HEBREOS 9 - Xochapa Mixteco

¹ Tá kivi ki̱ndoo Ndioxi xiꞌin na Israel ya núnu̱ú, ta ta̱xi ra ichí ndaꞌa na nuu xa̱ꞌnda chiñu ra nuu na ndá kuꞌva xaa kaꞌnu na ra ini veꞌe ñuꞌu manta ñuu ivi yóꞌó.

² Ta soꞌva ndi̱xiyo veꞌe ñuꞌu ikán: Ya núnu̱ú ndi̱xiyo ku Cuarto ya náni Cuarto I̱í, ta ikán xi̱ndichi kàà ya náni candelero nuu xíxi ñu̱ꞌu̱, ta saa xi̱ndichi mesa nuu ndóso xita vaꞌa ya sóko nda sutu nuu Ndioxi.

³ Saa tíkaa iin toto chee ni, ta sata toto ikán ndíkaa inka Cuarto, ta Cuarto ikán kua náni Cuarto ya ndee ni I̱í.

⁴ Ta ini Cuarto ikán íyo iin ñaꞌa nuu chóꞌma nda sutu xuxa vaꞌa nuu Ndioxi, iin ndíxi níí ya oro. Ta saa íyo tu iin xatun náni arca, ta ini nu ikán ndíkaa iin kisi nuu ñúꞌu maná, saa ndíkaa tu itun vara xi̱niñuꞌu ra Aarón, itun na̱na ndíxin, ta ñúꞌu tu yu̱ú nuu ta̱a ra Moisés uxi saa nuu ley Ndioxi ya ta̱xi Ndioxi ndaꞌa ra, nuu ndi̱kaꞌan Ndioxi xiꞌin ra ya xaa súvi ra ya ndi̱kaꞌan ra xiꞌin ra.

⁵ Ta sata itun arca ikán ndíta uvi naꞌna na tatun Ndioxi, ya náni querubines, ta íyo ndixin ya, ya ikán kua káꞌan ya íyo Ndioxi mi ikán. Ndóso ya sata nu, ndi̱ndika uvi saa ndixin ya ndási ya sata nu, nuu xáta niꞌni sutu nií kiti ya xáa kaꞌnu ini Ndioxi xaꞌa kuachi na. Sundi vitin ta köo xíniñuꞌu yo kaꞌan yo xaꞌa ndiꞌi ya yóꞌó.

⁶ Soꞌva ku̱u tá ndi̱ꞌi ku̱vií ndiꞌi ñaꞌa ini Cuarto ya I̱í, ya núnu̱ú ikán, saa kuakiꞌvi nda sutu ini ya xáa súvi nda chiñu nuu Ndioxi. Saa íkan nda vitin taan nuu ra ya xáa kaꞌnu nda ra.

⁷ Sundi ini Cuarto ya ndee ni I̱í, ya uvi, ta iindaa sutu, ra chee nuu ndiꞌi sutu ku ra kuakiꞌvi, ta iindaa ichí kuakiꞌvi ra nuu kuiya. Ta kuakiꞌvi nií kiti xiꞌin ra ya táxi ra rá ndaꞌa Ndioxi xaꞌa kuachi mií ra tin xaꞌa kuachi na ñuu, kuachi ya íkan sana na.

⁸ Ta xiꞌin ya yóꞌó sínaꞌa Tachi I̱í Ndioxi yoo vitin, tá kivi ndi̱xiyo Cuarto ya I̱í, ya núnu̱ú ikán, ta köo naꞌa ndi̱kuchiñu kiꞌvi ini Cuarto ya ndee ni I̱í ya xaa kaꞌnu na Ndioxi, tá káa ya xi̱ndasi saa ndi̱xiyo ya nuu na.

⁹ Ta ndiꞌi ya yóꞌó tá káa ya sínaꞌa yoo káa ya xaꞌa ñaꞌa ya ndi̱soko naꞌa nuu Ndioxi xiꞌin ya xa̱ꞌni na kiti nuu ra ta̱xi na ndaꞌa ra, ta köo ndi̱kuchiñu ya ikán ndasa vaꞌa ya nima na, ya koo vaꞌa ya xínituni na xaa kaꞌnu na Ndioxi.

¹⁰ Saa chi ndiꞌi ya táxi na ndaꞌa Ndioxi ta káꞌan ya xaꞌa ñaꞌa ya xíxi na xiꞌin nduta xíꞌi na, ta saa tu ndá kuꞌva ndikata na ikin kuñu na ya nduyaa na nuu Ndioxi. Ndiꞌi ya yóꞌó ta köo ndi̱kuchiñu ya ndisama ya nima na. Ta ya yóꞌó kua i̱kan na iin saa nda kivi tá ndisama Ndioxi ya yóꞌó, ta nda saa kua ndi̱niꞌi na inka ya vaꞌa ni ka nuu Ndioxi.

