San Juan 15 - Xochapa Mixteco

Tuꞌun yóꞌó káꞌan ya xaꞌa Jesús ya káa ra tá káa teꞌe yoꞌó uva ya vaꞌa ni

¹ Saa ndi̱kaꞌan Jesús káchi ra saa: ―Yeꞌe ku itun yoꞌó uva ya vaꞌa ni. Ta Iva i ku ra ndáa nu ikán.

² Xáꞌnda ndiꞌi ra teꞌe ndaꞌa nu ya köo kúun kuiꞌi ndaꞌa. Ta ya kúun kuiꞌi ndaꞌa ta xáa vií ra xiꞌin ya, xáꞌnda ndoso ra ya, ná nana ndixin ya, ta saa kana kuaꞌa ka kuiꞌi ndaꞌa ya.

³ Ta ndóꞌo̱ xa ndu̱yaa ndo xiꞌin tuꞌun ya ndi̱kaꞌan i xiꞌin ndo.

⁴ Ta xíniñuꞌu ndo kutaꞌan tuun ndo xiꞌin i, ta saa tu yeꞌe va kutaꞌan tuun i xiꞌin ndo. Tá kúu yoꞌó teꞌe itun uva küvi kana kuiꞌi nuu ya tá tu köo ítaꞌan yoꞌo teꞌe xiꞌin nu, ta saa kundoꞌo tu ndóꞌo̱ va, tá tu köo ítaꞌan tuun ndo xiꞌin i.

⁵ ’Yeꞌe ku itun uva chee, ta ndóꞌo̱ ku teꞌe ndaꞌa nu. Na ítaꞌan tuun xiꞌin i ta koo tuun tu yeꞌe xiꞌin na, ta kuaꞌa ni ya vaꞌa ikan na xáa saa. Chi tá tu köo ítaꞌan tuun na xiꞌin i, ta nda iin ñaꞌa küchiñu na ikan na.

⁶ Tá ndá na köo ítaꞌan tuun xiꞌin i, ta kundoꞌo na tá kuꞌva ndóꞌo teꞌe ndaꞌa nu íchi ya, ta saa ndíkuiso na ya xáta na nuu xíxi ñu̱ꞌu̱, ta ndee ni xíxi ya.

⁷ ’Tá tu ítaꞌan tuun ndo xiꞌin i, ta íyo tuun tuꞌun i nima ndo, ta vaꞌa nduku ndo ndá ka ya kúni ndo nuu Iva i, ta niꞌi va ndo ya.

⁸ Tá xáa toꞌo ni ndo Iva i tá íkan ni ndo ya vaꞌa, ta saa kua ndúu ndo na ítaꞌan xiꞌin i.

⁹ Ta Iva i ta kúꞌvi ni ini ra xíni ra yeꞌe, ta saa yeꞌe kúꞌvi ni ini i xíni i ndóꞌo̱, yakan kutaꞌan tuun ni ndo xiꞌin i xaꞌa ya kúꞌvi ni ini i xíni i ndóꞌo̱.

¹⁰ Tá tu xáa súvi ndo ya xáꞌnda chiñu i nuu ndo, ta saa kua koo tuun ndo xiꞌin i, chi kúꞌvi ni ini i xíni i ndóꞌo̱, ta kuꞌva saa kua xáa súvi yeꞌe ya xáꞌnda chiñu Iva i yakan íyo tuun i xiꞌin ra ta kúꞌvi ni ini ra xíni ra yeꞌe.

¹¹ ’Ya yóꞌó kua káꞌan i xiꞌin ndo ya ná koo ya sií ni íyo nuu i xiꞌin ndo, ta saa kua ná kusini ni ka ndo.

¹² Ta ya yóꞌó kua xáꞌnda chiñu i nuu ndo: Kuꞌvi ni ini ndo kuni taꞌan ndo tá kuꞌva kúꞌvi ini yeꞌe xíni i ndóꞌo̱.

¹³ Iin ra xíꞌi xaꞌa ra ítaꞌan xiꞌin ra ra ikán ku ra yáꞌa ni kúꞌvi ini xíni ra ta köo ka ya ikan ra ya sinaꞌa ra mií ra ya kúꞌvi ni ini ra xíni ñaꞌa ra.

¹⁴ Ta ndóꞌo̱ ku ndo ítaꞌan vaꞌa ni xiꞌin i tá tu xáa súvi ndo ya káꞌan i xiꞌin ndo.

¹⁵ Ta käꞌan ka i xiꞌin ndo ya kúu ndo: “moso i” chi iin moso ta köo xíni ra unkua ikan ra xáa chiñu ra nuu. Sundi yeꞌe káꞌan i xiꞌin ndo ndóꞌo̱ ku ndo ítaꞌan vaꞌa ni xiꞌin i, chi ndi̱tuꞌun ndiꞌi i xiꞌin ndo xaꞌa ya xi̱ni soꞌo i ndi̱kaꞌan Iva i, ta saa íyo ndiꞌi ya ndi̱kaꞌan i xiꞌin ndo.

