HEBREOS 10 - Xochapa Mixteco

Jesucristo ku ra ndása vaꞌa nima yo nuu Ndioxi

¹ Saa chi ley Ndioxi ya ta̱a ra Moisés, ta tá káa copia ya xa̱na ni náꞌa ya sínaꞌa xaꞌa ndiꞌi ñaꞌa ya vaꞌa taxi Ndioxi ndaꞌa yo kivi vaxi, saa káa ya. Chi ley ikán ta xa̱ꞌnda chiñu ya nuu naꞌa ya soko na kiti sana na nuu Ndioxi tá nuu kuiya. Ta nda iin ichí köo ndi̱kuchiñu ya ndasa vaꞌa ya nima na ivi, ta ni küchiñu ya.

² Saa chi tá tu ndíkuchiñu ley ikán ndasa vaꞌa ya nima na nuu Ndioxi xaꞌa kuachi na, ta kündiꞌi ka ini na xaꞌa kuachi na, ta ni köo xíniñuꞌu soko ka na kiti sana na xaꞌa ya síndikaꞌán ya xínituni na mií na ya íyo ka kuachi na, ndikuu.

³ Sundi xaꞌa ya íkan na xáꞌni na kiti nuu Ndioxi, tá nuu kuiya xaꞌa kuachi na, ta vií ka síndikaꞌán ya ini na ya íyo kuachi na.

⁴ Saa chi nií kiti toro xiꞌin nií kiti tixuꞌu ta köo ndi̱kuvi ndasa vaꞌa rá na sindiꞌi xaꞌa rá kuachi na.

⁵ Yakan kua ndi̱kaꞌan Jesucristo saa xiꞌin Ndioxi tá ki̱xi ra ñuu ivi yóꞌó, ka̱chi ra saa: “Köo kúni un kaꞌni na kiti soko na nií ri nuu un, ta ni ya soko na ndá ka ñaꞌa nuu un, köo kúni un. Sundi ta̱xi un ikin kuñu i ndaꞌa i ya nditaxi i mií i ndaꞌa un.

⁶ Saa chi yóꞌo̱ ta köo kútoo un soko na kiti xáꞌmi na nuu un, ni ndá ka ñaꞌa ya sóko na nuu un xaꞌa kuachi na, köo kútoo un.

⁷ Xaꞌa ya ñaa kua ndi̱kaꞌan i, káchi i saa: “Tata Iva i Ndioxi yóꞌó íin i. Vaxi i xaa súvi i ya kúni mií un, tá káchi ya íyo nuu ley un xaꞌa i”, káchi Jesucristo xiꞌin Ndioxi.

⁸ Chi tá núnu̱ú ta káꞌan Jesucristo, ya köo kúni Ndioxi ya soko naꞌa kiti sana na nuu ra. Ni ya kaꞌni na ri, ni ya kaꞌmi na ri nuu ra ya xaa kaꞌnu ini ra xaꞌa kuachi na, köo kúni ra. Nda iin ya yóꞌó köo kúni ra, vani nuu ley ra ya íyo ndaꞌa na xinaꞌa xa̱ꞌnda chiñu ya nuu na ya xíniñuꞌu ni na xaa súvi na ya yóꞌó, káchi ley ikán.

⁹ Ta sindiꞌi káꞌan tuku ra, káchi ra: “Iva i Ndioxi, yóꞌó íin i ya xaa súvi i ya kúni un”, káchi ra xiꞌin Ndioxi. Ya yóꞌó kúni kachi ya ki̱xi ra ya si̱kutaꞌa ra kuꞌva i̱kan na tá ndi̱soko na ñaꞌa nuu Ndioxi. Chi vitin ta ya i̱kan Jesucristo nuu Ndioxi ndi̱soko ra mií ra ya ikán kua ndáa yaꞌvi ni ka.

¹⁰ Xaꞌa ya i̱kan Jesucristo ndi̱taxi ra mií ra ndi̱xiꞌi ra xaꞌa yo, ta xaꞌa ya ikán kua ndu̱u yo na ií, na vaꞌa nuu Ndioxi, saa chi Jesucristo ta xa̱a súvi ra ya kúni mií Ndioxi. Ta nda iin ichí köo xíniñuꞌu tuku ra ikan ra saa.

¹¹ Nda sutu nuu na judío ta vitin taan xáa kaꞌnu nda Ndioxi xáa chiñu nda nuu ra sóko nda kiti táxi nda ndaꞌa ra, vani saa íkan nda ndiꞌi saa kivi, ta köo ndi̱kuchiñu nií kiti ikán sikutaꞌa rá kuachi naꞌa nuu Ndioxi, ya sindiꞌi xaꞌa rá kuachi na.

¹² Sundi Jesucristo ta iin ichí va i̱kan ra saa, iin ichí va ndi̱taxi ra mií ra xaꞌa kuachi yo, ta ya i̱kan ra saa ta köo xíniñuꞌu ra ikán tuku ra saa. Tá sindiꞌi i̱kan ra saa ta ndi̱kunduꞌu ra ñaꞌñu kuáꞌá Ndioxi xáꞌnda chiñu ra xiꞌin Ndioxi.

