Gálatas 3 - Xochapa Mixteco

Xaꞌa ya ndáa ini yo xíni yo Jesucristo kua níꞌi yo ya vaꞌa nuu Ndioxi

¹ ¿Ndachu kíꞌvi ni íkan ndo, ñani yo, na ñuu Galacia? ¿Ta unku na sa̱ka ini ndo ya köo xíin ka ndo kandixa ndo ya ndaa si̱naꞌa nde ndóꞌo̱ xaꞌa Jesucristo? Chi tá si̱naꞌa i ndóꞌo̱ ta ndee ni va teꞌe si̱naꞌa i ndóꞌo̱ xaꞌa ya ndi̱xiꞌi ra nuu cruzin xaꞌa kuachi ndiꞌi yo.

² Ta vitin kúni i ndakan tuꞌun i ndóꞌo̱, ta vaꞌa ndikuiin ndo yuꞌu i xaꞌa ya kaꞌan i xiꞌin ndo: Tá ndi̱kiꞌin ndo Tachi I̱í Ndioxi ta ¿án xaꞌa ya xáa súvi ndo ley Ndioxi kua ndi̱kiꞌin ndo ya, túvi ndo? Süvi saa íyo ya, xaꞌa ya xi̱ni soꞌo ndo tuꞌun vaꞌa xaꞌa Jesucristo va kua ndi̱kiꞌin ndo Tachi I̱í ra.

³ Ta ya ikán kua nda̱sa xa̱á ndóꞌo̱ tá ndi̱kundikun ndo Jesucristo, sundi vitin ta kúni ndo sindoo ndaꞌa ndo Tachi I̱í Ndioxi. Saa kúni ndo ndikundikun ndo ley Ndioxi ya ta̱a ra Moisés. ¡Ndachu yáꞌa ni ini ndo saa!

⁴ Ta ¿án si̱ndikoo ndaꞌa va ndo Jesucristo, ta ndi̱kundikun tuku ndo ley Ndioxi ya ta̱a ra Moisés kua? Tá tu saa ra, köo ndáa yaꞌvi vi ya ti̱xuꞌvi ni ndo tá sikan ndi̱kundikun ndo Jesucristo. ¡Ta ya mani uun va kua ndo̱ꞌo ni ndo tá tu saa!

⁵ Ta ¿án xaꞌa ya xáa súvi ndo ley Ndioxi kua ta̱xi ra Tachi I̱í ra ndaꞌa ndo, túvi ndo? Saa tu ya íkan Ndioxi yatuꞌun xiꞌin va ndo ta ¿án xaꞌa ya xáa súvi ndo ley Ndioxi kua, túvi ndo? Süvi saa íyo ya. Xaꞌa ya xi̱ni soꞌo ndo tuꞌun vaꞌa xaꞌa Tata yo Jesucristo, ta ka̱ndixa ndo ya sikaku ra ndóꞌo̱. Xaꞌa ya ikán kua ta̱xi ra Tachi I̱í ra ndaꞌa ndo, saa tu ya íkan ra yatuꞌun xiꞌin va ndo.

Ndu̱u ra Abraham iin taa ra köo ka kuachi kúu mií nuu Ndioxi

⁶ Ta saa ra Abraham yáꞌa ni xi̱ndaa ini ra xi̱ni ra Ndioxi xaꞌa ya ikán kua ki̱ndaa Ndioxi kuachi ra, saa ndu̱u ra iin taa, ra köo ka kuachi kúu mií nuu Ndioxi.

⁷ Xaꞌa ya ikán kua xíniñuꞌu ndo kundaa ini ndo, xaꞌa naꞌa, na ndixa kúu seꞌe sikua ra Abraham, na ikán ku na ndee ni ndáa ini xíni Ndioxi.

