Gálatas 5 - Xochapa Mixteco

Ná kundikun ni yo ichí nuu xíka ndíka yo

¹ Na taꞌan yo, xaꞌa ya sa̱ña Jesucristo yoo yakan vaꞌa íyo ndíka yo. Kuenta ni koo ndo, tuun ni kundikun ndo ichí nuu íyo ndíka ndo, ta täxi ndo nduu tuku ndo naꞌa, na íin tá íin naꞌa, na sa̱ta na xáa chiñu nuu na xiꞌin ya nduxa.

² Mií yeꞌe, Pablo káꞌan xiꞌin ndo, xíkan i ya mani nuu ndo ya ná kuni soꞌo ndo ya káꞌan i xiꞌin ndo, chi tá ná ndiko koo tuku ndo xaa súvi ndo ya ndikunuu tuni Ndioxi ndóꞌo̱, ta ya ñaa kúni kachi ya köo ndáa yaꞌvi ya ndi̱xiꞌi Cristo xaꞌa kuachi ndo tá tu saa.

³ Ta yeꞌe, ndítuꞌun tuku i xiꞌin ndiꞌi ndo, tá ndá naꞌa kúni ya ndikunuu tuni Ndioxi na, ta xíniñuꞌu na xaa súvi na ndiꞌi ni kúu ya káꞌan ley Ndioxi.

⁴ Tá tu kúni ndo kindoo vaꞌa ndo xiꞌin Ndioxi tixin ley ra, ta kúni kachi ya xa ku̱xika va ndo nuu Cristo, ta saa ku̱xika tu ndo nuu ya ndi̱niꞌi uun ndo nuu ra kúꞌvi ini ra xíni ra ndóꞌo̱ va.

⁵ Sundi ndeꞌe ta tixin Tachi I̱í ra kua kúndaa teꞌe ini nde ya ndikuiso Ndioxi ndeꞌe nuu ra, nduu nde tá íin naꞌa, na köo ka kuachi kúu mií nuu ra, xaꞌa ya ndáa ni ini nde xíni nde Jesucristo.

⁶ Chi tá kándixa yo Jesucristo ta köo ndáa yaꞌvi ka ya án kúu mií yo tuni Ndioxi án köo ya kúu mií yo, chi ya ndee ni ndáa yaꞌvi nuu ra kua ndáa ni ini yo xíni yo ra xaꞌa ya kúꞌvi ni ini ra xíni ra yoo.

⁷ Ta ndóꞌo̱, ta vaꞌa ni va xa̱a súvi ndo ndi̱xika ndo ichí ra ya ndaa. Ta ¿unku na si̱ndaꞌvi ndóꞌo̱ ya kündikun ka ndo ichí ra?

⁸ Ta süvi Ndioxi ra ka̱na ndóꞌo̱ ku ra ndi̱kan saa xiꞌin ndo.

⁹ Ta kuenta ni koo ndo ndïndoso ini ndo ya káꞌan xaꞌa nda vata ñaa: “Chi tá kúu uxan iyá ta loꞌo paꞌa tíin va ya táan naꞌa xiꞌin iin koꞌndo chee uxan xita vaꞌa ta ndee ni va sínañu ñaꞌa ya”.

¹⁰ Ta yeꞌe, ta kándixa i ya chindee Ndioxi ndóꞌo̱ ya kundaa ini ndo, ya ná kändixa ndo ya káꞌan nda vata ñaa xiꞌin ndo. Chi nda ñaa ku nda sáka ini ndo xaꞌa ñaꞌa ya káꞌan nde xiꞌin ndo, ta vaꞌa chi mií Ndioxi ku ra sindoꞌo ini nda xaꞌa ya íkan nda saa, án ndá ka mií naꞌa kúu va na, ta saa ikan ra xiꞌin na.

¹¹ Ñani yo, tá tu yeꞌe sínaꞌa ku i naꞌa xaꞌa ya ná xaa súvi ka na costumbre ya ndikunuu tuni Ndioxi na, ni na judío ta xäa nduvaꞌa ka na xiꞌin i, ndíkuu. Chi tá saa ná kaꞌan i xiꞌin na ta säa ka ini na kuni yeꞌe xaꞌa ya sínaꞌa i ya ndi̱xiꞌi Jesucristo nuu cruzin xaꞌa kuachi yo, ndikuu.

¹² Ta naꞌa, na síndaꞌvi ndóꞌo̱ ya ndikunuu tuni Ndioxi ndóꞌo̱, ta ¡án vaꞌa ka ná kaꞌnda vaꞌa va na mií na, nduu capo va na, káchi yeꞌe!

¹³ Ñani yo, Ndioxi ta ka̱na ra ndóꞌo̱ ya koo ndo tá íin naꞌa, na íyo ndika, sundi täxi ndo xaa súvi ikin kuñu ndo ndá ka ñaꞌa väꞌa, ya kúni mií ndo. Vaꞌa ka ndiꞌi saa ichí chindee taꞌan ni ndo xiꞌin taꞌan ndo, xaꞌa ya kúꞌvi ni ini ndo xíni taꞌan ndo.

¹⁴ Chi ley Ndioxi ya ta̱a ra Moisés, ta xiꞌin iin tuꞌun yóꞌó kua xáa súvi ndo ndiꞌi ya káꞌan ya, káchi ya saa: “Kuꞌvi ni ini ndo kuni taꞌan ndo, tá kuꞌva kúꞌvi ini ndo xíni ndo mií ndo”, káchi ya.

