Gálatas 2 - Xochapa Mixteco

¹ Ndi̱yaꞌa uxi kumi kuiya saa ndi̱ko koo i ñuu Jerusalén, ndi̱xaꞌan i xiꞌin ra Bernabé, ñani yo, saa tu ra Tito va.

² Ndi̱xaꞌan i ñuu Jerusalén, saa chi saa íyo ya si̱naꞌa Ndioxi nuu i ya xíniñuꞌu i kuꞌun i. Saa ndi̱kitaꞌan i xiꞌin ndisaa mií nda ñani yo, nda ínuu tuꞌun ndíso chiñu xiꞌin veꞌe ñuꞌu ñuu Jerusalén. Ta ndi̱tuꞌun i xiꞌin nda xaꞌa tuꞌun vaꞌa ya ndíkani i xaꞌa Tata yo Jesucristo nuu naꞌa, na köo kúu judío. Ndi̱tuꞌun teꞌe i xiꞌin nda ya ná kundaa ini nda ya köo ndi̱nama i tuꞌun ya ndítuꞌun i xiꞌin naꞌa xaꞌa Jesucristo, chi köo kúni i xaa chiñu uun i, tá tu köo íyo yuꞌu nda xiꞌin i xaꞌa chiñu íkan i.

³ Ta vaꞌa va chi ndi̱xiyo va yuꞌu nda xiꞌin i kuꞌva ndítuꞌun i xiꞌin naꞌa, na köo kúu judío, ya köo xíniñuꞌu na xaa súvi na ya ndikunuu tuni Ndioxi mií na. Ni ra Tito, ñani yo, ta süvi ra judío ku ra, chi ra griego ku ra, ta köo ndixaa nduxa nda xiꞌin ra ya ndikunuu tuni Ndioxi ra.

⁴ Ndi̱kitaꞌan nde ndi̱tuꞌun nde xiꞌin taꞌan nde, chi sava nda káꞌan kúu nda ñani yo, ta nda vata va ku nda. Tá kua ndi̱kiꞌvi nda veꞌe ñuꞌu ya xínani nda ya íkan yo, chi nda ikán ta köo kúni nda ya koo ndíka yo tá kuꞌva káꞌan Jesucristo, sundi kúni nda ná nduu tuku yo tá íin yo xáa súvi ley Ndioxi xiꞌin ya nduxa.

⁵ Ta ndeꞌe, ta nda loꞌo köo ndi̱kandixa nde ya ndi̱kaꞌan nda vata ikán, chi kúni nde ná koo tuꞌun vaꞌa xaꞌa Jesucristo, ya ndaa, nima ndo.

⁶ Ta nda ñani yo ndóo ñuu Jerusalén, nda kúnaꞌnu, ndíso chiñu xiꞌin na veꞌe ñuꞌu, ta nda iin ya köo ndi̱kaꞌan nda xiꞌin i ya nama i kuꞌva sínaꞌa i naꞌa. Ta saa ni yeꞌe ta köo xíka ini i xaꞌa ya káꞌan nda, ni nda naꞌnu ni va ku nda. Saa chi nuu Ndioxi ta iin káchi íin ndiꞌi va yo ivi yóꞌó nuu ra.

⁷ Ta ku̱ndaa ini nda chiñu ñani yo ikán xaꞌa i ya ta̱xi Ndioxi chiñu ndaꞌa i kaꞌan ndoso i tuꞌun vaꞌa xaꞌa Tata yo Jesucristo nuu naꞌa, na köo kúu judío. Ta ra Pedro ku ra ndi̱niꞌi chiñu ya xaa chiñu ra nuu na kúu judío.

⁸ Ta suvi mií Ndioxi ku ra ta̱xi chiñu ndaꞌa ra Pedro ya xaa chiñu ra xaꞌa ya kúu ra apóstol nuu na judío. Ta saa i̱kan tu ra xiꞌin yeꞌe va, ta̱xi ra chiñu ndaꞌa i xaa chiñu i xiꞌin ndisaa na köo kúu judío.

⁹ Ta nda ñani yo ra Jacobo xiꞌin ra Pedro tin ra Juan, nda ikán ku nda ndíso chiñu xiꞌin na veꞌe ñuꞌu ñuu Jerusalén. Saa ndi̱kuni nda ikán yeꞌe ya ta̱xi Ndioxi chiñu ndaꞌa i xáa chiñu i nuu ra, ñaa ti̱in nda ndaꞌa i xiꞌin ra Bernabé ñani yo, ya ná kuꞌun ndeꞌe xaa chiñu nde xiꞌin na köo kúu judío ta mií nda ku nda xaa chiñu xiꞌin na judío.

¹⁰ Ta iindaa ñaꞌa ya ndu̱ku nda nuu nde kua: ya ná ndïndoso ini nde xaꞌa naꞌa, na ndaꞌvi, káchi nda xiꞌin i. Ta chiñu ikán kua ndee ni ndíꞌi ini nde xáa súvi nde vitin.

Ndi̱ndaꞌi ra Pablo xiꞌin ra Pedro

¹¹ Tá ndi̱xaꞌan ra Pedro ñuu Antioquía xi̱to ra na veꞌe ñuꞌu ikán, ta ndi̱ndaꞌi va yeꞌe xiꞌin ra, chi väꞌa ndíkan ra.

