HEBREOS 3 - Xochapa Mixteco

Ndee ni ka Jesús nuu ra Moisés

¹ Ñani yo xiꞌin kuꞌva yo, ndóꞌo̱ ku ndo ndi̱kaxin Ndioxi, saa ka̱na ra ndóꞌo̱ ta xa̱a i̱í ra ndóꞌo̱ koo ndo xiꞌin ra. Yakan kiꞌin ni ndo kuenta, chi suvi mií Jesús ku ra ku apóstol, ra ti̱ꞌvi Ndioxi vaxi xaa chiñu ra nuu ra, ta kúu tu ra sutu ra chee ni nuu ndiꞌi yo kándixa ñaꞌa.

² Xa̱a súvi ni Jesús chiñu nuu Ndioxi. Tá íyo ndiꞌi ya ndi̱kaꞌan Ndioxi xiꞌin ra, saa íyo ndiꞌi ya i̱kan ra, xa̱a súvi ni ra ya, tá i̱kan ra Moisés xinaꞌa xa̱a súvi ni ra chiñu veꞌe Ndioxi ya ndi̱kaꞌan Ndioxi xiꞌin ra ikan ra.

³ Sundi Jesús ku ra ndee ni ka nuu ra Moisés, saa chi Jesús ku ra káa tá káa iin ra síkuaꞌa veꞌe, ta ra Moisés ku ra káa tá káa mií veꞌe ya síkuaꞌa na. Ta ra síkuaꞌa ya ku ra ndíkunuu vaꞌa ni ka tuꞌun nuu mií veꞌe ikán.

⁴ Saa chi ndiꞌi veꞌe, ta íyo naꞌa síkuaꞌa ya, sundi Ndioxi, ta süvi iindaa veꞌe kua ndi̱sikuaꞌa ra, si̱kuaꞌa tu ra iníi ñuu ivi yóꞌó va.

⁵ Ta ra Moisés ku ra ndee ni vaꞌa xa̱a chiñu, ku̱u ra moso nuu na veꞌe Ndioxi, saa ndi̱kaꞌan ndoso ra Moisés nuu naꞌa xaꞌa ya ndi̱tuꞌun Ndioxi xiꞌin ra kaꞌan ra xiꞌin na kivi vaxi.

⁶ Sundi Jesucristo, xaꞌa ya kúu ra Seꞌe Ndioxi ta xáa súvi ni ra chiñu ya ta̱xi Ndioxi ndaꞌa ra, yakan xáꞌnda chiñu ra veꞌe ra. Saa yoo, ta na veꞌe Ndioxi ku yo, yoo ku yo xáꞌnda chiñu ra nuu, tá tu ndinuꞌu ni ini yo ndáa ni ini yo xíni yo Ndioxi, saa kúsini ni yo ndátun yo niꞌi yo ya taxi Ndioxi ndaꞌa yo.

Na kándixa ni Ndioxi ta taxi ra nuu ndikundee na.

⁷ Tá káꞌan Tachi I̱í Ndioxi nuu tuꞌun ra, káchi ya saa: “Tá tu xíni soꞌo ndo vitin ya káꞌan Ndioxi xiꞌin ndo,

⁸ ta xäa soꞌo ndo tá i̱kan xii sikua ndo, saa chi na ikán, ta soꞌo ni ndi̱xiyo na, saa xi̱to ndoso na yeꞌe iku yuyu.

⁹ Iku ikán xi̱to ndoso xii sikua ndo yeꞌe uvi xiko kuiya. Vani xi̱ni na ya vaꞌa i̱kan i xiꞌin na, ta saa ni xi̱to ndoso na yeꞌe.

¹⁰ Xaꞌa ya ikán kua ndi̱saa ni ini i xiꞌin na, ta ndi̱kaꞌan i, káchi i saa: “Ndiꞌi saa ichí xíka uvi ini na, ta köo xíin na kundikun na yeꞌe, ni köo xíin na kundaa ini na xaꞌa ichí i”.

¹¹ Xaꞌa ya ikán kua ndi̱kani ini i, ndi̱kaꞌan i tá kivi ndi̱saa i xiꞌin na, ta ka̱chi i saa: “Täxi i kiꞌvi na koo na nuu ndikundee na xiꞌin i””, káchi Ndioxi xaꞌa na.

¹² Ñani yo, kuenta ni koo ndo, chïvaꞌa ndo ya väꞌa nima ndo, chi ìyo ni xaa xíka ya ndóꞌo̱ nuu Ndioxi ra táku, ta täxi ya kundaa ni ini ndo ra.

¹³ Xaꞌa ya ikán kua, xaꞌa ni ndo ndee xiꞌin taꞌan ndo. Sixinu ndo ini taꞌan ndo iin iin kivi, vitin ka tá íyo tiempo. Ikan ndo saa xiꞌin taꞌan ndo ya ná ndïkava ndo nuu kuachi ya väꞌa, ta sindaꞌvi ya ndóꞌo̱, ya vaꞌa kua íkan ndo kaꞌán ndo, ta saa ndasa tuun ndo nima ndo nuu Ndioxi.

¹⁴ Ta ya ndixa kua táxi Cristo ndiꞌi ya kúu mií ra ndaꞌa yo, tá tu köo síndoo yo ya tuun ni ndíkun yo ra, tá tu ndáa ni ini yo xíni yo ra tá kuꞌva ndi̱xiyo yo xiꞌin ra nda tá xaꞌa, tá sikan xa̱á yo ndikun yo ra.

¹⁵ Tá káchi tuꞌun Ndioxi, ya káchi saa: Kivi vitin, tá xíni soꞌo ndo ya káꞌan Ndioxi xiꞌin ndo, ta xäa soꞌo ndo tá kuꞌva i̱kan xii sikua ndo xinaꞌa, chi na ikán ta köo ndi̱xiin na kuni soꞌo na ya ndi̱kaꞌan ra xiꞌin na.

¹⁶ ¿Ta unku na xi̱ni soꞌo ya ndi̱kaꞌan Ndioxi xiꞌin na, ta saa ni köo ndi̱xiin na xaa súvi na ya ndi̱kaꞌan ra xiꞌin na? Suvi ni mií xii sikua yo ku na i̱kan saa, na ta̱va ra Moisés ñuu Egipto xinaꞌa ku na.

¹⁷ ¿Ta unku xiꞌin kua ndi̱saa ni Ndioxi uvi xiko kuiya? Xíni yo, xii sikua yo na ta̱va ra Moisés ñuu Epigto ku na ndi̱kiꞌvi kuachi xiꞌin Ndioxi, yakan ndi̱saa ra xiꞌin na, ta ndi̱xiꞌi na iku yuyu.

¹⁸ ¿Ta unku na ndi̱kaꞌan Ndioxi xiꞌin, ya täxi ra kiꞌvi na koo na xiꞌin ra nuu ndikundee na xaꞌa ya köo ndi̱xiin na kuni soꞌo na ya ndi̱kaꞌan ra xiꞌin na? Suvi ni xii sikua yo ku na ndi̱kaꞌan ra saa xiꞌin.

¹⁹ Ta saa ndixa ndo̱ꞌo na, xaꞌa ya köo ndi̱kandixa na ra yakan kua köo ndi̱taxi ra kiꞌvi na koo na xiꞌin ra nuu ndikundee na.