HEBREOS 11 - Xochapa Mixteco

Kuꞌva soꞌva kua xi̱ndaa ni ini na xi̱ndikun Ndioxi xinaꞌa xi̱ni na ra

¹ Xaꞌa ya ndinuꞌu ni ini yo ndáa ini yo Ndioxi yakan kúndaa teꞌe ini yo ya taxi ra ñaꞌa ndátun yo ndaꞌa yo. Vani täꞌan kuni yo ya, ta xíni yo taxi ra ya ndaꞌa yo.

² Xií yo na xi̱ndoo xinaꞌa, ta ka̱ndixa ni na Ndioxi, yakan nda ni mií ra ta vaꞌa ni káꞌan ra xaꞌa na.

³ Xaꞌa ya ndáa ni ini yo xíni yo Ndioxi yakan kúndaa ini yo xiꞌin tuꞌun ra ya xa̱ꞌnda ra chiñu kua ndi̱kuaꞌa ñuu ivi yóꞌó xiꞌin ndivi ni̱nù. Ya yóꞌó kúni kachi ya ndi̱kuaꞌa ñuu ivi yóꞌó xiꞌin ñaꞌa ya köo ndi̱kuvi koto xiꞌin nuu yo.

⁴ Xaꞌa ya xi̱ndaa ni ini ra Abel xi̱ni ra Ndioxi yakan kua ndi̱soko ra nina ya vaꞌa nuu Ndioxi, vaꞌa ni ka ya ndi̱soko ra ikán nuu ñani ra, ra Caín. Xaꞌa ya ikán kua vaꞌa ni ku̱ni Ndioxi xi̱ni ñaꞌa ra, ta ndi̱kaꞌan ra xaꞌa ra ya vaꞌa ni taa ku ra, saa ndi̱kiꞌin Ndioxi ya ta̱xi ra ndaꞌa ra. Yakan vani xa naꞌa ni ndi̱xiꞌi ra Abel ta ya vaꞌa i̱kan ra nuu Ndioxi, ya ikán kua sínaꞌa yoo ya xíniñuꞌu ni yo kundaa ni ini yo kuni yo Ndioxi tá kuꞌva i̱kan ra Abel.

⁵ Saa tu ra Enoc va, xaꞌa ya xi̱ndaa ni ini ra xi̱ni ra Ndioxi yakan kuaꞌan ivi ra xiꞌin Ndioxi, köo ndi̱xiꞌi ra ta nda iin ka naꞌa köo ndi̱xini ñaꞌa, saa chi Ndioxi ndi̱kiꞌin ra kuaꞌan ra. Ta xa ndi̱xiyo tuꞌun xaꞌa ra ya vaꞌa ni ku̱ni Ndioxi xi̱ni ñaꞌa ra.

⁶ Tá tu köo ndáa ni ini yo xíni yo Ndioxi, ta küvi xaa síni yo ini ra, saa chi ndiꞌi yo kúyati nuu ra ta xíniñuꞌu yo kundaa ni ini yo kuni yo ra ya íyo ra, saa xíniñuꞌu tu yo kundaa ini yo ya sóko ni ra ya vaꞌa nuu ndiꞌi yo kúyati nuu ra, ndúku yo ra.

⁷ Xaꞌa ya xi̱ndaa ni ini ra Noé xi̱ni ra Ndioxi kua si̱kuaꞌa ra itun barco tá ndi̱kaꞌan Ndioxi xiꞌin ra kixi tindoꞌo sata na ñuu ivi yóꞌó, ta nda iin ichí täꞌan kuun kini ni saví tá kuꞌva ku̱un rá kivi ikán. Xaꞌa ya xi̱ndaa ni ini ra xi̱ni ra Ndioxi yakan kua xa̱a súvi ra ya ndi̱kaꞌan Ndioxi xiꞌin ra, ya kuchiñu kaku na veꞌe ra. Ta xaꞌa ya i̱kan ra saa kua ta̱xi ra kuachi xaꞌa na ñuu ivi yóꞌó. Ta saa ndi̱niꞌi ra ya vaꞌa nuu Ndioxi, ndu̱u ra tá káa iin naꞌa, na köo ka kuachi kúu mií nuu Ndioxi, xaꞌa ya xi̱ndaa ni ini ra xi̱ni ra Ndioxi.

