Filipenses 3 - Xochapa Mixteco

Káꞌan ra Pablo ya ndee ni ka ndáa yaꞌvi Jesucristo

¹ Ñani yo xiꞌin kuꞌva yo, vitin káꞌan i xiꞌin ndo kusini ni ndo xiꞌin ya i̱kan Tata yo Jesucristo xaꞌa ndo. Chi yeꞌe, ta köo kúxuxan i taa tuku i ya xa ta̱a i xaa nuu ndo, chi ya yóꞌó kua chindee ni ndóꞌo̱.

² Ta kuenta ni koo ndo nuu naꞌa, na síndaꞌvi naꞌa. Täxi ndo sindaꞌvi na ndóꞌo̱, saa chi sava na xáa chiñu veꞌe ñuꞌu, ta sínaꞌa na nduxa taꞌnda ndo ndikunuu tuni Ndioxi ndóꞌo̱ nda taa, káchi na. Ta na íkan saa ta kütaꞌan ndo xiꞌin na chi tá íin tina saa íin na ñaa.

³ Ta na ndixa kúu mií tuni Ndioxi ku yoo na káñuꞌu ni Ndioxi xiꞌin ndiꞌi nima yo, chi kúu mií yo Tachi Ndioxi. Ta kúsini ni yo xiꞌin ya i̱kan Tata yo Jesucristo xaꞌa yo. Ta köo kándixa yo ya sikaku ra yoo xaꞌa kuꞌva íin yo án xaꞌa ndá ka ñaꞌa ya íkan yo.

⁴ Tá tu xaꞌa chiñu ya íkan yo kua kaku yo túvi sava na, ta xiꞌna yeꞌe ku ra kama ni kaꞌan ya xa ndi̱kaku i, saa chi kuaꞌa ni ka va ya vaꞌa i̱kan yeꞌe.

⁵ Chi tá ndi̱xinu una kivi ka̱ku i ta chi̱nuu na tuni Ndioxi yeꞌe, xaꞌa ya kúu i ra ñuu Israel. Ta seꞌe sikua ra Benjamín ku i, saa tu iva siꞌí i, na hebreo ku uvi saa na, yakan saa tu yeꞌe va, yeꞌe hebreo ku i. Ta xa̱a súvi ni i ley Ndioxi ya si̱ndoo ra Moisés chi ra fariseo ndi̱xiyo i.

⁶ Ta xaꞌa ya xa̱a súvi ni i ndiꞌi ichí ya si̱ndoo xii yo xinaꞌa ñuu i, yakan kua ndi̱xika i xa̱a nduvaꞌa ni i xiꞌin na ndíkun Jesucristo, chi süvi na vaꞌa ku na káꞌán i. Nda iin naꞌa ta köo ya ndi̱niꞌi na kaꞌan na xaꞌa i, chi ndaa ni ndi̱xiyo ini i, xaꞌa ya xa̱a súvi ni i ley Ndioxi.

⁷ Sundi vitin ta ndi̱nama ndiꞌi ya nuu i, saa chi ndiꞌi ñaꞌa ya ndee ni ndi̱xiyo nuu i tiempo ikán, ta köo ndáa yaꞌvi ka ya nuu i vitin, xaꞌa ya i̱kan Cristo xaꞌa i.

⁸ Ta ndiꞌi ya vaꞌa ni ndi̱xiyo nuu i yachi, ta nda loꞌo ka köo ndáa yaꞌvi ya nuu i vitin xaꞌa ya xi̱ni taꞌan i xiꞌin Tata yo Jesucristo, ra Chee ni nuu yo. Xaꞌa ra yóꞌó kua si̱ndoo ndaꞌa ndiꞌi i ñaꞌa ya ndee ni vaꞌa xi̱ndaa yaꞌvi nuu i tá yachi, ta ni köo xaꞌa ka ya nuu i vitin, tá íyo taka va saa íyo ya nuu i chi ya ndee ni vaꞌa ka kua nduu i kuenta Jesucristo.

⁹ Chi ndi̱kiꞌin vaꞌa Ndioxi yeꞌe, ta süvi xaꞌa ya xáa súvi i ley ra ya si̱ndoo ra Moisés kua ndi̱kiꞌin vaꞌa ra yeꞌe, xaꞌa ya ndáa ni ini i xíni i Jesucristo kua ndi̱kiꞌin vaꞌa ra yeꞌe, saa nda̱sa ra yeꞌe tá káa iin naꞌa, na köo ka kuachi kúu mií nuu Ndioxi.

