San Juan 1 - Xochapa Mixteco

Tuꞌun ya káꞌan xaꞌa Jesucristo ra kúu tuꞌun Ndioxi

¹ Tá täꞌan xi̱koo ñuu ivi yóꞌó, ta xa íyo va ra kúu tuꞌun Ndioxi, ta ra kúu tuꞌun Ndioxi ikán xa íyo va ra xiꞌin Ndioxi tá yachi, ta suvi mií ra kúu tuꞌun ikán ku ra kúu Ndioxi.

² Ta ra ikán ta xa íyo ra xiꞌin Ndioxi tá núnu̱ú.

³ Tixin ra ikán kua si̱kuaꞌa Ndioxi ndiꞌi ñaꞌa. Nda iin ya köo ndi̱kan mií Ndioxi, sundi ndiꞌi ni kúu ya íyo, ta tixin ra ikán si̱kuaꞌa ndiꞌi Ndioxi ya.

⁴ Ta mií ra ikán ku ra kúu mií ndee ya taxi ra kutaku na ñuu ivi xiꞌin ra tá kuꞌva táku mií ra. Chi ya táku ra kua vaꞌa síndiyeꞌe ra nuu na ñuu ivi.

⁵ Ta ñu̱ꞌu̱ ikán kua túun nuu naá, ta ya naá köo ndi̱küchiñu ya ndaꞌva ya ñu̱ꞌu̱ ikán.

⁶ Ndi̱xiyo iin taa ra ti̱ꞌvi Ndioxi xaa chiñu nuu ra, ta ra ikán nani ra Juan.

⁷ Ki̱xi ra ya ndíkuiin ra xaꞌa ñu̱ꞌu̱ ikán, káꞌan ra xiꞌin na ya ná kandixa ndiꞌi na taa, ra síndiyeꞌe nuu na.

⁸ Ta ra Juan süvi ra síndiyeꞌe nuu naꞌa ku ra, takua ki̱xi kuiti ra ndi̱tuꞌun ra xaꞌa taa, ra síndiyeꞌe nuu na ñuu ivi.

⁹ Ta ra kúu ñu̱ꞌu̱ ya ndixa sítuun nuu na ñuu ivi, ta xa vaxi va ra ñuu ivi yóꞌó.

¹⁰ Ra kúu tuꞌun Ndioxi ku ra, ta xa̱a ra íyo ra ñuu ivi, ta tixin ra ikán si̱kuaꞌa Ndioxi ñuu ivi. Sundi na ñuu ivi, ta köo ndi̱xiin na ndikuni ñaꞌa na.

¹¹ Ki̱xi ra nuu na ñuu ra, ta na ñuu ra köo ndi̱xiin na ndikiꞌin ñaꞌa na.

¹² Sundi tá kúu ndiꞌi na ndíkiꞌin vaꞌa ñaꞌa, ta kándixa na kivi ra. Ta ndaꞌa na ikán kua táxi ra ichí ndúu na seꞌe Ndioxi.

¹³ Ta mií ya ndaa seꞌe Ndioxi ndúu na, chi köo ndi̱kaku na tá kuꞌva káku seꞌe iin taa xiꞌin iin ñaꞌa. Sundi ka̱ku na tá kuꞌva kúni mií Ndioxi.

¹⁴ Ta Tuꞌun Ndioxi ikán, ndu̱u ya iin taa, tá íin mií yo saa ndu̱u ra, ta ndi̱xika ra xiꞌin nde ñuu ivi yóꞌó. Ta xi̱ni nde ya vaꞌa luvi ni kúu mií ra. Ta mií ya luvi ni kúu mií Ndioxi kua kúu mií ra, chi iindaa mií ra ku Seꞌe Ndioxi. Iin chútu ndaa ya vaꞌa, ya ndaa ini ra.

¹⁵ Ta ra Juan ku ra ndíkuiin xaꞌa ra ikán, chi ra ikán ku taa, ra kúu tuꞌun Ndioxi. Ndee ni ndi̱kaꞌan ra Juan káchi ra saa: ―Ra yóꞌó ku taa ra ndi̱kaꞌan i xaꞌa xiꞌin ndo yachi, ka̱chi i saa: Ra vaxi sata i, ta chee ni ka ra ikán nuu i chi xa yachi vi íyo ra ―káchi ra Juan.

¹⁶ Ta xaꞌa ya chútu ni ya vaꞌa ini ra ikán, ta nda yoo ndi̱niꞌi ya vaꞌa xiꞌin ra. Ndakua ndíkun taꞌan ya táxi ra ndaꞌa yo.

