HEBREOS 4 - Xochapa Mixteco

¹ Yakan yoo, ta ná kundiꞌi ni ini yo, kiꞌvi yo koo yo nuu ndikundee yo xiꞌin Ndioxi. Ta kuenta ni ná koo yo süvi ka vi ya ndoo sava yo chí sata, ta küchiñu yo kiꞌvi yo koo yo nuu ndikundee yo xiꞌin ra.

² Saa chi tá kuꞌva xi̱ni soꞌo yoo tuꞌun Ndioxi ya síkaku ra yoo, ta saa xi̱ni soꞌo tu na xii sikua va yo tuꞌun ra. Ta xi̱ni soꞌo uun va na ya, saa chi köo ndi̱kandixa na ya ndi̱kaꞌan Ndioxi xiꞌin na.

³ Sundi yoo kándixa ñaꞌa ku yo kiꞌvi koo yo xiꞌin ra nuu ndikundee yo, ta na köo ndi̱xiin kandixa ñaꞌa ta kïꞌvi na koo na xiꞌin ra nuu ndikundee na xiꞌin ra, yakan ndi̱kaꞌan ra xaꞌa na, káchi ra saa: Tá ndi̱saa i xiꞌin na ta ndi̱kaꞌan i, chi̱naꞌa i: “Nda iin kivi täxi i kiꞌvi na koo na xiꞌin i nuu vaꞌa ndikundee na”, káchi Ndioxi xaꞌa na, vani xa yachi vi ndi̱kundee ra xaꞌa chiñu i̱kan ra si̱kuaꞌa ra ñuu ivi.

⁴ Chi nuu tuꞌun Ndioxi káꞌan ya xaꞌa kivi uxa, káchi ya saa: Kivi uxa kua ndi̱kundee Ndioxi xaꞌa ndiꞌi chiñu i̱kan ra”, káchi ya.

⁵ Ta saa káꞌan tuku tuꞌun ra, káchi ya saa: “Nda iin kivi täxi i kiꞌvi na koo na xiꞌin i nuu ndikundee i”, káchi ya.

⁶ Ta kúmani ka sava naꞌa kiꞌvi koo nuu ndikundee na xiꞌin ra. Chi naꞌa, na xiꞌna xi̱ni soꞌo tuꞌun vaꞌa xaꞌa nuu koo na ndikundee na xiꞌin ra, ta köo ndi̱kuchiñu na kiꞌvi na koo na xiꞌin ra, xaꞌa ya köo ndi̱xaa súvi na ya ndi̱kaꞌan ra xiꞌin na.

⁷ Xaꞌa ya ikán kua ta̱xi ra inka kivi náni ya kivi vitin, tá kuꞌva ndi̱kaꞌan ra rey David xinaꞌa, káchi ra saa: “Tá tu xíni soꞌo ndo ya káꞌan Ndioxi xiꞌin ndo vitin, ta ndäsa tuun ndo nima ndo”, káchi Ndioxi, káchi ya ta̱a ra rey David.

⁸ Tá tu yachi nditaxi ra Josué nuu koo xií sikua yo ndikundee na, ndikuu, ta käꞌan ka Ndioxi xaꞌa kivi vitin ya taxi ka ra nuu ndikundee yo.

⁹ Xaꞌa ya káꞌan Ndioxi saa kua kúndaa ini yo ya íyo ka nuu ndikundee yoo kúu ñuu Ndioxi xiꞌin ra.

¹⁰ Saa chi yo kuakiꞌvi ndíkundee xiꞌin Ndioxi, ta ndíkundee yo xiꞌin ra xaꞌa ndiꞌi chiñu ya i̱kan yo, tá kuꞌva ndi̱kundee mií ra tá kivi si̱ndiꞌi ra si̱kuaꞌa ra ndiꞌi ñaꞌa ya íyo ñuu ivi yóꞌó.

¹¹ Yakan kua xíniñuꞌu yo chikaa ni yo ndee ya ná kiꞌvi yo nuu ndikundee yo xiꞌin ra. Süvi ka vi ya ndoꞌo yó tá ndo̱ꞌo na xii sikua yo köo ndi̱xiin na kandixa ñaꞌa na, xaꞌa ya ikán kua köo ndi̱kuchiñu na kiꞌvi na koo na nuu ndikundee na xiꞌin ra.

¹² Saa chi tuꞌun Ndioxi, ta ya táku ku ya ta ndee ni kúnu kuakiꞌvi ya xáꞌnda ya. Ndee ni ka ndee tuꞌun ra nuu iin i̱chi̱ ya xi̱ín ni uvi saa yuꞌu. Chi tuꞌun ra, ta kuakiꞌvi ya xáꞌnda ya nima naꞌa, iin saa nda nuu vaꞌa na, xiꞌin tivavi na, xiꞌin mbeke ya ñúꞌu ini leke na, ta vaꞌa xíto ndoso ya ndiꞌi ya xínituni na xiꞌin ya ndíkani ini na, ya íyo nima na.

¹³ Nda iin ñaꞌa ya si̱kuaꞌa Ndioxi küvi tiseꞌe ya nuu ra, saa chi mií ra si̱kuaꞌa ndiꞌi ya, ta íyo túvi ndiꞌi ya nuu ra. Ta suvi mií ra ku ra xaꞌa yo kuenta nuu xaꞌa ndiꞌi ñaꞌa ya íkan yo.

Jesús ku sutu ra chee ni kaꞌnu ni ka ra ikán nuu ndiꞌi sutu

¹⁴ Jesús, ra kúu Seꞌe Ndioxi ku iin sutu ra ndee ni chee, ra ndee ni kaꞌnu nuu yo. Ta ra ikán ku ra nda̱a nuu ndivi, yakan tuun ni ná kandixa yo ra, ta ná xïkuiin yo ya ndáa ini yo ra.

¹⁵ Saa chi sutu ra ínuu nuu yo ku ra ta kúndaꞌvi ni ini ra xíni ra yoo, xaꞌa ya xíni ra köo ndee ini yo, köo ndaku ini yo nuu ya väꞌa, chi tá káa níí ya ndóꞌo yoo, saa ndi̱xiyo tu ya ndo̱ꞌo mií va ra, xi̱to ndoso ni ya väꞌa ra, sundi nda iin kuachi köo ndi̱kiꞌvi ra.

¹⁶ Yakan vaꞌa ná kuyati yo nuu ra tá ndóꞌni yo nuu tindoꞌo ta ná ku ïꞌvi yo kuyati yo nuu ra, chi ndee ni vaꞌa ra, kúndaꞌvi ni ini ra xíni ra yoo, yakan kúꞌvi ni ini ra xíni ra yoo, ta saa chindee ra yoo tá ñúꞌu yo nuu tindoꞌo, ta ná kuyati yo nuu íyo ra xáꞌnda chiñu ra.