⁸ Chi tuꞌun Ndioxi ya ta̱a na xinaꞌa, ta xa ndi̱kaꞌan ya xaꞌa, kivi ya vaxi, chi kivi ikán kua ndasa Ndioxi naꞌa, na köo kúu judío, nduu na naꞌa, na köo ka kuachi kúu mií nuu ra, káchi ya. Ta xaꞌa ya ikán kua ndi̱kaꞌan Ndioxi xiꞌin ra Abraham, káchi ra saa: “Xaꞌa yóꞌo̱ kua niꞌi, ndiꞌi ni kúu na ñuu ivi ya vaꞌa”, káchi Ndioxi xiꞌin ra Abraham tá ndi̱kaꞌan ra xiꞌin ra.

⁹ Ya yóꞌó kúni kachi ya, ndiꞌi yo ndáa ni ini xíni Ndioxi tá kuꞌva xi̱ndaa ini ra Abraham xi̱ni ñaꞌa ra, ta niꞌi yo ya vaꞌa xaꞌa ya kándixa ni yo kuꞌva ka̱ndixa ni ra ikán Ndioxi.

¹⁰ Ta ndiꞌi naꞌa, na ndíkani ini ya xíniñuꞌu ni na xaa súvi na ya káꞌan ley Ndioxi ya ta̱a ra Moisés, saa kua nduu na, na vaꞌa, na köo ka kuachi kúu mií nuu Ndioxi, káꞌán na, ta íyo chiꞌña sata na, chi saa káꞌan tuꞌun Ndioxi, káchi ya soꞌva: “Ndiꞌi naꞌa, na köo kúchiñu xaa súvi ndiꞌi ni kúu ya káꞌan ley Ndioxi ya ta̱a ra Moisés, ta na ndíso chiꞌña ku ndiꞌi na”, káchi tuꞌun ra.

¹¹ Xiꞌin tuꞌun yóꞌó kúndaa ini yo nda iin naꞌa küchiñu nduu na naꞌa, na köo ka kuachi kúu mií nuu Ndioxi xaꞌa ya xáa súvi na ley ya ta̱a ra Moisés. Tá kuꞌva káꞌan mií tuꞌun Ndioxi, káchi ya saa: “Naꞌa, na ndáa ni ini xíni Ndioxi, na ikán ku na ndúvaꞌa nuu ra, ta na ikán ku na kuchiñu kutaku xiꞌin ra”, káchi tuꞌun ra ya ta̱a na xinaꞌa.

¹² Sundi naꞌa, na ndáa ni ini xíni ya káꞌan ley ya ta̱a ra Moisés, ta köo ndáa ini na xíni na Ndioxi ya ndasa vaꞌa ra na, nduu na naꞌa, na köo ka kuachi kúu mií nuu ra. Chi saa káꞌan mií ley Ndioxi, káchi ya saa: “Naꞌa, na xáa súvi ndiꞌi ni kúu ley ya ta̱a ra Moisés ku na kuchiñu kutaku, tá tu xáa súvi ndiꞌi na ya káꞌan ya”, káchi ley ikán.

¹³ Chi Cristo ku ra cha̱ꞌvi xaꞌa yo nuu chiꞌña ya ta̱xi ley ya ta̱a Moisés ndaꞌa yo, chi köo ndi̱kuchiñu yo sixinu yo ya káꞌan ley ikán. Xaꞌa ya ikán kua cha̱ꞌvi Jesucristo xaꞌa yo chi ndi̱xaꞌa ndee ini ra si̱kuiso ra chiꞌña xiꞌin mií ra, saa ku̱chiñu ra ki̱ndaa ra chiꞌña sata yo. Chi saa káꞌan mií tuꞌun Ndioxi, káchi ya saa: “Ndiꞌi naꞌa, na tíkaa ikin kuñu nuu itun cruzin, ta na ndíso chiꞌña ku na”, káchi ya.

¹⁴ Xaꞌa ya i̱kan Cristo saa kua vaꞌa ndi̱niꞌi ndiꞌi ni kúu naꞌa, na köo kúu judío ya vaꞌa taꞌan ya ndi̱niꞌi ra Abraham nuu Ndioxi. Ta tixin Jesucristo kua níꞌi yo ya vaꞌa xaꞌa ya ndáa ni ini yo xíni yo ra, ta saa kua ndíkiꞌin yo Tachi I̱í Ndioxi ya ndi̱kaꞌan ra taxi ra ndaꞌa yo.

