Gálatas 6 - Xochapa Mixteco

Vaꞌa chindee taꞌan ndo xiꞌin taꞌan ndo

¹ Ñani yo, ndóꞌo̱ xa xuxa ini, ndóꞌo̱ vaꞌa ni xáa súvi ya kúni mií Tachi I̱í Ndioxi, ta án sana ndá na taꞌan yo kóyo nuu kuachi, íkan na ya väꞌa. Ta vaꞌa kuyati ndo nuu na ya chindee taꞌan ndo xiꞌin na, ta vívií kaꞌan ndo xiꞌin na ya ná sindikoo na ya väꞌa íkan na. Ta saa kuenta ni koo ndo chi ìyo ni koyo tu mií va ndo nuu kuachi.

² Ta chindee taꞌan ndo xiꞌin taꞌan ndo xaꞌa ndá ka tindoꞌo ya ndóꞌo̱ ndo, chi tá íkan ndo saa xiꞌin taꞌan ndo, ta saa kua xáa súvi ndo ley mií Cristo.

³ Tá ndá ndóꞌo̱ ndíkani ini ya ndee ni ndáa yaꞌvi ndo túvi ndo, ta síndaꞌvi ndo mií va ndo, chi süvi ya ndixa kua.

⁴ Ta koto ndoso ndo mií ndo xaꞌa ñaꞌa íkan ndo, saa kusini ni ndo xiꞌin ya íkan ndo. Tá tu vaꞌa ni ka íkan ndo ndá ka chiñu túvi ndo, ta käꞌan ndo xaꞌa ya íkan inka naꞌa.

⁵ Saa chi iin iin naꞌa ta ndíso mií va na xiꞌin chiñu ya kúu mií na, ya sixinu na ya.

⁶ Ta naꞌa, na síkuaꞌa xiꞌin iin ra maestro, sínaꞌa ra na xaꞌa tuꞌun Ndioxi, ta xíniñuꞌu na chindee taꞌan na xiꞌin ra xiꞌin ndiꞌi ndá ka ñaꞌa vaꞌa kúu mií na.

⁷ Sïndaꞌvi ndo mií ndo, saa chi nda iin naꞌa küvi kusiki ndaa na Ndioxi. Chi tá kúu na chíꞌi, tá kuꞌva chíꞌi na ta kuꞌva saa íyo ñaꞌa ndíkuiso na tá síkee na.

⁸ Saa chi ndiꞌi naꞌa chíꞌi ya kúni ikin kuñu na, ta kuꞌva saa koo ñaꞌa ndikiꞌin na, ndikiꞌin na ya ndiꞌi xaꞌa na kuvi na. Sundi naꞌa, na chíꞌi ya kúni Tachi I̱í Ndioxi, ta niꞌi na nuu Tachi I̱í ra kutaku na ndiꞌi saa tiempo.

⁹ Ta ná künaa yo ya chíꞌi yo ya vaꞌa, ná xaꞌa ni yo ndee ikan yo saa ndiꞌi kivi, saa tá ti̱ndaa tiempo ta niꞌi ni yo ya vaꞌa xaꞌa ya íkan yo saa.

¹⁰ Ndiꞌi saa ichí ya kúchiñu yo chindee taꞌan yo xiꞌin naꞌa, ta vaꞌa ná ikan yo ya vaꞌa xiꞌin ndiꞌi na. Ta ndisaa ka vi na taꞌan yo, na ndáa ni ini xíni Jesucristo, ná chindee taꞌan ni yo xiꞌin na.

¹¹ Xaꞌa ya ñaa kua kúni i ná kundaa ini ndo ya táa i tutu yóꞌó xiꞌin ndaꞌa mií i xaa ya ndaꞌa ndo, ta nda naꞌnu ka íyo letra ya táa i nuu ndo ya ná kundaa ini ndo xiꞌin ya káꞌan i xiꞌin ndo.

¹² Ta naꞌa, na xáa nduxa xiꞌin ndo ya ndikunuu tuni Ndioxi ndóꞌo̱, ta íkan na saa xiꞌin ndo chi kúni na kindoo vaꞌa na nuu na judío, na káꞌan ya xíniñuꞌu ndo ndikunuu tuni Ndioxi ndóꞌo̱. Ta íkan na saa chi köo kúni na kunduvaꞌa na judío xiꞌin na tá tu ná ndituꞌun na ndisaa xaꞌa ya ndo̱ꞌo Jesucristo ndi̱xiꞌi ra nuu cruzin.

¹³ Ta nda káꞌan xiꞌin ndo ya ndikunuu tuni Ndioxi ndóꞌo̱ ya xaa súvi ndo ley Ndioxi ya ta̱a ra Moisés, ni mií nda ta köo kúchiñu nda xaa súvi nda ndiꞌi ya káꞌan ley. Sundi kúni nda ná xaa súvi ndóꞌo̱ ya, ta saa kuchiñu ndikunuu vaꞌa tuꞌun nda, xaꞌa ya xa̱a nduxa nda xiꞌin ndo ndi̱kunuu tuni Ndioxi ikin kuñu ndo.

¹⁴ Sundi yeꞌe, ta köo kúni i kutai ini i xaꞌa ndá ka ñaꞌa. Ndisaa xaꞌa ya ndi̱xiꞌi Tata yo Jesucristo nuu cruzin xaꞌa kuachi yo kua kúni i kutai ini i xaꞌa. Chi xaꞌa ya i̱kan Jesucristo nuu cruzin kua ndu̱u i tá káa iin ra xa ndi̱xiꞌi nuu ya väꞌa íyo ñuu ivi yóꞌó, ta köo ka ndee ya kaꞌnda chiñu ya nuu i, chi yeꞌe tá káa ra xa ndi̱xiꞌi va saa káa i nuu ya.

¹⁵ Saa chi tá tu xaa iin ndu̱u yo xiꞌin Cristo ta ni köo ndáa yaꞌvi ka ya kúu mií yo tuni Ndioxi án köo ya kúu mií yo. Iindaa ya ndee ni ndáa yaꞌvi kua nda̱sa xa̱á Ndioxi yoo ndu̱u yo naꞌa, na xa̱á.

¹⁶ Ta saa ná koo ni ya vaꞌa xiꞌin ndo, xiꞌin ya kúndaꞌvi ini Ndioxi xíni ra ndiꞌi ndóꞌo̱ na kúu ñuu Ndioxi, na xáa súvi ni ya káꞌan i xiꞌin ndo.

¹⁷ Ñani yo, yóꞌó ku nuu káꞌan i xiꞌin ndo, xíkan ni i ya mani nuu ndo, täva ka ndo kuachi xiꞌin i. Chi yeꞌe, ta ndee ni va kuaꞌa yanda íyo ikin kuñu i nuu ti̱kueꞌe ni i xaꞌa ya ndóꞌo ni i xaꞌa Tata yo Jesucristo.

¹⁸ Ñani yo, mií Tata yo Jesucristo ná chikaa ni ya vaꞌa ndóꞌo̱. Saa ná koo.