HEBREOS 6 - Xochapa Mixteco

¹ Ná kuaꞌnu ka yo xiꞌin tuꞌun Ndioxi nda ná xinu koo yo kuu yo tá íyo na xa xa̱ꞌnu. Ta ná ndïko koo tuku yo ikan yo taꞌan ñaꞌa ya xa si̱naꞌa na yoo tá xaꞌa. Chi tá xaꞌa ta si̱naꞌa na yo ya kundàà ni ini yo kuni yo Ndioxi, ta saa si̱naꞌa na yo ya sindoo yo ñaꞌa ya väꞌa, ya köo ndáa yaꞌvi i̱kan yo tá yachi.

² Ta saa si̱naꞌa tu na yo ya xíniñuꞌu yo kuchi yo, xiꞌin ya chinuu ndaꞌa yo xi̱ní naꞌa ya kaꞌan yo xaꞌa na xiꞌin Ndioxi, saa si̱naꞌa na yo xaꞌa ya ndítaku naꞌa, na xa ndi̱xiꞌi. Ta si̱naꞌa tu na yo xaꞌa kivi sindiꞌi ya taxi Ndioxi kuachi xaꞌa naꞌa, na köo ndi̱xiin kandixa ñaꞌa.

³ Ta mií Ndioxi ná kachi, ta sikuaꞌa vaꞌa ka yo ya ndíchi ni ka, saa xinu yo kuaꞌnu ka yo.

⁴ Sundi naꞌa, na xa ndi̱yeꞌe tuꞌun Ndioxi nima tá yachi ta si̱ndoo na ya, na ikán ta küchiñu ka ndiko koo tuku ini na chi xa ku̱ndaa vaꞌa ini xaꞌa ya ndaa ya síndiyeꞌe nima na, ta saa ndi̱niꞌi na ya vaꞌa nuu Ndioxi, ndi̱kiꞌin na Tachi I̱í ra ndi̱xiyo ya xiꞌin na.

⁵ Na ikán ta kúndaa ini na ya vaꞌa ni ku tuꞌun Ndioxi, saa kúndaa ini na ya ndee ni ndee kúu mií ra kaꞌnda chiñu ra kivi vaxi.

⁶ Xaꞌa ya íkan kua küvi ka ndiko koo tuku ini na, chi tá ná ikan tuku na saa, ta tá íin na xáꞌni tuku Seꞌe Ndioxi nuu cruzin va saa íin na, chi kúsiki ndaa na ra nuu ndiꞌi naꞌa.

⁷ Sundi naꞌa, na ndíkun vaꞌa Ndioxi, ta tá íin ñuꞌú vaꞌa nuu chíꞌi naꞌa, saa íin na. Chi ndiꞌi kivi tá kúun savi, ta xaꞌa ya ndee ni vaꞌa ñuꞌú na, yakan vaꞌa ni kána ñaꞌa chíꞌi na, níꞌi ni na ya vaꞌa nuu ñuꞌú na íkan Ndioxi.

⁸ Ta naꞌa, na ndíko koo ini xaꞌa ra, tá íin ñuꞌú iyá nuu kána nina itun iñu án iku väꞌa saa íin na. Ta ìyo ni tavi chiꞌña Ndioxi ñuꞌú ikán saa sindiꞌi xaꞌa yaa ra ya, kaꞌmi ndiꞌi ra ya. Tá ndóꞌo ñuꞌú ikán, saa kundoꞌo ndiꞌi naꞌa, na köo xíin ka kandixa ra.

⁹ Ñani yo, ndóꞌo̱ ku ndo kúꞌvi ni ini nde xíni nde. Vani ndee ni uꞌvi tuꞌun ya káꞌan nde xiꞌin ndo yóꞌó, sundi ndeꞌe ta xíni nde ya ndee ni vaꞌa ndíkun ndo ichí nuu sikaku ndo mií ndo, chindee ndo mií ndo.

¹⁰ Saa chi Ndioxi, ta vaꞌa ni ra, ndaa ni ini ra yakan ndïndoso ini ra xaꞌa chiñu ya íkan ndo, saa ndikaꞌán ini ra xaꞌa ndiꞌi ka ñaꞌa ya i̱kan ndo. Chi sínaꞌa ndo mií ndo ya kúꞌvi ni ini ndo xíni ndo ra, xaꞌa ya chíndee ndo naꞌa, na kándixa ñaꞌa. Ta nda vitin ta chíndee ka ndo na.

