HEBREOS 1 - Xochapa Mixteco

Ndioxi káꞌan ra xiꞌin yo tixin Seꞌe ra

¹ Tá kuiya xinaꞌa ta kuaꞌa ni ichí tin kuaꞌa ni kuꞌva ndi̱kaꞌan Ndioxi xiꞌin xii sikua yo, ta ndi̱kaꞌan ra xiꞌin na tixin nda ndi̱kaꞌan ndoso tuꞌun yuꞌu ra.

² Sundi tiempo ya kuaꞌan ndíꞌi ndóo yo vitin ta köo káꞌan ka ra xiꞌin yo tixin nda ikán, tixin Seꞌe ra kua káꞌan ra xiꞌin yo, chi tixin ra ikán kua si̱kuaꞌa ra ndiꞌi ni kúu ñaꞌa ya íyo nuu ndivi xiꞌin ya íyo ñuu ivi yóꞌó. Saa ta̱xi ndiꞌi ra ya ndaꞌa Seꞌe ra, ta ra ikán ku ra ndíso chiñu xiꞌin ndiꞌi ni kúu ñaꞌa ra.

³ Ta ya luvi ni yéꞌe̱ kúu mií Seꞌe Ndioxi kua yéꞌe̱ mií Ndioxi. Tá káa níi mií Ndioxi saa káa níi mií Jesucristo, saa ta̱xi Ndioxi ichí ndaꞌa ra ya ndíso chiñu ra xiꞌin ndiꞌi ñaꞌa ya íyo ñuu ivi yóꞌó. Ta xiꞌin tuꞌun ra ya ndee ni ndee kua xáa chiñu ndiꞌi ya nda vitin. Saa ndi̱kata ra kuachi yo xiꞌin ndee mií ra, ta sindiꞌi nda̱a ra nuu ndivi ndi̱kunduꞌu ra ñaꞌñu kuáꞌá Ndioxi nuu tai toꞌo, xáꞌnda chiñu ra xiꞌin ra.

Chee ni ka Seꞌe Ndioxi nuu na tatun ra

⁴ Ta Seꞌe Ndioxi ndi̱xinu ra kúu ra, ra chee ni ka nuu na tatun Ndioxi, saa chi Ndioxi ndi̱kaꞌan ra xiꞌin ra ya kúu ra Seꞌe ra, ta ndee ni ka ndáa yaꞌvi kivi ya ta̱xi ra ndaꞌa Seꞌe ra nuu kivi na tatun ra.

⁵ Saa chi Ndioxi ta nda iin ichí köo ndi̱kaꞌan ra xiꞌin nda iin tatun ra tá kuꞌva ndi̱kaꞌan ra xiꞌin Seꞌe ra, káchi ra saa: Yóꞌo̱ ku Seꞌe i, ta yeꞌe ku Iva un, Ta saa ndi̱kaꞌan tuku Ndioxi xiꞌin ra, káchi ra saa: Yeꞌe nduu Iva un, ta yóꞌo̱ nduu Seꞌe i, ka̱chi Ndioxi xiꞌin ra.

⁶ Tá kivi ti̱ꞌvi Ndioxi Seꞌe ra, ra núnu̱ú ki̱xi ra ñuu ivi yóꞌó ta ndi̱kaꞌan ra xaꞌa ra, káchi ra saa: Ndiꞌi tatun xáa chiñu nuu i ta ná xaa kaꞌnu na Seꞌe i, káchi ra.

⁷ Ta xa síin káꞌan Ndioxi xaꞌa na tatun ra, káchi ra saa: Na tatun i, na xáa chiñu nuu i, ta ndása i na ndúu na tá kuꞌva íin tachi xiꞌin ñu̱ꞌu̱ ya ndee ni xíxi, káchi Ndioxi xaꞌa na.

⁸ Sundi xaꞌa Seꞌe ra, káchi ra saa: Yóꞌo̱ ku Ndioxi ta ndiꞌi saa ichí kaꞌnda chiñu un nuu na ñuu ivi yóꞌó, nda iin ichí ndïꞌi xaꞌa chiñu ya kúu mií un, ta ndǎku ni kaꞌnda chiñu un.

⁹ Saa chi kútoo ni un xíni un ya ndaa, ta kúndasi nuu un xíni un ya väꞌa, xaꞌa ya ñaa kua ndi̱kaxin Ndioxi yóꞌo̱ ya kaꞌnda chiñu un, yakan ta̱xi ra ya kusini ni ka yóꞌo̱ nuu na taꞌan un, káchi tuꞌun Ndioxi.

¹⁰ Saa káꞌan tuku tuꞌun Ndioxi xaꞌa Seꞌe ra, káchi ya saa: Tata, nda tá xi̱koo ñuu ivi yóꞌó tá xaꞌá, ta nda iin ñaꞌa köo ndi̱xiyo, ta yóꞌo̱ ku un si̱kuaꞌa ndiꞌi ni kúu ya íyo ñuu ivi yóꞌó xiꞌin ya íyo nuu ndivi xiꞌin ndaꞌa mií un si̱kuaꞌa ndiꞌi un ya.

¹¹ Ta ya íyo ñuu ivi yóꞌó ta vaxi tiempo ndiꞌi xaꞌa yaa ya, tá kuꞌva ndíꞌi xaꞌa toto tá kúyata ya, saa ndiꞌi xaꞌa ya. Sundi yóꞌo̱, ta nda iin tiempo ndïꞌi xaꞌa un.

¹² Tá kuꞌva chíkaꞌnu naꞌa toto na, saa ikan un xiꞌin ñuu ivi yóꞌó. Tá kuꞌva ndínama na toto na, saa ndinama un ya. Sundi yóꞌo̱, ta nda iin kivi köo ndínama un, tá káa un vitin saa koo un ndiꞌi saa kivi, nda iin ichí ndïꞌi xaꞌa un, káchi tuꞌun Ndioxi xaꞌa Seꞌe ra.

¹³ Ndioxi ta nda iin ichí köo ndi̱kaꞌan ra saa xiꞌin nda iin na tatun ra, tá kuꞌva ndi̱kaꞌan ra xiꞌin Seꞌe ra: Naꞌa yóꞌó koo un xiꞌin i ñaꞌñu kuáꞌá i kaꞌnda chiñu un xiꞌin i, ndakua ná tindaa kivi sikoyo i naꞌa, na sáa ini xíni yóꞌo̱ tixin xaꞌa un, sindiꞌi xaꞌa ndiꞌi i na, káchi Ndioxi xiꞌin ra.

¹⁴ Ta na tatun Ndioxi ta xa síin va ku na, chi na ikán ta tachi va ku na xíka na chiñu nuu ra, tíꞌvi ra na kuaꞌan na chindee na naꞌa, na sikaku ra.