¹² Soꞌva i̱kan ra: tá yachi tá sikán ndi̱xaa ra ñuu Antioquía ta vaꞌa ni xíxi ra xiꞌin naꞌa, na köo kúu judío, saa vaꞌa ni ítaꞌan ra xiꞌin na. Sundi si̱ndiꞌi tá ndi̱xaa sava nda judío, nda ti̱ꞌvi ra Jacobo ndi̱xaa nda, ta ndi̱ndiꞌvi ra Pedro nuu nda ikán, saa xa̱á ra kúxika ra nuu na köo kúu judío, chi nda ndi̱xaa ikán ta kándixa ni va nda ley Ndioxi ya ta̱a ra Moisés.

¹³ Tá i̱kan ra Pedro saa i̱kan tu inka va nda judío, ndi̱xiyo uvi yuꞌu nda nuu na, ta nda ra Bernabé ndi̱xinu ini i̱kan tá kuꞌva i̱kan mií ra Pedro.

¹⁴ Tá xi̱ni i ya i̱kan nda saa, köo ndi̱kan nda tá kuꞌva káꞌan tuꞌun vaꞌa xaꞌa Tata yo Jesucristo, saa ndi̱kaꞌan i xiꞌin ra Pedro, nuu ndiꞌi nda ndi̱kaꞌan i xiꞌin ra, káchi i saa: “Yóꞌo̱, Pedro, ta ra judío ku un, ta íkan un tá kuꞌva íkan na köo kúu judío, köo íyo un tá kuꞌva íyo na judío taꞌan yo. Xaꞌa ya íkan un saa ta tá káa ra xáa nduxa xiꞌin na ya xaa súvi na kuꞌva kándixa na judío taꞌan yo, saa íkan un, väꞌa íkan un ya íkan un saa”.

¹⁵ Chi yo kúu judío ta nda tá ka̱ku vi yo íyo yo saa, ta köo ndi̱kaku yo tá kuꞌva káku naꞌa, na ndee ni ndee kuachi ndíso, soꞌva káꞌan yo xaꞌa naꞌa, na köo kúu judío.

¹⁶ Sundi xa xíni yo, nda iin naꞌa, küchiñu ndikitaꞌan vaꞌa xiꞌin Ndioxi xaꞌa ya xáa súvi ni na ley ra. Ndi̱saa xaꞌa ya ndáa ni ini yo xíni yo Jesucristo va kua ndíkuiso vaꞌa ra yoo. Xaꞌa ya ikán kua kándixa ni yo Jesucristo, ya ná kuchiñu yo nduu yo naꞌa, na vaꞌa, na köo ka kuachi kúu mií nuu ra. Ta süvi xaꞌa ya xáa súvi yo ley Ndioxi kua ndíkuiso mani ra yoo nuu ra, chi tá tu xaꞌa ya xáa súvi yo ley ra kua, ta nda iin yo küchiñu ndikundoo vaꞌa xiꞌin ra, ndikuu.

¹⁷ Saa tu yoo va, xaꞌa ya kúni yo ndikuiso vaꞌa Ndioxi yoo kua kándixa yo Jesucristo, ta ya ñaa kua kúni kachi ya, yo íyo kuachi ku tu mií va yo nuu Ndioxi. Ta xaꞌa ya ndíkuni yo ya íyo kuachi yo nuu ra, ta köo kúni kachi ya mií Jesucristo ku ra tíꞌvi yoo ya ikan yo ya väꞌa. ¡Chi süvi saa íyo ya!

¹⁸ Chi tá ná ndiko koo tuku i sinaꞌa i taꞌan ya xa si̱ndoo ndaꞌa i, ya si̱naꞌa i yachi ta väꞌa mií vi káa ya, kini ni va káa ya tá ná ikan i saa.

¹⁹ Saa chi yeꞌe, ta tá káa ra xa ndi̱xiꞌi va saa káa i nuu ley ya ta̱a ra Moisés. Suvi mií ley ikán kua xa̱ꞌni yeꞌe tá kivi ndi̱xiꞌi i nuu ya, ta saa kua ndi̱taku i ya xaa súvi i ya kúni mií Ndioxi.

²⁰ Ta yeꞌe, nda tá káa ra ínuu nuu cruzin xiꞌin Tata yo Jesucristo saa káa i, ta köo táku ka i xaꞌa mií i, chi ndisaa xaꞌa mií ra kua táku i. Kivi táku i ini ikin kuñu i ya kúu mií i, ta ndisaa xaꞌa ya ndáa ni ini i xíni i Tata yo Jesucristo ra kúu Seꞌe Ndioxi kua táku i, chi mií ra ku ra kúꞌvi ni ini xíni yeꞌe, saa ta̱xi ra mií ra ndi̱xiꞌi ra xaꞌa i.

²¹ Xaꞌa ya ikán kua küvi kundasi nuu i ya vaꞌa ndi̱niꞌi uun i nuu Ndioxi, ya kúꞌvi ni ini ra xíni ra yeꞌe. Chi tá tu ya ndi̱kuchiñu ku ley ndasa vaꞌa ya naꞌa, nduu na tá íin naꞌa, na köo ka kuachi kúu mií nuu Ndioxi, ta ni köo ndáa yaꞌvi vi ya ndi̱xiꞌi Tata yo Jesucristo, ndíkuu.