HEBREOS 8 - Xochapa Mixteco

Tata yo Jesús ku sutu ra chee ni ka nuu yo

¹ Ta ya káꞌan i xiꞌin ndo yóꞌó kua ndee ni ndee xíniñuꞌu ndo kundaa ini ndo: Jesucristo ku ra ku sutu chee, kaꞌnu ni ra nuu yo, ta nda̱a ra ndi̱kunduꞌu ra ñaꞌñu kuáꞌá Ndioxi nuu íyo tai kaꞌnu itun toꞌo xáꞌnda chiñu ra xiꞌin Ndioxi.

² Saa xáa chiñu ra ini veꞌe ñuꞌu nuu i̱í ni, nuu ndee ni ndixa íyo ya toꞌo xáa kaꞌnu na Ndioxi xiꞌin nina ya ndaa. Ta mií Ndioxi ku ra si̱kuaꞌa veꞌe ñuꞌu ikán, süvi na ivi yóꞌó ku na ndi̱sikuaꞌa ya.

³ Chi ndiꞌi nda sutu naꞌnu ta kúu mií nda ichí soko nda ñaꞌa nuu Ndioxi, án kaꞌni nda kiti nuu ra. Ta kuꞌva saa xíniñuꞌu tu Tata yo Jesucristo va kuu mií ra ñaꞌa soko ra nuu Ndioxi xaꞌa ya kúu ra sutu chee.

⁴ Chi tá tu ñuu ivi yóꞌó ka xáa chiñu Tata yo Jesucristo kúu ra sutu, ta süvi sutu kuu ra, ndíkuu. Saa chi xa íyo kuaꞌa ni sutu na sóko ñaꞌa táxi na ñuu ndaꞌa Ndioxi tá kuꞌva káꞌan ley ra, ya ta̱a ra Moisés.

⁵ Sundi chiñu ya íkan nda sutu yóꞌó ini veꞌe ñuꞌu, ta tá káa copia ya íyo nuu ndivi va káa ya ndínaꞌa na ndá kuꞌva káa mií ya ndixa ndaa ni íyo ini veꞌe ñuꞌu nuu ndivi. Ta xíni yo kúu ya copia, saa chi tá kivi ndi̱kaꞌan Ndioxi xiꞌin ra Moisés ya sikuaꞌa ra veꞌe ñuꞌu manta nuu kañuꞌu na Ndioxi, ta ndi̱kaꞌan ra xiꞌin ra, káchi ra saa: “Koto vaꞌa un ya kaꞌan i xiꞌin un, tá kuꞌva káa nií copia ya sinaꞌa i nuu un iku yóꞌó, saa koo ya sikuaꞌa un”, káchi Ndioxi xiꞌin ra.

⁶ Ta ndee ni ka chiñu ya ta̱xi Ndioxi ndaꞌa Tata yo Jesucristo nuu chiñu ya ku̱u mií nda sutu naꞌnu ni ñuu ivi yóꞌó. Ta vaꞌa ni ka ya ta̱xi ra ndaꞌa Tata yo Jesucristo chi si̱kitaꞌan mani ra yoo ndi̱kitaꞌan vií yo xiꞌin Ndioxi, yakan vaꞌa ni ka ke̱e yo xiꞌin ya yóꞌó nuu ya yata, ya ki̱ndoo Ndioxi xiꞌin ra Moisés xi̱naꞌa.

⁷ Tá tu ndíkuchiñu naꞌa xaa súvi na trato ya ki̱ndoo Ndioxi xiꞌin na tá núnu̱ú, ndikuu, ta kïndoo tuku ra inka trato xiꞌin na. Sundi xaꞌa ya köo ndi̱kuchiñu na xaa súvi na ya ikán, yakan xi̱niñuꞌu tuku ra ki̱ndoo ra inka trato ya uvi xiꞌin na.

⁸ Xaꞌa ya köo ndikuchiñu na xaa súvi na trato ya ki̱ndoo ra xiꞌin na tá núnu̱ú, yakan kua ndi̱kaꞌan ra xiꞌin na, káchi ra saa: Vaxi iin kivi ta kindoo i inka trato xa̱á xiꞌin na ñuu Israel tin na Judá.

⁹ Ta trato ya kindoo i xiꞌin na kivi vaxi, ta süvi ka taꞌan ya ki̱ndoo i xiꞌin xii sikua na xinaꞌa kua, tá kivi ti̱in i ndaꞌa na ta̱va i na ñuu Egipto. Saa chi xaꞌa ya köo ndi̱xaa súvi na ya ndi̱kaꞌan i xiꞌin na, yakan kua si̱ndoo ndaꞌa i na.

¹⁰ Ta ya yóꞌó ku trato ya kindoo i ikan i xiꞌin na Israel kivi vaxi: Ta soꞌva koo ya ikan i xiꞌin na kivi ikán: Chikaa i ley i koo ya xi̱ní na, saa taa i ya nima na. Ta iindaa mituꞌun yeꞌe kuu Ndioxi ra kañuꞌu na, saa tu mií va na kundikun na yeꞌe.

¹¹ Ta köo ka naꞌa sinaꞌa taꞌan na án na veꞌe na, kaꞌan na xiꞌin ñani na, ya xíniñuꞌu na kuni taꞌan na xiꞌin Tata yo. Saa chi xa ndiꞌi va na kuni taꞌan xiꞌin ra, nda na vali ta kuni taꞌan na xiꞌin ra, saa tu na naꞌnu va.

¹² Saa chi yeꞌe, ta xaa kaꞌnu ini i xaꞌa ndiꞌi ya väꞌa i̱kan na nuu i, ta nda iin ka ichí küñuꞌu ka ini i xaꞌa kuachi na, káchi Ndioxi.

¹³ Tá tu káꞌan Ndioxi xaꞌa trato ya xa̱á ki̱ndoo ra xiꞌin yo vitin, ta kúni kachi ya, ya yata ta ya xa kuaꞌan ndíꞌi xaꞌa kua, yakan siloꞌo ni ta ndiꞌi vaꞌa va xaꞌa ya.