Gálatas 4 - Xochapa Mixteco

¹ Ta ya kúni i ndituꞌun i xiꞌin ndo xaꞌa na ndixa kúu seꞌe Ndioxi kua yóꞌó: Tá kúu iin ra loꞌo, vani ra kuika ku ra xaꞌa ya kuika ni iva ra, sundi tá kivi loꞌo ra ta nda tá káa iin taa ra xáa chiñu xiꞌin ya nduxa nuu iva ra saa káa tu mií va ra, vani ndee ni kuika ra.

² Chi tá kivi loꞌo ra, ta xíniñuꞌu ra xaa súvi ra ya xáꞌnda chiñu taa, ra xáa chiñu nuu iva ra, chi ra ikán ku ra xáa kuenta xiꞌin ra nda kivi ná xinu ra nduchee ra ya kuchiñu ra kundiso chiñu ra xiꞌin ya kuika kúu mií iva ra, tá íyo ya xáꞌnda chiñu mií iva ra.

³ Ta kuꞌva saa ndo̱ꞌo yoo kándixa Jesucristo, tá ndo̱ꞌo ra loꞌo ikán saa ndi̱xiyo yo yachi tá ndi̱xiyo vali yo, chi köo ndi̱kuvi ikan yo ya vaꞌa, ta nina taꞌan ñaꞌa ya ndínaꞌa na ñuu ivi yóꞌó va kua xa̱ꞌnda chiñu nuu yo, ta ya ikán kua xa̱a súvi yo.

⁴ Sundi tá ndi̱xinu kivi ya chi̱tuni mií Ndioxi ti̱ꞌvi ra Seꞌe ra ki̱xi ra ñuu ivi yóꞌó, saa ka̱ku ra tixin iin ñaꞌa, ta xa̱a súvi ndiꞌi ra ya káꞌan ley ya ta̱a ra Moisés.

⁵ Saa i̱kan Ndioxi ti̱ꞌvi ñaꞌa ra ki̱xi ra ya chindee ra yoo saña yo ndaꞌa ley ya ta̱a ra Moisés, ta ndi̱kuiso ra yoo ndu̱u yo seꞌe ra.

⁶ Ta xaꞌa ya ndu̱u yo seꞌe Ndioxi, yakan vaꞌa ta̱xi ra Tachi I̱í Seꞌe ra ndaꞌa yo íyo ya nima yo. Ta mií ya ku ya síkaꞌán ini yo ya vaꞌa kaꞌan yo xiꞌin ra, kachi yo soꞌva: “Iva mani mií i”, kachi yo xiꞌin ra.

⁷ Yakan vitin ra köo xáꞌnda chiñu ka ya ndínaꞌa na ñuu ivi yóꞌó, nuu yo. Chi vitin ra seꞌe Ndioxi ndu̱u yo tixin Jesucristo, ta xaꞌa ya ndu̱u yo seꞌe Ndioxi ta kúu mií yo ichí ndikiꞌin yo ndiꞌi ya kuika kúu mií Ndioxi.

Ndíꞌi ni ini ra Pablo xaꞌa na veꞌe ñuꞌu ndóo ñuu Galacia

⁸ Yachi tá täꞌan kuni taꞌan ndo xiꞌin Ndioxi, ta ndi̱xiyo ndo tá íin naꞌa, na xáa chiñu xiꞌin ya nduxa, saa ndi̱xiyo ndo xi̱ndoꞌni ndo ndaꞌa ndioxi ya siki xa̱a chiñu ndo nuu.

⁹ Ta vitin xa xíni ndo Ndioxi ra ndaa. Án xa xíni vaꞌa mií ra ndóꞌo̱, ná kachi yo. Ta saa, ta ¿ndachu kúni ndo ndiko koo tuku ndo ndinaꞌa ndo taꞌan ya ndi̱naꞌa ndo yachi, ya ndínaꞌa na ñuu ivi yóꞌó, ta ni köo ndáa yaꞌvi ya íkan na? ¿Án kúni tuku ndo nduu ndo tá íin naꞌa, na xáa chiñu xiꞌin ya nduxa?

¹⁰ Chi ndóꞌo̱, ta ndínaꞌa ka va ndo taꞌan ya íkan na ñuu ivi yóꞌó, chi xáa kaꞌnu ka va ndo sava kivi, xiꞌin yoo tin kuiya, ndítava ka va ndo viko taꞌan ya íkan na ivi yóꞌó.

