HEBREOS 5 - Xochapa Mixteco

¹ Ta vaꞌa ná ndikani i nuu ndo ya kuchiñu kundaa ini ndo xaꞌa sutu ra chee. Chi mií Ndioxi ku ra ndíkaxin iin iin taa ya ndúu nda sutu chee nuu ra. Ta ra sutu ikán ku ra sóko ñaꞌa na ñuu nuu Ndioxi, saa xáꞌni ra kiti sana na nuu Ndioxi xaꞌa kuachi na.

² Ta xaꞌa ya kúu sutu ikán ra ivi, ra vita ni ini taꞌan mií yo ivi yóꞌó, yakan vaꞌa kúndaꞌvi ini ra xíni ra naꞌa, na nda̱ñuꞌu, na köo kúndaa vaꞌa ini xaꞌa tuꞌun Ndioxi.

³ Xaꞌa ya kúu ra, ra ivi taꞌan mií yo yóꞌó, ta ìyo ni ndikava ra nuu kuachi, yakan kua xíniñuꞌu tu mií va ra xáꞌni ra kiti xaꞌa kuachi ra, saa xáꞌni ra kiti xaꞌa kuachi na ñuu ra nuu Ndioxi.

⁴ Nda iin taa küvi nduu nda sutu chee ni, tá tu süvi mií Ndioxi ku ra ndíkaxin nda. Chi mií va Ndioxi ku ra ndíkaxin nda sutu, yakan vaꞌa xáa kaꞌnu ni ñaꞌa ra, tá kuꞌva ndi̱xiyo ra Aarón ra ku̱u sutu chee núnu̱ú.

⁵ Ta saa tu Cristo va, köo ndi̱ndasa ra mií ra sutu chee, sundi Ndioxi ku ra ta̱xi ichí ndaꞌa ra kúu ra sutu ra chee ni, saa chi ndi̱kaꞌan Ndioxi xaꞌa ra, káchi ra saa: Yóꞌo̱ ku Seꞌe i, ta yeꞌe ku Iva un, káchi ra xaꞌa Jesucristo.

⁶ Ta inka tuku ñaꞌñu nuu tuꞌun Ndioxi, káchi ra saa: Yóꞌo̱ ku sutu, ta ndiꞌi saa ichí koo un sutu, nda iin ichí ndïꞌi xaꞌa chiñu un. Tá kuꞌva ndi̱xiyo ra sutu Melquisedec saa koo un, káchi Ndioxi xiꞌin ra.

⁷ Kivi ndi̱xiyo Cristo ñuu ivi yóꞌo̱ ta ndee ni xa̱ku ndaꞌvi ra nuu Ndioxi, káꞌan ndaꞌvi ra xiꞌin Ndioxi, saa chi xíni ra iindaa mií Ndioxi ku ra kúu mií ndee ya sikaku ñaꞌa ra, ya ná ndöo ra ndikaa ra ndaꞌa ndìì ya xáꞌni naꞌa. Ta xaꞌa ya xa̱a súvi ni ra ya ndi̱kaꞌan Ndioxi xiꞌin ra, saa ndaꞌvi ni ndo̱ꞌo ra nuu Ndioxi, xaꞌa ya ikán kua xi̱ni soꞌo Ndioxi ya ndi̱kaꞌan ra xiꞌin ra.

⁸ Vani Seꞌe Ndioxi ndi̱xiyo ra, ta ndee ni vaꞌa si̱kuaꞌa ra xa̱a súvi ra ndiꞌi ya ndi̱kaꞌan Ndioxi xiꞌin ra xaꞌa ya ndee ni ti̱xuꞌvi ra ñuu ivi yóꞌó.

⁹ Yakan tá sindiꞌi ra xa̱a súvi ra ndiꞌi ya ndi̱kaꞌan Ndioxi xiꞌin ra, saa kua ndi̱xinu ra ndu̱u ra taa, ra ndee ni ndixa xíniñuꞌu yo ya sikaku ra yoo koo yo xiꞌin ra ndiꞌi saa ichí tá tu xáa súvi yo ya káꞌan ra.

¹⁰ Saa ku̱u nuu ta̱xi Ndioxi chiñu ndaꞌa ra ndu̱u ra sutu chee ni, tá kuꞌva ndi̱xiyo sutu ra xi̱nani Melquisedec xinaꞌa.

Kuenta koo ndo sïndoo ndo ya ndíkun ndo Jesucristo

¹¹ Íyo kuaꞌa ni ka ya ndituꞌun nde xaꞌa ya yóꞌó xiꞌin ndo, ta ndíchi ni ya ndikani nde ya nuu ndo tá kuꞌva íyo ya, saa chi ndóꞌo̱ ta kuee ni saa kúndaa ini ndo xiꞌin ya.

¹² Xa naꞌa ni va ndíkun ndo Jesucristo, ta xa kuꞌva kua sinaꞌa ndo inka naꞌa, ndikuu. Sundi ndóꞌo̱ ta tá íin na vali chíchin va saa íin ndo, saa chi ni köo ndíchi ya xi̱ni soꞌo ndo tá sikan ndi̱kundikun ndo Jesucristo, ta tuku kúni ndo ndikani nde ya nuu ndo. Tá íin na vali saa íin ndo, chi na vali ta ndisaa leche xíꞌi na, küvi kuxi na ñaꞌa ya xíxi na chee.

¹³ Tá íin na vali chíchin saa íin ndo, chi köo kúndaa ini ndo ndá kuꞌva koo ndo, ta ni köo xíni ndo unkua vaꞌa ta unkua väꞌa.

¹⁴ Sundi naꞌa, na kúndaa vaꞌa ini, ta xáꞌnu ka na xiꞌin tuꞌun Ndioxi. Ta na ikán ku na íin tá íin na xa xa̱ꞌnu, na xa vaꞌa xíxi mií, saa chi xíni na unkua vaꞌa ta unkua väꞌa.