¹¹ Yakan kua kúni nde ná chikaa ni iin iin ndo ndee kundikun ni ndo ichí Ndioxi nda kivi sindiꞌi. Saa chi kivi ikán kua niꞌi ndo ya ndátun ndo niꞌi ndo nuu ra.

¹² Chi köo kúni nde nduu ndo na xuxan, sundi kúni nde ná ikan ndo tá i̱kan naꞌa, na ndee ni xi̱ndaa ini xi̱ni Ndioxi, ta ndixaꞌa ndee ni ini na xi̱ndatun na niꞌi na ya ki̱ndoo Ndioxi xiꞌin na taxi ra ndaꞌa na.

¹³ Saa chi tá kivi ki̱ndoo Ndioxi taxi ra ya vaꞌa ndaꞌa ra Abraham, ta xaꞌa ya köo ka naꞌa chee ka nuu mií ra, yakan chi̱naꞌa ra tixin ndee kúu mií ra ya sixinu ra ya ndi̱kaꞌan ra xiꞌin ra Abraham,

¹⁴ káchi ra saa: “Ya ndaa kua chikaa ni i ya vaꞌa yóꞌo̱, ta ndasa kuaꞌa ni i seꞌe sikua un”, káchi Ndioxi xiꞌin ra.

¹⁵ Ta xaꞌa ya ndi̱xaꞌa ndee ni ini ra Abraham xi̱ndatun ra ya ki̱ndoo Ndioxi xiꞌin ra taxi ra ndaꞌa ra, xaꞌa ya ikán kua ndi̱niꞌi ra ya ndi̱kaꞌan Ndioxi taxi ra ndaꞌa ra.

¹⁶ Ya ndixa ni kua, ndiꞌi na ivi, tá kíndoo na sixinu na ya káꞌan na xiꞌin taꞌan na, ta chínaꞌa na nuu iin ra chee ka ya xaa súvi na ya kíndoo na xiꞌin taꞌan na. Xaꞌa ya kíndoo na saa xiꞌin taꞌan na ta ni köo ka naꞌa kaꞌan kuachi xiꞌin na.

¹⁷ Ta Ndioxi köo ndi̱xiniñuꞌu ra kivi inka naꞌa ya xaa súvi ra ya xa ki̱ndoo ra ikan ra, tixin kivi mií ra chi̱naꞌa ra nuu na ya sixinu ra ya ndi̱kaꞌan ra xiꞌin na ndíkun ra. Saa chi kúni ra ná kundaa ini na ya xaa súvi ra ya xa ki̱ndoo ra xiꞌin na, ta ndïko koo ini ra xaꞌa ya ki̱ndoo ra xiꞌin na.

¹⁸ Uvi nuu ku ñaꞌa ya ki̱ndoo Ndioxi xaa súvi ra: iin ku ya ki̱ndoo ra xiꞌin naꞌa xaa súvi ra ya ndi̱kaꞌan ra xiꞌin na, ta inka kua chi̱naꞌa ra tixin mií ra ya sixinu ra ya ki̱ndoo ra xiꞌin na. Xaꞌa ya ikán kua vaꞌa ná kandixa ni yo ra, ta ná kuyati yo nuu ra ya chindee ra yoo, saa ná kundaa teꞌe ini yo ya ndikiꞌin yo ya ndi̱kaꞌan ra xiꞌin yo taxi ra ndaꞌa yo.

¹⁹ Chi ya ki̱ndoo ra xiꞌin yo, ta tá káa iin kàà vee ya kúu mií itun barco, ya táan na ini nduta ñûꞌu ya ná kundichi tuun nu, ta iin kuꞌva saa ná kundaa teꞌe ni ini yo xaꞌa ya ki̱ndoo ra xiꞌin yo chindee ra yoo, ya ná koo tuun ni ya vaꞌa yo xiꞌin ra, xaꞌa ya ndáa ni ini yo ra, ta saa kuchiñu yo kiꞌvi yo nuu i̱í ni, nuu íyo ra nuu ndivi.

²⁰ Chi Jesús ta xa ndi̱kiꞌvi ra, yakan vaꞌa ku̱chiñu ra xu̱na ra ichí nuu yo ya kuchiñu yo kiꞌvi yo koo yo xiꞌin Ndioxi. Ta nda iin ichí ndïꞌi xaꞌa chiñu kúu mií ra, ndiꞌi saa ichí kuu mií ra sutu, ra chee ni nuu yo, tá kuꞌva ndi̱xiyo sutu ra Melquisedec, saa íyo ra.