Ley Ndioxi ta köo síndiꞌi xaꞌa ya ya kindoo Ndioxi taxi ra ndaꞌa yo

¹⁵ Ñani yo, ná kaꞌan i xiꞌin ndo ndá kuꞌva íkan mií yo ivi yóꞌó tá kivi kíndoo yo sixinu yo ndá ka chiñu: Tá íyo iin naꞌa ndítuꞌun taꞌan na xaꞌa iin chiñu ikan na xiꞌin taꞌan na, ta saa síkuaꞌa na iin tutu nuu kíndoo na xiꞌin taꞌan na. Tá xa ndi̱kuaꞌa tutu ikán ta sindiꞌi ta nda iin ka naꞌa küvi kindaa ya ki̱ndoo na nuu ya, ta ni küvi tiso ka na ya kúni mií na nuu ya, ni küvi tu ndikuaa na ya káꞌan va ya.

¹⁶ Ta kuꞌva saa íyo ya ki̱ndoo Ndioxi xiꞌin ra Abraham xiꞌin iin ra kúu seꞌe ñani sikua ra, köo káꞌan ya xaꞌa kuaꞌa ni na seꞌe ñani sikua ra, iindaa va ra káꞌan ya xaꞌa, ta ra ikán ku Jesucristo, xaꞌa ra ikán káꞌan ya.

¹⁷ Ta ya káꞌan i xaꞌa xiꞌin ndo ta xa yachi ka vi ki̱ndoo Ndioxi xiꞌin ra Abraham, täꞌan ka vi xikoo ley ya ta̱a ra Moisés tá ndi̱kaꞌan Ndioxi saa xiꞌin ra. Nda sindiꞌi tá ndi̱yaꞌa kumi ciento oko uxi kuiya, saa vi kua ta̱xi Ndioxi ley ndaꞌa ra Moisés. Xaꞌa ya ikán kua köo ndi̱kuchiñu ley ikán ndinama ya tuꞌun ya xa ki̱ndoo Ndioxi xiꞌin ra Abraham.

¹⁸ Ya vaꞌa ta̱xi Ndioxi ndaꞌa yo, ta süvi xaꞌa ya xáa súvi yo ley ya ta̱a ra Moisés kua ta̱xi ra ya ndaꞌa yo, chi xaꞌa ya xa ki̱ndoo ra xiꞌin ra Abraham yachi vi kua i̱kan ra saa xiꞌin yo. Chi tá tu xaꞌa ya xáa súvi yo ley kua ndi̱niꞌi yo ya vaꞌa nuu ra, ta köo ndáa yaꞌvi ka ya xa ki̱ndoo ra taxi ra ndaꞌa yo, ndikuu. Chi nda iin ñaꞌa köo ndi̱kan ra Abraham xaꞌa ya ndi̱niꞌi ra ya vaꞌa ikán nuu Ndioxi, ya ndi̱niꞌi uun va ra kua.

¹⁹ Tá tu saa, ta ¿ndá xaꞌa kua ta̱xi Ndioxi ley ra ndaꞌa ra Moisés, túvi ndo? Ta̱xi Ndioxi ley ra ndaꞌa na ya ná kundaa ini na väꞌa íkan na nuu Ndioxi, chi köo ndi̱xaa súvi na ya kúni ra. Ta saa chi̱tuni ra koo saa kaꞌnda chiñu ley ra nuu na, nda kivi tá ná xinu kivi kixi Jesucristo, ra kúu seꞌe sikua ra Abraham, ra ndi̱kaꞌan Ndioxi xaꞌa nuu ndikiꞌin ra ya vaꞌa taxi Ndioxi ndaꞌa ra. Ta saa ta̱xi ra ley ra ndaꞌa na tatun ra, ta na ikán ta̱xi ya ndaꞌa ra Moisés ndi̱xikanuu ra nuu na Israel ta̱xi ra ya ndaꞌa na.

