HEBREOS 2 - Xochapa Mixteco

Ná kuni soꞌo ni yo ya káꞌan Ndioxi ra síkaku yoo

¹ Xaꞌa ya yóꞌó kua xíniñuꞌu yo chikaa ni soꞌo yo xaꞌa tuꞌun Ndioxi ya xi̱ni soꞌo yo ya ná sïndoo yo ichí ra, ta ná kandixa ni ka yo ra.

² Ndikaꞌán ini ndo xaꞌa ley Ndioxi ya ta̱xi ra ndaꞌa na tatun ra ta na ikán ta̱xi ya ndaꞌa xii sikua yo ra Moisés. Ta ya ndi̱kaꞌan Ndioxi xiꞌin na ndi̱xiyo ndee ya si̱tixuꞌvi ni ya ndiꞌi naꞌa, na köo ndi̱xiin xaa súvi ya káꞌan ya.

³ Tá tu saa ndo̱ꞌo na tiempo ikán, ta ndisaa ka vi yo ndóo vitin ndee ni ka tixuꞌvi yo, tá tu köo xíin yo kundikun yo ichí nuu kaku yo ya táxi Ndioxi ndaꞌa yo. Saa chi ya yóꞌó kua ndixa ni ka chee íkan Ndioxi xiꞌin yo. Ta xiꞌna mií Tata yo Jesucristo ku ra ndi̱kaꞌan xiꞌin naꞌa xaꞌa ichí ikán, sindiꞌi, ndi̱kaꞌan na ikán xiꞌin yo, chi xi̱ni na ya ndaa kua ndi̱kaꞌan ra, yakan ndi̱kani na ya nuu yo.

⁴ Ta si̱naꞌa teꞌe Ndioxi yoo, ya ndaa ku tuꞌun ra, chi kuaꞌa ni nuu seña ya täꞌan kuni yo si̱naꞌa ra nuu yo, xiꞌin ndee vaꞌa ni xiꞌin yatuꞌun si̱naꞌa ra nuu yo, ta tixin Tachi I̱í ra kua ta̱xi ndiꞌi ra ya yóꞌó ndaꞌa yo tá kuꞌva chi̱tuni mií ra, saa i̱kan ra xiꞌin yo.

Jesucristo ndu̱u ra ra ivi taꞌan mií yo ivi yóꞌó

⁵ Ndioxi, ta köo ndi̱taxi ra ichí ndaꞌa na tatun ra ya kaꞌnda chiñu na nuu ñuu ivi ya xa̱á, ya káꞌan yo xaꞌa vitin.

⁶ Tá ndi̱kaꞌan iin ra xinaꞌa ra ta̱a nuu tuꞌun Ndioxi káchi ra saa: Tata Iva yo Ndioxi ¿Án ndáa yaꞌvi ni ndeꞌe, na ñuu ivi yóꞌó, yakan ndíkaꞌán ni ini un xaꞌa nde? Ta ¿ndachu ndíꞌi ni ini un xaꞌa Taa ra xa̱a ñuu ivi yóꞌó?

⁷ Iin tiempo loꞌo xa̱a ni̱nu̱ un ra nuu na tatun un. Ta sindiꞌi, xa̱a kaꞌnu ni un ra, saa xa̱a toꞌo ni un ra. Saa ta̱xi un ichí ndaꞌa ra, ndáa chiñu ra xiꞌin ndiꞌi ni kúu ñaꞌa ya si̱kuaꞌa un.

⁸ Ndiꞌi ni kúu ñaꞌa ta̱xi un ndaꞌa ra ndáa chiñu ra xiꞌin ya. Ta nda iin ñaꞌa köo ndi̱sindoo mií Ndioxi, ta̱xi ndiꞌi ra ya ndaꞌa ra. Vani ndi̱kundiso chiñu ra xiꞌin ndiꞌi ni kúu ya, ta saa ni íyo ka sava ya täꞌan xinu.

⁹ Sundi xíto yo ya nda̱sa ni̱nu̱ Ndioxi Jesús uvi ndaa kivi nuu na tatun ra. Ta vitin ndi̱niꞌi ni ra ya vaꞌa ndi̱kunuu sunkun ni ya toꞌo ra, xaꞌa ya ndo̱ꞌo ni ra ndi̱xiꞌi ra, chi kúꞌvi ni ini Ndioxi xíni ra yoo yakan ta̱xi ra ndi̱xiꞌi Jesús xaꞌa ya vaꞌa ndiꞌi yo.