¹⁷ Ta ley Ndioxi ta ndaꞌa xii sikua yo ra Moisés ta̱xi Ndioxi ya xa̱ꞌnda chiñu ya nuu yo. Sundi ya ndaa xiꞌin ya kúꞌvi ni ini Ndioxi xíni ra yoo ta tixin Jesucristo kua xa̱a ya nuu yo.

¹⁸ Nda iin mituꞌun naꞌa täꞌan kuni xiꞌin nuu Ndioxi. Iindaa Jesucristo Seꞌe Ndioxi, ra iin mituꞌun nuu ra, ra íyo xiꞌin ra, ra ikán ku ra xíni vaꞌa Ndioxi, ta ra ikán ku ra sínaꞌa yoo ndá kuꞌva káa Ndioxi.

Tuꞌun ya ndíkuiin ra Juan káꞌan ra xaꞌa Jesucristo

¹⁹ Soꞌva ndi̱kuiin ra Juan ra sínaꞌa naꞌa, tá ti̱ꞌvi nda naꞌnu nuu na judío na ndóo ñuu Jerusalén sava nda sutu xiꞌin sava nda levita, nda ndíso chiñu xiꞌin veꞌe ñuꞌu. Ti̱ꞌvi ñaꞌa nda kuaꞌan nda ndakan tuꞌun nda ra, káchi nda saa: ―¿Unku yóꞌo̱? ―káchi nda xiꞌin ra.

²⁰ Ta köo ndi̱tiseꞌe tuꞌun ra, ndi̱kaꞌan teꞌe ra xiꞌin nda, káchi ra saa: ―Süvi yeꞌe ku Cristo, ra ti̱ꞌvi Ndioxi vaxi sikaku na ñuu ivi yóꞌó ―káchi ra.

²¹ Saa ndi̱ndakan tuꞌun tuku ñaꞌa nda, káchi nda saa: ―¿Ta unku yóꞌo̱? ¿Án ra profeta Elías kúu un? ―káchi nda xiꞌin ra. Saa ndi̱kuiin ra káꞌan ra: ―Süvi i ―káchi ra. ―¿Án iin ra profeta ndi̱kaꞌan ndoso tuꞌun yuꞌu Ndioxi xinaꞌa va ku un? ―káchi nda xiꞌin ra. Saa ndi̱kuiin ra káꞌan ra: ―Süvi i ―káchi ra xiꞌin nda.

²² ―Tá tu saa, ta ¿unku yóꞌo̱?, saa chi ndeꞌe ta xíniñuꞌu nde kundaa ini nde, ta saa ndituꞌun nde xiꞌin na ti̱ꞌvi ndeꞌe vaxi nde. ¿Unkua káchi un xaꞌa un? ―káchi nda xiꞌin ra.

²³ Saa ndi̱kuiin ra káꞌan ra: ―Yeꞌe ku ra ti̱ꞌvi Ndioxi vaxi i xíka i káꞌan i iku yuyu káchi i saa: “Xaa vií ndo nima ndo nuu Ndioxi”. Tá kuꞌva íyo ya ta̱a ra Isaías ra ndi̱kaꞌan ndoso tuꞌun yuꞌu Ndioxi xinaꞌa ―káchi ra Juan xiꞌin nda.

²⁴ Ta nda fariseo ku nda ti̱ꞌvi nda ikán ndi̱xaꞌan nda nuu ra Juan.

²⁵ Ta saa ndi̱kaꞌan nda xiꞌin ra, káchi nda saa: ―Tá tu süvi Cristo kuu un, ta ni süvi ra Elías ku un, ta ni süvi ra profeta ku un, ¿ta ndachu síkuchi un naꞌa? ―káchi nda xiꞌin ra.

²⁶ Saa ndi̱kuiin ra Juan ndi̱kaꞌan ra xiꞌin nda, káchi ra saa: ―Yeꞌe ta xiꞌin tikuii va síkuchi i naꞌa, sundi xa íyo iin taa tañu ndo, ta köo xíni ndo ra.

²⁷ Ta ra ikán ku ra vaxi sata i, ta xa xiꞌna ka vi ra ikán íyo nuu yeꞌe yakan chee ni ra nuu i. Ta nda ni iin correa loꞌo sata nduxan ra köo kúu mií i ichí ndaxin i xaꞌa ya ndee ni ra ―káchi ra Juan xiꞌin nda.

²⁸ Ndiꞌi ya yóꞌó ndo̱ꞌo ra Juan ñuu ya náni Betábara, ya íyo yati yuꞌu ita Jordán, nuu si̱kuchi ra naꞌa.