²⁰ Sundi tá kivi ki̱ndoo Ndioxi ya ndi̱kaꞌan ra xiꞌin ra Abraham, ta köo ndi̱xiniñuꞌu ra inka naꞌa ya kaka na nuu ra, tá kuꞌva ndi̱xiyo ra Moisés. Chi Ndioxi ta iin va ku ra, yakan iindaa mií va ra chi̱nduꞌu ya ki̱ndoo ra xiꞌin ra Abraham.

Ndá xaꞌa kua ndi̱kunduꞌu ley ya ta̱a ra Moisés

²¹ Ta ya ndítuꞌun i xaꞌa xiꞌin ndo, ta ¿án köo ndi̱xiyo yuꞌu ya xiꞌin ley ya ta̱a ra Moisés xaꞌa ya ki̱ndoo Ndioxi xiꞌin ra Abraham, túvi ndo? ¡Ta süvi saa íyo ya! Chi tá tu ya ndi̱kuchiñu ku ley ikán taxi ya kutaku yo ndiꞌi saa tiempo xiꞌin Ndioxi, xaꞌa ya xáa súvi ni yo ya, ta ndikuiso vaꞌa va ra yoo nduu yo naꞌa, na köo ka kuachi kúu mií nuu ra, ndikuu.

²² Chi tuꞌun Ndioxi ta káꞌan ya xaꞌa yo ya íin yo tá íin naꞌa, na núꞌni ndaꞌa kuachi na, saa íin ndiꞌi ni kúu yo ndaꞌa kuachi ya xáꞌnda chiñu nuu yo. Ta ndisaa naꞌa, na kándixa Jesucristo ku na kúchiñu ndíkiꞌin ya vaꞌa, ya ndi̱kaꞌan Ndioxi niꞌi yo nuu ra.

²³ Yachi tá täꞌan kixi Jesucristo, tá ndi̱xiyo yo ndaꞌa ley, ta tá íin na ñúꞌu veꞌe kàà saa ndi̱xiyo yo ndaꞌa ya, chi köo ndi̱kuvi saña yo nda kivi tá ka̱ndixa yo Jesucristo, saa kua ndi̱saña ndika yo ndaꞌa ley ikán.

²⁴ Ta ndee ni xi̱ndaa ya yoo, tá kuꞌva ndee ni vaꞌa ndáa iin taa na vali, kíꞌin ni ra kuenta xiꞌin na, kuꞌva saa xi̱ndaa ya yoo, nda kivi tá xa̱a Jesucristo, ta saa kua nda̱sa vaꞌa ra yoo ndu̱u yo tá íin naꞌa, na köo ka kuachi kúu mií nuu Ndioxi.

²⁵ Ta vitin xa̱a Jesucristo ra ndáa ni ini yo, ta köo xíniñuꞌu ka yo kundaa ni ley ikán mií yo, chi Jesucristo ku ra ndáa ni yoo vitin.

²⁶ Chi xaꞌa ya kándixa yo Jesucristo kua ndúu ndiꞌi yo seꞌe Ndioxi vitin.

²⁷ Tá kúu ndiꞌi yo chi̱chi xaꞌa ya kándixa yo Cristo ta iin ndu̱u yo xiꞌin ra, tá káa iin toto xa̱á saa káa ya táxi ra ndíxi yo, chínuu ra ya sata yo sísaꞌvi ya yoo.

²⁸ Iin nuu ndu̱u ndiꞌi yo xiꞌin Jesucristo, iin káchi ndáa yaꞌvi ndiꞌi yo, án yo judío ku yo, án süvi yo judío ku yo, án yo sa̱ta naꞌa xáa chiñu nuu na ku yo, án süvi yo ndi̱sata na ku yo, án taa ku yo án ná ñaꞌa ku ná, ta iin káchi ndáa yaꞌvi ndiꞌi yo nuu Ndioxi.

²⁹ Ta xaꞌa ya xa i̱in ndu̱u yo xiꞌin Cristo yakan kua vaꞌa kúu yo seꞌe ñani sikua ra Abraham, ta kúu mií yo ichí ndikiꞌin yo ñaꞌa, ya ki̱ndoo Ndioxi taxi ra ndaꞌa ra Abraham.