¹³ Ikán índuꞌu ra ndátun ra ndakua ná sindiꞌi xaꞌa ndiꞌi Ndioxi naꞌa, na kánitaꞌan xiꞌin ra.

¹⁴ Saa chi xaꞌa ya i̱kan ra saa ndi̱soko ra mií ra, ta iindaa ichí va i̱kan ra saa, nda̱sa vaꞌa ra na ndíkun sata ra, ndu̱u ndǎku na nuu ra, saa xa̱a i̱í ra na, ta saa koo na ndiꞌi saa tiempo.

¹⁵ Ta xíni yo ya ndixa kua, chi káꞌan Tachi I̱í Ndioxi xiꞌin yo, káchi ya:

¹⁶ Trato ya ki̱ndoo i ikan i xiꞌin na judío kivi vaxi, ta soꞌva koo ya, káchi Iva yo Ndioxi: Chikaa i ley i koo ya nima na, ta saa taa i ya xi̱ní na nuu íyo ya xínituni na, káchi ra.

¹⁷ Ta saa káꞌan tuku ra, káchi ra saa: Ta ndïkaꞌán ka ini i xaꞌa kuachi na, ni ya väꞌa íkan na, ndïkaꞌán ka ini i xaꞌa ya, káchi Iva yo Ndioxi.

¹⁸ Ta xa xa̱a kaꞌnu ini Ndioxi xaꞌa yo, yakan kua köo xíniñuꞌu ka nda sutu kaꞌni nda kiti taxi nda ndaꞌa Ndioxi xaꞌa kuachi yo.

Xíniñuꞌu yo kuyati yo nuu Ndioxi

¹⁹ Na taꞌan yo, vitin ta xaꞌa ya ndi̱xita nií Jesucristo tá ndi̱xiꞌi ra, yakan kua ná kündiꞌi ka ini yo, ta ndinuꞌu ini yo ná kiꞌvi yo ini Cuarto ya ndee ni I̱í.

²⁰ Chi xaꞌa ya ndi̱xiꞌi ra xaꞌa yo ku nuu xu̱na ra ichí xa̱á nuu yo, ta ikin kuñu mií ra ku ichí xa̱á ikán, ta táku ra vitin. Saa chi kivi ndi̱xiꞌi ra ta ndi̱taꞌnda toto ya xi̱tikaa xi̱ndasi nuu ndi̱xiyo Cuarto ya ndee ni I̱í, ya köo ndi̱taxi yaꞌa yo. Ta vitin vaꞌa yaꞌa yo,

²¹ chi Jesús ku ra ku sutu ra chee ni nuu yo, ta ndíso chiñu ra xiꞌin veꞌe ñuꞌu Ndioxi.

²² Xaꞌa ya ikán kua ná kuyati yo nuu Ndioxi xiꞌin ndinuꞌu nima yo, ta saa ndinuꞌu ni ini yo ná kundaa ni ini yo kuni yo ra, saa chi xa ndi̱kata ra nima yo xaꞌa ndiꞌi ya väꞌa, ta saa ndi̱kata ra ikin kuñu yo xiꞌin tikuii nduta vaꞌa ni.

²³ Ta vitin tuun ni ná kundikun yo ra xaꞌa ya ndáa ni ini yo xiní yo ra, ta ná käka uvi ini yo nuu naꞌa xaꞌa ya ndíkun yo ra, saa chi Ndioxi ta síxinu ndiꞌi ra ya xa ki̱ndoo ra xiꞌin yo.

²⁴ Ta saa ná nduku ka yo ndá kuꞌva kuniꞌi taꞌan yo ya kuꞌvi ni ini yo kuni taꞌan yo, ta ná ikan yo ndisaa ya vaꞌa xiꞌin taꞌan yo.

²⁵ Xíniñuꞌu yo ndikitaꞌan yo xiꞌin na ñani yo tin kuꞌva yo ya xaa kaꞌnu yo Ndioxi. Ta ná ïkan yo tá íkan sava na taꞌan yo, köo xíin ka na ndikitaꞌan na ya xaa kaꞌnu na Ndioxi. Ná xaꞌa ka yo ndee xiꞌin taꞌan yo, saa chi vitin ka kua ndee ni, chi xa kuaꞌan kúyati ni kivi ya ndiko koo tuku Tata yo Jesucristo kixi ra ñuu ivi yóꞌó.

²⁶ Saa chi tá tu xa kúndaa teꞌe ini yo xaꞌa ya ndaa, ta íkan ka yo ya väꞌa, ta ndaꞌvi ni va mií yo, saa chi köo ka inka ñaꞌa soko Jesucristo ya xaa kaꞌnu ini Ndioxi xaꞌa kuachi yo.

²⁷ Chi ndiꞌi naꞌa, na íkan saa kivi tá ná xaa nduvaꞌa Ndioxi xiꞌin na, ta ndee ni sitixuꞌvi ra na xaꞌa kuachi na, ta saa kua taán ra na koko na nuu ndee ni xíxi ñu̱ꞌu̱. Ikán ku nuu sindiꞌi xaꞌa yaa ra na sáa ini xíni ra.

