Filipenses 4 - Xochapa Mixteco

¹ Xaꞌa ya ñaa kua káꞌan ni i xiꞌin ndo ñani yo xiꞌin kuꞌva yo, tuun ni kundikun ndo Tata yo Jesucristo. Xa xíni mií ndo ndee ni kúꞌvi ini i xíni i ndóꞌo̱, ta kúni ni i kuni i ndóꞌo̱. Chi ndóꞌo̱ ku ndo xáa sií ni ini i, ta vaꞌa ni kée i xiꞌin ndo, kúsini ni i xiꞌin ndo, tá káa ñaꞌa ya níꞌi iin ra xínu, saa íyo ndo nuu i, ndáa yaꞌvi ni ndo.

Káꞌan ra Pablo xiꞌin na ya ná kutaꞌan vaꞌa na xiꞌin taꞌan na ta ná kündiꞌi ini na

² Ta vitin xíkan ni i ya mani nuu ná kuꞌva yo, yá Evodia xiꞌin yá Síntique, ya ná ndikitaꞌan vaꞌa ná, saa chi ná ndíkun Tata yo Jesucristo ku uvi saa ná.

³ Ta yóꞌo̱, ñani yo, yóꞌo̱ vaꞌa ni xáa chiñu xiꞌin i ku un, ta xíkan ni i ya mani nuu un chindee taꞌan un xiꞌin ná kuꞌva yo ñaa ya ná ndikitaꞌan vaꞌa ná xiꞌin taꞌan ná. Saa chi ná ñaa ku ná chi̱ndee ni yeꞌe xiꞌin ra ñani yo ra Clemente tin inka ka na ya ndi̱xita ka tuꞌun vaꞌa xaꞌa Tata yo Jesucristo kuaꞌan ya. Chi na ñaa ta xa ndi̱kundoso kivi na nuu tutu Ndioxi, nuu ndíkundoso kivi na kutaku ikan Ndioxi.

⁴ Ndiꞌi saa kivi ná kusini ni ndo xaꞌa Tata yo Jesucristo. Saa káꞌan tuku i xiꞌin ndo: Kusini ni ndo.

⁵ Vívií koo ndo, tái koo ndo, saa kuni inka naꞌa ya vaꞌa ni íyo ndo. Chi xa kama ni ndiko koo Tata yo Jesucristo kixi ra.

⁶ Ta nda iin ya kündiꞌi ini ndo xaꞌa. Tá ndá ya kúmani nuu ndo ta kuaku ndaꞌvi ndo nuu Ndioxi. Nduku ndo ñaꞌa ya xíniñuꞌu ndo nuu ra, saa taxi ni ndo tixaꞌvi ndaꞌa ra xaꞌa ya chíndee ra ndóꞌo̱.

⁷ Ta saa taxi Ndioxi ya koo vaꞌa ini ndo, chi iindaa ya vaꞌa táxi Ndioxi kua ndee ni vaꞌa, ta nda iin yo küchiñu xinu kundaa ini xiꞌin ya, ta ya ikán kua kundaa nima ndo xiꞌin ya xínituni ndo, xaꞌa ya kúu ndo kuenta Tata yo Jesucristo.

Nina ya vaꞌa ndikani ini ndo xaꞌa

⁸ Ta vitin kúni i kaꞌan i xiꞌin ndo unkua xíniñuꞌu ndo ndikani ini ndo xaꞌa: Nina ya ndaa, nina ya íyo ya toꞌo xaꞌa, nina ya ndǎku, nina ya vaꞌa, nina ya luvi, nina ya ínuu vaꞌa tuꞌun xaꞌa ndikani ini ndo. Ta saa ndikani ni tu ini ndo xaꞌa ya ndee ni ndáa yaꞌvi xiꞌin ndiꞌi ya ndee ni xáa kaꞌnu Ndioxi.

⁹ Xaa súvi ndo ya xa si̱naꞌa i ndóꞌo̱, ya xa ta̱xi i ichí ndaꞌa ndo xaꞌa, ya xi̱ni soꞌo ndo ndi̱kaꞌan i xiꞌin ndo xiꞌin ya xi̱ni ndo i̱kan i. Ikan ndo ya yóꞌó ta koo Ndioxi xiꞌin ndo chi mií ra ku ra táxi ya koo vaꞌa ini ndo.

Táxi ra Pablo tixaꞌvi ndaꞌa na ñuu Filipos xaꞌa ya chi̱ndee na ra

¹⁰ Ta táxi ni i tixaꞌvi ndaꞌa Tata yo Jesucristo chi ndóꞌo̱ ta tuku xa̱á ndo ndíꞌi ni ini ndo xaꞌa i, ta vitin si̱naꞌa ndo mií ndo kuꞌva ndíꞌi ini ndo xaꞌa i ya chi̱tuvi ndo yeꞌe, chi̱ndee ndo yeꞌe xaꞌa ñaꞌa ya xíniñuꞌu i. Chi yachi ta köo ndi̱kuchiñu ndo chindee taꞌan ndo xiꞌin i tá kuꞌva chíndee ndo yeꞌe vitin.