¹¹ Ta xaꞌa ya íkan ndo saa kua íꞌvi ni va i xiꞌin ndo chi án sana ya mani uun va kua ndi̱kaꞌan ndoso i tuꞌun Ndioxi xiꞌin ndo.

¹² Xaꞌa ya ikán kua xáku ndaꞌvi i nuu ndo ñani yo, ya ná nduu ndo tá kuꞌva íyo yeꞌe, chi yeꞌe ta xa ndu̱u i tá kuꞌva íyo mií ndo köo kúu judío, ta ïkan ka ndo taꞌan ñaꞌa ya íkan ley nde judío. Chi yo kándixa Jesucristo ta xa ndi̱saña ndíka yo nuu ndiꞌi ya ñaa, ta saa kúni i ná koo ndo. Saa chi ndóꞌo̱ ta nda iin ya väꞌa köo ndi̱kan ndo xiꞌin i.

¹³ Xa xíni mií ndo tá kivi ndi̱xaꞌan i nuu ndo tá núnu̱ú ta ndee ni ndee ndóꞌo i kúꞌvi i, yakan ndi̱xaa i ñuu ndo ta saa kua ndi̱tuꞌun i xiꞌin ndo tuꞌun vaꞌa xaꞌa Tata yo Jesucristo, nuu kaku ndo.

¹⁴ Vani ndee ni ndee ndo̱ꞌo i ta si̱ndiꞌi ni i ini ndo xiꞌin kueꞌe ya ndo̱ꞌo i, ta köo ndi̱kuchitun ndo yeꞌe, ni köo ndi̱kundasi nuu ndo kuni ndo yeꞌe. Ndee ni ka va vaꞌa ndi̱kiꞌin ndo yeꞌe, nda tá kuꞌva ndíkiꞌin ndo iin tatun Ndioxi án tá kuꞌva ndíkiꞌin ndo mií Jesucristo, saa ndi̱kiꞌin ndo yeꞌe.

¹⁵ Ta ndee ni va vaꞌa ku̱sini ndo xi̱ni ndo yeꞌe, ta ¿mií chí ki̱ndoo ya i̱kan ndo saa xiꞌin i? Chi tiempo ikán ta nda nduchi nuu va ndo ku̱ni ndo tava ndo taxi ndo ndaꞌi tá ya ndíkuvi kua.

¹⁶ Ta vitin, ¿án xaꞌa ya ndítuꞌun i ya ndaa xiꞌin ndo kua ndu̱u i tá káa iin ra káni taꞌan xiꞌin ndo, túvi ndo?

¹⁷ Chi naꞌa, na xáa nduxa xiꞌin ndo ya ndikundikun ndo ley ya ta̱a ra Moisés ta süvi na vaꞌa ku na, yakan ndee ni va ndúku na kuꞌva ya koo vaꞌa ni ini ndo xiꞌin na, sundi väꞌa ndíkani ini na xíni na ndóꞌo̱. Kúni na ná kuxika ndo nuu nde, ta ndisaa mií na ná kundikun ndo, ta köo kúni na kundikun ndo inka naꞌa.

¹⁸ Ya vaꞌa ni va kua ndíꞌi ni ini na xaꞌa ndo, tá tu ya vaꞌa ni kua ndíkani ini na xíni na ndóꞌo̱, ndikuu. Ta ndiꞌi saa ichí ná kundiꞌi ini na xaꞌa ndo, ta ná ïkan na saa xiꞌin ndo ndisaa tá íyo i xiꞌin ndo.

¹⁹ Ñani mani, nda tá íin seꞌe i saa íyo ndo nuu i, ta tuku va tíxuꞌvi ni i xaꞌa ndo. Nda tá kuꞌva ndóꞌo̱ iin ñaꞌa yá ndee ni xáꞌnda seꞌe, saa ndóꞌo̱ i xiꞌin ndo, nda ná xinu ndo koo ndo tá kuꞌva íyo mií Cristo.

²⁰ Tá ya kúvi vi kua ta ndikun xaa i nuu ndo ñaa, saa kuekuee ndituꞌun i xiꞌin ndo tá kuꞌva kúni mií i. Ta xaꞌa ya köo íyo yati i xiꞌin ndo ta ni köo xíni i ndá kuꞌva kaꞌan i xiꞌin ndo.

Ya sínaꞌa yoo xaꞌa ya ndo̱ꞌo yá Sara xiꞌin yá Agar

²¹ Sava ndóꞌo̱ ñani yo, ta kúni tuku va ndo ndiko koo ndo xaa súvi ndo ley ya ta̱a ra Moisés ta ¿án köo xíni ndo unkua káꞌan ya?