Kuꞌva ya xa̱á ki̱ndoo Ndioxi xiꞌin na xaa kaꞌnu na ra

¹¹ Sundi Jesucristo ta xa ki̱xi ra ñuu ivi yóꞌó, ta vitin ra ikán ku ra kúu sutu ra chee ni nuu yo. Chi ki̱xi ra ya taxi ra ndiꞌi ya vaꞌa kúu mií Ndioxi ndaꞌa yo. Ta vitin íyo ra xáa chiñu ra veꞌe ñuꞌu ya chee, ya luvi ni íyo nuu ndivi, ya ndee ni ka vaꞌa ku ya ikán nuu ya íyo ñuu ivi yóꞌó, saa chi süvi na ivi yóꞌó ku na ndi̱sikuaꞌa ya, Ndioxi ku ra si̱kuaꞌa ya.

¹² Ta Jesucristo ndi̱kiꞌvi ra ini veꞌe ñuꞌu ikán nuu ndíkaa Cuarto ya ndee ni I̱í, ta köo ndi̱kiꞌvi ra xiꞌin nií tixuꞌu ni xiꞌin nií kiti cerra vali. Sundi xiꞌin nií mií ra kua ndi̱kiꞌvi ra. Ta iindaa mituꞌun ichí kua i̱kan ra saa, ta ya i̱kan ra saa ta ndáa yaꞌvi ni ya, chi ikán ku nuu sa̱ña ra yoo, ndi̱saña ndika yo kuaꞌan yo ndiꞌi saa tiempo, ta nda iin ka ichí küñuꞌu yo ndaꞌa ndee ya väꞌa.

¹³ Ya ndaa kua nda̱sa vaꞌa nií kiti toro xiꞌin nií kiti tixuꞌu rá kóꞌni yuchi nda sutu sata naꞌa xiꞌin yaá kiti cerra vali kiti xa̱ꞌmi na, saa kóꞌni yuchi nda ya sata na ya ku̱chiñu nda̱sa vaꞌa ya sata ikin kuñu na.

¹⁴ Tá tu ku̱chiñu nií ikán xiꞌin yaá nda̱sa vaꞌa ya sata ikin kuñu na, ta ¡ndisaa ka vi nií Jesucristo, ndee ni ka ndee kúu mií rá ikán chi nda loꞌo kuachi ra köo, yakan vaꞌa ndasa vaꞌa rá yoo xaꞌa Tachi ra ya táku ndiꞌi saa ichí! Saa chi nií mií ra ku rá ndása vaꞌa nima yo, ndúvaꞌa yo nuu kuachi ya xáꞌni yoo, ta saa kua kuchiñu yo xaa chiñu yo nuu Ndioxi, ra táku.

¹⁵ Xaꞌa ya yóꞌó kua ndi̱xiꞌi Jesucristo xaꞌa yo, ta si̱kitaꞌan mani ra yoo ivi yóꞌó xiꞌin Ndioxi, nuu ki̱ndoo ra iin trato ya vaꞌa ni, ya xa̱á xiꞌin yo, ta ikán ku nuu ndo̱o kuachi yo ya i̱kan yo tixin trato ya yata ki̱ndoo Ndioxi xiꞌin yo tá núnu̱ú. Ta vitin kuchiñu niꞌi ndiꞌi yo ya vaꞌa ki̱ndoo Ndioxi taxi ra ndaꞌa yo ka̱na ra kundikun ñaꞌa.

¹⁶ Ta xíni yo, tá ndá naꞌa xíꞌi ta síkuaꞌa na tutu síndoo na xaꞌa ñaꞌa na, ta tutu ikán ta köo ndáa yaꞌvi ya kivi táku mií na si̱kuaꞌa ya, nda tá ndi̱xiꞌi vi na saa kua xáa ya ndáa yaꞌvi ya.

¹⁷ Sundi kivi táku na, vani xa ndi̱kuaꞌa tutu na íyo ya, ta köo ndáa yaꞌvi ya. Saa chi táku va na, yakan küvi nditaꞌvi ñaꞌa na, sundi tá ná kuvi na, saa kua kundaa yaꞌvi tutu ya si̱kuaꞌa na.

¹⁸ Xaꞌa ya yóꞌó kua kuaꞌa ni kiti xa̱ꞌni nda sutu ndi̱soko nda ri nuu Ndioxi, ta ndi̱xita nií ri ya kuchiñu kundàà yaꞌvi trato ya núnu̱ú ki̱ndoo ra xiꞌin na tá ndi̱kaꞌan ra xiꞌin na.

