San Juan 20 - Xochapa Mixteco

Ya ku̱u nuu ndi̱taku Jesús

¹ Ta xitaan ni kivi domingo, naá ka ke̱e yá María Magdalena kuaꞌan yá nuu ndi̱nduxin Jesús, ta xi̱ni yá xa ku̱taꞌa yu̱ú ya chee ni ndási yuꞌu kava ikán.

² Saa ke̱e yá xínu yá kuaꞌan yá nuu íin ra Simón Pedro xiꞌin inka ra xi̱taꞌan xiꞌin Jesús, ra ku̱ꞌvi ni ini Jesús xi̱ni ra, ta ndi̱tuꞌun yá xiꞌin nda, káchi yá saa: ―Ta̱va na ikin kuñu Tata yo kuaꞌan xiꞌin na, ta köo xíni nde míí chí ndi̱xaꞌan na ndi̱ndaka na ya ―káchi yá xiꞌin nda.

³ Saa ke̱e ra Simón Pedro xiꞌin inka ra xi̱taꞌan xiꞌin Jesús, ka̱na koo nda kuaꞌan nda koto nda nuu ndi̱nduxin Jesús.

⁴ Xínu uvi saa nda kuaꞌan nda, sundi inka ra ikán ku ra ndee ni ka ndee xínu kuaꞌan, ta xiꞌna ra ikán ku ra ndi̱xaa nuu ra Pedro.

⁵ Saa ndi̱kuita ndee ra xíto ra tixin kava ikán, ta xi̱ni ra ndóo toto, sundi köo ndi̱kiꞌvi ra.

⁶ Sindiꞌi saa ndi̱xaa ra Simón Pedro ta ndi̱kiꞌvi ra, saa xi̱ni ra toto ya ndi̱suvi Jesús ndóo ya.

⁷ Ta xi̱ni ra toto ya xi̱ndasi xiní Jesús, ndi̱suvi vaꞌa ya ikán índuꞌu ya inka ñaꞌñu, köo ítaꞌan ya xiꞌin toto ikán.

⁸ Saa ndi̱kiꞌvi inka ra kuaꞌan xiꞌin ra, ra xi̱ꞌna ndi̱xaa yuꞌu kava, ndi̱kiꞌvi ra ini kava ta xi̱ni ra ya ku̱u, saa ka̱ndixa ra.

⁹ Vani täꞌan kundaa ini nda ya káꞌan tuꞌun Ndioxi, ya xíniñuꞌu nditaku Jesús tañu na ndíi.

¹⁰ Saa ndi̱ko koo ra Pedro xiꞌin ra kuaꞌan xiꞌin ra kuanuꞌu nda.

Ndi̱tuvi Jesús nuu yá María Magdalena

¹¹ Sundi yá María Magdalena ta xáku ni yá ndíchi yá yuꞌu kava ikán. Ta saa ndi̱kuita ndee yá xíto yá ini ya.

¹² Saa xi̱ni yá uvi tatun Ndioxi ndóo na, ta yaa ni toto ndíxi na, iin ya índuꞌu nuu xi̱nduꞌu xiní Jesús, ta inka ya índuꞌu nuu xi̱ndoo xaꞌa ra.

¹³ Saa ndi̱ndakan tuꞌun na yá, káchi na saa xiꞌin yá: ―Nana, ¿ndachu xáku un? ―káchi na xiꞌin yá. Saa ndi̱kuiin yá káꞌan yá: ―Xaꞌa ya ndi̱kiꞌin na ikin kuñu Tata i, yakan xáku i, chi köo xíni i míí chí ndi̱xaꞌan na chi̱nduꞌu na ya ―káchi yá.

¹⁴ Sikan sindiꞌi kuiti yá ndi̱kaꞌan yá, saa ndi̱ko koo yá ndi̱koto yá, ta xi̱ni yá ndíchi Jesús, ta köo xíni yá án ikán ku ra.

¹⁵ Saa ndi̱kaꞌan Jesús xiꞌin yá, káchi ra saa: ―Nana, ¿ndachu xáku un? ¿Ta unku na ndúku un? ―káchi ra xiꞌin yá. Ta án ra ndáa itun kuiꞌi ikán va ku ra káꞌán yá, saa ndi̱kaꞌan yá xiꞌin ra, káchi yá saa: ―Tata, tá tu yóꞌo̱ ndi̱kiꞌin ikin kuñu ra kuaꞌan xiꞌin un, ta kaꞌan xiꞌin i míí ndi̱xaꞌan un chi̱kaa un ya, ta kuꞌun i ndikiꞌin i ya sinduxin i ―káchi yá xiꞌin ra.

¹⁶ Saa ndi̱kuiin Jesús ndi̱kaꞌan ra xiꞌin yá, káchi ra saa: ―¡María! ―káchi ra. Saa ndi̱koto yá nuu ra, ta ndi̱kuni yá ra, saa ndi̱kaꞌan yá xiꞌin ra: ―¡Raboni! ―káchi yá. (Chi tuꞌun Raboni ku tuꞌun ya káꞌan mií na judío, ta kúni kachi ya Maestro.)

¹⁷ Saa ndi̱kaꞌan Jesús xiꞌin yá, káchi ra saa: ―Tïin un yeꞌe saa chi täꞌan ndiko koo i kuꞌun i nuu Iva i. Sundi vaꞌa kuꞌun un ndituꞌun un xiꞌin nda xi̱taꞌan xiꞌin i, ya ndiko koo i kuꞌun i nuu Iva i xiꞌin Iva ndóꞌo̱, Ndioxi mií i ku ra ta saa kúu tu ra Ndioxi ndóꞌo̱ va ―káchi Jesús xiꞌin yá.