⁸ Xaꞌa ya xi̱ndaa ni ini ra Abraham xi̱ni ra Ndioxi kua xa̱a súvi ra chiñu ya ndi̱kaꞌan Ndioxi xiꞌin ra. Saa ke̱ta ra kuaꞌan ra koo ra inka ñuu nuu ki̱ndoo Ndioxi xiꞌin ra taxi ra ya ndaꞌa ra koo ra xiꞌin seꞌe ra, ta ni köo kúndaa ini ra ndá ñaꞌñu kua kuaꞌan ra.

⁹ Xaꞌa ya xi̱ndaa ni ini ra ya sixinu Ndioxi ya ndi̱kaꞌan ra xiꞌin ra, xaꞌa ya ikán kua ndi̱xiyo tóo ra nuu ñuꞌú inka naꞌa, ya ki̱ndoo Ndioxi xiꞌin ra kuu ñuꞌú mií ra. Ta xiꞌin ñií kiti kua ndi̱kuaꞌa veꞌe nuu ndi̱xiyo ra, saa tu ra Isaac, seꞌe va ra xiꞌin ra Jacob, chi iin káchi ndi̱kaꞌan tu Ndioxi xiꞌin uvi saa nda ikán va ya taxi ra ya vaꞌa ndaꞌa nda.

¹⁰ Soꞌva i̱kan ra Abraham xaꞌa ya xi̱ndatun ra, koo ra iin ñuu ya ndee ni tuun ndi̱kuaꞌa kútu ta köo ndíꞌi xaꞌa ya, iin ñuu ya vaꞌa ni, ya taxi Ndioxi ndaꞌa ra. Saa chi ñuu ikán ta mií Ndioxi ku ra ta̱va xaꞌa ya, ta ndi̱kani ini ra ndá kuꞌva koo ya.

¹¹ Xaꞌa ya xi̱ndaa ni ini yá Sara xi̱ni yá Ndioxi yakan ku̱chiñu yá ka̱ku seꞌe yá, chi köo ndi̱kuvi koo seꞌe yá, yá numa ndi̱xiyo yá, ta ka̱ku seꞌe yá tá xa ku̱chee ni yá. Xaꞌa ya xi̱ndaa ni ini yá xi̱ni yá Ndioxi ya sixinu ra ya ndi̱kaꞌan ra xiꞌin yá, yakan vaꞌa ka̱ku seꞌe yá.

¹² Saa ra Abraham, vani xa ku̱chee ni ra, ta saa ni ka̱ku ka seꞌe ra xiꞌin yá síꞌi ra. Ta ndixa ni kuaꞌa ndi̱xiyo seꞌe sikua ra, nda tá íin kimi kiti íyo nuu ndivi xiꞌin yoti ya íyo yuꞌu nduta ñûꞌu saa ndi̱xiyo seꞌe sikua ra. Saa chi nda iin naꞌa köo ndi̱kuchiñu kaꞌvi na.

¹³ Ta ndiꞌi na káꞌan yo xaꞌa yóꞌó ta xi̱ndaa ni ini na xi̱ni na Ndioxi, saa ndi̱xiꞌi ndiꞌi na, ta köo ndi̱kiꞌin na ñuꞌú ya ndi̱kaꞌan Ndioxi taxi ra ndaꞌa na. Sundi xaꞌa ya xi̱ndaa ni ini na xi̱ni na ya ndi̱kaꞌan Ndioxi taxi ra ya ndaꞌa na, vani xi̱ni xika na ya, ta saa ku̱sini ni na ndikiꞌin na ya. Saa ndi̱kani ini na süvi ñuu na ku ñuu ivi yóꞌó, na xi̱ndoo tóo va ku na nuu ya, ta saa yáꞌa na kuaꞌan va na.