¹⁶ Ta süvi mií ndo ndi̱kaxin yeꞌe, mií i ndi̱kaxin ndóꞌo̱. Ta ndi̱kaxin i ndóꞌo̱ ya ná ikan ndo nina ya vaꞌa. Tá íin itun kuiꞌi kána kuaꞌa ni ñaꞌa ndaꞌa saa ná koo ndo. Ndiꞌi saa ichí koo ndo tá íin kuiꞌi vaꞌa ni kúun. Tá íkan ndo saa ta vaꞌa nduku ndo ndiꞌi ya kúmani nuu ndo nuu Iva i. Ta tixin kivi yeꞌe taxi ra ya ndúku ndo nuu ra ndaꞌa ndo.

¹⁷ Ta ya yóꞌó kua xáꞌnda chiñu i nuu ndo: Kuꞌvi ni ini ndo kuni taꞌan ndo.

Na ñuu ivi yóꞌó ta kundasi nuu na kuni na ndóꞌo̱

¹⁸ ’Tá kúndasi nuu na ñuu ivi yóꞌó xíni na ndóꞌo̱, ta ná kundaa ini ndo chi xiꞌna yeꞌe vi ku̱ndasi nuu na xi̱ni na, saa ku̱ndasi na xi̱ni na ndóꞌo̱.

¹⁹ Tá tu taꞌan na ñuu ivi yóꞌó ku ndo, ta kuꞌvi ini na kuni na ndóꞌo̱, ndikuu. Sundi ndóꞌo̱ ta süvi taꞌan na ku ndo. Chi yeꞌe ta ndi̱kaxin i ndóꞌo̱ ya ndu̱u ndo kuenta mií i. Ta xaꞌa ya ñaa kua kúndasi nuu na xíni na ndóꞌo̱.

²⁰ Ndikaꞌán ini ndo xaꞌa tuꞌun ya xa ndi̱kaꞌan i xiꞌin ndo: “Nda iin naꞌa, na kúu moso ta köo kaꞌnu ka na ikán nuu ra xáa chiñu na nuu.” Tá tu xáa nduvaꞌa na xiꞌin i, ta saa xaa nduvaꞌa tu na xiꞌin ndóꞌo̱ va. Tá tu xáa súvi na ya káꞌan i xiꞌin na, ta saa xaa súvi tu na ya káꞌan ndóꞌo̱ va xiꞌin na.

²¹ Ndiꞌi ya yóꞌó kundoꞌo ndo xaꞌa ya ndíkun ndo yeꞌe. Chi na ñuu ivi yóꞌó ta köo xíni na Iva i ra ti̱ꞌvi yeꞌe vaxi i.

²² ’Tá tu köo ndi̱kixi i ñuu ivi yóꞌó ndituꞌun i xiꞌin na, ta köo kuachi na, ndíkuu. Ta vitin ta küvi kaꞌan na ya köo xíni na, chi xa ndi̱tuꞌun i ya ndaa xiꞌin na, yakan ndíso mií na xaꞌa kuachi na, chi xa ku̱ndaa ini na xaꞌa ya ndaa ta köo xíin na xaa súvi na ya.

²³ Ndiꞌi na kúndasi nuu xíni yeꞌe, ta kúndasi nuu tu na xíni na Iva va i.

²⁴ Tá tu köo yatuꞌun ndi̱xini na ikan i ta köo kuachi na, ndikuu, sundi xi̱ni na ya, ta saa ni kúndasi nuu na xíni na yeꞌe ta kúndasi nuu tu na xíni na Iva va i. Ta kuaꞌa ni yatuꞌun i̱kan i nda iin na köo ndi̱kan taꞌan ya i̱kan i.

²⁵ Xaꞌa ya i̱kan na saa kua síxinu na tuꞌun Ndioxi ya íyo nuu ley na, káchi ya saa: “Ni köo ya ndi̱kan i xiꞌin na, ta sáa ni ini na xíni na yeꞌe”, káchi tuꞌun Ndioxi ―káchi Jesús xiꞌin nda.

²⁶ Saa ndi̱kaꞌan ka Jesús xiꞌin nda, káchi ra saa: ―Tá ná kixi Tachi Ndioxi ya Sindiko ini ndo ndikuiin ya xaꞌa i kaꞌan ya xiꞌin ndo. Ta ya tiꞌvi i kixi ta ya ndaa ni kua chi nuu Iva i vaxi ya.

²⁷ Ta saa tu ndóꞌo̱ va, ndikuiin ndo xaꞌa i nuu naꞌa, chi ndóꞌo̱ ta nda núnu̱ú xa̱á ndo íyo ndo xiꞌin i ―káchi ra xiꞌin nda.