San Juan 13 - Xochapa Mixteco

Ndíkata Jesús xaꞌa nda ítaꞌan xiꞌin ra

¹ Yachi tixin viko pascua. Ta xa ku̱ndaa ini Jesús ya ti̱ndaa hora sindoo ra ñuu ivi yóꞌó, ta ndiko koo ra kuꞌun ra nuu Iva ra. Ta ndiꞌi saa ichí ku̱ꞌvi ni ini ra xi̱ni ra nda ítaꞌan xiꞌin ra ñuu ivi yóꞌó, ta saa si̱naꞌa ra mií ra nuu nda ya ndixa ni kúꞌvi ini ra xi̱ni ñaꞌa ra nda kivi sindiꞌi.

² Saa ku̱u ndi̱kunduꞌu Jesús kuxini ra xiꞌin nda ítaꞌan xiꞌin ra, ta xa sikaꞌán va kiti nǎꞌa ini ra Judas Iscariote seꞌe ra Simón, ya ná nditaxi ra Jesús ndaꞌa na sáa ini xíni ra.

³ Xa xíni Jesús ya ta̱xi ndiꞌi Iva ra ñaꞌa ndaꞌa ra, ta xíni ra ke̱e ra nuu Ndioxi, ta saa ndiko koo ra kuꞌun ra.

⁴ Saa ndóo na xíxini na, ta ndi̱kundichi Jesús ta̱va ra toto ya súkun ra, saa ki̱ꞌin ra iin toalla ka̱tun ra toko ra.

⁵ Saa ki̱ꞌin ra tikuii ta̱an ra ini iin ñaꞌa, ñaa xa̱á ra ndíkata ra xaꞌa nda ítaꞌan xiꞌin ra, ta síichi ra ya xiꞌin toalla, ya ka̱tun ra toko ra.

⁶ Tá xaa ra ndikata ra xaꞌa ra Simón Pedro, ta ndi̱kuiin ra ikán káꞌan ra: ―Tata, väꞌa náꞌa ya ndikata un xaꞌa i ―káchi ra.

⁷ Saa ndi̱kuiin Jesús ndi̱kaꞌan ra, káchi ra saa: ―Ya íkan i xiꞌin un vitin, ta köo kúndaa ini un unkua kúni kachi ya, sundi sindiꞌi saa kundaa ini un xaꞌa ya ―káchi Jesús xiꞌin ra.

⁸ Saa ndi̱kaꞌan ra Pedro, káchi ra saa: ―Tata, nda iin kivi täxi i ndikata un xaꞌa i ―káchi ra. Saa ndi̱kuiin Jesús, ndi̱kaꞌan ra xiꞌin ra, káchi ra saa: ―Tá tu täxi un ndikata i xaꞌa un, ta küvi koo un iin ra ítaꞌan xiꞌin i ―káchi Jesús xiꞌin ra.

⁹ Saa ndi̱kuiin ra Simón Pedro, káchi ra saa: ―Tata, tá tu saa ta süvi ndisaa xaꞌa i ndikata un, vaꞌa ndikata tu un ndaꞌa i xiꞌin xiní va i ―káchi ra.

¹⁰ Saa ndi̱kaꞌan Jesús xiꞌin ra, káchi ra saa: ―Ndiꞌi na xa chi̱chi, ta köo xíniñuꞌu na ndoo ndiꞌi iín na, nani kua tá tu ndo̱o xaꞌa na, ta ya ñaa kua xáa yaa ndiꞌi iín na. Ta ndóꞌo̱ ta xa ndo yaa ndu̱u ndo, vani süvi ndiꞌi ndo yaa ―káchi ra xiꞌin ra.

¹¹ Saa chi xa ku̱ndaa ini ra unku ra nditaxi ñaꞌa ndaꞌa nda sáa ini xíni ra, yakan ndi̱kaꞌan ra, süvi ndiꞌi nda ku nda ndu̱yaa.

¹² Saa tá si̱ndiꞌi ra ndi̱kata ra xaꞌa nda, ta ndi̱kusukun tuku ra toto ikán, saa ndi̱kunduꞌu tuku ra nuu mesa xa̱á ra káꞌan ra, káchi ra saa: ―¿Án xíni ndo unkua kúni kachi ya i̱kan i xiꞌin ndo?

