HEBREOS 7 - Xochapa Mixteco

Tá ndi̱xiyo sutu ra Melquisedec saa íyo Jesús

¹ Ra Melquisedec ta ndi̱xiyo ra rey nuu na ñuu Salem, saa ku̱u tu ra sutu nuu Iva yo Ndioxi ra kaꞌnu ni. Kivi ndi̱ko koo ra Abraham tá ndi̱xaꞌan ra nuu kuachi ka̱ni taꞌan ra xiꞌin inka nda rey, ta ku̱chiñu ra nuu nda rey ikán, saa ke̱ta ra Melquisedec ndi̱kiꞌin ñaꞌa ra, saa chi̱kaa ra ya vaꞌa ra Abraham.

² Saa ta̱va ra Abraham iin iin ñaꞌa tañu ya uxi ki̱ndaa ra ndaꞌa nda rey ikán, ta ta̱xi ra ya ndaꞌa ra Melquisedec. Ta kivi ra Melquisedec kúni kachi ya: “rey ra ndaa ni ini”, ta kivi rey ra ke̱e ñuu Salem kúni kachi ya: “rey ra táxi ndóo vaꞌa ni naꞌa”.

³ Ta tuꞌun Ndioxi köo káꞌan ya xaꞌa iva ra Melquisedec, ni xaꞌa siꞌí ra, ni xaꞌa na veꞌe ra köo káꞌan ya, ni kivi ka̱ku ra, ni kivi ndi̱xiꞌi ra köo xíni yo xaꞌa. Ta xaꞌa ya yóꞌó kua kúndaa ini yo ya kúu ra sutu tá kuꞌva íyo Seꞌe Ndioxi, chi Seꞌe Ndioxi ta ndiꞌi saa ichí, ndiꞌi saa kivi kúu ra sutu.

⁴ Xíto yo ndee ni ndee chiñu ku̱u mií ra Melquisedec, yakan kua nda ni mií xii sikua yo ra Abraham, ta ta̱va ra iin iin koꞌndo tañu ya uxi ki̱ndaa ra ndaꞌa nda rey nuu ndi̱xaꞌan ra kuachi, saa ta̱xi ra ya ndaꞌa ra Melquisedec.

⁵ Tá káchi ley Ndioxi ya ta̱a ra Moisés, ndiꞌi sutu nda kúu seꞌe sikua ra Leví, ta kúu mií nda ichí ndikiꞌin nda iin iin ñaꞌa tixin ya uxi kíꞌin na ñuu nda xáa chiñu na, chi xa chiñu nuu na ñuu kua taxi na ya ndaꞌa nda xaꞌa ya xáa chiñu nda nuu na, vani seꞌe sikua ra Abraham ku nda sutu ikán ta saa tu mií va na ñuu.

⁶ Sundi ra Melquisedec, vani süvi sutu ra kúu seꞌe sikua ra Leví ku ra, ta ndi̱kuiso ra iin iin ñaꞌa tixin ya uxi ki̱ndaa ra Abraham ndaꞌa nda nuu ndi̱xaꞌan ra kuachi, saa chi̱kaa ra Melquisedec ya vaꞌa ra Abraham, ra ki̱ndoo Ndioxi xiꞌin taxi ra ñaꞌa ndaꞌa ra.

⁷ Xíni yo, iin ra chíkaa ya vaꞌa iin naꞌa ta ra chee ni ka ku ra ikán nuu na ndíkiꞌin ya vaꞌa. Ta saa i̱kan ra Melquisedec xiꞌin ra Abraham.

⁸ Ta vaꞌa ná koto yo, ndiꞌi nda sutu nda kúu seꞌe sikua ra Leví, ta nda ivi taꞌan mií yo ku ndiꞌi nda, chi ndiꞌi nda ikán ta xíꞌi nda tá kuꞌva xíꞌi yoo, ni kuꞌva saa ndi̱xiyo nda ta ndi̱kuiso nda iin iin ñaꞌa tixin ya uxi ya kíꞌin na ñuu nda xáa chiñu na. Sundi ra Melquisedec, ta káꞌan tuꞌun Ndioxi xaꞌa ra ya táku ra íyo ra nda vitin.

