HEBREOS 12 - Xochapa Mixteco

Táxi Ndioxi ndoꞌo ni naꞌa, na kúu seꞌe ra

¹ Ta xa xíni yo yáꞌa ni kuaꞌa ku naꞌa, na xi̱ndaa ni ini xi̱ni Ndioxi. Ta saa ná ikan yoo tá kuꞌva i̱kan na ikán. Ta ná xaꞌa ni ka yo ndee xiꞌin mií yo, ndinuꞌu ni ini yo ná kaka yo ichí Iva yo Ndioxi, ta saa ná sindoo ndiꞌi yo ya sási nuu yo, xiꞌin ya väꞌa ya síkoyo yoo nuu kuachi.

² Ta iindaa mituꞌun xaꞌa Tata yo Jesucristo kua ná kundiꞌi ni ini yo, saa chi mií ra ku ra sínaꞌa yoo ndá kuꞌva kua kundaa ni ini yo kuni yo Ndioxi, saa tu iindaa mituꞌun mií ra ku ra chíndee yoo, ndása vaꞌa ra kuꞌva ndáa ni ini yo xíni yo Ndioxi. Ta saa ndi̱xaꞌa ndee ndiꞌi ini ra ndoꞌo ni ra nuu cruzin, ta köo ndi̱kiꞌin ra kuenta xaꞌa ya kúkaꞌan nuu ra, chi kúndaa ini ra tá si̱ndiꞌi ndo̱ꞌo ra saa ta kusini ni ra. Ta vitin ndi̱kunduꞌu ra ñaꞌñu kuáꞌá Ndioxi xáꞌnda chiñu ra xiꞌin Ndioxi.

³ Ta saa ndóꞌo̱, ndikani vaꞌa ini ndo ndá kuꞌva ndo̱ꞌo Jesús, chi ra ikán ta yáꞌa ni ndee ya ndo̱ꞌo ra i̱kan naꞌa, na ivi kuachi yóꞌó, ta ndi̱xaꞌa ndee ndiꞌi ini ra ndo̱ꞌo ra saa. Xaꞌa ya ñaa kua künaa ndo, ta ni ndïkava ini ndo ya ndíkun ñaꞌa ndo.

⁴ Chi ndóꞌo̱, vani ndee ni kánitaꞌan ndo xiꞌin tindoꞌo ya vaxi nuu ndo, sundi nda iin ndo täꞌan kuvi xaꞌa ya kánitaꞌan ndo xiꞌin ya väꞌa, köo ndóꞌo ndo tá kuꞌva ndo̱ꞌo mií Tata yo Jesucristo ndi̱xiꞌi ra xaꞌa yo.

⁵ ¿Án xa ndi̱ndoso ini ndo ya káꞌan Ndioxi xiꞌin ndo kúu ndo seꞌe ra? Tá káchi ra nuu tuꞌun ra, káchi ya saa: Seꞌe mií i, säa ndo tá káꞌan i xiꞌin ndo ndá kuꞌva xíniñuꞌu ndo kaka ndo. Ta ndïkava ini ndo tá ndáꞌi Ndioxi xiꞌin ndo.

⁶ Chi Ndioxi ta síndoꞌo va ra ini naꞌa, na kúꞌvi ni ini ra xíni ra, saa táxi Ndioxi ndóꞌo ni naꞌa, na ndíkuiso ra ndúu seꞌe ra.

⁷ Saa ndóꞌo̱, xaꞌa ndee ini ndo ndoꞌo ndo tá tu sítixuꞌvi Ndioxi ndóꞌo̱, saa chi ni na ivi yóꞌó, ta saa íkan na xiꞌin seꞌe na, sítixuꞌvi ñaꞌa na.

⁸ Sundi tá tu köo sítixuꞌvi Ndioxi ndóꞌo̱, tá kuꞌva íkan na ivi yóꞌó xiꞌin seꞌe na, ta kúni kachi ya süvi ndixa seꞌe ra ku ndóꞌo̱, tá íin na ka̱ku niꞌnu va, saa íin ndo, ndikuu.

⁹ Ta xa xíni mií ndo tá ndi̱xiyo vali yo, ndi̱xuꞌvi ni yo nuu iva yo nuu si̱naꞌa nda yoo ikan yo ya vaꞌa, ta saa ni xi̱ni soꞌo yo ya ndi̱kaꞌan nda xiꞌin yo, ta xa̱a toꞌo yo nda. Ta saa tu Iva yo Ndioxi ra íyo nuu ndivi ni̱nù, ná xaa toꞌo yo ra ikán, saa chi ra ikán ku ra táxi ya kutaku yo xiꞌin ra.

