Gálatas 1 - Xochapa Mixteco

Káꞌan ndioxi ra Pablo xiꞌin na kándixa Jesús ndóo estado Galacia

¹ Yeꞌe, Pablo, ra xíka chiñu nuu Tata yo Jesucristo ku i táa tutu yóꞌó, xaa ya nuu ndo. Ta süvi na ñuu ivi yóꞌó ku na ndi̱taxi chiñu ndaꞌa i kúu i apóstol, chi mií Tata yo Jesucristo xiꞌin mií Iva yo Ndioxi, ra si̱taku Tata yo Jesucristo ku ra ta̱xi chiñu ndaꞌa i xáa chiñu i nuu ra.

² Ta ndiꞌi na ñani yo ndóo nuu íyo i yóꞌó, tíꞌvi ni na tuꞌun mani xaa nuu ndiꞌi ndóꞌo̱, na taꞌan yo, na veꞌe ñuꞌu ndóo ndiꞌi estado Galacia.

³ Ta mií Iva yo Ndioxi xiꞌin Tata yo Jesucristo ná ikan ni ya vaꞌa xiꞌin ndo, ná taxi ni ra ya vaꞌa koo ya ini ndo ta saa ná koo vaꞌa ni ini ndo.

⁴ Chi Tata yo Jesucristo ta ndi̱taxi ra mií ra ndi̱xiꞌi ra xaꞌa kuachi yo, xaꞌa ya saa chi̱tuni mií Iva yo Ndioxi, ya kuchiñu yo kaku yo nuu ya väꞌa, ya xáꞌnda chiñu ñuu ivi yóꞌó, nuu ndóo yo tiempo vitin.

⁵ Ta saa ná kunuu vaꞌa ni tuꞌun Ndioxi, ná kunuu sukun ni ya toꞌo ra ndiꞌi saa kúu ichí. Saa ná koo.

Ndáꞌi ra Pablo xiꞌin na chi kama ni ku̱xika na nuu tuꞌun vaꞌa xaꞌa Jesucristo

⁶ Ndee ni va ndíkanda ini i xíni i ndóꞌo̱, ñani yo, chi kama ni va ku̱xika ndo nuu Ndioxi. Xaꞌa ya vaꞌa ni ra xiꞌin ndo kúꞌvi ni ini ra xíni ra ndóꞌo̱ ya sikaku ra ndóꞌo̱ nuu ndee ya väꞌa. Ta vitin xa si̱ndikoo ndo tuꞌun vaꞌa xaꞌa Jesucristo, saa ndi̱kundikun ndo inka nuu tuꞌun ya ndíkani ini ndo ku tuꞌun vaꞌa sikaku ndóꞌo̱, ta süvi taꞌan ya ndi̱kaꞌan nde xiꞌin ndo kua, chi xa síin kua ikán.

⁷ Ta ya ndixa kua káꞌan i xiꞌin ndo, köo ka inka tuꞌun vaꞌa xaꞌa Jesucristo, ya ndaa ni xaꞌa ra kua xa ndi̱tuꞌun i xiꞌin ndo. Chi íyo sava nda taa kúni saka xi̱ní ndo ya ná ndisaka ini ndo xaꞌa tuꞌun ra ya xa xi̱ni soꞌo ndo.

⁸ Ta xaꞌa ya ñaa kua káꞌan i xiꞌin ndo, kuenta ni koo ndo. Ni ndeꞌe ku nde, án ndá ka naꞌa ku na, án iin tatun Ndioxi ke̱e nuu ndivi ku na ndítuꞌun inka nuu tuꞌun vaꞌa xaꞌa Jesucristo xiꞌin ndo, ta ¡vaꞌa ná kuiso na ñaa chiꞌña, xaꞌa ya íkan na saa!

⁹ Xa saa ndi̱kaꞌan i xiꞌin ndo yachi, ta saa káꞌan tuku i xiꞌin ndo vitin: tá ndá naꞌa sínaꞌa ndóꞌo̱ tuꞌun vaꞌa xaꞌa Jesucristo, ta süvi taꞌan ya ndi̱tuꞌun nde xiꞌin ndo kua, síin nuu kua sínaꞌa na ndóꞌo̱, ta ¡vaꞌa ná tavi chiꞌña Ndioxi na ñaa!

¹⁰ Xaꞌa ya ndi̱tuꞌun i xiꞌin ndo, ta ¿án ndíkani ini ndo ya kúni i ná kaꞌan vaꞌa naꞌa xaꞌa i kua, túvi ndo? ¿án ya kaꞌan vaꞌa Ndioxi xaꞌa i kua túvi ndo? Chi tá tu kúni i kindoo vaꞌa i nuu naꞌa, ta süvi ra xáa chiñu nuu Jesucristo vi kuu i, ndikuu.