¹⁰ Ndiꞌi ñaꞌa ya si̱kuaꞌa Ndioxi ta íyo ya xaa kaꞌnu ya ra, chi tixin ndee mií ra kua íyo ndiꞌi ya. Ta saa kúni ra ná niꞌi ndiꞌi na kúu seꞌe ra koo na xiꞌin ra nuu luvi ni káa. Xaꞌa ya ikán kua ta̱xi ra ndo̱ꞌo ni Tata yo Jesús ndi̱xiꞌi ra. Ikán ku nuu si̱xinu ra ndiꞌi chiñu ya kúni Ndioxi, saa ku̱u nuu ku̱chiñu ra ndu̱u ra taa, ra sikaku yoo, na kúu seꞌe ra.

¹¹ Saa chi iin ku ra ndása i̱í yoo, ta saa ndúu ndiꞌi yo iin xiꞌin ra ta iin káchi ndúu i̱í ndiꞌi yo nuu ra, yakan köo kúkaꞌán nuu ra kaꞌan ra xiꞌin yo ya kúu yo ñani ra.

¹² Chi saa káꞌan mií Jesús, káchi ra saa: Kaꞌan ndoso i xaꞌa un xiꞌin ñani i. Ta saa kata i yaa xaa kaꞌnu i yóꞌo̱, nuu ndíkitaꞌan na xáa toꞌo na yóꞌo̱, káchi Jesús xiꞌin Ndioxi.

¹³ Ta saa káꞌan tuku ra, káchi ra saa: Iva i Ndioxi ku ra ndáa ni ini i, káchi ra. Ta saa káꞌan ka ra, káchi ra saa: Iva yo, yóꞌó íyo i xiꞌin seꞌe un na ta̱xi un ndaꞌa i, káchi ra.

¹⁴ Tá kúu seꞌe na iva siꞌí, iin nuu ku ikin kuñu ndiꞌi na ta iin nuu kuu tu nií va na. Ta saa xi̱niñuꞌu Tata yo Jesús ndu̱u ra, ra ivi taꞌan mií yo, ndi̱xiyo ikin kuñu ra ta ku̱u mií ra nií taꞌan yoo, saa ndi̱xiꞌi ra xaꞌa ya ikán kua ku̱chiñu ra si̱ndiꞌi xaꞌa ra ndee kiti nǎꞌa ya xáꞌni ndìì.

¹⁵ Xaꞌa ya ndu̱u ra, ra ivi taꞌan mií yo, xaꞌa ya ikán kua ku̱chiñu ra sa̱ña ra yo ivi yóꞌó nuu ya íꞌvi yo kuvi yo. Saa chi yachi ta tá íyo yo xi̱nuꞌni saa ndi̱xiyo yo ndaꞌa ya xáꞌni ndìì.

¹⁶ Yakan teꞌe ni va íyo ya nuu yo, chi köo ndi̱kixi ra ya chindee ra na tatun Ndioxi, ki̱xi ra ya chindee ra mií yo kúu seꞌe sikua ra Abraham.

¹⁷ Xaꞌa ya ndu̱u ra iin káchi tá kuꞌva íin mií yo na ivi yóꞌó, na kúu ñani ra. Xaꞌa ya ikán kua vaꞌa ndi̱xinu ra ndu̱u ra sutu, ra ndee ni ndinuꞌu xáa súvi ndiꞌi ñaꞌa, ta saa kúndaꞌvi ni ini ra xíni ra naꞌa. Xaꞌa ya ndi̱taxi ra mií ra ndi̱xiꞌi ra, yakan vaꞌa ku̱chiñu ra ndi̱soko ra mií ra nuu Ndioxi ya xaa kaꞌnu ini ra xaꞌa kuachi yoo, na kúu ñuu Ndioxi.

¹⁸ Tá kúu mií ra, yaꞌa ni ndee xi̱ndikaa ra nuu tindoꞌo, ndi̱xiyo ni ñaꞌa xi̱to ndoso ya ra, yakan vaꞌa kúndaa ini ra ya ndóꞌo yo tá kivi ñúꞌu yo nuu tindoꞌo, chi ndee ni ndee kúu mií ra ya chindee ra yoo, tá vaxi ya väꞌa xíto ndoso ya yoo.