¹⁰ Ta saa tu iva yo nda ivi yóꞌó ku nda, ta chi̱ndee taꞌan nda xiꞌin yo si̱tixuꞌvi nda yoo ya ná ïkan yo ndisaa ya kúni mií yo. Saa ndi̱kani nda nuu yo tá kuꞌva vaꞌa túvi mií nda, saa i̱kan nda xiꞌin yo uvi ndaa kivi. Ta ndee ni ka vaꞌa íkan Iva yo Ndioxi xiꞌin yo, tá tu sítixuꞌvi ra yoo ta xaꞌa ya vaꞌa mií va yo kua íkan ra saa xiꞌin yo, saa chi ndása vaꞌa ra yoo ndúu i̱í ka yo tá kuꞌva íyo mií ra.

¹¹ Ya ndaa kua, tiempo ndóo yo vitin ta nda iin yo köo kúsini tá kivi sítixuꞌvi iva siꞌí yo na ivi yóꞌó mií yo ni tá sítixuꞌvi Ndioxi yoo nuu sínaꞌa ra yoo ta yo kúsuchi ini va ku yo, ta ndíkava ini yo tá ndóꞌó yo saa. Sundi ya vaꞌa ni mií va yo kua ndóꞌo yo saa, chi saa kua ikan yo ya vaꞌa ta taxi Iva yo Ndioxi ya koo vaꞌa ni ini yo, kusini ni yo.

Ìyo ni ya köo xíin yo kuni soꞌo yo ya káꞌan Ndioxi xiꞌin yo

¹² Xaꞌa ya ikán kua xíniñuꞌu ni ndo chikaa ni ndo ndee, vani xa ku̱vita ni ini ndo, köo ka ndee kúu mií ndo ta ná nduu ndee tuku ndo.

¹³ Kuenta koo ndo, vívií kaka ndo kuꞌun ndo, täxi ndo nduvita ini ndo ta koyo ndo, kuenta ni koo ndo ya ná kaku ndo.

¹⁴ Ta nduku ndo kuꞌva ya koo vaꞌa ni ndo xiꞌin ndiꞌi naꞌa. I̱í ni koo ndo, saa chi tá tu köo i̱í ini ndo ta küchiñu ndo kuni ndo Ndioxi. Ta ni nda iin naꞌa, ta küchiñu na kuni na ra, tá tu kéꞌe na ya väꞌa.

¹⁵ Kuenta ni koo ndo xiꞌin taꞌan ndo, kïꞌvi ndo kuachi ya táxi kuxika naꞌa nuu ya kúꞌvi ni ini Ndioxi xíni ra na. Täxi ndo kaku ya väꞌa nima ndo saa nduu ndo tá íyo iku uva, ya xatu ni síkuaꞌa kueꞌe xiꞌin naꞌa. Ta ìyo ni sindiꞌi xaꞌa ndo ya vaꞌa kuaꞌa ni naꞌa.

¹⁶ Ta nda iin ndóꞌo̱, käka sií xiꞌin ñaꞌa án xiꞌin taa, ta ni kündasi nuu ndo kuni ndo Ndioxi tá kuꞌva i̱kan ra Esaú xinaꞌa. Chi xaꞌa ya kúu ra seꞌe núnu̱ú iva siꞌí ra kua ku̱u mií ra ichí ya ndikiꞌin ra ya vaꞌa ndaꞌa na, sundi ra ikán, ta ndi̱xiko ra ya xaꞌa iin koꞌo loꞌo ñaꞌa xíxi.

¹⁷ Xa kúndaa ini mií ndo ya ndo̱ꞌo ra, tá ndi̱ko koo ini ra ta ku̱ni ra ya chikaa iva ra ya vaꞌa ra, xa̱ku ndaꞌvi ni ra nuu ra, sundi köo ndi̱kuchiñu ka ra niꞌi ra ya vaꞌa xaꞌa ya xa ku̱ndasi ra ya.

¹⁸ Ta vaꞌa ná kundaa ini ndo chi xa síin va kua i̱kan Iva yo Ndioxi xiꞌin yoo nuu xií sikua yo. Chi yoo ta köo ndi̱kuyati yo nuu ra tá kuꞌva ku̱yati na ikán nuu ra tá kivi ta̱xi ra ley ra ndaꞌa na. Chi ndee ni ìyo ku̱u nuu iku ya ku̱chiñu na xi̱ni xiꞌin nuu na, ta ndee ka vi xíxi ñu̱ꞌu̱, saa ndee ka vi xíka tachi ta iin nánaa káa nuu mií iku Sinaí ikán.