¹⁵ Sundi tá kánitaꞌan ndo xiꞌin taꞌan ndo, xáa nduvaꞌa ndo xiꞌin taꞌan ndo, ta ndóꞌo̱ síndiꞌi xaꞌa taꞌan mií va ku ndo.

Ná ïkan yo ya kúni kuñu yo, vaꞌa ná xaa súvi yo ya kúni mií Tachi I̱í Ndioxi

¹⁶ Xaꞌa ya ñaa kua ndíkani i nuu ndo xiꞌin tuꞌun yóꞌó: Taxi ndo ná kaꞌnda chiñu Tachi I̱í Ndioxi nuu ndo, ta täxi ka ndo ikan ikin kuñu ndo ya väꞌa kúni mií ya ikan ya.

¹⁷ Chi ñaꞌa ya kútoo ni ikin kuñu yo xaa súvi ya ta köo íyo yuꞌu ya xiꞌin Tachi I̱í Ndioxi. Saa tu mií Tachi I̱í Ndioxi va, köo íyo yuꞌu ya xiꞌin ñaꞌa väꞌa ya kúni ikin kuñu yo xaa súvi ya. Káni taꞌan va uvi saa ya xiꞌin taꞌan ya. Xaꞌa ya ñaa kua köo kúchiñu ndo xaa súvi ndo ya ndixa kúni ndo xaa súvi ndo.

¹⁸ Sundi tá táxi ndo xáꞌnda chiñu Tachi I̱í Ndioxi nuu ndo, ta saa kua kíndoo ndika ndo, köo xáꞌnda chiñu ka ley ya ta̱a ra Moisés nuu ndo.

¹⁹ Chi xa kúndaa vaꞌa va ini yo ndá ñaꞌa kua kútoo ni ikin kuñu yo ikan ya: tá kúu ya kuakiꞌvi nda taa xiꞌin ná síꞌi ta süvi ná síꞌi nda ku ná ta saa íkan tu ná síꞌi va, saa tu na täꞌan ka tindaꞌa xiꞌin taꞌan na ta xa kuakiꞌvi na xiꞌin taꞌan na, ta saa tu ndiꞌi na ikán ndá ka ñaꞌa ya kini ni káa, saa tu na íkan ndiꞌi ya kúni mií ikin kuñu va na,

²⁰ saa tu na káñuꞌu ni ndioxi ya siki, xiꞌin na xíka nuu na tási, saa tu na kúndasi nuu xíni taꞌan va na, xiꞌin na káni taꞌan xiꞌin taꞌan, saa tu na xáa kuiñu taꞌan, xiꞌin ya ndee ni sáa íni na xíni taꞌan na, xiꞌin ya íyo na kuachi xiꞌin taꞌan na, tin ya táva na kuachi xiꞌin taꞌan na, saa táꞌvi taꞌan na,

²¹ xiꞌin na kǔní ini xíni taꞌan, saa tu na xáꞌni ndìì, xiꞌin na xíꞌí tin na xíka ndá ka nuu íyo viko, xiꞌin na íkan ndiꞌi nuu ñaꞌa väꞌa taꞌan ya yóꞌó. Ta xa yachi ndi̱tuꞌun i xiꞌin ndo xaꞌa ya yóꞌó, ta vitin ndítuꞌun tuku i xiꞌin ndo xaꞌa ya, chi ndiꞌi na íkan saa ta küchiñu na koo na nuu xáꞌnda chiñu Ndioxi.

²² Ta süvi saa íkan Tachi I̱í Ndioxi xiꞌin yo, chi ya chíndee taꞌan ka va kua xiꞌin yo kuꞌvi ini yo kuni yo na taꞌan yo, saa táxi ya kusini ni yo, ta táxi ya íyo vaꞌa ini yo xiꞌin taꞌan yo, saa táxi ya ndúu yo na kaꞌnu ini, ta táxi ya ndúu yo na toꞌo ni ini, saa táxi tu ya ndúu yo naꞌa, na tái ni ini, ta táxi tu ya ndúu yo naꞌa na ndáa ni ini naꞌa xíni na án Ndioxi ta ndáa ini ra xíni ra yoo,

²³ saa táxi tu ya ndúu yo na vita ini, ta táxi tu ya ndúu yo na xáꞌnu ini nuu ya väꞌa. Ta köo ley ya ndíkasi nuu yo ya ikan yo taꞌan ya yóꞌó.

²⁴ Ta saa ndiꞌi yo íyo xiꞌin Jesucristo xaꞌa ya ndi̱xiꞌi ra nuu cruzin xaꞌa yo, ta saa iin káchi ndi̱xiꞌi tu ikin kuñu yoo va xiꞌin ndiꞌi ñaꞌa väꞌa ya ndee ni ku̱too ikin kuñu yo xaa súvi ya yachi.

²⁵ Tá tu íyo Tachi I̱í Ndioxi xiꞌin yo, ta saa ná taxi yo kaꞌnda chiñu Tachi I̱í ra nuu yo.

²⁶ Ta saa ná küu yo naꞌa, na ndee ni kútai ini, ni ná sïsaa yo ini taꞌan yo ya kani taꞌan na xiꞌin taꞌan na, saa ná chïkaa yo ya uni xiꞌin taꞌan yo.