¹⁰ Saa chi ya kúni ni i kua yóꞌó: Kúni ni i kuni taꞌan vaꞌa ka i xiꞌin Cristo, saa kúni i koo ndee Ndioxi ya si̱taku Jesús xiꞌin i, ta xa íyo ndúvi i ndoꞌo i tá kuꞌva ndi̱xiyo ndúvi mií ra ndi̱xiꞌi ra.

¹¹ Saa tá ná tindaa kivi ya kuvi i ta ndátun i sitaku Ndioxi yeꞌe xiꞌin naꞌa, na xa ndi̱xiꞌi.

¹² Ta ya káꞌan i soꞌva, ta köo kúni i kaꞌan i ya xa i̱kan ndiꞌi i ya yóꞌó, ta ni täꞌan xinu koo i nduu i ra vaꞌa ni. Sundi ya íkan i kua yóꞌó, ndíkundee ni i kuaꞌan ka i chí nuu iin iin kivi ya kuchiñu xinu koo i nduu i tá kuꞌva káa mií Jesucristo, chi xaꞌa ya ikán kua ka̱na ra yeꞌe ya kundikun i ra.

¹³ Ñani yo xiꞌin kuꞌva yo, köo kúni i kaꞌan i xiꞌin ndo xa ku̱chiñu i ndi̱xinu i káa i tá káa mií ra, ya íkan i kua yóꞌó: Köo xíka ka ini i xaꞌa ya xa ndi̱yaꞌa, ndíndoso ini i xaꞌa ya, ta chíkaa ni i ndee ya xinu i ndikiꞌin i ya taxi ra ndaꞌa i.

¹⁴ Saa íkan i kuaꞌan i ya kuchiñu i ndikiꞌin i ñaꞌa ya ndi̱kaꞌan Ndioxi taxi ra ndaꞌa i tá kivi ka̱na ra yeꞌe tixin Tata yo Jesucristo.

¹⁵ Ta kuꞌva saa ná ndikani ini ndiꞌi yo xa xa̱ꞌnu tuꞌun Ndioxi nima. Tá ndá tu ndóꞌo̱ köo ndíkani ini kuꞌva saa, ta xa síin ndíkani ini ndo, ta mií Ndioxi ku ra sinaꞌa ndóꞌo̱ ndá kuꞌva ndikani ini ndo.

¹⁶ Sundi ya xa ku̱ndaa ini yo xaꞌa yóꞌó kua xíniñuꞌu ni yo xaa súvi yo vitin taan, ta saa ná ikan yo xiꞌin taꞌan yo.

¹⁷ Ñani yo xiꞌin kuꞌva yo, ikan ndo tá kuꞌva íkan yeꞌe án tá kuꞌva íkan na taꞌan yo na xáa súvi ya xa si̱naꞌa nde na.

¹⁸ Chi xa kuaꞌa ni ichí ndi̱kaꞌan i xiꞌin ndo, ta vitin káꞌan tuku i xiꞌin ndo, nda xáku i káꞌan i xiꞌin ndo xaꞌa sava naꞌa, na sáa ini xíni tuꞌun vaꞌa xaꞌa Tata yo Jesucristo, ra ndi̱xiꞌi nuu cruzin.

¹⁹ Chi kuaꞌan na ichí nuu síndiꞌi xaꞌa na mií va na. Ndisaa ya kútoo ni mií ikin kuñu na kua ndúku na xaa súvi na, ta ya ikán kua ndu̱u ndioxi nuu na. Ya kukaꞌan nuu na xiꞌin vi kua íkan na, ta köo íkan na saa, ya kútai ini na xiꞌin ka va kua. Ndisaa ñaꞌa íyo ñuu ivi yóꞌó ndíkani ini na xaꞌa.

²⁰ Sundi yoo, ta nuu ndivi ku ñuu yo, chi ikán koo yo xiꞌin Ndioxi. Ta ndátun yo ndiko koo Tata yo Jesucristo kixi ra sikaku ra yoo.

²¹ Ta ndinama ra ikin kuñu yo ya vita ni kúu mií yo, saa nduu ya tá káa ikin kuñu mií ra, ya luvi ni. Ta xiꞌin ndee kúu mií ra ya xáꞌnda chiñu ra nuu ndiꞌi ñaꞌa kua ndisama ra yoo.