¹³ Ndóꞌo̱, ta káꞌan ndo xiꞌin i kúu i Maestro ta kúu i ra kaꞌnu nuu ndo, káchi ndo. Ta ya ndaa ndixa kua káꞌan ndo xiꞌin i, saa chi ikán ku i.

¹⁴ Tá tu yeꞌe ku Maestro ndo tin ra kaꞌnu nuu ndo, ta ndi̱kata i xaꞌa ndo. Ta saa ndóꞌo̱, saa xíniñuꞌu ndo ndikata ndo xaꞌa taꞌan ndo.

¹⁵ Tá kuꞌva i̱kan i xiꞌin ndo, saa xíniñuꞌu ndo xaa súvi ndo xiꞌin taꞌan ndo.

¹⁶ Ya ndixa ni kua káꞌan i xiꞌin ndo: Ra xáa chiñu nuu xitoꞌo ra, ta köo chee ka ra ikán nuu xitoꞌo ra. Ni iin ra xíka chiñu, ta köo chee ka ra ikán nuu ra ti̱ꞌvi ñaꞌa.

¹⁷ Tá tu kúndaa ini ndo tuꞌun yóꞌó ta xáa súvi ndo ya, ta vaꞌa ni kée ndo tá tu íkan ndo saa.

¹⁸ ’Süvi xaꞌa ndiꞌi ndo káꞌan i, chi yeꞌe ta xa xíni va i unku ndóꞌo̱ ndi̱kaxin i. Ta ndixa xíniñuꞌu xinu nuu tuꞌun Ndioxi ya ta̱a na xinaꞌa, káchi ya saa: “Iin taa, ra xíxi xita vaꞌa xiꞌin i ku ra ndi̱kiꞌvi kuachi xiꞌin i”, káchi tuꞌun Ndioxi.

¹⁹ Xa vitin ka káꞌan i xiꞌin ndo, ya kundaa kuee ini ndo, tá ti̱ndaa ya kuu saa, ta kandixa ndo ya kúu i taa ra kúu i.

²⁰ Ya ndaa ni káꞌan i xiꞌin ndo, ndiꞌi na ndíkiꞌin vaꞌa na ti̱ꞌvi i xaa chiñu nuu i, ta yeꞌe ku i ndíkiꞌin na, ta ndiꞌi na ndíkiꞌin yeꞌe ta ndíkiꞌin na Iva i Ndioxi ra ti̱ꞌvi yeꞌe vaxi i ―káchi ra.

Káꞌan Jesús xaꞌa ra Judas ya ndixiko vata ñaꞌa ra

²¹ Tá ndi̱ꞌi ndi̱kaꞌan ra saa, ta xa̱á ra kúsuchi ni ini ra, ta saa ndi̱kaꞌan ra xiꞌin nda, káchi ra saa: ―Ya ndaa káꞌan i xiꞌin ndo: Iin ndóꞌo̱ ku ndo ndixiko vata yeꞌe nuu na sáa ini xíni yeꞌe ―káchi ra xiꞌin nda.

²² Saa ndi̱koto nuu taꞌan ndiꞌi nda ítaꞌan xiꞌin ra, ta xíka ni ini nda, unku nda káꞌan ra xaꞌa.

²³ Ta iin ra ítaꞌan xiꞌin Jesús ku ra kúꞌvi ni ini ra xíni ñaꞌa ra, ta yati índuꞌu ndaa ra xiín Jesús.

²⁴ Saa si̱kaka ndaꞌa ra Simón Pedro nuu ra ikán, ya ná ndakan tuꞌun ra Jesús, unku nda ku nda ikán saa.

²⁵ Saa ku̱yati vaꞌa ra ikán xiín Jesús, ta ndi̱ndakan tuꞌun ñaꞌa ra, káchi ra saa: ―¿Tata, unku ndeꞌe ikan saa? ―káchi ra.

²⁶ Saa ndi̱kuiin Jesús káꞌan ra: ―Ra sindaxin i xita vaꞌa taxi i ndaꞌa, ku ra ―káchi ra. Saa si̱ndaxin ra xita vaꞌa ta̱xi ra ndaꞌa ra Judas Iscariote, seꞌe ra Simón.