²⁸ Tá káꞌan ley Ndioxi, tá íyo uvi án uni naꞌa, na ndíkuiin xaꞌa naꞌa, ya köo xíin na xaa súvi na ley ra ya ta̱a ra Moisés, káchi na, ta ndikun xáꞌni ñaꞌa mií nda xi̱ni soꞌo ya ndi̱kaꞌan na testigo ikán, ta ni köo kúndaꞌvi ini nda xíni ñaꞌa nda.

²⁹ Ta ndisaa ka vi ndee ni ndee kundoꞌo naꞌa, na kóso kava Tata yo Jesucristo, ra kúu Seꞌe Ndioxi, chi köo kíꞌin na kuenta xaꞌa nií ra, nda tá káa rá väꞌa saa káa ra nuu na, saa íkan naꞌa, na kúndasi nuu xíni Tachi I̱í Ndioxi, ra kúꞌvi ni ini xíni ñaꞌa, chi suvi xiꞌin nií Tata yo Jesucristo kua ki̱ndoo ra trato ya ikan ra ya vaꞌa xiꞌin yo.

³⁰ Xíni yo ya káꞌan Iva yo Ndioxi soꞌva: “Yeꞌe ku i kúu mií ichí ya sitixuꞌvi i naꞌa, na kéꞌe ya väꞌa, tá íyo ya i̱kan na, saa koo ya ikan i xiꞌin na”, káchi ra. Saa ndi̱kaꞌan tuku ra, káchi ra saa: “Yeꞌe ku i xaa nani kuachi xiꞌin na kúu kuenta i”, káchi ra.

³¹ ¡Ta yáꞌa ni ndee tindoꞌo kixi nuu yo ikan Iva yo Ndioxi, ra táku, tá ná nditaꞌan ra yoo íkan yo ya väꞌa!

³² Ta saa ndóꞌo̱, ndikaꞌán ni ini ndo ndá kuꞌva ndo̱ꞌo ndo yachi, tá sikan ndi̱yeꞌe nima ndo xiꞌin tuꞌun vaꞌa xaꞌa Tata yo Jesucristo, ta ndee ni tindoꞌo ki̱xi nuu ndo, ta ndi̱xaꞌa ndee ndiꞌi ini ndo xiꞌin ya ndinuꞌu ni ini ndo xi̱ndikun ndo sata ra.

³³ Sava ndóꞌo̱, ta ndee ni ti̱xuꞌvi ndo xaꞌa ya kini ni ndi̱kaꞌan naꞌa xiꞌin ndo, saa xa̱a ndu̱vaꞌa ni na xiꞌin ndo nuu ndiꞌi naꞌa. Ta saa tu ndóꞌo̱ va, ku̱ndaꞌvi ini ndo xi̱ni ndo na taꞌan ndo, na ndóꞌo̱ tá kuꞌva ndo̱ꞌo ndo, saa ndi̱xaꞌan ndo chi̱tuvi ndo na.

³⁴ Saa ku̱ndaꞌvi ni ini ndo xi̱ni ndo na tá ñúꞌu na veꞌe kàà. Ta nda kúsini ndo tá xíto ndo kíndaa na ñaꞌa ndo ndaꞌa ndo. Saa chi ndóꞌo̱, ra xíni ndo, vaꞌa ni ka ñaꞌa kúu mií ndo nuu ndivi, ya taxi Ndioxi ndaꞌa ndo, saa chi ya ikán ta nda iin ichí ndïꞌi xaꞌa ya.

³⁵ Yakan ndóꞌo̱, ta sïndikoo ndo ya ndáa ni ini ndo xíni ndo Ndioxi, saa chi vaxi kivi ta yáꞌa ni vaꞌa ya niꞌi ndo nuu ra.

³⁶ Ta xaꞌa ndee ni ini ndo tá ñúꞌu ndo nuu tindoꞌo, saa chi saa kua xáa súvi ndo ya kúni Ndioxi, ta saa niꞌi ndo ya ki̱ndoo ra taxi ra ndaꞌa ndo.

³⁷ “Chi ra ndátun ndo kixi, ta kama ni kixi ra. Ndiko koo tuku ra kixi ra, küachi ka ra.

³⁸ Ta naꞌa, na ndása vaꞌa Ndioxi, na köo ka kuachi kúu mií nuu ra, na ikán ku naꞌa, na kutaku xiꞌin ra xaꞌa ya ndee ni ndáa ini na xíni na ra. Sundi tá ná ndiko koo ini na, ta väꞌa mií kuni ra xiꞌin na.

³⁹ Ta yoo, ta süvi taꞌan naꞌa, na ndíko koo chí sata ku yo, chi na íkan saa ta síndiꞌi xaꞌa na mií va na, xaꞌa ya síndikoo na ichí ra. Sundi yoo, ta ndee ni ndáa ini yo xíni yo ra ya sikaku ra ya vaꞌa yo.