⁹ Xaꞌa ya yóꞌó kua vaꞌa kúndaa ini yo ya ta̱xi ra Leví iin iin ñaꞌa tixin ya uxi ndaꞌa ra Melquisedec, tá kivi ta̱xi ra xií sikua ra, ra Abraham iin iin ñaꞌa tixin ya uxi ndaꞌa ra, vani nda seꞌe sikua ra Leví va ku nda ndíkuiso iin iin ñaꞌa tixin ya uxi ndaꞌa na ñuu. Ta saa ni ta̱xi tu nda ikán va ya ndaꞌa mií ra Melquisedec.

¹⁰ Saa chi tá kivi ndi̱kitaꞌan ra Abraham xiꞌin ra Melquisedec, ta täꞌan kaku ra Leví seꞌe ñani sikua ra Abraham, sundi tá íyo ra xa táku saa ndi̱xiyo ra, saa chi xa ndíkaa ra ikin kuñu xií sikua ra, ra Abraham.

¹¹ Ta ley Ndioxi ya ta̱xi ra ndaꞌa ra Moisés kua káꞌan ndá kuꞌva xaa chiñu nda sutu nda ndi̱xiyo seꞌe sikua ra Leví. Sundi köo ndi̱kuchiñu nda sutu ikán ndasa vaꞌa nda naꞌa nuu Ndioxi. Xaꞌa ya ikán kua xi̱niñuꞌu ni ki̱xi inka sutu, ta süvi ka taꞌan nda sutu seꞌe sikua ra Leví án ra Aarón ku ra xíniñuꞌu ni ki̱xi, ra xíniñuꞌu ni kixi ku taꞌan sutu ra Melquisedec.

¹² Chi tá ndísama Ndioxi nda sutu, ta saa xíniñuꞌu tu ra ndisama ra ley mií va ra.

¹³ Ta sutu ra káꞌan Ndioxi xaꞌa ku Jesucristo, ta köo ndi̱kixi ra tixin na veꞌe ra Leví, chi tixin inka veꞌe ki̱xi ra, ta na veꞌe nuu ki̱xi ra ta nda iin na köo ndi̱xiyo sutu.

¹⁴ Ta yoo xíni yo ya ki̱xi Jesucristo ti̱xin veꞌe ra Judá, ta köo ndi̱kaꞌan ra Moisés xaꞌa nda iin na veꞌe ra Judá ya koo na sutu.

¹⁵ Ta ya ndaa ndixa kua ndi̱sama Ndioxi nda sutu, saa chi ti̱ꞌvi ra inka nuu sutu taꞌan ra Melquisedec.

¹⁶ Ta ra ikán ku Tata yo Jesucristo, ta köo ndi̱nduu ra sutu tá kuꞌva káꞌan ley xaꞌa nda sutu, sundi ndu̱u ra sutu xaꞌa ya ndee ni ndee kúu mií ra ya kutaku ra ndiꞌi saa kivi, chi nda iin ichí ndïꞌi xaꞌa ra.

¹⁷ Saa chi mií Ndioxi ta ndi̱kaꞌan ra xiꞌin ra, káchi ra saa: “Yóꞌo̱ ku sutu, ta nda iin ichí ndïꞌi xaꞌa chiñu un, tá kuꞌva ndi̱xiyo ra sutu Melquisedec, saa koo un”, káchi Ndioxi xiꞌin ra.

¹⁸ Xaꞌa ya ikán kua ki̱ndaa Ndioxi ley ra ya ta̱a ra Moisés, saa chi köo ndi̱kuchiñu ya chindee ya naꞌa, vita ni ya, köo ndee kúu mií ya.