¹⁹ Tá sindiꞌi ra Moisés ndi̱kaꞌan ra xiꞌin na xaꞌa ley Ndioxi. Ta saa sa̱kanuu ra nií kiti cerra vali xiꞌin nií kiti tixuꞌu, sa̱ka ra rá xiꞌin tikuii, saa ti̱in ra iin ndaꞌa itun náni hisopo ka̱tun ra nu ikán xiꞌin kachi kuaꞌa. Saa ko̱ꞌni yuchi ra rá sata tutu nuu íyo ley Ndioxi, ta ko̱ꞌni tu ra rá sata naꞌa va.

²⁰ Saa ndi̱kaꞌan ra xiꞌin na, káchi ra saa: “Nií yóꞌó ku rá ndíkuiin xaꞌa trato ya ki̱ndoo Ndioxi ikan ra xiꞌin ndo”, káchi ra Moisés xiꞌin na.

²¹ Saa ko̱ꞌni yuchi tu ra nií ini veꞌe ñuꞌu manta xiꞌin ndiꞌi ka ñaꞌa ya íyo ini ya, ya xíniñuꞌu nda sutu tá íkan nda chiñu nuu Ndioxi ya xáa kaꞌnu nda ra.

²² I̱kan ra saa, saa chi saa káꞌan ley Ndioxi, ndiꞌi ñaꞌa ta xíniñuꞌu ya nduu vaꞌa ya xiꞌin nií, chi tá tu köo xíta nií, ta köo xáa kaꞌnu ini Ndioxi xaꞌa kuachi naꞌa, káchi ya.

Nií Jesucristo ku rá ndíkata kuachi yo

²³ I̱kan nda sutu ikán saa, xaꞌa ya xíniñuꞌu nduu vaꞌa ñaꞌa íyo veꞌe ñuꞌu manta, ya íin tá íin copia ya íyo nuu ndivi. Xaꞌa ya ikán kua xa̱ꞌni nda kiti nuu ndu̱u vaꞌa ndiꞌi ya xiꞌin nií ri, sundi mií veꞌe ñuꞌu ya ndee ni ndixa íyo nuu ndivi ku ya ndee ni ndinuꞌu, ta ndiꞌi ya íyo nuu ndivi xíniñuꞌu ya nduvaꞌa ya xiꞌin ñaꞌa ya vaꞌa ni ka nuu nií kiti.

²⁴ Saa chi veꞌe ñuꞌu nuu ndee ni I̱í ndi̱kiꞌvi Jesucristo, ta süvi na ñuu ivi yóꞌó ku na ndi̱sikuaꞌa ya. Chi ya si̱kuaꞌa na ivi yóꞌó, ta tá káa copia mií veꞌe ñuꞌu ya ndee ni vaꞌa íyo mií nuu ndivi saa káa ya si̱kuaꞌa na. Ta ikán ku nuu ndi̱kiꞌvi Jesucristo ini veꞌe ñuꞌu ya ndee ni vaꞌa ikán, káꞌan ndaꞌvi ra xaꞌa yo xiꞌin Ndioxi, ya ná xaa kaꞌnu ini ra xaꞌa yo.

²⁵ Ta iindaa ichí ndi̱kiꞌvi ra ta̱xi ra mií ra ndaꞌa Ndioxi, chi iindaa ichí ndi̱xiꞌi ra. Köo ndi̱kan ra tá kuꞌva i̱kan nda sutu chee, chi nda ikán ta kuakiꞌvi nda ini Cuarto ya ndee ni I̱í tá nuu kuiya, ta xiꞌin nií kiti ku rá ndi̱soko nda nuu Ndioxi.

²⁶ Tá ndi̱kan Jesucristo tá kuꞌva i̱kan nda sutu ikán tá nuu kuiya, ta nda tá xa̱á xi̱koo ñuu ivi yóꞌó vi xíniñuꞌu ra kuvi ra kuaꞌa ni ichí, ndikuu. Sundi tiempo ya ku̱yati ndiꞌi xaꞌa ñuu ivi ndóo yo vitin kua ki̱xi ra, ta iindaa va ichí ndi̱taxi ra mií ra ndisoko ra mií ra xaꞌa yo, ta ya i̱kan ra saa ndi̱taxi ra mií ra ndaꞌa Ndioxi yakan si̱ndiꞌi xaꞌa ra kuachi yo.

²⁷ Tá ndo̱ꞌo Tata yo Jesucristo ndi̱xiꞌi ra iindaa ichí, ta saa kundoꞌo ndiꞌi yo, iindaa ichí va kuvi yo, ta sindiꞌi saa xaa nani Ndioxi kuachi yo.

²⁸ Saa chi saa i̱kan Jesucristo iin ichí va ndi̱xiꞌi ra ya ndi̱soko ra mií ra nuu ndi̱kata ra kuachi kuaꞌa ni naꞌa. Ta sindiꞌi, tá ná ndiko koo tuku ra ichí uvi, ta kïxi ka ra ya kuvi ra xaꞌa kuachi yo, sundi kixi ra sikaku ra yo ndátun ñaꞌa.