¹⁸ Saa ke̱e yá María Magdalena, kuaꞌan yá ndituꞌun yá xiꞌin nda xi̱taꞌan xiꞌin Jesús, ya xi̱ni yá ra, ta ndi̱tuꞌun ndiꞌi yá xiꞌin nda xaꞌa ya ndi̱kaꞌan ra xiꞌin yá.

Ndi̱tuvi Jesús nuu nda xi̱taꞌan xiꞌin ra

¹⁹ Ta ñǔu suvi mi kivi ikán, kivi domingo kivi nuu xaꞌa semana, ndi̱kitaꞌan ndiꞌi nda xi̱taꞌan xiꞌin ra ndóo nda ini veꞌe. Ta ndási tuun yeꞌe ndóo nda, xaꞌa ya íꞌvi nda nuu na chiñu. Saa iin ku̱u soꞌva ndi̱tuvi Jesús ndíchi ra maꞌñu nuu ndóo nda, saa chi̱ndee ra nda, káchi ra saa: ―Ná koo vaꞌa ni ini ndo ―káchi ra xiꞌin nda.

²⁰ Tá sindiꞌi ra ndi̱kaꞌan ra saa, ta si̱naꞌa ra ndaꞌa ra tin ñaꞌñu xiín ra nuu íyo yavi ya ti̱kueꞌe ra. Saa ku̱sini ni nda xi̱taꞌan xiꞌin ra xaꞌa ya xi̱ni ñaꞌa nda.

²¹ Saa ndi̱kaꞌan tuku Jesús xiꞌin nda, káchi ra saa: ―Ná koo vaꞌa ni ini ndo. Tá kuꞌva ti̱ꞌvi Iva i yeꞌe, saa tíꞌvi i ndóꞌo̱ kuꞌun ndo vitin ―káchi ra xiꞌin nda.

²² Tá ndi̱kaꞌan ra saa, ñaa ti̱vi ra tachi ra nuu nda, saa ndi̱kaꞌan ra xiꞌin nda, káchi ra saa: ―Ndikiꞌin ndo Tachi I̱í Iva i Ndioxi vitin.

²³ Tá tu xáa kaꞌnu ini ndo xaꞌa kuachi naꞌa, ta saa tu Ndioxi xaa kaꞌnu ini ra xaꞌa kuachi na. Tá tu köo xáa kaꞌnu ini ndo xaꞌa kuachi na, ta ni Ndioxi xäa kaꞌnu ini ra xaꞌa kuachi na ―ka̱chi ra xiꞌin nda.

Ya ku̱u nuu ka̱ndixa ra Tomás Jesús

²⁴ Ta iin ra uxi uvi xi̱taꞌan xiꞌin Jesús náni ra Tomás ta káꞌan tu na xiꞌin ra Dídimo va, ta köo ra ikán íin tá ndi̱tuvi Jesús nuu nda xi̱taꞌan xiꞌin ra.

²⁵ Saa ndi̱kaꞌan nda taꞌan ra xiꞌin ra, káchi nda saa: ―Xi̱ni nde Tata yo Jesús ―káchi nda xiꞌin ra. Saa ndi̱kuiin ra káꞌan ra: ―Köo kándixa i ndóꞌo̱, nda ná kuni nuu i ndaꞌa ra nuu ka̱ni na clavo, ta tuvi ndaꞌa i nuu ndi̱xani ya. Ta saa chikaa ndaꞌa i nuu yavi nuu ndi̱kiꞌvi kàà xiín íyo nuu itun, nda saa kandixa i ―káchi ra Tomás xiꞌin nda.

²⁶ Saa ndi̱yaꞌa una kivi ta ndi̱kitaꞌan ndiꞌi tuku nda ndóo nda ini veꞌe ikán. Ta íyo ra Tomás xiꞌin nda. Ta ndási tuun tuku yeꞌe ndóo nda, saa ndi̱xaa Jesús ndi̱kundichi sava tuku ra maꞌñu nda, saa chi̱ndee ra nda, káchi ra saa: ―¡Ná koo vaꞌa ni ini ndo! ―káchi ra xiꞌin nda.

²⁷ Saa ndi̱kaꞌan ra xiꞌin ra Tomás, káchi ra saa: ―Tuvi nuu ndaꞌa un yóꞌó, ta koto un ndaꞌa i saa taxi un ndaꞌa un tuvi un ya nuu ndi̱kiꞌvi nuu itun íyo kàà nuu, ta köo ka un iin ra köo xíin kandixa, ra kándixa ná nduu un vitin ―káchi Jesús xiꞌin ra.

²⁸ Saa ndi̱kuiin ra Tomás, káchi ra saa: ―¡Tata, yóꞌo̱ ku Tata i tin Ndioxi mií i! ―káchi ra xiꞌin Jesús.

²⁹ Saa ndi̱kaꞌan Jesús xiꞌin ra, káchi ra saa: ―Tomás, kándixa un yeꞌe vitin saa chi xi̱ni un yeꞌe. Ta vaꞌa ni kée na köo ndi̱xini yeꞌe, ta kándixa na yeꞌe ―káchi Jesús xiꞌin ra.

Tuꞌun yóꞌó káꞌan ya ndá xaꞌa kua ta̱a ra Juan tutu yóꞌó

³⁰ Ta kuaꞌa ni ka yatuꞌun i̱kan Jesús nuu nda xi̱taꞌan xiꞌin ra, ta köo ya ndóso nuu tutu yóꞌó.

³¹ Ta ndiꞌi tuꞌun ya vaxi nuu tutu yóꞌó, ta̱a i ya, ná kundaa ini ndo xaꞌa Jesús ya kúu ra Cristo Seꞌe Ndioxi. Saa tá kándixa ndo ra ta saa kuchiñu ndo kutaku ndo tixin kivi ra.