²⁷ Ta tá ndi̱kiꞌin soꞌva ra Judas ikán xita vaꞌa xi̱xi ra, ta ndikun ndi̱kiꞌvi kiti nǎꞌa nima ra. Saa ndi̱kaꞌan Jesús xiꞌin ra, káchi ra saa: ―Chiñu ya xaa súvi un, ta vaꞌa kama xaa súvi un ya ―káchi Jesús xiꞌin ra.

²⁸ Ta nda iin nda ndóo nuu mesa ikán, köo ndi̱kundaa ini ndá xaꞌa kua ndi̱kaꞌan Jesús saa xiꞌin ra.

²⁹ Ta sava nda ndi̱kani ini ya kuꞌun ra sata ra ñaꞌa kuniñuꞌu nda viko án ná taxi ra xuꞌun ndaꞌa na ndáꞌvi, káꞌan nda, chi mií ra ku ra ndíso ñaꞌa ñúꞌu xuꞌun.

³⁰ Tá xi̱xi ra iin yuꞌu loꞌo, ta ndikun ke̱ta ra kuaꞌan ra, ta xa ñǔu kua.

Ya sínaꞌa Jesús ta ya xa̱á kua

³¹ Tá ke̱ta ra Judas kuaꞌan ra, saa ndi̱kaꞌan Jesús xiꞌin nda ítaꞌan xiꞌin ra, káchi ra saa: Vitin kua kuni naꞌa ya chee ni Taa ra xa̱a ñuu ivi yóꞌó, ta tixin ra ikán kua ndikunuu ya toꞌo Iva ra.

³² Tá tixin ra ikán kua ndúu kaꞌnu ni Ndioxi ta saa ndasa kaꞌnu ni tu Ndioxi ra íkan va, ta kama ni kuu saa.

³³ Ta ndóꞌo̱, tá íyo seꞌe mií i saa íyo ndo. Ta xa siloꞌo ni kivi íyo i xiꞌin ndo. Ndinduku ni ndo yeꞌe, ta köo ka i. Tá íyo ya ndi̱kaꞌan i xiꞌin inka nda judío, saa íyo tu ya káꞌan i xiꞌin ndóꞌo̱ va: Nuu kuꞌun i ta küvi kuꞌun ndo ―káchi Jesús xiꞌin nda.

³⁴ Ta ya yóꞌó ku iin chiñu xa̱á sindoo i ndaꞌa ndo: Kuꞌvi ni ini ndo kuni taꞌan ndo, tá kuꞌva kúꞌvi ini i xíni i ndóꞌo̱, ta kuꞌva saa kuꞌvi ni tu ini ndóꞌo̱ va kuni taꞌan ndo.

³⁵ Tá tu kúꞌvi ni ini ndo xíni taꞌan ndo, ta saa kuni ndiꞌi naꞌa ya ítaꞌan ndo xiꞌin i ―káchi ra xiꞌin nda.

Káꞌan Jesús xaꞌa ra Pedro ya ndikuaa ñaꞌa ra

³⁶ Saa ndi̱kaꞌan ra Simón Pedro xiꞌin Jesús, káchi ra saa: ―Tata, ¿míí chí kuꞌun un? ―káchi ra xiꞌin ra. Saa ndi̱kuiin Jesús ndi̱kaꞌan ra, káchi ra saa: ―Nuu kuꞌun i ta küvi kuꞌun un xiꞌin i vitin, sindiꞌi saa kuchiñu un kuꞌun un nuu kuꞌun i ―káchi Jesús xiꞌin ra.

³⁷ Saa ndi̱kaꞌan ra Pedro xiꞌin ra, káchi ra saa: ―Tata, ¿ndachu küvi kuꞌun i xiꞌin un vitin? Ta xa íyo tuꞌva i, vani nda kuvi i xaꞌa va un ―káchi ra xiꞌin Jesús.

³⁸ Saa ndi̱kuiin Jesús, káchi ra saa: ―¿Án ndixa ku un, íyo tuꞌva un ya kuvi un xaꞌa i? Ya ndixa kua káꞌan i xiꞌin un, ñǔu vitin, ta xa uni ichí vi ndikuaa un ya köo xíni un yeꞌe, saa kana chele ―káchi Jesús xiꞌin ra Pedro.