¹⁴ Xaꞌa ya i̱kan na saa kua si̱naꞌa na yoo ya ndi̱xika na ndu̱ku na inka ñuu ya kúu ñuu mií na.

¹⁵ Tá tu na ndíxika ni ini ku na xaꞌa ñuu na nuu ke̱e na, ta kama ni va ndiko koo na ñuu na, ndikuu.

¹⁶ Sundi na ikán ta kúni na koo na inka ñuu ya vaꞌa ni káa, ta ñuu ikán ku ndivi ni̱nù. Xaꞌa ya ikán kua köo ndi̱kukaꞌán nuu Ndioxi xiꞌin na xaꞌa ya káꞌan na kúu ra Ndioxi na, saa chi xa nda̱sa vaꞌa ra iin ñuu nuu koo na xiꞌin ra.

¹⁷ Xaꞌa ya ndáa ni ini ra Abraham xíni ra Ndioxi kua ka̱ndixa ra tá ndi̱kaꞌan Ndioxi xiꞌin ra ya soko ra seꞌe ra, ra Isaac nuu ra, ta iin mituꞌun saa ndi̱xiyo seꞌe ra. Chi xa kúndaa ini ra ya xaa súvi Ndioxi ya ki̱ndoo ra xiꞌin ra,

¹⁸ tá ndi̱kaꞌan ra, káchi ra saa: “Tixin seꞌe un ra Isaac ndasa kuaꞌa ni i seꞌe sikua un”, ka̱chi Ndioxi xiꞌin ra.

¹⁹ Ta ra Abraham, ta xi̱ndaa ni ini ra xi̱ni ra Ndioxi ya kúu mií ra ndee ya sitaku ra na ndíi. Xaꞌa ya ikán kua ndi̱xiyo ndúvi ra ya soko ra seꞌe ra nuu Ndioxi, köo ndi̱xaꞌni ka ra seꞌe ra. Ta xaꞌa ya i̱kan ra saa tá íyo ra xa ndi̱xiꞌi ta ndi̱taku ra, saa ndi̱xiyo seꞌe ra, ra Isaac.

²⁰ Ta saa tu ra Isaac va, xi̱ndaa ni ini ra xi̱ni ra Ndioxi yakan chi̱kaa ra ya vaꞌa ra Jacob xiꞌin ra Esaú seꞌe ra, ya niꞌi nda ya vaꞌa nuu Ndioxi kivi vaxi.

²¹ Saa tu ra Jacob va, xaꞌa ya xi̱ndaa ni ini ra xi̱ni ra Ndioxi yakan tá xa ku̱yati kuvi ra, ta chi̱kaa ra ya vaꞌa iin iin nda seꞌe ra José. Ta saa ndi̱tavi ndaa ra itun távi ra, ta xa̱a kaꞌnu ra Ndioxi.

²² Ta saa tu ra José va, ya xi̱ndaa ni ini ra xi̱ni ra Ndioxi, yakan tá xa ku̱yati kuvi ra, ta ndi̱kaꞌan ra xiꞌin na ñuu ra, na Israel, ya kana koo na ñuu Egipto vaxi kivi. Ta saa ndi̱kaꞌan ra xiꞌin na, ya ná chinaꞌa na nuu ra ya kundiso na leke ra kuꞌun xiꞌin na tá xa kana koo na ñuu ikán.

²³ Saa tu na iva siꞌí ra Moisés va, xaꞌa ya xi̱ndaa ni ini na xi̱ni na Ndioxi, yakan kua ti̱seꞌe na ra loꞌo Moisés seꞌe na uni yoo. Ta i̱kan na saa xiꞌin ra chi xi̱ni na ya luvi ni ra loꞌo ikán, ta köo ndi̱ndiꞌvi na kuni na ra rey ikán xaꞌa ya xa̱ꞌnda chiñu ra kuvi ndiꞌi na vali.

²⁴ Saa tu ra Moisés va, xaꞌa ya xi̱ndaa ni ini ra xi̱ni ra Ndioxi yakan kua tá xa ku̱chee ra ta köo ndi̱xiin ka ra kunani ra seꞌe yá seꞌe ra rey Faraón.