¹⁹ Ta xi̱ni soꞌo na tachi itun trompeta ndáꞌi nuu, ta saa xi̱ni soꞌo na tachi Ndioxi káꞌan ra xiꞌin na. Ñaa xa̱á na xáku ndaꞌvi na nuu ra ya ná käꞌan ka ra xiꞌin na xaꞌa ya íꞌvi ni na,

²⁰ ta ni köo ndi̱kundee ini na xiꞌin tuꞌun ya xa̱ꞌnda chiñu ra nuu na, káchi ya saa: “Ta ndá naꞌa án ndá kiti ná ndaa kuañu nuu iku Sinaí yóꞌó, ta xíniñuꞌu ndo kaꞌni ñaꞌa ndo xiꞌin yu̱ú án xiꞌin itun xiín ni nuu”, káchi Ndioxi xiꞌin na.

²¹ Yáꞌa ni ìyo ku̱u xi̱ni na, yakan ndi̱ndiꞌvi ni na, nda ni mií ra Moisés ta ndi̱kaꞌan ra, káchi ra saa: “Yáꞌa ni íꞌvi i, ndakua kísia yeꞌe”, káchi ra.

²² Sundi ndóꞌo̱, ta süvi taꞌan iku ikán kua ndi̱kuyati ndo nuu. Chi ndóꞌo̱, ta nuu iku ya náni Sión kua ku̱yati ndo, ya yóꞌó ku ñuu Jerusalén, ya íyo nuu ndivi ni̱nù ya kúu ñuu Ndioxi ra táku, nuu íyo kuaꞌa ni mil tatun Ndioxi xáa kaꞌnu ya ra.

²³ Ta ñuu ikán ku nuu ndi̱kitaꞌan ndo xiꞌin na núnu̱ú na kúu seꞌe Ndioxi, ta na ikán ta xa íyo kivi na nuu tutu ra, na íin tá íin tachi, na ndi̱xiyo ivi na vaꞌa ni, na ndu̱u tá íin naꞌa, na köo ka kuachi kúu mií nuu Ndioxi, na xa nda̱sa i̱í ra. Na ikán ku na xa ndi̱xaa nuu ra xaꞌa ya kúu ra, ra xáa nani kuachi xiꞌin na.

²⁴ Ta ndóꞌo̱, ku̱yati ndo nuu Jesús, ra ndíchi nuu Ndioxi nuu ki̱ndoo ra ya xa̱á xaꞌa ndo xáku ndaꞌvi ra xaꞌa ndo nuu Ndioxi. Saa chi ra ikán ku ra ki̱ndoo iin trato ya xa̱á xiꞌin ndo, ta xiꞌin nií ra ku rá nda̱sa i̱í Ndioxi ndóꞌo̱, saa chi ndee ni ka nií Jesús nuu nií ra Abel, ra ndi̱xiꞌi xinaꞌa.

²⁵ Yakan kua xíniñuꞌu ni yo kuni soꞌo yo ya káꞌan Ndioxi xiꞌin yo, süvi ka vi ya kundoꞌo yo tá ndo̱ꞌo xií sikua yo kivi köo ndi̱xiin na kuni soꞌo na ya ndi̱kaꞌan ra xiꞌin na iku Sinaí ñuu ivi yóꞌó. Tá tu köo ndi̱kuchiñu na ikán kaku na kivi ndi̱kaꞌan ra xiꞌin na ñuu ivi yóꞌó, ta ndisaa ka vi yoo, unkua ikan yo kaku yo tá tu köo xíin yo kuni soꞌo yo ya káꞌan ra xiꞌin yo kivi vitin. Saa chi kivi káꞌan ra xiꞌin yo ta nda nuu ndivi vaxi ya káꞌan ra xiꞌin yo.

²⁶ Tiempo xinaꞌa ikán tá ndi̱kaꞌan Ndioxi ta xiꞌin tuꞌun ra kua ndi̱taan ñuu ivi yóꞌó i̱kan ra, ta vitin káꞌan ra xaꞌa kivi vaxi: “Sitaan tuku i, sundi süvi iindaa ñuu ivi yóꞌó sikanda i, chi sikanda tu i nuu ndivi ni̱nù va”, káchi ra.

²⁷ Ta xiꞌin tuꞌun ya káꞌan ra “sitaan tuku ra”, xiꞌin ya ikán kua kúndaa teꞌe ini yo ya sindiꞌi xaꞌa ndiꞌi ra ñaꞌa ya si̱kuaꞌa ra ñuu ivi yóꞌó, ta ndisaa ya köo ndíꞌi xaꞌa kua ndoo koo.

²⁸ Nuu xáꞌnda chiñu Ndioxi, nuu koo yo xiꞌin ra kua ndoo koo chi küvi kanda ya ikán kutaꞌa ya. Yakan kua ná taxi ni yo tixaꞌvi ndaꞌa ra, ta saa ná xaa kaꞌnu ni yo ra tá kuꞌva kútoo mií ra, xaꞌa ya íꞌvi yo xíni yo ra.

²⁹ Saa chi mií Iva yo Ndioxi ta tá káa ñu̱ꞌu̱ ya ndee ni xáꞌmi ndiꞌi ñaꞌa, saa káa ra.