Nuu ndi̱kitaꞌan ra Juan xiꞌin Jesús

²⁹ Ta ndi̱tuvi inka kivi saa xi̱ni ra Juan Jesús vaxi ra nuu ra, saa ndi̱kaꞌan ra xiꞌin naꞌa, káchi ra saa: ―¡Koto ndo vii! Ra káa ku ra síniꞌi Ndioxi kuvi ra xaꞌa kuachi yo ñuu ivi. Tá íyo levo síniꞌi naꞌa nuu Ndioxi ya síndiꞌi xaꞌa ra kuachi na, ta saa íyo ra káa.

³⁰ Xaꞌa ra káa kua ndi̱kaꞌan i xiꞌin ndo, ka̱chi i saa: “Vaxi iin ra sata i, ta ndee ni ka ra ikán nuu i, chi tá ka̱ku i ta xa xiꞌna vi ra íyo nuu i”, ka̱chi i xiꞌin ndo.

³¹ Ni yeꞌe ta köo xíni i unku ra ti̱ꞌvi Ndioxi vaxi sikaku yoo, ta xaꞌa ya ná kuni túvi na Israel ra yóꞌó kua síkuchi i naꞌa xiꞌin tikuii vaxi i ―káchi ra Juan.

³² Saa ndi̱kaꞌan ka ra Juan xaꞌa Jesús, káchi ra saa: ―Xi̱ni i Tachi Ndioxi vaxi nùù ya nuu ndivi. Tá káa sata, saa káa ya nùù ta ndi̱ndoo ya íyo ya xiꞌin ra.

³³ Ta yeꞌe täꞌan kundaa ini i unku ra, sundi ra ti̱ꞌvi yeꞌe vaxi i sikuchi i naꞌa xiꞌin tikuii, ku ra ndi̱kaꞌan xiꞌin i káchi ra saa: “Tá xi̱ni un vaxi nùù Tachi i íyo ya xiꞌin iin ra, ta ra ñaa ku ra síkuchi naꞌa xiꞌin Tachi I̱í i”, káchi Ndioxi xiꞌin i.

³⁴ Ta yeꞌe xa xi̱ni va i ra, ndíkuiin i káꞌan i xaꞌa ra xiꞌin ndo, ra yóꞌó ku Seꞌe Ndioxi ―káchi ra Juan.

Nda núnu̱ú ndi̱kitaꞌan xiꞌin Jesús

³⁵ Tá ndi̱tuvi inka kivi ta íyo tuku ra Juan xiꞌin uvi nda ítaꞌan xiꞌin ra.

³⁶ Ta xi̱ni ra ndi̱yaꞌa Jesús kuaꞌan ra, saa ndi̱kaꞌan ra xiꞌin nda ítaꞌan xiꞌin ra, káchi ra saa: ―Koto ndo ra kuaꞌan káa, tá káa levo loꞌo saa káa ra, chi ra kaá ku ra si̱niꞌi Ndioxi xaꞌa kuachi yo ivi yóꞌó ―káchi ra Juan xiꞌin nda.

³⁷ Tá xi̱ni soꞌo uvi saa nda ítaꞌan xiꞌin ra ya ndi̱kaꞌan ra xaꞌa Jesús, ta saa ndi̱kundikun nda Jesús.

³⁸ Saa ndi̱ko koo Jesús ndikoto ra sata ra, ta xi̱ni ra ndíkun nda kuaꞌan nda sata ra, ta saa ndi̱kaꞌan ra xiꞌin nda, káchi ra saa: ―¿Unkua kúni ndo? ―káchi ra xiꞌin nda. Saa ndi̱kuiin nda káꞌan nda: ―Rabí ¿míí ku nu íyo un? ―káchi nda xiꞌin ra. Ta tuꞌun “Rabí” kúni kachi ya “Maestro”.

³⁹ Ta ndi̱kuiin ra káꞌan ra xiꞌin nda: ―Naꞌa ndo kuni ndo nuu íyo i ―káchi ra xiꞌin nda. Saa ke̱e nda kuaꞌan nda xiꞌin ra kuni nda nuu íyo ra. Ta iin nduvi saa ndi̱xiyo nda xiꞌin ra kivi ikán, chi xa kua iin kuꞌva kàà kumi xikuaa.

⁴⁰ Ta iin taꞌan nda uvi xi̱ni soꞌo ya ndi̱kaꞌan ra Juan xaꞌa Jesús, ta ndi̱kundikun ñaꞌa ra, ra ikán ku ra Andrés, ñani ra Simón Pedro.

