌe ra, saa chi ndée ni ndee ndóꞌo seꞌe ra ta xa yati kuvi ra.

⁴⁸ Ta saa ndi̱kaꞌan Jesús xiꞌin ra, káchi ra saa: ―Ndóꞌo̱, ta xïin ndo kandixa ndo yeꞌe. Nda kuni ndo yatuꞌun Ndioxi íkan i án iin seña kuni ndo ta saa vi kandixa ndo yeꞌe ―káchi Jesús.

⁴⁹ Saa ndi̱kuiin ra chiñu ikán káꞌan ra, káchi ra saa: ―Tata, kama loꞌo kixi un ndáꞌvi i, koto ka kuvi seꞌe i ―káchi ra.

⁵⁰ Saa ndi̱kaꞌan Jesús xiꞌin ra: ―Ndiko koo kuanuꞌu veꞌe un, xa ndu̱vaꞌa va seꞌe un ―káchi ra xiꞌin ra. Saa ka̱ndixa ra ikán ya ndi̱kaꞌan Jesús xiꞌin ra, ta ndi̱kiꞌin ra kuanuꞌu ra.

⁵¹ Saa tá xa kúyati ra xa̱a ra veꞌe ra, ta ka̱na koo na xáa chiñu nuu ra káꞌan na xiꞌin ra: ―Xa ndu̱vaꞌa va seꞌe un, tata ―káchi na xiꞌin ra.

⁵² Saa ndi̱ndakan tuꞌun ra na: ―¿Ndá hora kua xa̱á vaꞌa kúni ra? ―káchi ra xiꞌin na. Saa ndi̱kaꞌan na xiꞌin ra, káchi na saa: ―Kuni ndu̱vaꞌa ra, kàà iin xikuaa ki̱ndaa ya ndítuvi ya xiꞌin ra ―káchi na xiꞌin ra.

⁵³ Saa ndi̱kaꞌán ini ra mií hora ikán kua ndi̱kaꞌan Jesús xiꞌin ra: “Xa ndu̱vaꞌa va seꞌe un”, káchi ra. Ta saa ka̱ndixa ra ikán Jesús xiꞌin ndiꞌi na veꞌe ra.

⁵⁴ Ya yóꞌó ku yatuꞌun, ya uvi i̱kan Jesús, tá ndi̱ko koo ra ndi̱xaa estado Galilea tá sindiꞌi ndi̱xika ra estado Judea.