²² Chi tuꞌun Ndioxi, káꞌan ya xaꞌa ra Abraham, káchi ya saa: Ka̱ku uvi seꞌe taa ra, iin seꞌe ra ka̱ku xiꞌin ñaꞌa yá xáa chiñu nuu ra xiꞌin ya nduxa, ta inka seꞌe ra ka̱ku xiꞌin yá síꞌi ra, yá íyo ndíka.

²³ Ta seꞌe ra ka̱ku xiꞌin yá xáa chiñu nuu ra, ta ka̱ku ra tá kuꞌva káku mií yo ñuu ivi yóꞌó, sundi seꞌe ra, ra ka̱ku xiꞌin yá síꞌi ra, ta ka̱ku ra tá kuꞌva ki̱ndoo Ndioxi xiꞌin mií ra Abraham.

²⁴ Ta ya ndo̱ꞌo uvi saa ná ñaꞌa yóꞌó kua ndíkani xaꞌa uvi kuꞌva ya ki̱ndoo Ndioxi xiꞌin na ñuu ra: ya káꞌan xaꞌa yá Agar, yá xáa chiñu nuu ra Abraham kua ndínaꞌa iku ya Sinaí nuu ndi̱kiꞌin xii sikua yo ley Ndioxi ya ndi̱kiꞌin ra Moisés ndaꞌa Ndioxi. Tá ndi̱kiꞌin na ley ikán, saa ndu̱u na tá íin naꞌa, na xáa chiñu xiꞌin ya nduxa.

²⁵ Ta yá Agar ku yá ndínaꞌa iku ya Sinaí ndíkaa chí Arabia, ta iku ikán kua ndínaꞌa ñuu Jerusalén vitin ya íyo tá kuꞌva íyo naꞌa, na xáa chiñu xiꞌin ya nduxa.

²⁶ Sundi ñuu Jerusalén ya íyo nuu ndivi, ta yá Sara, yá íyo ndíka kua ndínaꞌa ya ikán, ta yá ikán ku siꞌí ndiꞌi yo.

²⁷ Saa káꞌan tuꞌun Ndioxi ya ta̱a na xaꞌa yá Sara xinaꞌa, káchi ya saa: Vaꞌa, ná kusini ni yóꞌo̱, yá núma, yá küvi koo seꞌe, yá täꞌan kaku seꞌe nda iin ichí. Ndee vaꞌa ndaꞌi kóꞌo un ya kúsini ni un xaꞌa ya köo xíni un ndá kuꞌva xáꞌnda seꞌe ná síꞌi tá kaku na. Chi yóꞌo̱, ta tá káa iin ñaꞌa yá ndi̱ndoo ndaꞌa i̱kan ií, saa káa un. Sundi yóꞌo̱ ku un ndee ni ka kuaꞌa koo seꞌe nuu ñaꞌa yá íyo ií.

²⁸ Ñani yo, kuꞌva saa kua ka̱ku ra Isaac seꞌe ra Abraham. Ta saa ndiꞌi yo kándixa Jesucristo tá íyo ra Isaac, saa íyo ndiꞌi yo, chi si̱xinu Ndioxi ya ki̱ndoo ra xiꞌin ra Abraham.

²⁹ Ta seꞌe ra Abraham, ra ka̱ku tá kuꞌva káku ndiꞌi yo ivi yóꞌó, ta xa̱á ra xáa nduvaꞌa ra xiꞌin inka ra loꞌo seꞌe ra ka̱ku tá kuꞌva kúni mií Tachi I̱í Ndioxi. Ta saa ndóꞌo yo vitin.

³⁰ Ta soꞌva káꞌan tuꞌun Ndioxi ya ta̱a na xinaꞌa, káchi ya saa: “Vaꞌa tava un yá xáa chiñu nuu un xiꞌin seꞌe yá, ta ná keta yá kuꞌun yá. Chi ndisaa seꞌe yá síꞌi un ku ra niꞌi ndiꞌi ñaꞌa ya kúu mií un. Ta seꞌe yá xáa chiñu nuu un, ta nda iin ñaꞌa nïꞌi ra”, káchi tuꞌun Ndioxi.

³¹ Ñani yo, vaꞌa ná kundaa ini ndo chi yo kándixa Jesucristo, ta köo kúu yo seꞌe yá Agar yá xáa chiñu nuu ra, seꞌe mií yá síꞌi ra yá Sara, yá íyo ndika va ku yo.