⁴¹ Ta ra xiꞌna xi̱ni ra Andrés ku ra Simón Pedro ñani ra, saa ndi̱kaꞌan ra xiꞌin ra, káchi ra saa: ―Ndi̱taꞌan nde ra Mesías ―káchi ra. (Ta Mesías ku tuꞌun hebreo ya kúni kachi Cristo).

⁴² Ta saa ndi̱kundaka ra Andrés, ra Simón ñani ra kuaꞌan xiꞌin ra nuu Jesús. Tá ndi̱xaa nda, ta ndi̱koto vaꞌa Jesús nuu ra saa ndi̱kaꞌan ra xiꞌin ra, káchi ra saa: ―Yóꞌo̱ ku Simón, seꞌe ra Jonás, ta vitin kunani un Cefas ―káchi ra xiꞌin ra. (Ta Cefas kúni kachi ya “Pedro”).

Nuu ka̱na Jesús ra Felipe xiꞌin ra Natanael

⁴³ Ta ndi̱tuvi inka kivi ku̱ni Jesús kuꞌun ra estado Galilea, ta saa ndi̱taꞌan ra, ra Felipe. Ta ndi̱kaꞌan ra xiꞌin ra, káchi ra saa: ―Naꞌa koꞌyo xiꞌin i ―káchi Jesús xiꞌin ra.

⁴⁴ Ta ra ñuu Betsaida ku ra Felipe, ikán ke̱e tu ra Andrés va xiꞌin ra Pedro.

⁴⁵ Ta ndi̱taꞌan ra Felipe ra Natanael saa ndi̱kaꞌan ra xiꞌin ra, káchi ra saa: ―Ndi̱kitaꞌan nde xiꞌin taa, ra ta̱a ra Moisés xaꞌa xiꞌin ya ta̱a nda profeta ndi̱kaꞌan ndoso tuꞌun yuꞌu Ndioxi xinaꞌa. Ta Jesús náni ra, seꞌe ra José ra ñuu Nazaret ku ra ―káchi ra Felipe xiꞌin ra.

⁴⁶ Saa ndi̱kuiin ra Natanael káꞌan ra: ―¿Án ñuu Nazaret, káchi un? ¿Án vaꞌa ta kana iin taa, ra vaꞌa, ñuu Nazaret? ―káchi ra. Saa ndi̱kaꞌan ra Felipe xiꞌin ra, káchi ra saa: ―Naꞌa, kuni un ―káchi ra xiꞌin ra.

⁴⁷ Tá xi̱ni Jesús kúyati ra Natanael xaa ra nuu ra, ta saa ndi̱kaꞌan ra xaꞌa ra, káchi ra saa: ―¡Ra vaxi yóꞌo̱ ta mií ra ñuu Israel, ra ndaa ni ini ku ra, ta ni köo ya síki íyo ini ra! ―káchi Jesús xaꞌa ra.

⁴⁸ Saa ndi̱kaꞌan ra Natanael, káchi ra saa: ―¿Ndachu vaꞌa xíni un yeꞌe? ―káchi ra. Ta ndi̱kuiin Jesús káꞌan ra: ―Yachi ka tá täꞌan kana ra Felipe yóꞌo̱ vi kua, xi̱ni i yóꞌo̱ íyo un xaꞌa itun higo ―káchi Jesús xiꞌin ra.

⁴⁹ Saa ndi̱kaꞌan ra Natanael xiꞌin ra, káchi ra saa: ―Tata Rabí, ¡yóꞌo̱ ku Seꞌe Ndioxi, ta yóꞌo̱ ku Rey ra kaꞌnu nuu ndeꞌe ñuu Israel! ―káchi ra.

⁵⁰ Saa ndi̱kuiin Jesús, káꞌan ra: ―¿Án kándixa un yeꞌe chi ndi̱kaꞌan i xiꞌin un, xi̱ni i yóꞌo̱ xaꞌa itun higo? Ya ndee ka kuni un nuu ya xi̱ni un vitin ―káchi Jesús xiꞌin ra.

⁵¹ Saa ndi̱kaꞌan ka ra xiꞌin ra, káchi ra saa: ―Ya ndaa ni ndixa káꞌan i xiꞌin un, kuni ndo núna nuu ndivi, ta saa kuni ndo na tatun Ndioxi vaxi nùù na tin kuandaa na nuu íyo yeꞌe, Ra kúu Taa ra xa̱a ñuu ivi yóꞌó ―káchi Jesús xiꞌin ra Natanael.