²⁵ Ta chi̱kaa ini ra ya ndoꞌo ni ra xiꞌin na ñuu Ndioxi, yakan köo ndi̱kutoo ra kusini ra xiꞌin ñaꞌa saví ni íyo uvi ndaa kivi ñuu ivi yóꞌó, ta síndaꞌvi ya naꞌa kuakiꞌvi na kuachi.

²⁶ Ta chi̱kaa ni ini ra vaꞌa ka tixuꞌvi ra ndoꞌo ra tá kuꞌva ndoꞌo ni mií Cristo, ta köo ndi̱kuni ra ya kuika kúu mií na ñuu Egipto. Saa chi ndee ni tuun ndáa ini ra xíto ra nuu ya vaꞌa niꞌi ra nuu Ndioxi.

²⁷ Xaꞌa ya xi̱ndaa ni ini ra Moisés xi̱ni ra Ndioxi, yakan kua köo ndi̱ndiꞌvi ra tá kivi ke̱ta ra ñuu Egipto. Vani ndi̱saá ni ra rey ikán xiꞌin ra, ta köo ndi̱ndiꞌvi ra nuu ra. Ta ndi̱xaꞌa ndee ndiꞌi ini ra, saa chi nda tá káa ra xi̱ni xiꞌin nuu Ndioxi, ra küvi kuni yo, saa ndi̱xiyo ra.

²⁸ Xaꞌa ya xi̱ndaa ni ini ra Moisés xi̱ni ra Ndioxi, yakan tá ta̱va ra viko pascua ta xa̱ꞌnda ra chiñu nuu na taꞌan ra na judío, ya ná ndiyakun na nií kiti levo yeꞌe na, ya ná yäꞌa tatun Ndioxi ya xáꞌni ndìì kaꞌni ya seꞌe núnu̱ú na.

²⁹ Xaꞌa ya xi̱ndaa ni ini na judío xi̱ni na Ndioxi yakan kua vaꞌa ndi̱taꞌvi nduta ñûꞌu, nduta náni Nduta Ñûꞌu Kuaꞌa, ta saa ndi̱yaꞌa na maꞌñu rá nuu íchi. Ta saa ku̱ni tu mií va na ñuu Egipto ikan na, xaꞌa ya kúni na sindiꞌi xaꞌa ñaꞌa na, ta köo ndi̱kuchiñu na, ñaa ndi̱kaꞌan ndaa ndiꞌi na rá, ta ndi̱xiꞌi ndiꞌi na.

³⁰ Xaꞌa ya xi̱ndaa ini na judío xi̱ni na Ndioxi yakan tá si̱ndiꞌi ndi̱kava nduu na uxa ichí sata nama ya ndási nduu ndiꞌi nuu ñuu Jericó, ta iin ndi̱kuꞌun ndiꞌi ya, ndi̱koyo ya.

³¹ Xaꞌa ya xi̱ndaa ni ini yá Rahab Ndioxi, yá ndi̱xika sii, yakan köo ndi̱xiꞌi yá xiꞌin na ñuu yá, na Jericó, na iku ni ndi̱xiyo, chi yá ikán ta ndi̱kuiso vií yá na judío na ndi̱xaꞌan xi̱to nani ñuu ikán.

³² Xa kuaꞌa ni ya ndi̱kaꞌan i xiꞌin ndo ndá kuꞌva xi̱ndaa ni ini na ikán Ndioxi, ta kúmani kuaꞌa ya ndituꞌun i xaꞌa xiꞌin ndo tá kúu ra Gedeón xiꞌin ra Barac tin ra Sansón xiꞌin ra Jefté tin ra David xiꞌin ra Samuel, tin nda ndi̱kaꞌan ndoso tuꞌun yuꞌu Ndioxi xinaꞌa.