¹¹ Xaꞌa ya káꞌan i saa xiꞌin ndo ta süvi xaꞌa ya kúmani ndá ka ñaꞌa nuu i kua, chi xa si̱kuaꞌa i ndá kuꞌva kusini i xiꞌin ya kúu mií i.

¹² Kúsini ni i ya íyo i tá kuꞌva íyo na ndaꞌvi án tá kuꞌva íyo na kuika. Ta kúsini ni i chi xa kúndaa ini i ndá kuꞌva ndikaa i nuu ndiꞌi ya yóꞌó: xíni i kaꞌun ini i, ta xíni i kuxi vaꞌa i ndakua xaa ini i, saa xíni i koo kuaꞌa ni ñaꞌa nuu i án nda loꞌo ñaꞌa köo nuu i.

¹³ Ta kúchiñu i xáꞌa ndee ini i xiꞌi ndiꞌi ni kúu va ya, chi Cristo ku ra táxi ndee ndaꞌa i yáꞌa i nuu iin iin ya.

¹⁴ Vani köo ndíꞌi ini i xaꞌa ñaꞌa ya xíniñuꞌu i, ta ndóꞌo̱, ta vaꞌa ni i̱kan ndo xiꞌin i, ti̱ꞌvi ndo ya xa̱a ya ndaꞌa i. Xiꞌin ya yóꞌó chi̱ndee ndo yeꞌe xaꞌa tindoꞌo ya ndóꞌo i vitin.

¹⁵ Ndóꞌo̱, na ñuu Filipos, ta xa xíni vaꞌa ndo chi tá ke̱ta i ñuu ndo mií estado Macedonia ñaa kuaꞌan i, tá sikan xa̱á i ndítuꞌun i tuꞌun vaꞌa xaꞌa Tata yo xiꞌin naꞌa, ta ndisaa ndóꞌo̱, na veꞌe ñuꞌu, ndóo ñaa ku ndo chi̱ndee taꞌan ni xiꞌin i.

¹⁶ Saa tu tá ndi̱xiyo i ñuu Tesalónica, ta suvi ndóꞌo̱ ku ndo chi̱ndee ni yeꞌe, chikaa ni ndo ndee xiꞌin i ta süvi iindaa ichí ndi̱kan ndo saa xiꞌin i.

¹⁷ Süvi ya káꞌan i ya yóꞌó xiꞌin ndo ta kúni i chindee ndo yeꞌe, chi yeꞌe ya kúni i kua ná niꞌi ni ka ndo ya vaꞌa nuu Ndioxi xaꞌa ya vaꞌa ni ini ndo, tái ni ndo.

¹⁸ Ndixaꞌvi ni ndo xaꞌa ya ti̱ꞌvi ndo ndaꞌa i chi̱ndee ni ndo yeꞌe chi vitin ta xa íyo ndiꞌi ya xíniñuꞌu i, köo ka ya kúmani nuu i, nda ndóo ndoso ka ya nuu i, saa chi xa ndi̱kiꞌin i ya ti̱ꞌvi ndo vaxi xiꞌin ra Epafrodito, ñani yo. Ta tá káa ya luvi xáꞌan sóko ndo nuu Ndioxi saa káa ya, ta Ndioxi kúsini ni ra xiꞌin ndo.

¹⁹ Ta mií Iva i Ndioxi ku ra taxi ndiꞌi ñaꞌa ndaꞌa ndo ya xíniñuꞌu nuu ndo. Chi kuaꞌa ni ya kuika íyo nuu ra nuu ndivi, ta mií ra ku ra taxi ndiꞌi ñaꞌa ya kúmani nuu ndo ndaꞌa ndo, xaꞌa ya i̱kan Tata yo Jesucristo xaꞌa ndo.

²⁰ ¡Ná xaa kaꞌnu ni yo Ndioxi, ta saa ná chinuu sukun ni yo ya toꞌo ra ndiꞌi saa kivi ya vaxi! Saa ná koo.

Káꞌan ndioxi ta Pablo xiꞌin na ndíkun Jesucristo ndóo ñuu Filipos

²¹ Káꞌan ndioxi ni i xiꞌin ndiꞌi ndóꞌo̱ ñani yo na i̱í, ndóꞌo̱ ndíkun Tata yo Jesucristo ndóo ñuu Filipos. Ta saa tu na taꞌan yo, na ndóo xiꞌin i yóꞌó, tíꞌvi ni na tuꞌun mani xaa nuu ndo.

²² Ta ndiꞌi na ñani yo, na ndóo ñuu Roma yóꞌó, tíꞌvi ni tu na yóꞌó va tuꞌun mani xaa nuu ndo. Ta saa tu na taꞌan yo, na xáa chiñu nuu ra rey César veꞌe chiñu kaꞌnu yóꞌó, tíꞌvi tu na yóꞌó va tuꞌun mani xaa nuu ndo.

²³ Ta mií Tata yo Jesucristo ná chikaa ni ya vaꞌa ndóꞌo̱. Saa ná koo.