¹⁹ Chi ley ikán, ta köo ndi̱kuchiñu ya ndasa vaꞌa ya naꞌa nuu Ndioxi. Xaꞌa ya ikán kua ta̱xi ra inka ya ndee ni ndáa yaꞌvi ndaꞌa yo, ta tixin ya ikán kua vaꞌa kuyati yo nuu Ndioxi vitin.

²⁰ Chi̱naꞌa Ndioxi xaꞌa mií ra ya ndixa kua Jesucristo ku sutu.

²¹ Ta kivi ndi̱kaꞌan Ndioxi ya ta̱xi ra chiñu ndaꞌa Jesucristo ya kuu ra sutu, ta chi̱naꞌa ra xaꞌa mií ra nuu tuꞌun ra, káchi ra saa: “Yóꞌo̱, ta ndiꞌi saa ichí kúu mií un sutu, ta nda iin ichí ndïꞌi xaꞌa chiñu un ya kúu un sutu. Tá ndi̱xiyo ra sutu Melquisedec, saa koo un”, káchi Ndioxi xiꞌin Jesús.

²² Ta ya ndi̱kaꞌan Ndioxi saa kua kúndaa ini yo ya si̱xinu ra ya ki̱ndoo ra xiꞌin yo, chi Jesús ku ra íyo ndíkuiin xaꞌa yo nuu Ndioxi.

²³ Saa chi nda sutu nda ndi̱xiyo seꞌe sikua ra Leví, ta kuaꞌa ni va ndi̱xiyo nda ikán, saa chi tá xíꞌi̱ iin nda ta kuakiꞌvi inka nda nuu taꞌan nda.

²⁴ Sundi Jesús ta sutu ra táku ndiꞌi saa tiempo ku ra, yakan nda iin ichí ndïꞌi xaꞌa chiñu ra ya kúu ra sutu.

²⁵ Xaꞌa ya ikán kua vaꞌa síkaku ra yoo, yo kúyati nuu Ndioxi xaꞌa mií ra. Ta ndiꞌi saa ichí kutaku yo xiꞌin ra, saa chi ndiꞌi saa ichí táku mií ra, yakan vaꞌa káꞌan ra xaꞌa yo xiꞌin Ndioxi.

²⁶ Jesús ku ra ku sutu chee ni ka, ra ndee ni xíniñuꞌu yo. Saa chi ra ikán ta ra i̱í ni ku ra, nda iin kuachi ni ya väꞌa köo ndi̱kan ra, ta köo íyo yuꞌu ra xiꞌin na íkan kuachi, saa nda̱a ra kuaꞌan ra nuu ndivi, ta sukun ni ka nda̱a ra kuaꞌan ra.

²⁷ Ta köo ndi̱kan ra tá íkan inka nda sutu, saa chi nda ikán, ta xiꞌna xaꞌa kuachi mií nda xáꞌni nda kiti sóko nda nuu Ndioxi, ta sindiꞌi, saa xáꞌni nda kiti xaꞌa kuachi na ñuu. Sundi Jesús ta köo ndi̱kan ra saa ya kaꞌni ra kiti nuu Ndioxi, chi iin ichí va ndi̱soko ra mií ra ndi̱xiꞌi ra xaꞌa kuachi yo nuu Ndioxi. Ta ya i̱kan ra saa ndi̱soko ra mií ra ndi̱xiꞌi ra xaꞌa yo, ta iindaa ichí va kua i̱kan ra saa, ta köo xíniñuꞌu ra ikan tuku ra saa.

²⁸ Ley Ndioxi, ya ta̱a ra Moisés, ta táxi ya ichí ndaꞌa nda sutu ivi kuachi taꞌan mií yo, ya kuu nda sutu nda chee ni. Tá sindiꞌi ta̱xi ra ley ikán ndaꞌa nda, saa chi̱naꞌa ra mií ra ya ki̱ndoo ra ndasa ra Seꞌe ra nduu ra sutu chee ni. Ta xaꞌa ya ndo̱ꞌo ni Seꞌe ra, yakan ndu̱u ra iin sutu ra vaꞌa ni, ta saa koo ra ndiꞌi saa tiempo ya vaxi.