³³ Xaꞌa ya xi̱ndaa ni ini na ikán Ndioxi yakan kua vaꞌa ku̱chiñu na nuu inka na ñuu, tá ndi̱xaꞌan na nuu kuachi ka̱ni taꞌan na. Ta sava ka na vaꞌa ni xaa nani na kuachi xiꞌin inka naꞌa. Ta sava na ikán ndi̱kiꞌin na ya ki̱ndoo Ndioxi taxi ra ndaꞌa na. Ta sava na ku̱chiñu na ndi̱kasi na yuꞌu kiti lión, köo ndi̱kuchiñu ri tiin ri na.

³⁴ Xaꞌa ya xi̱ndaa ni ini na xi̱ni na Ndioxi yakan vaꞌa ku̱chiñu na nda̱ꞌva na ñu̱ꞌu̱ ya ndee ni xíxi, köo ndi̱xiꞌi na ini xitun nuu iꞌni ni. Ta sava na ndi̱kaku, köo ndi̱xiꞌi na kivi ku̱ni naꞌa kaꞌni ñaꞌa na xiꞌin i̱chi. Ta sava na ku̱u mií na ndee, ta̱xi Ndioxi ndaꞌa na kivi köo ka ndee ndi̱kuu mií na. Ndu̱u ndee ni na tá ndi̱xaꞌan na nuu kuachi, ta ku̱chiñu na si̱kunu na nda lapa nda inka ñuu nda ka̱nitaꞌan xiꞌin na.

³⁵ Xaꞌa ya xi̱ndaa ni ini ná síꞌi xi̱ni ná Ndioxi yakan vaꞌa ndi̱taku na veꞌe ná, na xa ndi̱xiꞌi. Ta sava naꞌa ndee ni ndi̱xuꞌvi, vani saa ndo̱ꞌo na, ta xaꞌa ya xi̱ndaa ni ini na xi̱ni na Ndioxi, yakan vaꞌa ndi̱xaꞌa ndee ni ini na ndo̱ꞌo na saa, chi ku̱ni na ikán nditaku na koo na inka ivi nuu vaꞌa ni káa.

³⁶ Ta xaꞌa ya xi̱ndaa ni ini na ikán xi̱ni na Ndioxi kua ndo̱ꞌo ni na ndaꞌa naꞌa, xa̱a siki ni ñaꞌa na, xa̱a chiꞌña ni na xiꞌin na saa ka̱ni ni ñaꞌa na. Ta inka na xi̱nuꞌni xiꞌin cadena xi̱ñuꞌu na veꞌe kàà.

³⁷ Ta sava na xa̱ꞌni ñaꞌa na xiꞌin yu̱ú. Sava na xa̱ꞌnda sava ñaꞌa na xiꞌin kàà ya xáꞌnda itun. Sava na xa̱ꞌni ñaꞌa na xiꞌin i̱chi. Ta sava na xi̱ndixi ñii levo xiꞌin ñii tixuꞌu, köo toto na ndi̱xiyo, ni veꞌe na köo ndi̱xiyo. Ndaꞌvi ni ndi̱xiyo na, ku̱chiꞌña ni ini na ta ndo̱ꞌo ni na ndaꞌa inka naꞌa, na köo xíni Ndioxi.

³⁸ Ta na vaꞌa ni va ndi̱xiyo na ikán, xaꞌa ya ikán kua köo ndi̱kuu mií na ñuu ivi yóꞌó ichí ya koo na tañu na, xaꞌa ya xi̱ndaa ni ini na ikán xi̱ni na Ndioxi kua ndixika sava na ikú yuyu, sava na ndi̱xika iku, ta sava na xi̱ñuꞌu tixin kava án yavi tixin ñuꞌú.

³⁹ Vani ndo̱ꞌo ni na ndaꞌvi ikán ta vaꞌa ni va káꞌan Ndioxi xaꞌa na, saa chi xi̱ndaa ni ini na xi̱ni na ra, sundi köo ndi̱kiꞌin na ya ki̱ndoo Ndioxi xiꞌin na taxi ra ndaꞌa na.

⁴⁰ Saa chi ku̱ni ra taxi ra ya vaꞌa ni ka ndaꞌa na, taꞌan ya chi̱tuni ra taxi ra ndaꞌa yoo, saa chi saa kua iin kachi nduu vaꞌa ni ka na nuu ra xiꞌin yoo.