Ndioxi ku ra ta̱xi ichí ndaꞌa ra Pablo xaꞌa chiñu kúu mií ra

¹¹ Ñani yo, kúni i ná kundaa ini ndo xaꞌa tuꞌun vaꞌa ya ndi̱kaꞌan ndoso i xiꞌin ndo xaꞌa Jesucristo, ta süvi tuꞌun ya ka̱ku xi̱ní na ñuu ivi yóꞌó ku ya.

¹² Chi süvi na ivi yóꞌó ku na ndi̱taxi ya ndaꞌa i, ta ni süvi na ivi yóꞌó ku na ndi̱sinaꞌa ya yeꞌe. Mií Tata yo Jesucristo ku ra ta̱xi ya ndaꞌa i tá ndi̱tuvi ra nuu i.

¹³ Ta xa kúndaa ini mií ndo xaꞌa i ndá kuꞌva ndi̱xiyo i yachi, xa̱a súvi ni i costumbre mií nde judío. Xa xi̱ni soꞌo ndo xaꞌa i ya ndee ni xi̱ndikun i na veꞌe ñuꞌu xaꞌa ya kándixa na Jesucristo, ta ndee ni ku̱ni i sindiꞌi xaꞌa i na.

¹⁴ Ta yeꞌe ku iin ra ndee ni vaꞌa ku̱chiñu nuu nda kuâán taꞌan i tiempo ikán. Ndee ni ndee ndi̱xiyo i nuu nda, xi̱nuu i nuu ndiꞌi nda ikán xaꞌa ya ndee ni vaꞌa si̱xinu ndiꞌi i chiñu ya xa̱ꞌnda chiñu xii sikua nde na judío xinaꞌa.

¹⁵ Sundi täꞌan ka vi kaku i, ñúꞌu ka va i tixin siꞌí i tá ndi̱kaxin Ndioxi yeꞌe, ta xaꞌa ya si̱niꞌi uun ra nuu i kúꞌvi ni ini ra xíni ra yeꞌe i̱kan ra ya mani xiꞌin i, ka̱na ra yeꞌe ya xaa chiñu i nuu ra.

¹⁶ Xaꞌa ya ikán kua tá ndi̱xinu kivi ya chi̱tuni mií Ndioxi, ta saa kua si̱tuvi ra Seꞌe ra Jesucristo nuu i, ya ta̱xi ra chiñu ndaꞌa i kuꞌun i kaꞌan ndoso i tuꞌun vaꞌa xaꞌa Jesucristo xiꞌin naꞌa, na köo kúu judío. Tá kivi ku̱u saa, ta köo ndi̱xaꞌan i ndakan tuꞌun i nda iin naꞌa, na xíni ni ya sinaꞌa na yeꞌe.

¹⁷ Ni ñuu Jerusalen köo ndi̱xaꞌan i ya nduku i nda taꞌan yo, nda xa kúu apóstol tiempo ikán. Ta ya i̱kan i kua, kama ni ke̱e i ndi̱xaꞌan i ndi̱xiyo i chí ñuu Arabia, ta sindiꞌi saa ndi̱ko koo i chí ñuu Damasco.

¹⁸ Ndi̱yaꞌa uni kuiya, saa ke̱e i ndi̱xaꞌan i ñuu Jerusalén ya kuni taꞌan i xiꞌin ra Pedro, saa ndi̱ndoo i ndi̱xiyo i xiꞌin ra xaꞌun kivi.

¹⁹ Ta nda iin nda apóstol täꞌan kuni taꞌan i xiꞌin tiempo ikán, ndisaa ra Jacobo, ñani Tata yo Jesucristo ku ra xi̱ni taꞌan i xiꞌin.

²⁰ Ta mií Iva yo Ndioxi xíni xaꞌa ya káꞌan i xiꞌin ndo, ya ndaa ni kua káꞌan i xiꞌin ndo.

²¹ Ta sindiꞌi ikán, saa ke̱e i ndi̱xaa i chí estado Siria xiꞌin estado Cilicia.

²² Ta tiempo ikán ta nda iin na ñani yo, na veꞌe ñuꞌu ndóo ñuu Judea, täꞌan kuni taꞌan nda iin na xiꞌin i.

²³ Takua xi̱ni soꞌo na tuꞌun xaꞌa i ya ndítuꞌun inka naꞌa xiꞌin na, káchi na saa: “Taa, ra ndee ni xi̱ndikun yoo veꞌe ñuꞌu ndi̱xiyo ra, saa xa̱a ndikuu ni ra xiꞌin yo, ta vitin xíka ra káꞌan ndoso ra xaꞌa tuꞌun vaꞌa ikán, ya ku̱ni ni ra sindiꞌi ra xaꞌa”, káchi na xaꞌa i.

²⁴ Ta saa xa̱a kaꞌnu ni na Ndioxi xaꞌa ya i̱kan ra xiꞌin i.